1 Samwil 17 - The Holy Bible In Alur (Lur) Revised Orthography

Daudi Nego Goliath

¹ Nie Jufilisti gicoko njuru asikari migi karacelo ba lwiny; man gicokri karacelo i Soko, ma en e piny pa Yuda, man gigonjo kind Soko kud Azeka, i Efes-damim.

² Man Saul ku dhanu mir Israel gicokri karacelo, man gigonjo i poga mir Ela, man githero lwiny kum Jufilisti.

³ Man Jufilisti gicungo wi got yo kurucel, man Israel ucungo wi got yo kurucel: man poga ni i kindgi.

⁴ Man jarukara acel uai kud i ka ma Jufilisti gonjo i ie, ma nyinge Goliath, ma Gath, ma kadongone bot abusiel ku katumbla.

⁵ Man ebedo ku kujanjra mi mola i wie, man eronyo kendi mir ali; man pek mi kendine en e cekel mi mola rubanga abic.

⁶ Man ebedo kud ungoli mi mola kor tiende, man asi mi mola i kind goke.

⁷ Man ruvangu pare en e calu yen pa jacwibongu; man lak tong’ pare pekne en e cekel mi nyunyu dak abusiel: man jayeiban pare cidho i wang’e.

⁸ Man ecungo elwong’o ba njuru asikari mir Israel, man ewacu igi kumae, Wuloro piny nithero lwiny mu nedi? an a Jafilisti ngo, man wun wu jutic pa Saul ungo? wugoi wi ng’atu acel iwu, man wuwek elor piny i bang’a.

⁹ Tek ecopo kiedo kuda, manenega, wabidong’ bedo jutic mu; ento tek avoye, man anege, e wubidong’ bedo jutic mwa, man wubitimo iwa.

¹⁰ Man Jafilisti wacu kumae, Ahero njuru asikari mir Israel i ceng’ maeni; wuwodh ng’atu acel, kara wakied wakude.

¹¹ Man kinde ma Saul kud Israel ceke giwinjo lembe maeno pa Jafilisti, ewinygi ng’abre, man lworo negogi dit.

¹² Nwang’u Daudi en c wod Jaefrathi maeno ma Beth-lehem-yuda, ma nyinge Yese; man wote abora: man ng’atuno ti i nindo pa Saul, ma rundi pare doko dupa i kind dhanu.

¹³ Man wot Yese adek ma dongo gicidho tok Saul i lwiny: man nying’ wote adek ma gicidho i lwiny ma kayu Eliab, m’ulubo ng’eye ke Abinadab, man mir adege ke Cama.

¹⁴ E Daudi en e cogo; man gin adek ma dongo gilubo tok Saul.

¹⁵ Nwang’u Daudine ebedeai ku ba Saul kara ecidh ekwai rombe pa won i Beth-lehem.

¹⁶ E Jafilistine ebedecoro ceng’ni kugweno man uthieno, man ewodhre ceng’ pier ang’wen.

¹⁷ Man Yese wacu ni Daudi ma wode kumae, Gam cam katoko acel maeni, m’acela, ku lungu kwen maeni apar ni utumeru, man itergi pio ba utumerugi i kagonjo;

¹⁸ man iter jamcak apar maeni ba jego mi rubanga migi, man inen maram utumeru bedo ko, man igam lembe m’i bang’gi.

¹⁹ Nwang’u Saul, ku gin, ku dhanu mir Israel ceke gini i poga mi Ela, gibekiedo ku Jufilisti.

²⁰ E Daudi ai pir kugweno, man eweko rombe dong’ ku jakwac, man eting’o, ecidho de, calu Yese ng’olo ire; man etundo i ka ma magali ni ie, kinde ma udul asikari m’ubecidho nikiedo uwoi mir ali.

²¹ Man Israel ku Jufilisti githero lwiny, njuru asikari dhu njuru asikari.

