S. Mat 11 - Šéiti Vangejlelj𝑒 si Matéu 1869 (Kalabria)

Krie XI.

¹ E kje, kûr Džesúi fernói te jip órdenet dimbeδiét δišípuljevet e tîje, se škói atêje te mesóneje, e te preδikóneje te χorat e tire.

² E Janji po tše gjekje te filjakjía te bẽnat e Krištit, dergúar di nder δišípuljit e tîje,

³ I θa: Ti jê aí, tše kâ te vĩnje, o presmi njeter?

⁴ E pergjegjur Džesúi θa atire: Vatur rrefíeni Janjit ató tše gjégjeni, e šiχni.

⁵ Te vérberit šoχen, šankatrat étsenjen, lebruste kjeronen, šurdrat gjegjen, te vdékurit ngjalen, e te némurit kân fiáljzen e mîr:

⁶ E ljum ešt aí, tše se márrete skandal tek ú.

⁷ E si u‐nísetin atá, Džesúi zû te θoje gjíndevet per Janjin: Tše vât te síχejet ju te éremi? nje kalmer tundur ka era?

⁸ Po tše vât te šíχejet? nje burr vešur nde te χola? Šini atá tše kjélenjen te χola, rrîn te špît e rrégjeravet.

⁹ Po tše vât te šíχejet? nje profét? Eχ ju θom, eδé mê se nje profét.

¹⁰ Pse kî ešt aí per ke kje škrúar: Šini ú ju dergonje ẽ́ngjelin tim perpara fakjes sate, tše kâ te dertonje uδen tẽnde perpara tîj.

¹¹ Per vertét ú ju θom, nẽng dúal nde te ljêrit e grâvet nje mê i maθ se Janje Tista: po aí tše ešt mé i vógelje te rregjería e kjíelvet, ešt mê i maθ se aí.

¹² Ka dítete prana e Janje Tístese njera naní, rregjería e kjíelvet do mârr pa‐χîr, e atá tše i štiχen siper e rrembenjen.

¹³ Pse gjiθ profetrat, e ljedža njera te Janji profetidzartin:

¹⁴ E nde doni te príteni mîr, aí ešt Elía, tše kiš te víneje.

¹⁵ Kuš kâ veš te gjegjet, é te gjegjet.

¹⁶ E kui kam te gjas ket dženeratsiúne? Ajó i gjet kriaturvet tše rrîn uljur nder kjátsete: e i θerresen šokvet,

¹⁷ E θôn: Ju kentúam, e nẽng ljúajetit: vaitúam, e nẽng kjáitit.

¹⁸ Pse erθ Janji tše nẽng χâje, nẽng pîje, e θôn: Kâ špirtin e χúaje.

¹⁹ Erθ i Biri njeríut tše χâ, e pî, e θôn: Njô nje njerî grik‐maθ, e njerî vérie, miku i gabeljotvet e te mekatrúamvet. E urtesía pat ljikje ka biljt e sâje.

²⁰ Aχíera zû e nemereje χôrvet, tek u‐bẽ̂n mê te šumet merákulje te tîje, se nẽng u‐metanósetin.

²¹ Mierezî tîj, Χorazín, mierezî tîj, Betsáiδe: se, nde Tîr, e Sidôn u‐kišen bẽn merákuljit, tše u‐bẽ̂n tek ju, kâ mot tše kišen bẽn peniténdzie nde θes e nde χí.

²² Frẽnge kte ju θom: Tirit, e Siδonit kan te jên mê te ljea penet te dita džuδidzit, se juve.

²³ E ti, Kapernaúm, tše jê ngréitur njera nder kjíel? njera te pisa kê te χumbeš: se, nde Soδem u‐kišen bẽn merákuljit, tše u‐bẽ̂n tek ti, ndoδ’ e kišen rrúar njera sot.

²⁴ Prandái ju θom, se katundit Sóδemes kan te jên mê te ljea penet te dita džuδidzit, se tîj.

²⁵ Nd’ at χêr pergjegjur Džesúi θa: Te skomolísenje, oi Tat, Zot i kjíeles e i δéut, pse fšeχe kto šurbise t’ úrtravet e te špéitravet, e ja buθtove te vígjeljvet.

²⁶ Eχ, oi Tat: se keštú kje mîr perpara tîj.

²⁷ Gjiθ šurbiset me kjen δẽn ka Tata im. E mosnjerî njeχ te Birin, mosse i Jati: ne te Jatin njeχ ndonjé, mosse i Biri, e kui i Biri dafte t’ e sbuljônje.

²⁸ Ngani tek ú gjiθ ju, tše šurbeni, e tše jini ngarkúar, e ú ju prẽnje.

²⁹ Mírreni zigúan tim mbi ju, e mesoni ka ú, se jam i but e i uljet zémerie: e gjẽni te préitur špírtravet tâje.

³⁰ Pse zigói im ešt i mîr, e barra ime ešt e ljê.