1 Jukorinto 13 - The Holy Bible In Alur (Lur) Revised Orthography

Mer

¹ Man ke anyutho iwu yo ma kadhu wi maeni ceke. Tek ayero ku dhok mi dhanu man mi malaika, ma mer ke mbe kuda, meca adoko ni mola m’ubeywak, kadi ngara m’ubeyengre ayenga.

² Man ke tek a won giramia mi lembila, man ang’eyo giramung’a ceke ku girang’eya de ceke; man tek a won yioyic ceke, m’acopo ketho ko gudi ai cen, ento mer umbe kuda, meca an a mananu.

³ Man tek awodho piny para ceke ya atung ko jucan, man tek amio kuma juwang’ awang’a, ento mer umbe kuda, meca eloko ira gin moko ngo.

⁴ Mer ciro lembe hai, man ebedo ber; mer kumira nege ngo; mer yungre gire ngo, etingre ngo,

⁵ etimbre rac ungo, eyenyo gin ma pare gire ngo, lembe ton i ie ngo, ekwanu dubo ngo;

⁶ anyong’a nege ngo i gondri, ento anyong’a nege karacelo ku lemandha;

⁷ emule ku gin ceke, eyio gin ceke, egeno gin ceke, eciro gin ceke.

⁸ Mer jik i yo ki ngo: ento kadok lembila nuti, jubikabugi woko; kadok dhok ma tung’ nuti, gibiling’; kadok ng’eyong’ec nuti, jubikabe woko.

⁹ Kum wang’eyo kucel, waewo de kucel;

¹⁰ ento ka maeno ma bedo ndhu cu wok m’ubedo kucel no jubikabu woko.

¹¹ Ka fodi a nyathin, aweco va nyathin, yeny ma ia yenyo calu pa nyathin, ia pido de ve nyathin; kawono m’adoko nico, aketho gin mi nyithindho cen.

¹² Kum kawono wabeneno i kieu via via; ento macen wabinendra ku wang’wa: kawono ang’eyo kucel; ento macen abing’eyo cu cil calu an bende jung’eya cu.

¹³ Ento kawono yioyic, ku genogen, ku mer, maeni adek ginuti; man ma dit ma kind maeni en e mer.