S. Mat 16 - Šéiti Vangejlelj𝑒 si Matéu 1869 (Kalabria)

Krie XVI.

¹ E kjasur Fariserat, e Saδukjerat, tue tsandzanisur i ljípejen ti buθtóneje atire nje sinjâl ka kjíela.

² E aí pergjegjur, i θa: Arδur mbrémanet θoni: Mot’ i mîr, se ngukjen kjíela.

³ E menatet: Sot mot i kekje, se ngukjen vréjetur kjíela. Ipókritra, dini e njiχni fakjen e kjíeles: e sinjalet e mótravet nẽng mund njiχni?

⁴ Rratsima e ljîge e e škatarrúar kerkón sinjalje: e sinjâl asâje nẽng i jipet, mosse sinjali Džones profetit. E ljeríer atá, iku.

⁵ E vatur δišípuljit e tîje mbatân, χarrúan te mírrejen buk.

⁶ E Džesúi θa atire: Rúani, e rúχi ka brumet e θaret te Farisérevet e Saδukjérevet.

⁷ E atá fóljejen nder ta, tue θẽn: Se ẽng múartim buk.

⁸ E Džesúi ndeljgúar kte, θa atire: Tše fóljeni nder ju, njerez pak béssie, se nẽng múartit buk?

⁹ Nẽng ndeljgoni, e nẽng kujetoni pes kraveljet e pes míljevet, e sâ kufa múartit?

¹⁰ Ne štat kraveljet e kater míljevet, e sâ športa múartit?

¹¹ Si nẽng deljgoni, se jo per buken ju θê ú, te ruχi ka brumit e Farisérevet, e Saδukjérevet?

¹² Aχíera ndeljgúan se nẽng θa te ruχšin ka brumit e bukes, po ka te mesúamit e Farisérevet e Saδukjérevet.

¹³ Vatur pra Džesúi nder anat e Tšesarês te Feljipes, píeti δišípuljit e tîje, tue θẽn: Kuš me θôn njérezit se jam ú, Biri i njeríut?

¹⁴ E atá θân: Tsa Janje Tisten, te tiêr Elîn, te tiér prana Džeremîn, o nje nder profetrat.

¹⁵ Aí θot atire: E ju kuš θoni se jam?

¹⁶ E pergjegjur Simún Piétri, θa: Ti jê Krišti, i biri Tinzoti te gjâl.

¹⁷ E pergjegjur Džesúi, θa atîje: Ljumi ti, Simún Bar Jonâ: se nẽng te sbuljúan kurmi, e gjaku, po Tata im, tše ešt nder kjíelet.

¹⁸ E ú te θom, se ti jê Piétri, e mbi ket gûr ú stísenje kjišen time, e díert e písese nẽng kân te mundur kunter asâje.

¹⁹ E te jap kjitšet e rregjerîs e kjíelvet: e ke ljíθeše ti mbi δéun, vién i ljiδur eδé nder kjíelet: e ke sgjíθeše ti mbi δéun, vién i sgjiδur nder kjíelet.

²⁰ Aχíera kumandói δišípuljevet e tîje te mos i θojen njeríu, se aí ešt Krišti.

²¹ Tše aχíera zû Džesúi te buθtóneje δišípuljevet tîje, se i ngit te veje Džerusalêm, e šûm te pesóneje ka piékjete, e krerat e príftravet, e Skribrat, e t’ iš i vrâr, e tek e treta dit te ngjalej.

²² E χeljkjur me njâne até Piétri, zû e i nemeréi tue θẽn: Rúaj vetχên, oi Zot: nẽng kâ te jêt per tíj kî šurbés.

²³ E aí piêrre i θa Piétrit: Bẽnu prapa meje, satán, ti me jep skandal: se nẽng ndeljgón šurbiset e Tinzoti, po ató te njérezvet.

²⁴ Aχíera Džesúi θa δišípuljevet tîje: Nde ndonjé do te vĩnje pas meje, mos njoχte mê vetχên e tîje, ngarkofte krikjen e tîje, e árθete pas meje.

²⁵ Pse aí tše dafte te salvônje špirtin e tîje, e bíer: e aí tše biérte špirtin e tîje per mua, e gjẽn.

²⁶ Pse tše mîr kâ njeríu, nde gavenjefte gjiθ jeten, e biérte špirtin e tîje? O tše jep njeríu per pejés špirtit tîje?

²⁷ Pse i Biri i njeríut kâ te vĩnje te χjea Jatit tîje me ẽ́ngjeljit e tîje: e aχíera nganjé pagúan si te bẽnat e tîje.

²⁸ Per vertét ju θom, jân tsa nder kta, tše rrîn ketú, tše se kân te ndíenjen mórtien, njera te pafšin te Birin e njeríut, tše vete te rregjería e tîje.