1 Jukorinto 5 - The Holy Bible In Alur (Lur) Revised Orthography

Pokolembe wi Tarwang’

¹ Lembe yik andha nia tarwang’ ni i kindwu, ma en e tarwang’, ma kadok cil kind Thekdhanumange de embe, ya ng’atu acel m’i kindwu bedo ku ci won.

² E wutingru ating’a, man can unegowu ngo, kara ng’atu m’utimo tic maeni ukabre woko kud i kindwu.

³ Kum andha, an m’ambe ku kum ento anuti ku cwiny re, adaru poko lembe pa ng’atu m’utimo ginduni kumeno calu ma tek anuti,

⁴ i nying Rwoth mwa Yesu, wun ma wucokru karacelo, ku cwiny a de, ku tego pa Rwoth mwa Yesu,

⁵ kara jumi ng’atu ma kumeno ni Jok pi nyoth ma junyotho ko kum, kara cwiny uboth i ceng’ pa Rwoth Yesu.

⁶ Kulula mu e ber ungo. Wung’eyo ngo nia thobi ma nyanok thumo i kwen ceke?

⁷ Wulwok thobi ma con cen, kara wubed kwen ma nyen, cil calu ma thobi mbe i beng’wu. Kum lam mwa mi kadhukuwijo judaru lamu, ndhu Kristu:

⁸ kum kumeno dong’ wakwiru agba, ku thobi ma con re ngo, kadok ku thobi mi cwiny mir akece ku dubo de ngo, ento ku kwen ma thobi mbe i ie mi cwiny ma abombi mbe i ie ku lemandha.

⁹ Agoro iwu i waraga para ya kud wuribru ku weg tarwang’;

¹⁰ awacu ngo ma nia kud wuribru ki ku weg tarwang’ m’i ng’om maeni, kadi ku ju ma ketho cwiny hai kum piny ku juvugdhanu de, kadi ku ju ma rwo ni ayi gin m’acwia; kum tek ebedo kumeni nwang’u wukoai aaia be kud i ng’ombuni:

¹¹ ento calu lembe bedo kumeni, agoro iwu ya kud wuribru, tek ng’atu moko ma julwong’e umego e won tarwang’, kadi ng’atu ma ketho cwinye hai kum piny, kadi ng’atu ma rwo ni ayi gin m’acwia, kadi jacai cac, kadi andrej kong’o, kadi javugdhanu; ku wagi ng’atu ma kumeni, kud wucam kude.

¹² Kum en e lembe para awene ma nia apok lembe mi ju ma gini woko? Wupoko lembe mi ju ma gini i ie ngo?

¹³ Ento ju ma gini woko re Mungu poko lembe migi en. Dong’ wukab jadubo nino woko kud i kindwu.