S. Mat 5 - Šéiti Vangejlelj𝑒 si Matéu 1869 (Kalabria)

Krie V.

¹ Pâr prana gjindet, u‐ngjit te malji, e po tše u‐ulj atié, ju‐kjásetin δišípuljit e tîje,

² E χapur buzen e tîje, i mesóje tue θẽn:

³ Ljumte te némurit te špirti: se e tíria ešt rregjería e kjíelvet.

⁴ Ljumte te bútete: se atá kân te trašigonjen jeten.

⁵ Ljumt’ atá tše kjânjen: se atá kân te kên pušîm.

⁶ Ljumt’ atá tše kân û, e tše kân et ljíkjie: se atá kân te jên te ndẽndur.

⁷ Ljumte ljipisiáret: se atá kan jên te ljipisur.

⁸ Ljumte te pastrúarit zémrie: se atá kân te šoχen Tẽnzôn.

⁹ Ljumt’ atá tše vẽ̂n pakjen: se atá kan θerriten bilje Tinzoti.

¹⁰ Ljumt’ atá tše jân nkuδirtur per te dréiten: se e tíria ešt rregjería e kjíelvet.

¹¹ Ljumte jini kûr te ju šanjen, e te ju perzên, e te ju θôn kunder gjiθ te ljigat, tue θẽn te rreme per pajet time:

¹² Χarepsi, e χezoni, pse rroga júaje ešt e maδe nder kjíel: se keštú perzûn profetrat, tše kjên pâr juše.

¹³ Ju jini kripa δéut. E nde kripa u‐škatarrofte, me ke kat dertonet? Ajó se veljén per mê gjê, mosse te štiχet jašt, e te jêt e škeljur ka njérezit.

¹⁴ Ju jini drita e jétese. Nẽng mund fšeχet nje χôr e vẽn mbi nje malje.

¹⁵ Né δézenjen χiljnarin, e e vẽ̂n perpoše menzes, po mbi pizulin, e bẽn drit gjiθve te špia.

¹⁶ Keštú lampariste drita júaje perpara njérezvet: se te šoχen te mirat bẽnat túaje, e te χjezónjen Taten têje, tše ešt nder kjíelet.

¹⁷ Mos ju dukte se ú erδa te škatarróija ljedžen, o profetrat: nẽng erδa ti škatarróija, po ti beja.

¹⁸ Se per vertét ju θom; njera te škônje kjíela e δeu, nje jota vet, o nje pikez nẽng ljipset ka ljedža, njera te kjofšin gjiθ šurbiset.

¹⁹ Per kte aí tše sgjiθte nje nde kto ljedža mê te vógeljat, e te mesônje keštú njérezit, mé i vógelji kat θerritet te rregjería e kjíelvet: aí prana tše beft e mesófte, kî i maθ kat θerritet te rregjería e kjíelvet.

²⁰ Pse ju θom, se nde mos mburóft e dréita júaje mê se e Skríbravet e e Farisérevet, nẽng χini te rregjería e kjíelvet.

²¹ Gjégjetit se kje θẽn piékjevet: Mos vraš: aí prana tše vrafte, kat jêt nen kúrtien.

²² Pra ú ju θom: se nganjé, tše kâ kjerratî me vlân e tîje per faregjê, kat jêt nen kúrtien. Aí prana tše θefte vláut tîje, raká: kat jêt nen kuventin. Aí prana tše i θefte, i lavur: kat jêt nd’ avsit ziárrit.

²³ Nde ti poka síelše rrigalin tẽnte mbi autarin, e atié u‐kuitofše se vlau it kâ gjagjê me tîj:

²⁴ Lje atié rrigalin tẽnte perpara autarit, e ets perpara e u‐mbjiθ me vláun tẽnte: e aχíerna arδur jipe rrigalin tẽnte.

