S. Mat 3 - Šéiti Vangejlelj𝑒 si Matéu 1869 (Kalabria)

Krie III.

¹ Nd’ató dit prana erθ Janje Tista te preδikárneje te éremi i Juδês,

² E tue θẽn: Metanóseni: pse u‐kjas rregjería e kjíelvet.

³ Pse kî ešt aí, tše kje θẽn ka Isaía profeti tše θôje: Vudža e atîje tše θerrét te éremi: Dertoni uδen e Tinzoti: bẽni te drékjeta karrarat e tîje.

⁴ Janji stessu prana kiš te véšuren e tîje kjime kameli, e nje bres ljekúrie te messi tîje: te ngrenit e tîje iš karkaljetse, e miáljte t’ eger.

⁵ Aχíera víneje tek aí Džerusalemi, e gjiθ Juδéa, e gjiθ katundet prei Džurdanit;

⁶ E išen te pakzúar te Džurdani ka aí, tue skomolissur ftesmet e tire.

⁷ Pâr prana šûm nder Fariserat, e Saδukjerat, tše vijen te pakzimi tîje, i θa: Rratsima anapremteš, kuš ju buθtói t’ ikni ka kjerratía tše kat vĩ̂nje?

⁸ Andái bẽni te bẽna peniténdzie.

⁹ E mos te ju škônje ka kríet te θoni mbe vetχên: kemi tat Abramin. Pse ju θom se Inzót mund bẽnje ka kta gûr te daljen bilj Abrami.

¹⁰ Po eδé topra ešt e vẽn te rrẽnjet e árvurvet. Andái nka arvur tše se bẽn frut te mîr, pritet, e štiχet nde ziárr.

¹¹ Ú ju pakzonje nd’ ûje per peniténdzie: aí tše vién pas meje, munden mé se ú, kui nẽng meritónje te kjélenje tsariχet: aí ju pakzón nde Špîrte šéit, e nde ziárre.

¹² Ljopata tîje ešt te dora tîje: e χjeθ ljemin e tîje, e mbiéθ krapúan e tîje te katokji, kašten prana e diék te ziárri pa‐šúam.

¹³ Aχíera vién Džesúi ka Galiléa Džurdán te Janji, se t’ iš i pakzúar ka aí.

¹⁴ Janji prana e largóneje, tue θẽn: Ú kam bezônje te jêm ka ti i pakzúar, e ti vién tek ú?

¹⁵ Pergjegjur prana Džesúi, i θa: Ljem pre naní: pse keštú na nget te bẽ́njemi gjiθ te dréiten. Aχíera e lja.

¹⁶ E pakzúar tše kje Džesúi, dúal mbiátu ka ujet. E njô ju‐χaptin kjíelt: e pâ Špirtin e Tinzoti tše kalarej si pelúmb, e tše víneje mbi até.

¹⁷ E njô nje vûdže ka kjíelt tše θoi: Kî ešt biri im i dášuri mîr, tek ú vura zémeren time.