S. Mat 22 - Šéiti Vangejlelj𝑒 si Matéu 1869 (Kalabria)

Krie XXII.

¹ E pergjegjur Džesúi, papâ θa atire me perralez, tue θẽn:

² U‐gja rregjería e kjíelvet njeríut rregje, tše beri dársemet birit tîje.

³ E dergói šerbetoret e tîje te θerrísien atá tše kišen kjẽn θerritur te dársemet, e ẽng dišen te vejen.

⁴ Papâ dergói te tiêr šerbetore, tue θẽn: Θúani atire tše kjên θerritur: Ši se tríesen time e dertova, teret tim e animáljete tše májeta kjên te θêrtur, e gjiθséi i ndrekjur: ngani te dársemet.

⁵ E atá pa‐vẽn rê, vân, kuš te petku tîje, e kuš te nigodzi tîje:

⁶ E te tiéret po tše rrembíen šerbetoret e tîje, i šáitin, e i vrân.

⁷ Gjegjur kte rregji, u‐ndzerrâr: e dergúar suljdetet e tîje, skriárti atá tše i kišen vrâr šerbetoret, e χoren e tire e dokje.

⁸ Aχíerna θot šerbetórevet e tîje: Dársemet jân dertúara, po te θerríturit nẽng išen te mîr.

⁹ Prandái étseni te krerat e úδevet, e sâ te gješi, θerríneji te dársemet.

¹⁰ E dâlje atá šerbetôre te uδet, mbióθtin gjiθ sâ gjétetin, te ljikje e te mîr: e tríesa u‐mbiúa me njerez per te χajen.

¹¹ E χíjetur rregji se te vréneje t’ úljurit te tríesa, pâ atié nje njerî tše ẽng kiš ngraχ te véšure dársemeš.

¹² E θot atîje: Šok, si χire ketú pâ pasur te véšure dársemeš? E aí mbet kjetu.

¹³ Aχíera θa rregji šerbetórevet: Po tše i ljíδeši atîje kẽmb e dúar, mírrenie e štínie nd’ érretit te jašem: atié kâ te jêt te kjâr, e ngersima δẽmbeš.

¹⁴ Se šûm jân θerritur, e pak sgjeδur.

¹⁵ Aχíera vatur Fariserat, mbáitin kešîl si te rrembéjen nder fiáljet.

¹⁶ E i dergonjen δišípuljit e tire me Eroδiánete, tue θẽn: Δáskalje, dimi se jê i vertét, e uδen e Tinzoti me verteten mesón, e ẽng kê kuidéš per mosnjerî: pse nẽng rúan nde fakje njéreziš:

¹⁷ Andái θúana si te duket, nget te jipet tšensi Tšésarit, o jo?

¹⁸ E njoχur Džesúi te ljigen e tire, θa: Pertšé me tsandzanisni, ipókritra?

¹⁹ Buθtonmi turreste e tšensit. E atá i buθtúan nje δinâr.

²⁰ E aí θot atire: Kui ešt kejó ninez, e e škrúamja siper?

²¹ Θôn atîje: E Tšésarit. Aχíera θot atire: Andái jipni ató te Tšésarit, Tšésarit: e ató te Tinzoti, Tinzoti.

²² E po tše e gjékjetin u‐mērúan, e ljêr até vân.

²³ Nd’ at dit u‐kjásetin atîje tsa Saδukjera, tše θôn se ẽng ešt te ngjáltur: e e píeitin,

²⁴ Tue θẽn: Δáskalje, Moiséu θa: Ne ndonjerî vdekte pa passur bilje, šokjen e tîje kâ te mârr per nusse vlau tîje, e kâ te bẽnje te ljeχet fara te vláut tîje.

²⁵ Išen pra tek na štat vlezer: e i pari, po tše vû kurôr, vdikje: e pse ẽng kiš femîlje, lja grúan e tîje vláut tîje.

²⁶ Keštú eδé i diti, eδé i treti njera tek i štáteti.

²⁷ E pas gjiθve vdikje eδé grúaja.

²⁸ Naní nde te ngjálturit tsiljit nde te štáteve ka te jêt šokje? pse gjiθ e pátetin.

²⁹ Pergjegjur pra Džesúi, θa atire: E sgarroni, se ẽng dini te Škrúamet, mẽngu fukjîn e Tinzoti.

³⁰ Pse nde te ngjálturit nẽng martônjen, e nẽng martonen: po jân si ẽ́ngjeljit e Tinzoti nder kjíel.

³¹ E mbi te ngjálturit e te vdékurvet nẽng δiavastit tše kje θẽn juve ka Inzót tše θot:

³² Ú jam Inzoti i Abramit, e Inzoti i Isakut, e Inzoti i Džakobit? Inzoti ẽng ešt Inzoti te vdékurvet, po te gjálevet.

³³ E po tše e gjékjetin gjíndete, u‐mērúan mbi te mesúamit e tîje.

³⁴ E Fariserat po tše gjékjetin se mbelíjeti griken Saδukjérevet, u‐mbióθtin bašk:

³⁵ E nje nde atá njerez ljédžie e píeiti, tue tantúar, e tue θẽn:

³⁶ Δáskalje, tsila ešt e máδia nde ljedžet?

³⁷ E Džesúi i θa atîje: Te dúaš mîr Zotin Tenzôn tẽnte me gjiθ zémeren tẽnde, e me gjiθ špirtin tẽnte, e me gjiθ trût tẽnde.

³⁸ Kejó ešt e para, e e máδia ljêdže.

³⁹ E e dîta ešt si kejó: Te dúaš mîr gjitonin tẽnte, si vetχên.

⁴⁰ Nde kta di kumandamente rrîn viêrre gjiθ ljedža, e profetrat.

⁴¹ Mbiéδur prana Fariserat, Džesúi i píeiti,

⁴² Tue θẽn: Tše ju duket juve per Krištin? kui ešt bîr? Θôn atîje: i Daviδit.

⁴³ Θot atire: Si andái Daviδi nde špîrte e θerrét Zot, tue θẽn:

⁴⁴ Θa Zoti Zotit tim: Ulju te e diáθta ime, njera te vê armíkjete tẽnte kumbîm kẽ́mbevet tẽnde?

⁴⁵ Nde prandái Daviδi e θerrét Zot, si ešt bîr i tîje?

⁴⁶ E mosnjerî mund i pergjegjej nje fiâlje: ne njerî pat zémer tše kâ ajó dit te píeneje mê.