San Juan 14:26 - Zoque Copainalá New Testament

²⁶ Pero ʌs Ndata's maŋba quiʌ'weju ʌs nʌquiʌsi te' Cotzo'ŋopyapʌ, y yʌ'wʌte' te' Espíritu Santo. Ñe'cʌ'smij maŋba 'yaŋmaytyamu mumutiyʌcʌsi, y nyajamwʌtzʌctamu tiyʌta'mʌsmij ndzamjaytyamupʌ.

San Juan 14:26 ပူးပေါင်းရင်းမြစ်များ

San Mateo 1:18

Y maŋba'cmaj pyʌ'naju te' Jesucristo, yʌ'šejte' tujcu: María, te' Jesujsis ñanaj, 'yemprendatzʌjcu Joseji'ŋ. Y antesquemaj tumʌtzʌquiajpa minu chejcʌyu te' Espíritu Santopit.

San Mateo 1:20

Y yʌ'šej nʌ quipsu'c Jose'is, yajquenu wyin ʌwyo'mo tʌ Ngomi Diojsis 'yangelejsis, y ñʌjayu: José, Davijtis wyinboya, uy cotza'ay wa'mis nʌtʌjcʌyu ndʌjcaŋʌ te' María ñempe tzejcʌwya'a, porque te' 'yune maŋba ijtuwʌ Espíritu Santo'ste'ñe'.

San Mateo 28:19

Te'cotoya maŋdamʌ, ma aŋmaytyamʌ mumu nacio'ŋojmota'mbʌ pʌn wa'yʌj co'ŋyaju jujcha' Maestro. Yajnʌ'yʌ'oytyamʌ te' Tata Diojsis ñʌquiʌsi, y ʌj, te' 'Yune's ñʌquiʌsi, y te' Espíritu Santo's ñʌquiʌsi.

San Mateo 3:11

Wiyuŋšej nʌ'ʌsmij nyajnʌ'yʌytyamu nʌ'pit wa'mij ŋguipswitu'tamu. Pero ʌs ucaŋgʌ'mʌc nʌ minu más mʌja'ŋbʌ que ja'n ʌj. Y myasa'najcupyit ja'n pyʌqui ni wa'yʌs nʌmaŋjayu wyacasnaca. Ñe'cʌ'smij maŋba nyajnʌ'yʌytyamu Espíritu Santopit wa'y pya'jayu mista'm ndzocoy.

San Marcos 12:36

Porque ñe'cʌ David nʌmu Espíritu Santopit: 'Yoto'ŋʌyjayu ʌs Ngomi te' Tata Diojsis, y ñʌjayu: Pocsa yʌy ʌs ndzʌ'na'ŋoyj mʌja'ŋajcu'yojmo, Nyajmaŋgopajcʌyajpa'cše'ŋo'yʌsmij te' ŋgui'nišajpapʌ'smij.

San Marcos 13:11

Y cuando ñʌmawʌtʌjtamba'cmij wa'mij ñchi'oquia'ʌtʌjtamu aŋgui'myajpapʌ's quiʌ'ojmo, uy jene quipstame wina tiyʌ mis maŋba ndzamdamu. Pero aŋdzoŋdamʌ lo que Diojsismij ñchi'tamba pijche'c wa'mis ndzamdamu. Porque te' Espíritu Santote' maŋba 'yaŋdzoŋu mijpitta'm.

San Lucas 1:15

Porque maŋba myʌja'ŋaju Diojsis wyi'naŋdʌjqui. Ja'n maŋu tyo'ŋu vino ni te' no'topyapʌ tiyʌ, y maŋba jyo'ʌyu Espíritu Santo's ñana'smaj chejcojmo ijtu'c.

San Lucas 1:35

Y 'yaŋdzoŋu te' angelejsis: Te' Espíritu Santo maŋba minu mijcʌsi, y te' tzajpojmopʌ's pyʌmi maŋba wyanajcu mijcʌsi cʌmʌŋšej. Te'cotoya te' Masanbʌ maŋba pyʌ'najupʌ maŋba ñʌjayaju Diojsis 'Yune.

San Lucas 1:41

Y yʌ'šej tujcu, myatoŋjayu'ctij te' Maria's dyujchi'oquiuy Elisabejtis, tʌpqui'mu te' 'yune chejcojmo y jyo'ʌyu Espíritu Santo's te' Elisabet.

San Lucas 1:67

Y jyo'ʌyjayu Espíritu Santo's te' une's tyataj, Zacarías, y tza'maŋwa'oyu ñe'cʌ y nʌmu:

San Lucas 11:13

Mijta'm, yatzita'mbʌ mbyʌnmijyʌ'. Y juca muspamis ndzi'tamu oyeta'mbʌ tiyʌ mista'm une, ¿cuantimastya'a tzajpojmo ijtupʌ mis Ndata Diojsis maŋbamij ñchi'tamu te' Espíritu Santo juca nwa'cjaytyambamis?

