S. Mat 18 - Šéiti Vangejlelj𝑒 si Matéu 1869 (Kalabria)

Krie XVIII.

¹ Nd’ at χêr u‐kjásetin δišípuljit Džesúit, tue θẽn: Kuš prana ê mê i maθ te rregjería e kjíelvet?

² E θerritur Džesúi nje diáljθe, e vû nde mest atire,

³ E θa: Per vertét ju θom, nde mos u‐nderrofšit, e u‐befšit si te vígjeljit, se mund χini te rregjería e kjíelvet.

⁴ Prandái kušdô te vogeljônje vetχên si kî diáljθe, kî ešt mê i maδi te rregjería e kjíelvet.

⁵ E aí tše mbiéθte nje diáljθe kesíš nd’ émerit tim, mbiéθ mua.

⁶ Kuš pra skandalidzarte nje nder kta te vígjelje, tše kân bes tek ú, i vién mê mîr atîje, ti viret nje gûr gaiδureš te gerljatsi, e te mbitet te avsi déitit.

⁷ Mierezî jetes per skándalet. Pse skándalet kân te vĩnjen: po mierezî atîje njeríu, per ke skándali vién.

⁸ E nde dora jote, o kẽmba jote te skandalidzaren: prit até, e štire ka ti: ešt mê mîr per tîj te χĩnješ te gjela tšung, e šankát, se pasur dî dúar, o dî kẽmbe te jêš i štẽn te ziárri i pa‐fernúam.

⁹ E nde siu it te skandalidzaren, škulje, e štire ka ti: ešt mê mîr per tîj te χĩnješ me nje sî te gjela, se me di te jêš i štẽn te avsi ziárrit.

¹⁰ Rúani te mos šani nje nde kta te vígjelje: pse ju θom, se ẽ́ngjeljit e tire nder kjíelet gjiθmôn šoχen fákjien e Tates tim, tše ešt te kjíelet.

¹¹ Pse erθ i Biri njeríut te salvônje te biérrin.

¹² Tše ju duket? ne ndonjerî pafte nje kjint delje, e ju‐sparrangjiste nje nder to: ljeríer aí nendeδietenendat, tue etsur máljevet, nẽng kerkón te sparrangjísten?

¹³ E nde i árθete te gjẽnje: per vertét ju θom se kâ mê šûm χarê per té se per nendeδietenendat, tše nẽng u‐sparrangjistin.

¹⁴ Keštú nẽng ê veljêm perpara Tates têje, tše ešt te kjíelet, te biret nje nder kta te vígjelje.

¹⁵ E nde fteste kunter tîj vlau it, ets’ e nemeréi nder ti, e aí vetem: e nde aí te gjékjete, gavenjeve vláun tẽnte.

¹⁶ E nde mos te gjékjete, mirr me tîj eδé nje, o di vet, sâ te buza di martrîše, o tre te kjintrônje gjiθ te foljet.

¹⁷ Nde prana ẽng dafte te gjegjet atá, θúaja kjíšese. E nde eδé kjišen se gjékjete, kjofte per tîj si džentili, o gabeljoti.

¹⁸ Per vertét ju θom, se sâ ljíδešit mbi δéun, jân te ljíδura nder kjíel: e sâ sgjíδešit mbi δéun, jân te sgjíδura nder kjíel.

¹⁹ Papâ ju θom, se nde di nder ju e ndíešin bašk mbi δéun, per nga šurbés, tše kân te ljípenjen, i vién atire ka Tata im, tše ešt te kjíelet.

²⁰ Pse tek jân di, o tre vet te mbiéδur nd’ émerit tim, ú jam atié nde mest atíreve.

²¹ Aχíera tue kjasur atîje Piétri, θa: Zot, sâ χêr kâ te me ftésenje vlau im, e ú te ndeljênje? per štat χêr?

²² Θot atîje Džesúi: Nẽng te θom, njera štat χêr: po njera štateδiét e štat χêr.

²³ Per kte u‐gja rregjería e kjíelvet njeríut rregje, tše diš te bẽ́neje kundet me šerbetoret e tîje.

²⁴ E si zû ti bẽ́neje, i erθ perpara nje, tše kiš ti jip δiét mîlje talente.

²⁵ E si aí nẽng kiš te ja jip, i kumandói i zoti tîje te šitej aí, e šokja e tîje, e te biljte, e gjiθséi tše kiš, e te paguχej detira.

²⁶ Râr per kte mbe trúal šerbetúari, e parkaljésneje tue θẽn: Zot, ki patšêndze per mua, e ú te jap gjiθséi.

²⁷ E i zoti pasur ljipisî per at šerbetúar, e lja te vêje, e i ndeljéu detiren.

²⁸ E dâlje aí šerbetúar gjet nje nder šókete šerbetrije, tše i kiš detire nje kjint δinâr: e rrembíer iš e e fukárneje, tue θẽn: Ẽm até tše kê te me japše.

²⁹ Râr mbe trúal pre kte šoku tîje šerbetrije, e parkaljésneje, tue θen: Ki patšêndze per mua, e te jap gjiθséi.

³⁰ E aí nẽng diš: po vatur, e štû nde filjakjî, njera ti pagúaneje detiren.

³¹ Pâr prana šokte e tîje šerbetrije kto te bẽna, u‐χeljmúan šûm: e vatur rrefíejetin zotit tire gjiθséi, tše kiš kjẽn.

³² Aχíera θerritur até i zoti tîje, i θot: Šerbetôr i ljik, gjiθ até detire te ljê, se me parkaljese:

³³ Se te ngit eδé tîj te ljipíseje šokun tẽnte, si eδé ú ljipisa tîj?

³⁴ E po tše u‐ngroχ i zoti tîje, e δa nde dúar atire tše vrísejen χûnje, njera kûr ti pagúaneje gjiθ detiren.

³⁵ Kestú eδé Tata im i kjíeles ju bẽn juve, nde mos ndeljefšit nganjé vláut tîje te zémerat túaje ftesmat e tire.