S. Mat 12 - Šéiti Vangejlelj𝑒 si Matéu 1869 (Kalabria)

Krie XII.

¹ Nd’ at mot vate Dšesúi njéi te štúnie ndemés te mbiéljavet: e δišípuljit e tîje kišen û, e zûn te χíljkjejen kalinje, e te χajen.

² E Fariserat pâr kte, i θân atîje: Ši δišípuljit tẽnte bẽnjen tše se mund benet nde te štunet.

³ E aí θa atire: Nẽng δiavastit tše beri Daviδi, kûr pat û, e atá tše išen me té:

⁴ Se χiri aí te špia e Tinzoti, e χẽnger bukte e autarit, tše nẽng i ngit atîje te χâje, ne atire, tše išen me té, mosse príftravet vetem?

⁵ O ẽng δiavastit te ljedža se nde te štunat priftrat te kjiša kepútenjen te štunen, e jân pa‐ftesur?

⁶ Ju θom prana, se ktu ešt nje mé i maθ se kjiša.

⁷ E nde kišet njoχur, tše ešt: Ljipisî dua, e jo sagrifitse: nẽng kišet kundanartur te pa‐ftesmit:

⁸ Pse i Biri njeríut ešt i zoti eδé te štunes.

⁹ E nisur atêje, vate te sinagoga e tire.

¹⁰ E njô nje burr tše kiš doren e θât, e e píejtin, tue θẽn: Nde jipet nde te štunat te šerônje? se t’ e ngaljésien.

¹¹ E aí θa atire: Tsilji ešt nder ju, tše kâ nje delje te vetme, e nde kejó tek e štúnia i rafte nde nje grop, nẽng e rrembén, e e ngrên?

¹² Po sâ njeríu ešt mê i mîr se nje delje? Prandái nder te štunat mund bẽnje mîr.

¹³ Aχíera i θot njeríut: Ndêj doren tẽnde. E e ndéiti, e u‐prúar e têr si jatra.

¹⁴ Fariserat prana tše dúaltin atêje, múartin kundzilje kunter atîje, si te birjen.

¹⁵ E Džesúi tše e dîje iku atêje: e vân pas atîje gjinde šûm, e šerói gjiθ atá:

¹⁶ E kumandói atire te mos e kalzojen.

¹⁷ Sa te beχej tše u‐θa ka Isaía proféti, tše θot:

¹⁸ Njô dialji im, tše ú sgjoδa, i dášuri mîr i im, tek u‐ndẽnde zémera ime. Ú vê špirtin tim mbi até, e aí rrefíen džuδidzin gjíndevet.

¹⁹ Nẽng bẽn tsîlje, nẽng θerrét, e mosnjerî gjegjen kjátsevet vudžen e tîje:

²⁰ Nẽng tšân kálmerin e piást, e mitšin tšé bẽn kamnúa nẽng šúan, njera tše te múndenje ljedža:

²¹ E nd’ émerit tîje gjindet pantéχenjen.

²² Aχíera u‐bê perpara atîje nje i zẽn ka špirti χúaje, i verber eδé mung, e e šerói sa i vérberi e mungu fjit, e šiχ.

²³ E kjindrojen me grik χapte gjindet, e θojen: Mos ešt kî i biri Daviδit?

²⁴ Fariserat prana gjegjur kte, θân: Kî nẽng ndzíer δimonte mosse me Beldzebubin kréin e δimonvet.

²⁵ E pâr Džesúi trût e tire, i θa: Nga rregjerî e ndáitur nde vetχên, bẽnet e škret: e nga χôr, o špî e ndáitur nde vetχên, nẽng rrejiret.

²⁶ E nde satanassi ndzíer satanassin, u‐ndâ mbe vetχên: si kâ te rrie štúara rregjería e tîje?

²⁷ E nd’ ú per Beldzebubin ndzíer špirtrat e χúaje, biljte tâje per ke i ndziéren? Per kte atá kân te jên júδetšerat tâje.

²⁸ Nd’ ú prana per Špirtin e Tinzoti ndzíer špirtrat e χúaje, mandái erθ mê pâr mbi ju rregjería e Tinzoti.