San Lucas 2:25

Y ijtu inʌc Jerusale'ŋojmo tuma'ŋbʌn ñʌjayajpapʌ Simeón, wʌpʌ y tumʌtzocoy wʌ'aŋja'mopyapʌ, nʌ inʌc jyo'cupʌ's te' maŋbapʌ's yajcotzoquiaju te' Israel-pʌnda'm. Y Espíritu Santo's inʌc quiotzoŋba Simeón.

San Lucas 24:49

Ʌs maŋba'ʌsmij ŋgʌ'wejaytyamu ʌs Ndata's chamdzi'oquia'upʌ tiyʌ. Pero tey jo'ctamʌ Jerusaleŋ-gumgu'yojmo hasta que mbʌjcʌchoŋdambamis ne'co'mo te' pʌmi tzajpojmoc wanacpapʌ.

San Lucas 3:22

Y quenequene'c wanajcu Espíritu Santo ñe'cʌcʌsi wiyuŋšejpʌ palomašej. Y pujtu tzajpojmocpʌ otowe, nʌmupʌ: Mijte' ʌs Une sunbapʌ'ʌs. Mijpi'tʌj tzocopyacpa.

San Juan 1:33

Y ʌs ja'ʌs inʌc musi juca Mesiaste'. Pero cʌ'weju'ʌj Diojsis wa'yʌj minu nyajnʌ'yʌ'oyu nʌ'pit, y ñe'cʌ'sʌj nʌjayu: Iwʌcʌsi mis ŋguenba nʌ wyanajcu Espíritu Santo y pocspacpa ñe'cʌcʌsi, te'wʌte' yajnʌ'yʌ'opya Espíritu Santopit.

San Juan 12:16

Wina tʌs, te' quiʌ'aŋmaye's, jañʌctʌ'yʌtʌs yʌ'šejta'mbʌ tiyʌ. Pero qui'mu'ca tzajpojmo te' Jesús, pijche'ctʌs njamwʌtzʌjcu que yʌ'šejta'mbʌ tiyʌ ja'yʌyupʌte' chambamʌy ñe'cʌ. Y yʌtij tucwa'a te'šej ja'yʌyušej.

San Juan 14:16

Y ʌs maŋba'ʌs nwa'cjayu Ndata Dios, y maŋbamij ŋguiʌ'wejaytyamu eyapʌ Cotzo'ŋopyapʌ. Ñe'cʌ maŋba chʌ'yu miji'ŋda'm mumu jamacotoya.

San Juan 14:25

Yʌ'šejta'mbʌ tiyʌ'ʌsmij ndzamjaytyamu yʌmya'ʌj ijtu'cše'ŋoyj miji'ŋda'm.

San Juan 15:26

Pero maŋba'ʌsmij ŋgʌ'wejaytyamu te' Cotzo'ŋopyapʌ. Te'wʌ maŋba chu'cumu ijtumʌy ʌs Ndata Dios. Te'wʌte' te' wiyuŋdzambapʌ Espíritu maŋba quiʌ'wejupʌ ʌs Ndata's. Te'wʌ'sʌj maŋba cotestigosaju ʌj.

San Juan 16:7

Pero ndzamjaytyamu'ʌsmij wiyuŋbʌ tiyʌ. Mijcotoyata'm pyʌcpa wa'yʌj maŋu. Juca ja'nʌj mawe ʌj, te' Cotzo'ŋopyawʌ's ja'nmij ŋguiʌ'mindame. Pero juca maŋba ʌj, maŋba'ʌsmij ŋgʌ'wejaytyamu.

San Juan 2:22

Te'cotoya, winsa'u'c ca'yajupʌ'ojmoc, tʌs te' quiʌ'aŋmaye's njamwʌtzʌjcutʌs que te'šej chamu. Y nwʌ'aŋjamutʌs te' Totojaye y te' Jesujsis chamušej.

San Juan 20:22

Y yʌ'se'a nʌmu'c sujutʌj y nʌmu: Pʌjcʌchoŋdamʌ te' Espíritu Santo.

San Juan 6:45

Yʌ'šej jya'yʌyaju tza'maŋwa'oyajpapʌ's: Diojsis maŋba 'yaŋmayaju mumu pʌn. Te'cotoya mumu iwʌ's quiʌmato'ŋʌpya tʌ Ndata Dios y aŋmapya, cʌ'minba'ʌj.

San Juan 7:39

Pero Jesujsis nʌte' inʌc chamu te' Espíritu Santo maŋba pyʌjcʌchoŋyajupʌ jujche'ŋ wyʌ'aŋjamyajpapʌ's ñe'cʌ. Jaminʌ'cmajte' Espíritu Santo, porque Jesús jayajmʌja'ŋa'cmajte' Diojsis.

