S. Mat 13 - Šéiti Vangejlelj𝑒 si Matéu 1869 (Kalabria)

Krie XIII.

¹ Nd’ at dit dâlje Džesúi ka špia, uljej rrêze dêtit.

² E u‐mbjoθtin mbân atîje gjinde šûm, akj sa pat χipej mbi nje vark t’ uljej: e gjiθ gjíndia kjintrói te zali,

³ E folji atire šûm me perralez, tue θẽn: Njô dúal aí tše mbíel, se te mbiêl.

⁴ E nde te štẽn faren, tsa râ per úδie, e érθetin zókjete e kjíeles, e e χẽ́ngertin.

⁵ Mê ditsá râ mbi guret, ku nẽng kišen šûm bot, e mbiátu ljeu, se ẽng kiš te pergjîrtur bótie.

⁶ E si dúal díeli u‐dokje: e pse nẽng kiš rrẽnje, u‐θâ.

⁷ E mê ditsá râ mbi drizat: e u‐rrítetin drizat, e e perpíjetin.

⁸ Mê ditsá prana râ mbi δéun e mîr: e krapissi, tsa mbe nje kjinte, tsa mbe trezét, tsa mbe triδiét.

⁹ Kuš kâ veš te gjegjet, é te gjegjet.

¹⁰ E kjasur δišípuljit i θân: Per tše i fiét atire me perralez?

¹¹ E pergjegjur aí, i θa: Pse juve ju kje δẽn te njiχni misteret e rregjerîs e kjíelvet: e atire nẽng i kje δẽn.

¹² Pse kuš kâ, atîje i jipet, e i mburonet: kuš pra nẽng kâ, eδé até tše kâ i mirret.

¹³ Per kte ú fiás atire me perralez: pse tue vréitur nẽng šoχen, e tue gjegjur nẽng marren veš, ne ndeljgonjen.

¹⁴ E beχet mbi atá profidzía Isaîs tše θot: Gjégjeni me veš, e nẽng diljgoni: e tue pâr vreni, e nẽng šiχni.

¹⁵ Pse u‐ndraš zémera e ksâje gjíndie, e gjégjetin me veš te nguret, e mbelíjetin sît e tire: se te mos síχejen me sît, e te gjégjejen me vešt, e te ndíejen me zémeren, e te priršin, e ú ti šeroja.

¹⁶ Po ljumt sît tâje se šoχen, e vešt tâje se gjegjen.

¹⁷ Se per vertét ju θom, se šûm profetra, e njerez te dréit dišerúan te šíχejen tše šiχni ju, e nẽng e pân: e te gjégješin até tše gjégjeni ju, e nẽng e gjégjetin.

¹⁸ Mandái ju mírreni veš perrálezen e atîje tše mbíel.

¹⁹ Nganjé, tše gjegjen fiáljen e rregjerîs, e nẽng e deljgón, vién i ljigu, e rrembén até tše kje mbiêl te zémera tîje: kejó ešt ajó tše u‐mbúal per úδie.

²⁰ Ajó prana tše u‐mbúal mbi guret, kî ešt, tše gjegjen fiáljen, e mbiátu e merr me χarê:

²¹ Po se kâ rrênje nde té, e ê pak‐moti. E si árθete χeljmi e te perzerit per pajet fiáljes, mbiátu skandalidzaret.

²² E ajó tše u‐mbúal te drizat, ešt kî, tše gjegjen fiáljen, e kuideša ksâje jétie, e e rrémia δivarit mbítenjen fiáljen, e nẽng krapissen.

²³ Ajó prana tše u‐mbúal mbi δéun e mîr, ešt kî tše gjegjet fiáljen, e e ndeljgón: aí per vertét krapissen, e bẽn tsa nje kjinte, tsa trezét, e tsa triδiét.

²⁴ Njater perralez i vû perpara atire, tue θẽn: Rregjería e kjíelvet u‐gjâ njeríut, tše mbúal faren e mîr te petku tîje.

²⁵ E kûr njérezit fiéjen, erθ armiku tîje, e mbúal égjer nde mest krapóit, e iku.

²⁶ E kûr štû bari, e krapissi, aχíera u‐duke eδé égjera.

²⁷ Kjasur prana šerbetoret e zotit špîs, i θân atîje: Zot, nẽng mbole fâr te mîr te δeu it? Prandái si kâ égjeren?

²⁸ E aí θa atire: Njerî armík beri kte. Šerbetoret prana i θân: Do tše vatur te mbiéδemi?

²⁹ E aí θa: Jo: se tue mbiéδur égjeren, te mos te škuljni bašk me té eδé gruret.

³⁰ Ljeni te rriten bašk njera nde te korra, e te moti te kórravet i θoni kórazvet: Mbjiδni perpara égjeren, e ljíδnie δomát per te dígjeni; krapúan prana mbjíδenie te katokji im.

