1 Jukorinto 12 - The Holy Bible In Alur (Lur) Revised Orthography

Giramia mi Tipo

¹ Nie pi giramia mi tipo, umego, ayenyo kud wubed cobo.

² Wung’eyo nia kinde ma fodi wu Thekdhanumange jupeyowu bang’ ayi gin m’acwia ma ajuba, calu ma tek jutelo wiwu.

³ Kum kumeno aketho wung’ei, nia ng’atu moko mbe m’ebeyero ku Tipo pa Mungu ma wacu kumae, Yesu en e Anathema; (thelembene kumae, Kwong’ ni i wi Yesu); man ke ng’atu moko mbe ma copo wacu kumae, Yesu en e Rwoth, ndhu ku Tipo Maleng’ re.

⁴ Nie giramia gi tung’ tung’, endre Tipo en e acel.

⁵ Man tic de gi tung’ tung’, Rwoth re en e acel.

⁶ Man tic m’ubetimbre gi tung’ tung’, endre Mungu en e acel, m’ubetimo gin ceke i ceke.

⁷ Ento jumio nyuthonyuth mi Tipo ni dhanu kubang’gi kara unyai igi kuloka.

⁸ Kum ni ng’atu acel jumio lembe mi rieko ni kum Tipo; ni mange ke lembe mi ng’eyo gitang’eya, calku Tipo maeni nini:

⁹ ni ng’atu mange ke yioyic, i Tipo maeni nini, man ni ng’atu mange giramia mi keyokum, de i Tipo acel;

¹⁰ man ni ng’atu mange tego mi musana; man ni ng’atu mange lembila; man ni ng’atu mange ng’ic ma jung’io ko tipo: ni ng’atu mange dhok ma tung’ tung’; man ni ng’atu mange rieko mi loko dhok ma tung’ tung’:

¹¹ ento gin maeni ceke Tipo acel maeni nini timo en, m’epoko ni dhanu kubang’gi calu ie yenyo.

Ceke Wathkum Acel

¹² Kum calu kum en e acel, wadhe de gi dupa, man wathkum ceke mi kum, ma gi dupa, gi kum acel; Kristu bende kumeno.

¹³ Kum i Tipo acel jumio baputisi iwa kawa ceke i kum acel, kadok Juyahudi kadi Juyunani, kadok jumiru kadi paker; man juketho ceke umadh kum Tipo acel.

¹⁴ Kum kum en e wathkum acel ungo, endre dupa,

¹⁵ Tek tielo biwacu kumae, Kum an a cing’ ungo, an a mi kum ungo; kum kumeno en e mi kum ungo ngo.

¹⁶ Man tek ith uwacu kumae, Kum an a wang’ ungo, an a mi kum ungo; kum kumeno embe i kum ungo.

¹⁷ Tek kum kubang’e ceke en e wang’, girawinja ke ni kani? Tek ceke en e girawinja, girang’wia ke ni kani?

¹⁸ Ento kawono Mungu ketho wathkum kubang’gi i kum, cil calu ie yenyo.

¹⁹ Man tek kagi ceke gi wathkum acel, kum ke ni kani?

²⁰ Ento kawono gi wathkum dupa, endre kum acel.

²¹ Man wang’ copo wacu ngo ni cing’ kumae, Lembe para mbe i beng’i: man kendo kadi wie de copo wacu ni tielo ngo kumae, Lembe para mbe i beng’i.

²² Ungo, ma sagu dit, wathkum maeno mi kum ma juwacu nyo gi ng’ic ma sagu wagi e ma maku gibed nuti be:

²³ man ke wathkum maeno, ma wawacu nyo gi nyaswaswa, joni e ma wayungogi dit ma sagu: man wathkumwa ma gilony hai ungo nini e ma gilony ma sagu;

²⁴ kum wathkumwa ma gilony can gin moko negogi ngo: ento Mungu ribo kum karacelo, m’emio yung ma sagu ni wathkum ma yung umbe kude;

²⁵ kara pokri kud uwok i kum; ento kara wathkum gikungri calacel man ukung wadi man ukung wadi.

²⁶ Man tek wathkum acel ubesendre, wathkum ceke gisendri karacelo gikude; kadi tek juyungo wathkum acel, wathkum ceke anyong’a negogi gikude.

²⁷ Nie wun wu kum Kristu, man wu wathkume ma tung’ tung’ kubeng’wu kubeng’wu.

²⁸ E Mungu ketho moko i kanisa, ma kwong’ane jukwenda, mir arionde jubila, mir adege ke juponji, macen ke tego mi musana, macen ke giramia mi keyo kum, man konyokony, ku bimobim, ku dhok ma tung’.

²⁹ Kagi ceke gi jukwenda? kagi ceke de gi jubila? kagi ceke gi juponji? kagi ceke de gi jutic mi musana?

³⁰ kagi ceke gi weg giramia mi kum acanga? kagi ceke giyero ku dhok ma tung’i? kagi ceke giloko lembe mi dhoki?

³¹ Ento wuyeny k’amora giramia m’usagu.