Hechos 1:2

Yʌ'šej chʌjcu Jesujsis hasta tiyʌ jama pyʌjcʌchoŋu Diojsis tzajpojmo, chamjayaju'ca Espíritu Santopit tiyʌ wa'y chʌquiaju te' cʌ'we'ista'm te' ñe'cʌ's quiopiŋyajupʌ.

Hechos 1:4

Y tumʌ'ijtyaju'c, 'yaŋgui'myaju Jesujsis uy chu'cumyaju te' Jerusaleŋ-gumgu'yojmo, sino tey wa'y jyo'quiaju tʌ Ndata Diojsis chamdzi'yajupʌ tiyʌ. Te'šej chamjayaju Jesujsis. Y ñʌjayajque'tu:

Hechos 1:8

Pero maŋba minu mijcʌsita'm te' Espíritu Santo y maŋbamij ñchi'tamu pyʌmi. Maŋbamisʌj ŋgowʌ'aŋjamdamu Jerusaleŋ-gumgu'yojmo, mumu Judea y Samaria-najsojmo y mumu naswindumʌ.

Hechos 11:16

Pijche'cʌs njamwʌtzʌjcu jutz nʌmu tʌ Ngomi: Wiyuŋšej yajnʌ'yʌ'oyu te' Juan nʌ'pit, pero mijta'm maŋbamij ñʌ'yʌytyamu Espíritu Santopit.

Hechos 13:2

Y tey inʌc nʌ quiʌna'tzʌyaju tʌ Ngomi Dios yʌ'ta'mbʌ's, y nʌ 'yayunatzʌquiaju'c nʌmu te' Espíritu Santo: Copiŋbutjaytyamʌ'ʌj te' Bernabé y te' Saulo wa'y maŋu yojšaju te' ʌs ŋgʌ'wejyajpamʌy.

Hechos 13:4

Y te'šej quiʌ'wejyaju Espíritu Santo's. Y ñe'cʌta'm wanaquiaju Seleucia-cumgu'yojmo. Y te'ya tzu'cumyaju barco'ojmo y maŋyaju Chipre-isla'ojmo.

Hechos 15:28

Porque wyʌmʌ'yu Espíritu Santo's y tʌs uytyʌsmij maŋu'ŋmʌjcʌ ŋgotjaytyamu jujcha' tzʌmi sino que pyʌcpaše'ŋ:

Hechos 15:8

Y ispʌcjapya Diojsis mumu pʌ'nis chocoy y ñe'cʌ's pyʌjcʌchoŋyaju y chi'yaju Espíritu Santo jujcha' tʌ tzi'que'tu.

Hechos 16:6

Y cʌtʌquiaju Frigia y te' Galacia-najsojmota'm porque yajwinduquiaju Espíritu Santo's u'ya chamgopuŋyaju te' tzame Asia-najsojmo.

Hechos 2:33

Te'šej jeque, yajmʌja'ŋaju Diojsis ñe' chʌ'na'ŋojmoc. Y Jesujsis pyʌjcʌchoŋu te' Espíritu Santo, Tyata's chamdzi'ušej, y quiʌ'weju yʌ' yʌtijmis nʌ ŋguendamupʌ y matoŋdamupʌ.

Hechos 2:4

Pijche'ca pa'ŋna jyo'ʌyaju Espíritu Santo's. Y chamgʌ'yaju wi'ni eyata'mbʌ otowe, chi'yajpašej inʌc te' Espíritu Santo's wa'y chamdzamnayaju.

Hechos 20:28

Te'cotoya coquendamʌ ne' nwin y mumu wʌ'aŋja'moye-tu'mʌquiuy te' Espíritu Santo'smij ŋguiottamumʌy jujcha' coque'nopyapʌ. Aŋmayjaytyamʌ te' Diojsis tyu'mʌquiuy, te' jyuyupʌ ñe' ñʌ'pinbit.

Hechos 20:35

Mumutiyʌcʌsi'amʌsmij aŋmaytyamu jutztʌ wa'y nyojsu y pyʌcpapʌte' wa'ytyʌ ŋgotzoŋyaju quieñajpapʌ's yacsnu'ajcuy, y uytyʌ njambʌ'jayu Ngomi Jesujsis chame, nʌmu'c: Mastʌ dichoso'ajpa wa'ytyʌ saju y ja'n wa'ytyʌj tʌj tzi'yaju.

