Jeremiah 7:20 - Zokam International Version

²⁰ "Tua ahi ciangin Thupipen TOPA gen hih ahi hi: Ka hehna le ka thangpaihna hih muna mihing tung le ganhing tung, lolai-a singkungte le leilaka singgahte tungah ka sungkhia dinga kangin a kiphelh zo kei ding hi.

LAISIENGTHOU CL Bible (BSI)

²⁰ Tuaziehin Mangpa Pasian in tambangin agen hi: En un, ka thangpaina, leh lungthahna, tam mun tungah leh mihing leh gamsa tungah tualeh gamlah singte leh leitung a theigate tungah ka sungbo dinga, aka dinga, akiphelmit sih ding hi.”

Zo Bible

²⁰ Tua ahi ziehin Topa in tam bangin gen hi: Tam mun, mihingte le ganhingte tung, lolai-a singkungte le lei lah singgate tungah ka lungthahna le ka thangpaina ka sung ding a, tua khu kuongin kiphel zo lo ding hi.

Jeremiah 7:20 ပူးပေါင်းရင်းမြစ်များ

2 Kumpite 22:17

Bang hang hiam cih leh amaute in kei hong taisanin pasian dangte tungah gimnamtui hal uh a, amau khuta a bawlsa uh milimte a-in kei hong phinin hong hehsak uh ahi manin hih mun tungah ka hehna kuang dinga a mit nawn kei ding hi,’ ci hi.

Isaiah 10:17

Israel-te Khuavak, mei suak dinga, amaute’ Siangtho Pa meikuang a suak ding hi; ni khat sungin kuang dinga a lingte le a thanglingte kangtum ding hi.

Isaiah 42:25

Tua ahi ciangin amaute tungah a hehna kuanglai le a gal ngongtat a sungkhia hi. Meikuang in tuamcip napi amaute in a theitel kei uh hi; amaute kang napi ngaihsutin a nei kei uh hi.

Isaiah 66:24

Tuateh amaute paikhia-in kei hong lehdo misiate luang a en ding uh hi; amaute than a si kei dinga, amaute mei zong mit loin mihing khempeuh in a kih ding uh hi," a ci hi.

Jeremiah 11:16

TOPA in nang, a hing kiuhkeuh a gah tawh a kilawm mahmah olive kung hong ci hi. Ahi hangin huihpi hat mahmah khat hawkin mei-in hong hal dinga, na hiangte a kitan ding hi.

Jeremiah 12:4

Bangtan vei gamsung vuaigawpin a lo sunga lopate vulgawp lai ding ahi hiam? Bang hang hiam cih leh tua gama tengte gilo uh a, vasate le gamsate mangthang khin ta uh hi. Tua tham loin mite in, "Ei tunga piangte hong mu kei na’nteh," ci uh hi.

Jeremiah 14:16

Tuateh amaute thugenna mite namsau le kialpi hangin Jerusalem kongzingte ah a kilawnkhia ding hi. Amaute, a zite a tanu a tapate uh a vui ding khat beek a om kei ding hi. Keimah in amaute thalawh tuahsiatna, amau tungah ka buaksuk ding hi.

Jeremiah 17:27

Ahi hangin ka thu hong mang loin Sabbath ni a siangtho-in na tan kei uh a, Sabbath ni-in Jerusalem kongpi tawnin van puasa in na pai teitei uh leh Jerusalem kongpite ah a kisumit thei lo mei ka tawhkuang dinga, tua in a kulh muanhuai a kangtum ding hi,’ ci in," hong ci hi.

Jeremiah 17:4

Na mawhna uh hangin kong piaksa gouluahna na taan ding uh hi. Note in ka hehna na tawhkuang uh a, kuangden ding ahi manin na theih ngei lohna uh gam na galte uh tungah sal kong suaksak ding hi."

Jeremiah 18:23

Ahi hangin TOPA aw, kei thah hong sawmna khempeuh uh nang na thei hi. Amaute khialhna maisak kei inla amaute mawhna nang muhna panin phiatkhiatsak kei in; na mai-ah lawnthal inla na heh hun mahin thuaksak pah ek in.

Jeremiah 21:12

David innkuante aw, hih in TOPA gen ahi hi: "‘Zingsang simin thutangin thu khen unla, a nengniampa khut panin a kisutgawppa hukhia un; tua hi kei leh na bawlsa uh gitlohna hangin ka thangpaihna mei bangin kuang dinga kuamah in a sumit zo kei ding hi.

