S. Mat 4 - Šéiti Vangejlelj𝑒 si Matéu 1869 (Kalabria)

Krie IV.

¹ Aχíera Džesúi kje i kjeltur nd’ éremit ka Špirti, se t’ iš i tsandzanissur ka diáli.

² E agjerúar dizét dit e dizét nat, pestana pat û.

³ E aferúar atîje tantaturi θa: Nde ti jê biri Tinzoti, θúaj kta gûr te beχen kravelje.

⁴ Aí prana pergjegjur θa: Kje škrúar: Jo me buk vet gjelîn njeríu, po me tšedó fiâlje vién ka buza Tinzoti.

⁵ Aχíera diáli e kjelen te χora e šéite, e e vê te tšuka kjíšese,

⁶ E i θot: Nde jê biri Tinzoti, štiju pošt. Pse kje škrúar: Se kat kumandônje ẽ́ngjeljevet e tîje per tîj, e kân te t’ marren mbe dôr, te mos piékše te guri kẽmben tẽnde.

⁷ I θa atîje Dšesúi: Papâ kje škrúar: Nẽng kê te tantóš Zotin Tenzôn tẽnte.

⁸ Papâ diáli e kjelen te nje malj i ljart šûm: e i buθtón gjiθ rregjerît e jetes, e χjên e tire,

⁹ E i θot atîje: Gjiθ kto šurbise ú te jap, nde ti râr pergjunja me aδorárenješ.

¹⁰ Aχíerna i θot Džesúi: Ik prapa meje Satán: se kje škrúar: Kê t’ aδorárenješ Zotin Tenzôn tẽnte, e até vet ket šurbéš.

¹¹ Aχíerna e lja diáli: e njô ẽ́ngjeljit u‐kjásetin, e e šurbejen.

¹² Gjegjur prana Džesúi se Janji kje zẽn, u‐prúar Galilê:

¹³ E ljeríer Nádzaret, arδur mbet Kapernaúm perrêz dêtit, nde sinorat e Dzabulonit, e Neftalimit:

¹⁴ Se te beχej e θẽna Isaîs profetit, tše θot:

¹⁵ Δeu i Dzabulonit, e δeu i Neftalimit, uδa dêtit pertêj Dšurdanit, Galiléa e gjíndevet,

¹⁶ Gjíndia tše rrîje uljet nd’ érretit, pâ nje drit te maδe: e atire tše rrijen uljet te χora e te χjea mórties, ju‐lje drita.

¹⁷ Tše aχíera zû Džesúi te preδikóneje, e te θoje: Bẽni peniténdzie: se u‐kjas rregjería e kjíelvet.

¹⁸ Tue etsur prana Džesúi rrêze dêtit Galilês, pâ di vlezer, Simunin, tše θerritej Piéter, e Ndrên vlân e tîje, tše štijen rritet te dêti (pse išen piškatâr),

¹⁹ E i θot atire: Ngani pas meje, e ju bẽnje piškatâr njereš.

²⁰ E atá mbiátu, ljeríer rritet, vân pas atîje.

²¹ E škúar perpara, pâ njeter di vlezer, Jápekun e Dzebeδéut, e Janjin vláun e tîje te varka me Dzebeδéun te jatin e tire, tše dertojen rritet e tire: e i θerriti.

²² E atá mbiátu, ljeríer varken e te jatin e tire, vân pas atîje.

²³ E vêje Džesúi per gjiθ Galilên, tue mesúar nder sinagogat e tire, e tue preδikúar vangjeljin e rregjerîs, e tue šerúar nga semûnd, e nga te viljakosur te gjíndia.

²⁴ E émeri tîje vate nde gjiθ Sírien, e i kjeltin perpara gjiθ atá tše išen kekje, te zẽn ka ndriše semunda e te δẽ́mbura, e atá tše kišen špirtrat e χúaje, e atá me semunden e χenes, e paralítkerat, e i šerói:

²⁵ E vejen pas atîje lége gjíndie šûm ka Galiléa, e ka Dekápoli, e ka Džerusalemi, e ka Juδéa, e ka pertéi Džurdanit.