S. Mat 15 - Šéiti Vangejlelj𝑒 si Matéu 1869 (Kalabria)

Krie XV.

¹ Aχíera vĩnjen te Džesúi ka Džerusalemi Skribra, e Farisera, tue θẽn:

² Pse δišípuljit e tû ljẽ̂n zakôn e piékjevet? pse nẽng ljanjen dúart e tire kûr χân buk.

³ E aí pergjegjur θa atire: E ju pse se bẽni órdenin e Tinzoti per zakonin têje? Pse Inzót kumandói, tue θẽn:

⁴ Nderó tet’ at e tet êm, e: Aí tše malkón atin, o êmen, vdekte mórtie.

⁵ Ju pra θoni: Aí tše θefte te jatit, o se jemes: Tsedó rrigâl vién ka ú, te bẽn mîr: e mos nderofte te jatin, o te jemen:

⁶ E škatarrúat ljedžen e Tinzoti per zakôn têje.

⁷ Ipókritra, mîr profetidzarti per ju Isaía, tše θôje:

⁸ Kejó gjind me kjaset me goljen e tire, e me buzen me nderón: po zémera tire ešt largu ka ú.

⁹ Pa‐vertét pra me nderonjen, tue mesúar mesúarat, ljedžat e njérezvet.

¹⁰ E po tše θerriti gjíndien, i θa: Mírreni veš, e deljgoni.

¹¹ Jo tše χîn te grika, pergón njeríun: po tše delje ka grika, pergón njeríun.

¹² Aχíera kjasur δišípuljit e tîje, i θân: E dî se Fariserat, po tše gjégjetin kto fiálje, u‐skandalidzartin?

¹³ E aí pergjegjur θa: Nga rrẽmb, tse se vû Tata im i kjíeles, kâ te jêt i škuljur.

¹⁴ Ljeni atá: jân te verber, tše kjélenjen te verber: e nde nje i verber kjelte njeter te verber, te di vên e bíen te gropa.

¹⁵ Piétri pra pergjegjur, θa atîje: Bẽn te deljgômi ket perralez.

¹⁶ E aí θa: Eδé ju jini pâ ndeljgîm?

¹⁷ Nẽng ndeljgoni, se tšedó χîn nde grikte, škon te barku, e štiχet tek pergonet?

¹⁸ Ató pestana tše vĩnjen ka grika, daljen ka zémera, e ató pergonjen njeríun:

¹⁹ Se ka zémera daljen pensiére te ljikje, te vrâra, aδultére, turpa grâše te ljígaše, kalúarit, martrî te rreme, malkime.

²⁰ Kto jân, tše pergonjen njeríun. Te ngrẽnit prana me dúart pa ljâre, nẽng pergón njeríun.

²¹ E dâlje atêje Džesúi u‐mbióθ nder anet e Tirit e Siδones.

²² E njô nje grua Kananê dâlje ka ató ân θerriti, tue θẽn atîje: Ki ljipisî per mua, oi Zot, bîr i Daviδit: bilja ime ešt e zẽn kekje ka špirti χúaje.

²³ E aí nẽng ju pergjekje nje fiâlje. E kjasur δišípuljit e tîje e parkaljésejen tue θẽn: Ljeje te vê: se θerrét prapa neše.

²⁴ Aí prana pergjegjur θa: Ú nẽng kjeva dergúar mosse per deljet e biérra te špîs Israélit.

²⁵ E ajó arδur, e aδoraren, tue θẽn: Zot, ndiχem.

²⁶ E aí pergjegjur i θa: Nẽng ešt mîr te marr buken e bíljevet e te ja štie kuljíševet.

²⁷ E ajó θa: Eχ, Zot: pse eδé kuljište χân derrúδet, tše bíen ka tríesa te zótravet e tire.

²⁸ Aχíera pergjegjur Džesúi, θa asâje: Grua, e maδe ê bessa jote: kjofte bẽn tîj si do. E u‐serúa bilja e sâje tše mb’ at χêr.

²⁹ E po tše škoi atêje Džesúi, vate rrêz detit Galilês: e ngjitur te malji, u‐ulje atié.

³⁰ E u‐kjásetin atîje gjinde šûm, tše kišen me tá múngera, te verber, šankatra, sdernatra, e šûm te tiêr: e i štûn perpara kẽ́mbevet Džesúit, e i šerói:

³¹ Sa gjindet bẽn e kjintrojen tše šíχejen múngera tše fjísejen, šankatra tše étsejen, te verber tše šíχejen: e ndêrien Tenzôn e Israélit.

³² Džesúi prana, θirrur δišípuljit e tîje, θa: Ljipísenje gjíndien, se kâ trî dit tše rrîn me mua, e se kân tše te χân: e ti ljê te vên esul nẽng dua, se te mos ti biêr zaljî uδes.

³³ E i θôn δišípuljit e tîje: Kâ neve te éremi akje buk, sâ te ndẽ́ndemi akje gjinde?

³⁴ E Džesúi θot atire: Sâ kravelje kini? E atá θân: Štat, e pak piškjiz.

³⁵ E kumandói gjíndevet, t’ úlješin mbe trúal.

³⁶ E mârre štat kraveljet, e piškjit, po tše rrin‐gradziárti, i tšáiti, e i δa δišípuljevet e tîje, e δišípuljit gjíndies.

³⁷ E χẽ́ngertin gjiθ, e u‐ndẽ́ndetin. E ka tsopat tše kjintrúan, ndzúartin štat športa piót.

³⁸ E atá tše χajen, išen kater mîlje burra, vetše grâte e te vígjeljit.

³⁹ E po tše lja te vejen gjindet, u‐ngjit te varka: e vate te anet e Mágδales.