S. Mat 14 - Šéiti Vangejlelj𝑒 si Matéu 1869 (Kalabria)

Krie XIV.

¹ Nd’ at mot gjegje Eroδi tetrarka émerin e Džesúit:

² E θa šerbetorvet e tîje: Kî ešt Janje Tista: aí u‐ngre ka te vdékurit, e pre kte fukjît šurbenjen tek aí.

³ Pse Eroδi zẽnur Janjin, e ljiδi: e e vû nde filjakjî per Eroδíaδen te šokjen e Feljipes vláut tîje.

⁴ Pse Janji θôje atîje: Ti nẽng mund kêš até.

⁵ E si dúaje te vrit, ju‐trẽmb gjíndies: se e mbajen si profete.

⁶ Arδur prana dita e te ljerit Eroδit e bilja Eroδíaδes ljúajeti atié nde mest, e i peljkjéu Eroδit.

⁷ Prandái i taksi me bê ti jip asâje até tše te ljípneje.

⁸ E ajó porsitur perpara ka e jema: Ẽm mua, i θa, ktu mbi ket taljûr kríet e Janje Tístese.

⁹ E u‐χeljmúa rregji: po per pajet bêvet, e atíreve tše išen bašk, kumandói ti jipej.

¹⁰ E dergói ti prísejen kríet Janjit te filjakjía.

¹¹ E kríet e tîje kje siél mbi nje taljûr, e kje δẽn vášezes, e kejó ja kjeli se jemes.

¹² E vatur δišípuljit e tîje, múartin kurmin, e e vûn nde varret: e arδur ja rrefíejetin Džesúit.

¹³ E po tše e gjegje Džesúi, u‐mbióθ atêje nde nje vark, te nje vente i vetem menjân: e po tše e gjégjetin gjindet, vân pas atîje mbe kẽmb ka χorat.

¹⁴ E dâlje Džesúi, pâ šûm gjinde, e pat ljipisî per ta, e šerói te semuret e tire.

¹⁵ Ardur prana mbrémanet, ju‐kjásetin δišípuljit e tîje, tue θẽn: Vendi ešt pa‐njerî, e χera eδé škoi: lje gjindet, te vên te katundet, se te biénjen per ta te ngrẽnit.

¹⁶ E Džesúi θa atire: Se kân ku te vên: jipni atire ju te χân.

¹⁷ E atá i θân: Nẽng kemi ktu se pes kravelje, e di piškje.

¹⁸ E aí θa: Silni mua atá ktu.

¹⁹ E po tše kumandói gjíndevet t’ úlješin mbi baret, mârre pes kraveljet, e di piškjit, tue rúajetur te kjíela i bekói: e po tše i tšáiti, δa bukte δišípuljvet, e δišípuljit gjíndevet.

²⁰ E χẽ́ngertin gjiθ, e u‐ndẽ́ndetin. E me tsopat tše kjintrúan ndzúartin dimbeδiét kufa piót.

²¹ E atá tše χajen išen pes mîlje burra, vetše grâte, e te vígjeljit.

²² E mbiátu Džesúi štíjeti δišípuljit e tîje te χipjen te varka, e te škojen perpara atîje mbatân, njera te lješóneje gjindet.

²³ E po tše lješói gjindet, u‐ngjit te malji i vetmiθ te parkaljésneje. E arδur mbrémanet, iš atié i vetem.

²⁴ Po varka iš nde mest dêtit škunduljisur ka suvaljat: se ájeri iš kunter.

²⁵ E tek e káterta vidžílie e nátese, vate tek atá Džesúi tue etsur mbi déitin.

²⁶ E pâr δišípuljit até tše étsneje mbi déitin, u‐tarakstin, tue θẽn: Se ešt umber. E per trẽmbsî θerrítetin.

²⁷ E mbiátu folji atire Džesúi, tue θẽn: Bẽni zémer: jam ú, mos trẽmbi.

²⁸ E pergjegjur atîje Piétri θa: Zot, nde jê ti, kumandóm te vĩnje tek ti mbi ujet.

²⁹ E aí θa: Eja. E po tše u‐kalâr ka varka Piétri, étsneje mbi ujet per te vêje te Džesúi.

³⁰ Pâr prana ájerin e fort, u‐trẽmb: e si zêje e mbitej, θerriti tue θẽn: Zot, salvóm.

³¹ E mbiátu Džesúi ndéitur doren, e rrembéu: e i θa: Njerî pak‐béssie, pse mbete i rrejirtur?

³² E χipur atá te varka, papsi ájeri.

³³ E atá te varka, vatur, e aδorartin, tue θẽn: Vertét jê Biri Tinzoti.

³⁴ E po tše škúan mbatân, vân te δeu Dženésarit.

³⁵ E si e njoχtin njérezit e atîje vendi, dergúan per gjiθ ató ân, e i kjeltin perpara gjiθ atá tše išen kekje:

³⁶ E e parkaljésejen ti ngísejen vetmiθ poδên e te véšures tîje. E sâ e ngân, u‐šerúan.