²⁹ O si mund χĩnje njeríu te špia e te fortit, e ti kalônje mbroljat e tîje, nde mos ljiθte perpara te fortin? e aχíera mund i džéšenje špîn e tîje.

³⁰ Aí tše nẽng ešt me mua, ešt kunter meje: e aí tš’ ẽng mbiéθ me mua, šprišen.

³¹ Per kte ju θom: Nga ftesme, e malkím i ndeljenet njérezvet, po malkimi i Špirtit nẽng i ndeljenet.

³² E kuš θefte nje fiâlje kunter Birit njeríut, i ndeljenet atîje: kuš prana e θefte kunter Špirtit šéit, nẽng i ndeljenet jo te kjo jet, jo te ajó tše kâ te vĩnje.

³³ O bẽni árvurin te mîr, e frutin e tîje e bẽni te mîr: o bẽni árvurin te ljik, e frutin e tîje e bẽni te ljik: pse ka fruti njiχet árvuri.

³⁴ Rratsîm anapremteš, si mund fóljeni šurbise te mira, po tše jini te ljikje? pse ka te mburúarit e zémeres golja fiét.

³⁵ Njeríu i mîr ka terzúari mîr i zémeres ndzíer te mirat: e njeríu ljik ka terzúari ljik ndzíer te ljigat.

³⁶ Eδé ju θom, se nga fiâlje e mbrazet, tše θefšin njérezit, per até kan japen kunt te dita e džuδidzit.

³⁷ Pse ka fiáljet tẽnde ke te kêš δẽn ljikj, e ka fiáljet tẽnde ke te jêš i kundanartur.

³⁸ Aχíera u‐pergjékjetin ditsá nder Skribrat e Fariserat, tue θẽn: Δáskalje, dúami te šomi ka ti nje sinjâl.

³⁹ E aí pergjegjur θa atire: Dženeratsiûn e ljîge, e e škatarrúar kerkón sinjâl: e sinjâl nẽng i jipet ašâje, mosse sinjali Džones profétit.

⁴⁰ Pse si Džona kje te barku balenes trî dit, e trî nat, keštú kâ te rrie i Biri njeríut te zémera e δéut trî dit, e trî nat.

⁴¹ Burrat Ninivitra ngreχen te džuδidzi me ket dženeratsiúne, e e kundanárenjen: se atá bẽ̂n peniténdzie nde te preδikárturit e Džones. E njô ktu ešt nje mê i maθ se Džona.

⁴² Rregjereša e miesdítese ngreχet te džuδidzi me ket dženeratsiúne, e e kundanaren: pse erθ ka s’ ê mê δê se te gjegjet urtesîn e Salamunit, e ši ktu nje mê i maθ se Salamuni.

⁴³ Kûr pra špirti i pergúar daljte ka njeríu, štiχet per vende pa‐úje, tue kerkúar te préitur, e nẽng e gjẽn.

⁴⁴ Aχíera θot: Prírem te špia ime, ka dola. E arδur e gjet mbrazet, šîjetur, e stoljisur.

⁴⁵ Aχíera vete, e merr me té njeter štat špírtera mê te ljikje se aí, e χíjetur rrîn atié: e te prásemet dit te atîje njeríu beχen mê te ljiga se te parat. Keštú i vién eδé kesái dženeratsiúnie te kekje.

⁴⁶ Si aí fjit gjíndevet, njô e jema, e te vlézerit e tîje rrijen jašt, tše kerkojen ti fjísejen.

⁴⁷ E nje i θa: Ši se jat’ êm, e tû vlezer rrîn jašt, tše kerkonjen te te fiásen.

⁴⁸ E aí pergjegjur, θa atîje tše i fóljneje: Kuš ešt mema ime, e kuš jân vlézerit tim?

⁴⁹ E ndéitur doren mbi δišípuljit e tîje, θa: Njô mema ime, e vlézerit e mî.

⁵⁰ Pse kušdó te bẽnje veljemen e Tates tim, tše ešt nder kjíelet: aí ešt vlau im, e moter, e même.