S. Mat 25 - Šéiti Vangejlelj𝑒 si Matéu 1869 (Kalabria)

Krie XXV.

¹ Aχíerθin gjitet rregjería e kjíelvet δiét vírgjerave: tše mârr χiljneret e tire dúaltin perpara δẽ́nderrit.

² E pes nder to išen te špéita, e pes ndrola:

³ E ndrolat, mârr χiljneret e tire, ẽng múartin valje bašk me to:

⁴ Te špéitat pra múartin valje te rrogjêt e tire bašk me χeljneret e tire.

⁵ E si δẽ́nderri menói, u‐kjelúan te gjiθta e fiéjen.

⁶ E nde mes nátese kje nje θírreme: Njô vién δẽ́nderri, díljni perpara atîje.

⁷ Aχíerna u‐ngrên gjiθ ató vírgjera, e dertúan χeljneret e tire.

⁸ E ndrolat θân te špéitravet: Ẽna neve ka váljete tâje: se χeljneret tân jân e šuχen.

⁹ U‐pergjégjetin te špéitat, tue θẽn: Jo, mos ẽng errefte neve e juve, étseni mê špéit tek atá tše e šesen, e biénie per ju.

¹⁰ E si ató vejen te biéjen, errû δẽ́nderri: e ató tše ndóδešin te ndrékjura, χíjetin me té te dársemet, e u‐mbulî dera.

¹¹ E vĩnjen pestana eδé te tiérat vírgjera, tue θẽn: Zot, Zot, χape neve.

¹² E aí pergjegjur θa: Per vertét ju θom, nẽng ju njoχ.

¹³ Mandái rrini sgjúar, se nẽng dini diten, ne χeren, tše vién i Biri njeríut.

¹⁴ Pse si njeríu tše niset largu δeut, θerriti šerbetoret e tîje, e i lja nder dúar petkat e tîje.

¹⁵ E njerit i δa pes talente, e jetrit di, e jetrit nje, nganjéje si fukjía e tîje, e u‐nis mbiátu.

¹⁶ E vatur aí tše kiš pes talente, šerbéu me atá, e beri njeter pes talente.

¹⁷ Keštú eδé aí tše pat di, e gavenjéi njeter di.

¹⁸ Aí prana tše pat nje, vatur beri nje grop te δeu, e fšeχu regjẽndet e te zotit tîje.

¹⁹ E pas šûm mot vién i zoti atire šerbetóreve, e χeljkje kundin me atá.

²⁰ E kjasur aí tše múar pes talentet, i vû perpara te tiéret pes, tue θẽn: Zot, ti me δê pes talente; šiχ, ú gavenjeva njeter pes talente mbi atá.

²¹ E i θa i zoti tîje: Mîr bere, šerbetúar i mîr e i besem, mbi te pákete kjeve i besem, ú te vê mbi te šumat: χîr te χaréa zotit tẽnte.

²² E kjasur eδé aí tše múar di talente, θa: Zot, di talente me δê; šiχ, njeter di talente ú gavenjeva mbi atá.

²³ I θa atîje i zoti tîje: Mîr bere, šerbetúare i mîr e i besem, mbi te pákete kjeve i besem, ú te vê mbi te šúmat: χîr te χaréa zotit tẽnte.

²⁴ E kjasur eδé aí tše pat nje talente, θa: Zot, te dija se jê njerî i nguret, tše kúaren tek se mbole, e mbiéθ tek se špriše:

²⁵ E se u‐trẽmba, vatur fšeχa talentin tẽnte te bota: šiχ, kê tẽndin.

²⁶ E pergjegjur i zoti atîje, i θa: Šerbetúar i ljik, e i varesur, dije se ú kúarenje tek se mbola, e mbiéθ tek se špriša?

²⁷ Duχej andái te ljeje ti regjẽndin tim atire tše nderronjen turrés, e arδur ú kiša mârr timin me nderés.

²⁸ Ndzirni andái talentin ketîje, e jípenia atîje, tše kâ δiét talentet.

²⁹ Pse atîje tše kâ i jipet, e i mburonet: po atîje, tše se kâ, eδé até tše kâ, i mirret.

³⁰ E šerbetúarin tše se veljén štínie nde t’ érretit te jašem: atié kâ te jêt te kjâr, e ngersima δẽmbeš.

³¹ Kûr prana te vĩnje i Biri njeríut nde δokse te tîje, e gjiθ šéitrat ẽ́ngjelj me té, aχíera uljet mbi θronin e δokses tîje:

³² E mbjiδen perpara atîje gjiθ gjindet, e ndân atá njeri ka jetri, si pekurari ndân deljet kâ katsíkjete:

³³ E vê deljet kâ e diáθta e tîje, e katsíkjete kâ e mandžinta.

³⁴ Aχíerna rregji θot atire, ka ana e diáθte: Ngani, ju te bekúamit e Tátese tim, trašigoni rregjerîn dertúar juve tše kûr u‐bê jeta.

³⁵ Se pata û, e me δât te χaja: pata et, e me δât te pîja: iša i χúaje, e me mbióθtit:

³⁶ I džešur, e me veštit: u‐semurta, e érθetit e me pât: iša nde filjakjî, e érθetit tek ú.

³⁷ Aχíerθin i pergjégjen te dréitit, tue θẽn: Zot, kûr te pâm me û, e te δâm te χaje: o me et, e te δâm te pije?

³⁸ E kûr te pâm te χúaje, e te mbióθtim: o džešur, e te veštim?

³⁹ E kûr te pâm semûr: o nde filjakjî, e érθetim tek ti?

⁴⁰ E pergjegjur rregji, θot atire: Per vertét ju θom, sâ χêr ja bête njei nder kta vlézerit e mî te vígjeljit, e bête mua.

⁴¹ Aχíerna θot eδé atire te ana e mandžinte: Ikni ka ú, ju tše jini te malkúar, te ziárri pâ‐fernúam, i dertúar per diálin, e ẽ́ngjeljit e tîje.

⁴² Se pata û, e nẽng me δât te χaja: pata et, e nẽng me δât te pîja:

⁴³ Iša i χúaje, e nẽng me mbióδetit: džešur, e nẽng me veštit: semûr, e nde filjakjî, e nẽng érθetit te me šíχejet.

⁴⁴ Aχíerna i pergjegjen eδé atá, tue θẽn: Zot, kûr te pâm me û, o me et, o te χúaje, o te džešur, o te semûr, o nde filjakjî, e nẽng te šurbíem?

⁴⁵ Aχíera i pergjegjet atire, tue θẽn: Per vertét ju θom: Sâ χêr nẽng ja bête njei nder kta te vígjeljit, eδé mua nẽng me bête.

⁴⁶ E kta vên nde te pesúarit pa‐fernúam: te dréitit pra nde gjelet pâ‐fernúam.