S. Mat 27 - Šéiti Vangejlelj𝑒 si Matéu 1869 (Kalabria)

Krie XXVII.

¹ E si u‐bê ndritšem, mbióθtin kundzilje gjiθ krerat e príftravet, e piékjet e gjíndies kunter Džesúit, se te dergjojen mbe mort.

² E po tše e ljíδetin, e kjeltin e e vûn nde dúart Pontse Pilatit tše atié kumandóneje.

³ Aχíera Juδa, tše e traδirti, pâr se kiš kjẽn dergúar mbe mort; i metanosur, prúar triδiét te regjẽndat kréravet e príftravet, e piékjevet,

⁴ Tue θẽn: Ftesa, tše traδirta gjakun te paftese. E atá θân: Tše e dúami na? ti kat e šoχeš.

⁵ E po tše štû te regjẽndat te kjiša, iku: e vatur u‐vúar.

⁶ E krerat e príftravet, mârr te regjẽndat, θân: Nẽng ešt mîr te štíemi kto te terzúari: se jân pretse gjaku.

⁷ E mbáitur kundzilje, biéitin me ató δéun e kjaramiδarit, per varr te χúajvet.

⁸ Per kte aí δê kje θerritur, Δê gjaku, njera me sot.

⁹ Aχíerna u‐bê e θẽna Džeremîs profetit, tže θot: E múartin triδiét te regjẽndat pretsi i te pritsármit, tše biéitin kâ te biljet e Israélit:

¹⁰ E i δân per δéun e kjaramiδarit, si me kumandói Inzót.

¹¹ E Džesúi kje perpara kréut e vendit, e kreu e píeti, tue θẽn: Ti jê Rregji i Juδivet? E Džesúi θa atîje: Ti e θua.

¹² E kûr e ngaljésien krerat e príftravet, e piékjete, fare pergjegjej.

¹³ Aχíerna i θot Pilati: Ẽng gjegjen sâ θôn mbi tîj martrît?

¹⁴ E nẽng ju pergjekje atîje per mos nje fiâlje, sâ te mērósneje šûm kréin.

¹⁵ Nga te krémtie prana krei vendit kiš dzakôn te lješóneje gjíndies nje te ljiδur, ke dúajen atá.

¹⁶ E kiš aχíera nje te ljiδur te njoχur, tše ja θojen Barabba.

¹⁷ Naní si atá u‐mbióθtin, i θa Pilati: Tsiljin doni te ju lješonje: Barabben, o Džesúin, tše ja θôn Krišt?

¹⁸ Pse dîje se per ziljî ja kišen δẽn nder dúar.

¹⁹ E si u‐ulj aí mbi θronin e ljíkjies, i dergói θẽn e šókjia tîje: Mosgjê pafše ti me ate te dréit, pse šûm pesova sot nd’ ẽnderr per té.

²⁰ E krerat e príftravet, e piékjete porsítetin gjindet te ljípien Barabben, e Džesúin te vrísien.

²¹ E pergjegjur krei, θa atire: Tsiljin doni te ju ljé nder kta te di? E atá θân: Barabben.

²² Θot atire Pilati: Njî tše kam te bẽnje Džesúin, tše ê i θẽn Krište?

²³ I θôn atîje gjiθ: Kâ te veχet mbe krikje. E krei θa: Tše ljik beri? E atá mê šûm θerrísien tue θẽn: Kâ te veχet mbe krikje.

²⁴ E pâr Pilati se fare e ndíχneje, po mê kekje barebûlje beχej: mârr tsa ûj, ljáiti dúart perpara gjíndies, tue θẽn: Ú se kam ftes per gjakun ketîje te dréiti: šíχenie ju.

²⁵ E pergjegjur gjiθ gjíndia, θa: Gjaku i tîje mbi nê, e mbi bíljete tâne.

²⁶ Aχíerna lješôje atire Barabben: e Džesúin po tše e fradželarti ja δa te vejen mbe krikje.

²⁷ Aχíerna suljdetet e kréit χeljkjur Džesúin nde pretoret, mbióδetin rrêz atîje gjiθ šókete:

²⁸ E po tše e džéšetin, i vûn ngraχ nje mantiélje te kukje,

²⁹ E piéksur nje kurôr gjẽmbaš, ja vûn mbe krie, e nje kalmer te dora e diáθte e tîje. E pergjunjur perpara atîje, e šajen, tue θẽn: Te fáljemi, rregje i Juδivet.

³⁰ E tue peštíjetur mbi até, múartin kálmerin, e ja kersísien te kríet e tîje.

³¹ E po tše e šáitin, i džéšetin mantiéljin, e e véšetin me mbroljat e tîje, e e kjeltin te vejen mbe krikje.

³² E dâlje gjétetin nje njerî Tširenê, per emer Simún: kte e štrengúan te ngrakóneje krikjen e tîje.