²⁵ Kjofš i mîr me armikun tẽnte mbiátu per sa jê mb’ ûδe me té: te mos te te kjélenje armiku te júδetši, e júδetši te te vêr te dúart e šerbetúarit: e te jêš i štẽn nde filjakjî.

²⁶ Per vertét te θom, nẽng delje atéi, njera te pagúaš te ljurtmin turrés.

²⁷ Gjégjetit se kje θẽn piékjevet: Mos befše mekát me grúan e te tiérve.

²⁸ Ú pra ju θom: Se nganjé, tše rúan grúan per te diserônje, aχíera beri mekaten te zémera tîje.

²⁹ Nde prana siu it i diáθt te jep skandal, ndzire, e štire ka ti: pse bẽn mê per tîj te biret nje piés e kurmit tẽnte, se gjiθ kurmi it te štiχet nde pist.

³⁰ E nde dora jote e diáθte te jep skandal, prite, e štire ka ti: pse bẽn mê per tîj te biret nje piés e kurmit tẽnte, se gjiθ kurmi it te štiχet nde pist.

³¹ Kje θẽn eδé: Aí tše ljerefte šokjen e tîje, je ti jâp škrúamen e te ljeríerit.

³² Ú pra ju θom: Se kuš ljerefte šokjen e tîje, mosse per te turperúarit, bẽn e turperonet: e aí tš’ u‐martofte me te ndáituren, e bẽn mekaten.

³³ Papâ gjégjetit se kje θẽn piékjevet: Mos márreše bên rrê: e príerše Tinzoti bêt tẽnte.

³⁴ Ú pra ju θom, te mos mírreni bê fare, jo mbi kjíelen, se ešt θroni Tinzoti:

³⁵ Jo mbi δéun, se ešt kumbimi i kẽ́mbevet tîje: jo mbi Džerusalemin, se ešt χora e te maδit rregje:

³⁶ Jo mbi kríet tẽnte te beš bê, se ẽng mund beš nje kjime te bârδe, o te zêze.

³⁷ Kjofte prana te foljet tâje, eχ, eχ: jo, jo: mê šûm se kto fiâlje, vién ka te ljikte.

³⁸ Gjégjetit se kje θẽn: Sî per sî, δẽmb per δẽmb.

³⁹ Ú pra ju θom, te mos rrini te zên me te ljigun: po kušdó te piáste nje mbalambérse mbi fakjen e diaθte tẽnde, priri atîje eδé jatren.

⁴⁰ E atîje, tše do te te kjélenje mbe kurt, e te te mârr gunen tẽnde, ljei atîje eδé mantiéljin.

⁴¹ E kuš te dzarriste per nje mîlje passe, ets me té eδé per njeter di.

⁴² Atîje tše te ljipen, jipi: e até tše do χua ka ti, mos e perzefše.

⁴³ Gjégjetit se kje θẽn: Dúaš mîr gjitonin tẽnte, e dúaš ljik armikun tẽnte.

⁴⁴ Ú pra ju θom: Dúani mîr armíkjete tâje, bekoni atá, tše ju malkonjen, bẽni mîr atire, tše se mund ju šoχen: e parkaljéseni per atá, tše ju bẽnjen ljik e ju perzên:

⁴⁵ Se te jini bilje Tátese têje, tše ešt nder kjíelet: se aí bẽn e ljeχet díeli tîje mbi te ljikjet e te miret: e bẽn e bie šî mbi te dréitit e te štrẽ́mburit.

⁴⁶ Pse nde ju dafšit mîr atá, tše ju dúan mîr, tše rrôg mund kini? nẽng bẽnjen kte eδé gabeljotrat?

⁴⁷ E nde ju fálješit vlézerit tâje vet, tše bẽni ju mê šûm? nẽng bẽnjen keštú eδé džentíljete?

⁴⁸ Andái kin jini ju gjiθ te mîr, si gjiθ i mîr ešt eδé Tata îje i kjíeles.