San Juan 7:28 - Zoque Copainalá New Testament

²⁸ Nʌ inʌc 'yaŋma'yoyu Jesús te' judio-templo'ojmo. Pijche'c weju'c nʌmu: Ispʌctambamisʌj y mustambamis jutʌpʌ'ʌjyʌ', pero te' wiyuŋšejpʌ Diojsisʌjte' cʌ'weju, y ñe'cʌ ja'nmis ispʌctame mista'm.

San Juan 7:28 ပူးပေါင်းရင်းမြစ်များ

San Mateo 11:27

Yʌ'šej cha'maŋwajcʌ'yu Jesujsis: Ʌs ŋgʌ'ojmo quiojtu ʌs Ndata Diojsis mumutiyʌ. Ya'iwʌ'sʌj ja'n ispʌqui ʌj, te' Diojsis 'Yune, juca ja'n ʌs Ndata's. Ni ʌs Ndataj ja'n ispʌcjay ya'iwʌ's juca ja'n ʌs, te' 'Yune's, y iwʌta'm te' 'Yune's sunba ya'ispʌquiaju. Te'ta'mbʌ maŋba ya'ispʌquiaju.

San Mateo 2:23

Y nu'cu'ctij tey, maŋu ijtu Nazaret-cumgu'yojmo, wa'y tyujcu nʌmyajušej te' tza'maŋwa'oyajpapʌ: Maŋba'n inʌc ñʌjayaju nazareno.

San Mateo 26:55

Pijche'ctij ñʌjayaju Jesujsis te' pʌnda'm: ¿Tiyajca'yʌ' nʌmindamba espada y cuy wa'misʌj nuctamu jujcha' nu'mbawʌ? Tumdumʌ jama inʌjcʌj pocspa miji'ŋda'm te' templo'ojmo, y aŋma'yopya inʌjcʌj, y jañuctamʌmisʌj.

San Lucas 10:22

Ʌs ŋgʌ'ojmo quiojtu ʌs Ndata's mumutiyʌ. Ya'iwʌ'sʌj ja'n ispʌqui ʌj, te' Diojsis 'Yune, juca ja'n ʌs Ndata's. Ni ʌs Ndataj ja'n ispʌcjay ya'iwʌ's juca ja'n ʌs, te' 'Yune's, y iwʌta'm te' 'Yune's sunba ya'ispʌquiaju. Te'ta'mbʌ maŋba ya'ispʌquiaju.

San Lucas 2:11

Que yʌtij pʌ'naju te' Davijtis quiumgu'yojmo te' maŋbapʌ'smij nyajcotzoctamu, y te'wʌte' te' CRISTO tʌ Ngomi.

San Lucas 2:39

Y chʌquiaju'ca mumutiyʌ chambašej tʌ Ngomi's 'yaŋgui'mgu'yis, maŋwʌtzʌquiaju Galilea-najsojmo, te' ñe'ta'm Nazaret-cumgu'yojmo.

San Lucas 2:4

Ijtu inʌc cumguy Galilea-najsojmo ñʌjayajpapʌ Nazaret. Teymʌ tzu'cumu José y maŋu Judea-najsojmo, y nu'cu Beleŋ-gumgu'yojmo pʌ'najumʌy inʌc David, porque José, Davijtiste' inʌc fyamilia's wyinboya.

San Lucas 2:51

Y wanajcu Jesús tyataji'ŋda'm y minu Nazarejtojmo y myato'ŋoyjayajpa inʌc ñe'cʌta'm. Y te' ñana's quioquenba inʌc mumu yʌ'šejta'mbʌ tiyʌ choco'yojmo.

San Juan 1:46

Natanae'lis ñʌjayu: ¿Putpasʌ'ŋ tiyʌ'iwʌ oyepʌ Nazaret-cumgu'yojmoc? Ñʌjayu Felipe's: Minʌ, quena.

San Juan 10:36

Ʌjte' te' yajmasa'najupʌ y quiʌ'wejupʌ najsacopajcʌsi ʌs Ndata Diojsis. Porque nʌmu'ʌj que Diojsisʌjyʌ' 'Yune, te'cotoya nʌjaytyambamisʌj que otowewʌ'ajapya'ʌs Dios.

San Juan 12:49

Porque jañchamʌ'ʌs ne' ŋgo'quips. Ʌs Ndata'sʌj cʌ'weju, y ñe'cʌ'sʌj aŋgui'mu jutzʌj wa'y nʌmu y jutzʌs wa'y ndzamu.

