S. Mat 23 - Šéiti Vangejlelj𝑒 si Matéu 1869 (Kalabria)

Krie XXIII.

¹ Aχíera Džesúi folji gjíndevet, e δišípuljevet e tîje,

² Tue θẽn: Mbi θronin e Moiséut u‐úljetin Skribrat, e Fariserat.

³ Gjiθ ató pra tše ju θefšin te rúani, rúani e bẽni: po si te bẽnat e atire mos bẽni: se θôn, e nẽng bẽnjen.

⁴ Pse ljíδenjen bárre te rẽnda, e tse se mund kjelen, e i vẽ̂n mbi kraχet e njérezvet: e me gjištin e tire nẽng dúan ti túndenjen.

⁵ Gjiθ pra te bẽnat e tire i bẽnjen se te jên pâr ka njérezit: andái sgjeronjen filattériet e tire, e bẽnjen mê te mbeδâ poδêt e te véšurvet e tire.

⁶ Dúan eδé te parin vende te tríesat, e te paret θrone te sinagogat,

⁷ E te faljat nder kjatset, e te jên θerritur ka njérezit Rabbi, Rabbi.

⁸ Ju prana mos u‐θerritni Rabbi: Pse nje ešt Δáskalji îje, Krišti, e gjiθ ju jini vlezer.

⁹ E Tat per ju mos θerritni njerî mbi δê: pse nje ešt Tata îje, tše ê nder kjíelet.

¹⁰ Ne θerríteni δáskalje: pse nje ê Δáskalji îje, Krišti.

¹¹ E mê i maδi nder ju, ê šerbetúari îje.

¹² E kuš ngréitit vetχên, kâ te jêt i úljetur: e kuš úljetit vetχên, kâ te jêt i ngréitur.

¹³ Mierezî juve, Skribra e Farisera ipókritra: se mbulini rregjerîn e kjíelvet perpara njérezvet. Pse ju nẽng χini, e nẽng ljẽni te χĩnjen atá tše išen per te χĩnjen.

¹⁴ Mierezî juve, Skribra e Farisera ipókritra: se χani špît e véavet, e tue θẽn parkaljésme te gjata: pre keté kin te kini juδikúame mê te maδe.

¹⁵ Mierezî juve, Skribra e Farisera ipókritra: se škoni dêtin e δéun, se te bẽni nje šok: e kûr te bêšit, bẽni até bîr písie dîše mê se ju.

¹⁶ Mierezî juve, mještra te verber, tše θoni: Aí tše befte bê mbi kjište, nẽng ešt gjê: aí prana tše befte bê mbi aret e kjíšese, kâ detîre.

¹⁷ Te lavur, e te verber: pse tše ê mê i maθ, aret, o kjiša, tše šeitrón aret?

¹⁸ Eδé aí tše befte bê mbi autarin, nẽng ê gjê: aí prana tše befte bê mbi rrigalin, tše ešt atié siper, kâ detîre.

¹⁹ Te lavur, e te verber: pse tše ê mê i maθ, rrigali, o autari, tše šeitrón rrigalin?

²⁰ Prandái aí tše bẽn bê mbi autarin, bẽn bê mbi até, e mbi gjiθ šurbiset, tše jân siper atîje.

²¹ E aí tše bẽn bê mbi kjišen, bẽn bê mbi até, e mbi até, tše rrî atié.

²² E aí tše bẽn bê mbi kjíelet, bẽn bê mbi θronin e Tinzoti, e mbi até, tše uljet siper.

²³ Mierezî juve, Skribra e Farisera ipókritra: tše pagúani te δiéteten piés e mẽ́ndrezes, e anitit, e kjiminit, e ljẽni mê te rẽndat e ljedžes, juδikúamen, ljipisîn, e bessen. Kto kiš te beχšin, e ató se kiš te ljeχšin.

²⁴ Mještra te verber, tše kuloni tsampanen, e per tsilni kamelin.

²⁵ Mierezî juve, Skribra e Farisera ipókritra, se bẽni paster perjašta kjeljkjit e taljurit: e mbrẽnda jân piót te viéδuraš, e te štrémburaš.

²⁶ Farisê i verber, pastró perpara mbrẽnda kjeljkjin e taljurin, se te bẽnet eδé perjašta pastra e tire.

²⁷ Mierezî juve, Skribra e Farisera ipókritra: pse gjíteni várrevet te sbarδur, tše perjašta duken te bukur njérezvet, e mbrẽnda jân piót eštra te vdékuriš, e gjiθ lanjuzî.

²⁸ Keštú eδé ju perjašta dúkeni te dréite njérezvet: e mbrẽnda jini piót te šéχuraš e te ljigaš.

²⁹ Mierezî juve, Skribra e Farisera ipókritra, pse stisni varret e profétravet, e stoljisni kujetimet e te dréitevet,

³⁰ E θoni: Nde kišem kjẽn nder dítete e príndravet tân, nẽng kišem kjẽn šoket’ e tire te gjaku i profétravet.

³¹ Keštú bẽni martrî mbi ju, se jini bilje atire, tše vrân profetrat.

³² E ju mbiúat metren e príndravet tâje.

³³ Gjerpẽnje, rratsîm anaprẽmteš, si peštoni ka juδikúamit e písese?

³⁴ Pre kte njô ú ju dergonje profetra, e t’ urte, e skribra, e nder ta kin te vrini, e te vẽni mbe krikje, e nder ta kin te vrini χûnje te sinagogat túaje, e kin ti perzeni χôr per χôr:

³⁵ Sa te vĩnje mbi ju gjiθ gjaku i dréit derδur mbi δéun, tše ka gjaku i Abelit te dréitit njera te gjaku Dzakarîse te birit Baraχjîse, tše vrât nde meste kjišes e autarit.

³⁶ Per vertét ju θom, vĩnjen gjiθ kto šurbise mbi ket rratse.

³⁷ Džerusalêm, Džerusalêm, tše vret profetrat, e zê me gûr atá, tše kjên dergúar tek ti, sâ χêr diša te mbjíδia biljte tẽnte, si pulja mbiéθ zókjete e sâje perpóš kráχevet, e ti nẽng diše?

³⁸ Eši ju ljeχet špia júaje e vême.

³⁹ Andái ju θom, nẽng me šiχni tše naní, njera kûr te θefši: Bekúar aí, tše vién nd’ émerit Tinzoti.