Jeremiah 42:18

Hih in TOPA Israel Pasian gen ahi hi: ‘Jerusalem a tengte tungah ka hehna le ka thangpaihna ka buakkhiat bangin Egypt ah na pai uh leh ka thangpaihna kong bua ding hi. Note hong kihamsiatin, hong kilipkhapin, bangmah a kimang lo mawhpaihna thuakte na hi ding uh a; hih mun na mu kik nawn kei ding uh hi,’ ci hi.

Jeremiah 44:6

Tua ahi ciangin ka hehluatna ka sungkhia a; tua in Judah khuapite le Jerusalem kongzingte kangin kisia-a tuni-in kuamah teng loin kilawi hi.

Jeremiah 6:11

Ahi hangin TOPA thangpaihna tawh ka kidim a, ka thuak zo nawn kei hi. "Lamdunga naupangte tung le a kikaikhawm khangnote tungah ka hehna ka sungkhia hi; zite le pasalte pitek luate le putek luate tawh kiman khawm ding hi.

Jeremiah 6:12

Tua gama teng mite tungah ka khut ka zankhiat ciangin a inn a lote uh le a zite uh midangte tungah kipia ding hi." TOPA in cikhia hi.

Jeremiah 8:13

" ‘A khopsa uh ante ka lakmangsak ding hi, TOPA in cikhia hi. Lenggui tungah lenggah a gah kei ding hi. Theikungte gah nawn lo dinga a tehte keu ding hi. Amau ka piaksate ka laksak ding hi,’ a ci in," a ci hi.

Tamlawhna 4:11

TOPA in a thangpaihna a vekin suahkhia ta hi, a heh luatna a sungkhia hi. Mei-in Zion hala a bulpite a kangtum hi.

Ezekiel 22:22

Pummei ah ngun a tui bangin tuanu sungah na tui ding uh a, keimah TOPA in nang tungah ka thangpaihna hong sung ka hilam na thei ding hi,’ hong ci hi," a ci hi.

Ezekiel 7:12

A hun hi ta a, a ni tung ta hi. Mipi buppi tungah thangpaihna tung ahi manin a leite nuam loin a zuakte zong dah tuan kei hen.

Ezekiel 7:14

Amaute in kiging kholsa in pengkul mut ta le uh mihon buppi tungah ka thangpaihna tung khin ahi manin galkap dingin kuamah a kuan kei ding hi.

Daniel 9:11

Israel-te khempeuh in na thu hong mang nuam lo uh a, na thukhamte palsatin nang hong lehngatsan uh hi. "Tua ahi ciangin nang tungah kote mawh khin ka hi manun Pasian nasem Moses Thukham sunga kigelhsa hamsiatna le ciamsiatna thukhennate ko tungah hong kisung khin hi.

Siampi Laibu 26:28

tua ciangin ka heh dinga note hong langneihin kei mahmah in note na mawhna uh hangin a zah sagih vei val dan kong tuaksak ding hi.

Nahum 1:6

Ama lunghamna kua in nangzo ding hiam? Amah hehluatna kua in thuakzo ding hiam? A thangpaihna mei bangin a sungkhia hi; ama mai-ah suangtumte kitamzan hi;

Zephaniah 1:2

"Lei maitang panin na khempeuh ka phiatmai ding hi," TOPA in cikhia hi.

Zephaniah 1:3

"Mihing ganhing ka phiatmai khawm dinga; huihlak vasate le tuipi sunga ngasate ka phiatmai ding hi. Lei maitang panin mite ka khenkhiat ciangin migilote in van sia lomtang a bek a nei ding uh hi," TOPA in cikhia hi.

Zechariah 7:12

Amaute lungsim thausuang bangin saka thukham ahikeh Thahatpen TOPA in kamsang masate tungtawna ama Kha tawh a gen thute a ngai nuam kei uh hi. Tua ahi ciangin Thahatpen TOPA a heh mahmah hi.

Malachi 4:1

"A ni hong tung takpi ta hi; pummei-a kang hong bang ding hi. A kiphasakte le migilote khempeuh ninpa keu tawh kibang ding uh a, hong tung ding tua ni-in amaute meikhuk ah a khul ding hi," Thahatpen TOPA in ci hi. "A bul a hiangin amaute a kinusiat kei ding hi.

Matthew 3:12

Amah in buhhah-ciangka tawi-in, ama buh phual hahsiang dinga, atak teng a sal sungah koihin, asi teng a mit ngei lo mei sungah a khul ding hi," ci-in a hilh hi.

Kilaakna 14:10

amah in zong Pasian thangpaihna hai sunga kisungsa a lungsona a khauh mahmah lenggahzu a dawn ding hi. Amah a siangtho van sawltakte le Tuuno mai-ah kaat kuang tawh kigawt ding hi.