San Juan 14:10

¿Y ja'nja nwʌ'aŋjamdame que ʌj, ʌs Ndata's choco'yojmo'ʌj ijtu, y ʌs Ndataj ijtu ʌsne' ndzoco'yojmo? Y tiyʌta'mʌsmij ndzamjaytyamba ja'nde' ʌsne' ŋgo'quips ndzame, sino que ʌs Ndata'sñe', te' ʌs ndzoco'yojmo ijtupʌ, jujche'ŋ wʌta'mbʌ tiyʌ ñe'cʌ'ste' chʌcpa.

San Juan 14:31

Pero ʌs ndzʌcpa'ʌs aŋgui'muše'ʌj Ndata's wa'y myujšaju te' ja'n wyʌ'aŋja'moyapyʌ's que ʌs sunba'ʌs Ndata Dios. Tzu'cumdamʌ, y ma'nta'm.

San Juan 16:3

Y yʌ'šejta'mbʌ tiyʌ maŋba chʌquiaju porque ja'nʌj ispʌquiay ʌj ni ʌs Ndata Dios.

San Juan 17:25

Tatay, njyustopʌmijte'. Jana wʌ'aŋja'moye's ja'nmij ispʌquiay pero ʌs ispʌcpa'ʌsmij. Y yʌ' ʌs ŋgʌ'aŋmaye'sta'm myujšajpa que misʌjyʌ' ŋgʌ'weju najsacopajcʌsi.

San Juan 17:3

Iwʌ'smij ispʌcpa que mijte' te' tumʌpʌ y wiyuŋšejpʌ Dios, y ispʌcpa'ʌj que ʌjte' te' Jesucristo, y que misʌjyʌ' ŋgʌ'weju, te'wʌ's pya'twa'a ja'n yayepʌ quenguy.

San Juan 3:2

Yʌ'wʌ's minu 'yoto'ŋʌyu Jesús tzu'cʌsi, y ñʌjayu: Maestro, muspatʌs que Diojsismijyʌ' ŋguiʌ'weju wa'mij 'yaŋma'yoyu, porque ya'iwʌ's ja'n musi chʌjcu isaŋwʌ'ajcuy mis ndzʌcpašej juca ja'n quiotzowe Diojsis.

San Juan 3:33

Pero iwʌ's wyʌ'aŋjamba tiyʌta'm chamba, yʌ'wʌ's chamgopuŋba que Dios wiyuŋdzamba.

San Juan 5:32

Ijtu iwʌ'sʌj cotestigosajpa ʌj, y muspa'ʌs que ñe'cʌ'sʌj cotestigosajpašej wiyuŋbʌ tiyʌte'.

San Juan 5:43

Ʌj minu'ʌj ʌs Ndata Diojsis ñʌquiʌsi y ja'nmisʌj mbʌjcʌchoŋdame. Juca minba pʌn ñe' wyin chambapʌ's, te'wʌ jʌ'ʌ, mbʌjcʌchoŋdambamis.

San Juan 6:42

Y nʌmyajpa inʌc: ¿Ja'nja jeque te' yʌ'wʌ te' Jesús, te' Jose'is 'yune? Ispʌcjaytyambatʌ tyataj y ñanaj. ¿Tiyajca' jequeyʌ' nʌmba: Tzajpojmojcʌjyʌ' wanajcupʌ?

San Juan 7:14

Pero sʌ'ŋʌcujcoyj tʌjcʌyu Jesús te' judio-templo'ojmo y aŋma'yoquiʌ'yu.

San Juan 8:14

'Yaŋdzoŋyaju Jesujsis: Wempe ʌsne' nwin ndzamʌ, ndzambaše'ʌs wiyuŋbʌ tiyʌte', porque muspa'ʌs jutʌ'ʌjyʌ' tzu'cumu y jutʌ'ʌj maŋba. Pero mista'm ja'nmis mustame jutʌ'ʌjyʌ' tzu'cumu ni jutʌ'ʌj maŋba.

San Juan 8:16

Y juca ʌs ŋgʌme'tzpa iwʌjutiwʌ, wiyuŋbʌ tiyʌpi'tʌs ŋgʌme'tzpa porque ja'nʌjyʌ' naytyumʌpʌ, sino que ʌji'ŋ ijtu ʌs Ndata Dios cʌ'wejupʌ'sʌj.

San Juan 8:19

Ñe'cʌ'sta'm quiʌ'aŋwa'quiaju: ¿Juta' jeque ijtu mis Ndataj? Aŋdzoŋu Jesús: Ja'nmisʌj ispʌctame ʌj ni ʌs Ndataj. Juca inʌc misʌj ispʌctamba ʌj, ispʌcjaytyambamis inʌc ʌs Ndataj.