³¹ Njater perralez i vû perpara atire tue θẽn: Rregjería e kjíelvet i gjet kokjes sinapit, tše mârr njeríu e mbúal te petku tîje:

³² Ajó per vertét ê mê e vógelje se gjiθ farat: kûr prana u‐rrítete, ešt mê e maδe nder gjiθ ljakrat, e bẽnet arvur, akje sa vĩnjen zókjete e kjíels, e bẽnjen foljê te deget e tîje.

³³ Njater perralez i rrefíeti atire. Rregjería e kjíelvet i gjet brumit θaret, tše mârr grúaja e peštíel te trî menza míel, njera te jêt i θaretúar gjiθ.

³⁴ Gjiθ kto šurbise rrefíeti Džesúi me perralez gjíndevet: e pâ perralez nẽng fjit atire:

³⁵ Se te beχej e θena e profetit tše θot: Ú χápenje me perralez goljen time, sbuljonje šurbise te šéχura, tše ka te zẽnit e jétese.

³⁶ Aχíera, ljeríer gjindet, vate te špia Džesúi: e ju kjásetin δišípuljit e tîje, tue θẽn: Bẽn te ndeljgónjemi perrálezen e égjeres te petkut.

³⁷ E aí pergjegjur θa atire: Aí tše mbíel faren e mîr, ešt i Biri i njeríut.

³⁸ Petku prana, ešt jeta. E fara e mîr, kta jân te biljte e rregjerîs. E égjerat, jân te biljte e te ljigut.

³⁹ Armiku prana, tše mbúal kto, ešt diáli. E te korrat, ešt te furnúarit e jétese: e kôrzit, jân ẽ́ngjeljit.

⁴⁰ Andái si mbjíδen égjerat, e digjen mbe ziárr: keštú vién nde te ljósurit e ksâje jétie.

⁴¹ I Biri i njeríut dergón aχíera ẽ́ngjeljit e tîje, e mbjíδen ka rregjería e tîje gjiθ skándalet, e gjiθ atá, tše bẽnjen te ljigen:

⁴² E i štíen te kamini ziárrit. Atié kâ te jêt te kjâr, e ngersima δẽmbeš.

⁴³ Aχíera te dréitit lamparísenjen si díeli te rregjería e Jatit tire. Kuš kâ veš te gjegjet, é te gjegjet.

⁴⁴ Papâ rregjería e kjíelvet i gjet terzúarit fšeχur te petku jašte: tše gjetur njeríu, e fšeχu, e pre χarên e tîje vete, e šet tšedó kâ, e bjên at petke.

⁴⁵ Papâ rregjería e kjíelvet i gjet merkantit, tše kerkón perna te búkura.

⁴⁶ E gjetur nje perne te štréite, vatur šiti gjiθ até tše kiš, e biéiti até.

⁴⁷ Papâ rregjería e kjíelvet i gjet rrítese e štẽn te dêti, e tše mbiéθ piškje gjiθ šórtie.

⁴⁸ Tše, kûr u‐mbiúa, po tše e χóljkjetin mbi zalin, e u‐uljtin, sgjóθtin te miret nde ruganjet, e te ljíkjete i štûn jašte.

⁴⁹ Keštú vién nde te ljósurit e jétese: daljen ẽ́ngjeljit, e sgjeδen te ljíkjete ne mes te dréitvet,

⁵⁰ E i štíen te kamini ziárrit: atié kâ te jêt te kjâr, e ngersima δẽmbeš.

⁵¹ I θot aθire Džesúi: Ndeljgúat ju gjiθ kto šurbise? I θôn atîje: Eχ, Zot.

⁵² E aí θa atire: Per kte nga skribe i mesúar nde rregjerît e kjíelvet, i gjet njeríut zotit špîs, tše ndzíer ka terzúari tîje šurbise te rea e te viétra.

⁵³ E kje, se furnúar Džesúi kto perralez, u‐nis atêje.

⁵⁴ E arδur te katundi tîje i mesói te sinagoga e tire, akje sa atá kjintrojen te marmaróst, e θojen: Kâ ktîje kjo urtesî, e kto fukjî?

⁵⁵ Ẽng ešt kî i biri miéštrit? Nẽng θuχet e jema tîje Maríe, e vlézerit e tîje, Jápeke, Sep, Simún, e Jûδe?

⁵⁶ E te motrat e tîje, ẽng jân gjiθ nder nê? Andái kâ ktîje gjiθ kto šurbise?

⁵⁷ E skandalidzárešin tek aí. E Džesúi i θa: Nẽng ešt profete pâ ndêr mosse te katundi tîje, e te špia tîje.

⁵⁸ E se beri atié merákulje šûm, per béssien tše atá se kišen.