³³ E vatur mbe vente i θẽn Gólgote, tše vién me θẽn vent Kútule,

³⁴ I δân te pîje vere me fêl te perzíer. E po tše e vû nde buzet, ẽng diš te pîje.

³⁵ E po tše e vûn mbe krikje, ndáitin te véšurat e tîje, tue štẽn šórtazit: se te mbióχej tše u‐θa ka profeti: Ndáitin te véšurat time nder ta, e mbi te véšuren time štûn šórtazit.

³⁶ E uljur e rúajen atié.

³⁷ E vûn mbi kríen e tîje ftesmen e tîje te škrúar: Kî ê Džesúi Rregji i Juδivet.

³⁸ Aχíerna jân te vẽn mbe krikje bašk me té di latrún: nje ka kraχu i diáθt, e nje ka i manδžinte.

³⁹ E atá tše škojen e malkojen, tue tundur krerat e tire,

⁴⁰ E tue θẽn: Ti tše šuljaren kjišen, e me trî dit e stisen: salvó vetχên: nde jê bîr Tinzoti, kalaru ka kríkjia.

⁴¹ E keštú eδé krerat e príftravet tše e kjéšejen bašk me Skribrat, e piékjete θojen:

⁴² Aí salvói te tiêr, e se mund salvônje vetχên: nde ešt rregje i Israélit, é te kalaret ka kríkjia, e i kemi bes:

⁴³ Aí u‐kumbís mbi Tenzôn: lje te lješônje naní, nde e do: pse θa: Jam bîr Tinzoti.

⁴⁴ Eδé kte i štijen nde buzet latrunte, tše išen vẽn mbe krikje bašk me té.

⁴⁵ E tše te e gjašta ôr u‐bê erret mbi gjiθ δéun njera tek e nẽ́ndeta.

⁴⁶ E si mbi te nẽ́ndeten ôr θerriti Džesúi me vûdže te maδe, tue θẽn: Ilí, ilí, lamá sabaχθaní? tše ešt: Inzoti im, Inzoti im, pertšé me ljereve?

⁴⁷ E ditsá nde ta tše rrijen atié, si e gjékjetin, θojen: Elîn θerrét kî.

⁴⁸ E mbiátu tue rankartur nje nder ta e mârr nje spôndze, po tše e mbiói me uθul, e e vû mbi nje kalmer, i δa te pîje.

⁴⁹ E te tiéret θojen: Ljê, šomi nde vién Elía te salvônje.

⁵⁰ E Džesúi papâ tue θirrur me vûdže te maδe, ndzúar špirtin.

⁵¹ E njô skjepi kjíšese u‐škjúar dîše tše ljart njera pošt, e δeu u‐tunte, e timbat u‐tšáitin,

⁵² E varret u‐χaptin: e šûm kúrmera šéitraš, tše fiéjen, u‐ngréiten.

⁵³ E dâlje ka varret pas te ngjálturit e tîje, érθetin te χora e šéite, e u‐buθtúan šumve.

⁵⁴ E Tšenturiúni, e atá tše me té rúajen Dšesúin, pâr δéun tše tundej e šurbiset tše beχšin, u‐trẽ́mbetin šûm, tue θẽn: Vertét Bîr Tinzoti iš kî.

⁵⁵ E išen atié šûm grâ, tše rúajen preselargu, ató tše kišen vât pas Džesúit ka Galiléa, te e šurbejen:

⁵⁶ Nder to iš Maríeja Maddalena, e Maríeja e jema Jápekut, e Sépese, e e jema te bíljevet Dzebeδéut.

⁵⁷ E kûr u‐ngris, erθ nje njerî i begát ka Arimatéa, tše kiš émerin Sep, tše eδé aí kiš mesúar ka Džesúi.

⁵⁸ Kî kjasur te Pilati, ljipi kurmin e Džesúit. Aχíera Pilati kumandói ti jipej kurmi.

⁵⁹ E mârr kurmin, Sepa e peštúal me peljχûr te pastrúame.

⁶⁰ E e vû te nje varr i tîje i rî, tše preu te guri. E po tše prúar nje plak te maδe te dera e varrit, u‐nis e vate.

⁶¹ E iš atié Maríeja Maddalena, e jatra Maríe, uljur perpara varrit.

⁶² E te jatra dit, tše ê pas te Prẽmtes, u‐mbióθtin krerat e príftravet, e Fariserat te Pilati,

⁶³ Tue θẽn: Zot, u‐kujetúam, se aí burr genjemeš θa kûr iš eδé i gjâl: Pas trî dite ngjalem.

⁶⁴ Andái kumandó te ruχet varri njera tek e treta dit: se arδur δišípuljit e tîje naten te mos kalonjen até, e te θôn gjíndies: U‐ngre ka te vdékurit: e l’ últemia genjeme te jêt mê zî se e para.

⁶⁵ E θa atire Pilati: Ju kini guárdien, étseni, rúani si dini.

⁶⁶ E atá vatur, rúajetin varrin, po tše šenúan gurin, bašk me guárdien.