San Juan 8:26

Ijtu sone tiyʌcʌsi'ʌsmij wa'y ŋgotzamdamu y ŋgʌme'tztamu. Pero te' cʌ'wejupʌ'sʌj wiyuŋbʌ Tatajte', y tiyʌ'ʌj yajmatoŋu ñe'cʌ's, te'še'ʌs ndzamjayajpa najsacopajcʌsita'mbʌ.

San Juan 8:42

Pijche'ca Jesujsis ñʌjayaju: Juca inʌc Dios mista'm Ndataj, wiyuŋšej sundambamisʌj inʌc ʌj, porque ʌj, tzu'cumu'ʌj ijtumʌy Dios, y minu'ʌj yʌy. Jaminʌ'ʌj ne' su'noquiupyit, ñe'cʌ'sʌjyʌ' cʌ'weju.

San Juan 9:29

Muspatʌs que Moisés 'yoto'ŋʌyu Diojsis, pero ʌ'wʌ ja'ndʌs musi jutʌpʌ'ʌ'.

Hechos 17:23

Porque nʌ'cʌj ŋgʌtʌjcu'c mista'm ŋgʌna'tzʌ'oquiuy-tyʌjcaŋi, ŋguenu'ʌs ijtu inʌc sanduj-mesacʌsi yʌ'šej ja'yʌyumʌy: TE' JA'NDɅS ISPɅQUIPɅ DIOS. Te' mis ŋgʌna'tzʌytyambapʌ pero ja'n ispʌctamdʌ'ʌpʌmaj, te'wʌ'ʌsmijte' nʌ ndzamgopuŋjaytyamu.

Romanos 1:28

Y ñe'cʌ'sta'm quiomʌ'yaju juca ja'nde' 'yoyepʌ tiyʌ wa'y jyamwʌtzʌquiaju te' Dios. Te'cotoya Diojsis chaquiaju na' yacha'cuy wa'y quipšaju y wa'y chʌquiaju ja'n 'yoyeta'mbʌ tiyʌ.

Romanos 3:4

Nijutz ja'ne, sino que muspatʌ que Dios wiyuŋdzamba ñempe mumu pʌn sujchajpa. Yʌ'šej ja'yʌyu: Wa'y myujšaju que nwyiyuŋdzambapʌmijte' te' mis ndzamepit, y wa'mis nwʌyaju ñchʌjqui'šajpa'camij.

2 Corintios 1:18

Pero, como tzi'nda'nupʌte' Dios, tiyʌta'mdʌsmij ndzamjaytyamba ja'nde' jʌ'ʌ y ja'ne.

2 Corintios 4:6

Aŋgui'mu Dios wa'y šʌ'ŋjojpajcu sʌ'ŋgʌ' pi'tza'ŋajcʌ'ojmo. Yʌ' Dios sʌ'ŋjojpajcu tʌ ndzoco'yojmo wa'ytyʌ tzi'u nʌctʌ'yoquiuy. Yʌ'šej chʌjcu wa'ytyʌ musjayu Diojsis myʌja'ŋajcuy. Yʌ' mʌja'ŋajcuy tʌ ŋguendamba Jesucristo's wyinnacacʌsi.

Tito 1:2

Nʌ'ʌs nyosjayu Dios porque njo'cpa'ʌs ja'n yayepʌ quenguy te' chamdzi'oquia'upʌ Diojsis maŋba'cmaj tyujcu yʌ' najsacopac. Y Dios yajujche'c ja'n šutzi.

Hebreos 6:18

Te'šej jequeyʌ' metzapʌ tiyʌte' Diojsis ja'n quiacpʌ'i, y Diojsis ja'ndʌ musi sutzjaytyamu. Yʌ'šejtʌ paquitzi'tamba wa'ytyʌ tumʌtzocoy nite'tzʌytyamu ñe'cʌ, y nijamdambatʌ que maŋbatʌ mbʌjcʌchoŋdamu te' ñe'cʌ'stʌ tzamdzi'tamupʌ tiyʌ.

1 Juan 5:10

Iwʌ's wyʌ'aŋjamba Jesús, te' Diojsis 'Yune, myuspa choco'yojmo que wiyuŋšej quiotestigosaju Diojsis. Iwʌ's ja'n wyʌ'aŋjame Dios, nʌ quiomʌ'yu sutzpapʌte', porque ja'n wyʌ'aŋjame te' Diojsis quiotestigosajušej te' 'Yune.