²² Man Daudi weko jamni pare i cing’ jagwok jamni, man eringo ba njuru asikarine, e ebino emotho utumin mire.

²³ Man kinde ma gibeweco gikugi, nen, jarukara wodhre, ku kind udul Jufilisti, en e Jafilisti ma Gath, ma nyinge Goliath, man eyero calu ebedeyero: e Daudi winjogi.

²⁴ E dhanu mir Israel ceke, ka gineno ng’atuno, giringe, man lworo negogi dit.

²⁵ E dhanu mir Israel giwacu kumae, Wuneno ng’atu maeni m’uwodhre? ewodhre kara ecai Israel andha: man ebibedo, nia ng’atu m’unege, ubimo bilonye ku lonyo ma dit, man ebimio ire nyare, man ebiketho ot pa won ubed agonya i kind Israel.

²⁶ E Daudi yero ni dhanu m’ucungo i vute, ewacu kumae, Jubitimo ang’o ni ng’atu m’unego Jafilisti maeni, man ekabu cac woko ku wi Israeli? kum Jafilisti maeni ma jutimo yaa ngo i kume en e ng’a, ma nia ecayu njuru asikari pa Mungu ma kwo e?

²⁷ E dhanu giloko lembe ire calu maeni, giwacu kumae, Jubitimo kumeni ni ng’atu m’unege.

²⁸ Man Eliab m’umin ma kayu winjo kinde m’eyero ni dhanune; man ng’ecwiny pa Eliab uopo kum Daudi, ewacu de kumae, Nedi iloro pinyi? man iweko rombe maeca ma nok i langa ku ng’a? Ang’eyo kuhaya peri, ku ndre mir adundeni; kum iloro piny kara inen lwiny.

²⁹ Man Daudi wacu kumae, Atimo ang’o kawono? There mbe?

³⁰ Man eai woko kud i bang’e man elokre yo ba ng’atu mange, man eweco ceke acel: man dhanu giloko ire lembe kendo calu ma kwong’a.

³¹ Man ka juwinjo lembe maeni ma Daudi yero, juyerogi i wang’ Saul; man eoro julwong’e.

³² Man Daudi wacu ni Saul kumae, Kud iyi adunde ng’atu moko miel kum ng’atuno; jatic peri bicidho bikiedo ku Jafilisti maeni.

³³ E Saul uwacu ni Daudi kumae, Icopo cidho ba Jafilisti maeni ngo ma nia wukied kude; kum fodi in aradu, man en e dhanu mir ali ugambre i aradu pare.

³⁴ E Daudi wacu ni Saul kumae, Jatic peri bekwayu rombe pa won; man kan umvor, kadi undiek ubino, man emaku nyathi rombo ku kind udul rombe,

³⁵ alubo toke, e agoye, man abodhe kud i dhoge; e kan ejai ira, amake ku tike, man agoye, anege de.

³⁶ Jatic peri goyo umvor kud undiek de: man Jafilisti maeni ma jutimo yaa ngo i kume ebibedo calu kindgi acel, kum ecayu njuru asikari pa Mungu ma kwo.

³⁷ Man Daudi wacu kumae, Yehova m’ubodha kud i cing umvor, man kud i cing undiek, ebibodha kud i cing’ Jafilisti maeni. E Saul uwacu ni Daudi kumae, Cidhi, man Yehova bibedo kudi.

³⁸ Man Saul uronyo Daudi ku kendi pare, man elutho kujanjra mi mola i wie, eronye de kud asi mir umbu.

³⁹ Man Daudi twio palamularu pare wi kendi pare, man eponjo cidho; kum fodi eponje ngo. Daudi wacu ni Saul kumae, Acopo cidho ku maeni ngo; kum fodi aponjogi ngo. Man Daudi wodhogi woko kud i kume.

⁴⁰ Man eting’o musongolo pare i cinge, man ekwanyu kidi ma kume pele pele abic ire kud i kulo, man ekethogi i usau mi kwac ma ni i bang’e, en e upiru pare; man jungbe pare ni i cinge: e ecoro ceng’ni kum Jafilisti nino.

⁴¹ Man Jafilistine bino man ecoro ceng’ni Daudi; e ng’atu m’uyeyo ban utelo yo i wang’e.

⁴² E ka Jafilisti neno kun ku kun, man eneno Daudi, ecaye; kum fodi en e aradu, man e landu, en e ng’atu ma wang’e ber de.

⁴³ Man Jafilisti wacu ni Daudi kumae, An a gwoki, ma nia ibino i bang’a ku yen e? E Jafilistine lamu Daudi ku mungu pare.

⁴⁴ Man Jafilisti wacu ni Daudi kumae, Bin i bang’a, man abimio ring’kumi ni winyo ma kor polo, man ni yedi m’i thim.

⁴⁵ Daudi lund uwacu ni Jafilisti kumae, Ibino i bang’a ku palamularu, man ku tong’, man ku pindo: ento abino i beng’i ku nying’ Yehova mir udul, en e Mungu mi njuru asikari mir Israel, m’icayu.

⁴⁶ Yehova bimii i cinga tin; man abigoyi, man abithumo wii kud i kumi; man abimio avuj udul mi Jufilisti ni winyo ma kor polo tin, man ni yedi m’i thim m’i ng’om; kara ng’om ceke ging’ei nia Mungu nuti i kind Israel,

⁴⁷ man kara cokri maeni ceke ging’ei nia Yehova bodho ku palamularu man ku tong’ ungo: kum lwiny en e pa Yehova, man ebimiowu i cingwa.

⁴⁸ Man etimbre, kinde ma Jafilistine ai malu, man ebino ecoro ceng’ni kara eromb ku Daudi, nia Daudi timo pio, man eringo yo ba njuru asikari kara eromb ku Jafilistine.

⁴⁹ Man Daudi royo cinge i usau pare, man ewodho kidi kud i ie, e ecanye, man ecanyu Jafilisti i ternyime; e kidi mwony i ternyime, man epodho arieba wang’e i ng’om.

⁵⁰ Kum kumeno Daudi voyo Jafilistine ku jungbe man ku kidi, man egoyo Jafilistine, e enege; ento palamularu mbe i cing’ Daudi.

⁵¹ Daudi lund uringo, man ecungo wi Jafilistine, man eting’o palamularu pare, man ewodhe kud i ukorone, man enege, ethumo kudo wie de. E kinde ma Jufilisti gineno nia jarukara migi tho, e giringo.

⁵² E dhanu mir Israel ku pa Yuda de, giai malu, man giwoi, man gilubo tok Jufilisti, cil m’ibino ko ba Gai, man ba dhugang’ mir Ekron. Man Jufilisti ma jutong’o lero i kumgi gipodho piny dhu yo ma cidho Caraim, cu kum Gath, man kum Ekron.

⁵³ E nyithindho mir Israel gidwogo ku ba lubo tok Jufilisti, man giyaku ka ma gigonjo i ie.

⁵⁴ Man Daudi ting’o wi Jafilistine, man ekele Yerusalem; ento eketho jambali pare i hema pare.

⁵⁵ Man kinde ma Saul uneno Daudi cidho kum Jafilisti, ewacu ni Abner, ma jego mir udul dhanu kumae, Abner, aradu maeni en e wod ng’a? Man Abner uwacu kumae, Calu ng’eyong’ec peri bedo kwo, E ubimo, acopo yero ngo.

⁵⁶ Man ubimo wacu kumae, Penj nyiruno en e wod ng’a.

⁵⁷ Man ka Daudi dwogo ku ba nek pa Jafilisti, Abner ugame, man ekele i wang’ Saul ku wi Jafilistine i cinge.

⁵⁸ Man Saul uwacu ire kumae, In i wod ng’a, jalawobi? Man Daudi wacu kumae, An a wod jatic peri ma Yese ma Jabeth-lehemi.