Hechos 28:25

Y jatyu'mbajcajya quipsoquiuytya'm, y maŋba'ca chu'cumyaju Pablo's ñʌjayaju: Wyiyuŋdzamjayaju tʌta'm ndataj te' Espíritu Santo's te' tza'maŋwa'opyapʌ Isaiajsis jya'yʌyupʌ tiyʌpit, nʌmu'c:

Hechos 5:3

Pero ñʌjayu Pedro's: Ananías, ¿tiyajca'nde' jyo'ʌyjayu Satanajsis mis ndzocoy wa'mis sutzjayu Espíritu Santo, y wa'mis nyajtzʌ'yu wene te' tumin ma'ʌyuše'ŋgʌsimis te' nas?

Hechos 7:51

Nguio'nuyuta'm mij, y nuyu mista'm ndzocoy, y ja'nmis nʌctʌ'ytyame. Nʌquipjojcʌtʌctambamis Espíritu Santo, chʌquiajušej mista'm ndata's, te'šej mis ndzʌctaŋgue'tpa mista'm.

Hechos 7:55

Pero como jyo'ʌyupʌte' Esteban Espíritu Santo's, quengui'mu tzajpojmo y quienjayu Diojsis chi'muŋgʌ', y tey inʌc ijtu Jesús te' Diojsis chʌ'na'ŋojmocpʌ mʌja'ŋajcu'yojmo.

Romanos 14:17

Diojsistʌ aŋgui'mba, pero ja'n wa'ytyʌ mba'ttamu cu'tcuy y ujcuy, sino que wa'ytyʌ tzi'tamu ñe'cʌ's justo'ajcuy, sʌ'mnaquiuy y oma, te' Espíritu Santopit.

Romanos 15:13

Y te' Dios, te' nite'tzʌytyambapʌmis, ñe'cʌ'smij nyajo'ʌytyamʌ wiyuŋšejpʌ omapit y sʌ'mnaquiupyit, porque nʌmis nwʌ'aŋjamdamu ñe'cʌ. Y te'šej wa'mis nite'tzʌyjojcʌtʌctamu te' Espíritu Santo's pyʌmipit.

Romanos 15:16

Y te'wʌpi'tʌj cojtu jujcha' Jesucristo's quioyosa te' genti'lojmota'm, y wa'yʌs ndzʌcjayu Diojsis yoscuy 'yevangelio'ojmo. Te'še'ʌj cojtu wa'yʌs nya'aŋguejyaju gentilta'm Diojsis wyi'naŋdʌjqui omombapʌ tzi'oquiuyšej masa'najupʌ Espíritu Santopit.

Romanos 5:5

Y te' nʌtʌ njo'ctamupʌ tiyʌ's ja'ndʌ tzactame tza'ajcu'yojmo, porque quiojtu Diojsis te' šu'noquiuy tʌta'm ndzoco'yojmo te' Espíritu Santopit te' tzi'upʌtʌ.

1 Corintios 12:3

Te'cotoya nyajmustamba'ʌsmij que ya'iwʌ tzamdzamnapyapʌ Diojsis 'Yespiritupit ja'n musi ñʌmu: Diojsis wyi'naŋdʌjqui tocoyupʌte' te' Jesús. Y ya'iwʌ ja'n musi ñʌmu juca ja'n Espíritu Santopit: Jesús tʌte' Ngomi.

1 Corintios 6:19

¿O ja'nja mustame que mista'm ŋgüerpo Espíritu Santo's te' tyʌc, y que ijtu te' Espíritu Santo mi'ojmota'm? Yʌ' Espíritu ñchi'tamumij Diojsis. Ja'nde' mista'mne' ne' nwin.

2 Corintios 13:14

Sunba'ʌs wa'y ijtu mi'ojmota'm tʌ Ngomi Jesucristo's yajya'moquiuy, y wa'mij šundamu Diojsis, y wa'mij ŋguiotzoŋdamu Espíritu Santo's, te' ijtupʌ mis ndzoco'yojmo. Amén.

2 Corintios 6:6

Nitza'mʌpyatʌs nwin tacscosujupʌ tzocopyit, mujsoquiupyit, pʌ'mgopajcu'yojmo, oye'ajcu'yojmo, Espíritu Santopit y wiyuŋbʌ su'noquiu'yojmo.

Efesios 1:13

Te'šejtijque' Diojsismij 'yune'ajtamu mijta'm Jesucristopit. Matoŋdamu'cmis te' wiyuŋbʌ evangelio, chambapʌ's jutztʌ cotzocpa, pijche'cmis nwʌ'aŋjamdamu tʌ Ngomi Jesucristo. Y chamdzi'oquia'ušej Diojsis, te'šejmij ŋguiʌ'wejaytyamu te' Espíritu Santo wa'y ijtu mis ndzoco'yojmota'm wa'y quieju que ñe'mijyʌ'ta'm.

Efesios 1:17

Nwa'cjapya'ʌs Dios wa'y ñe' 'Yespiritu'smij wa'y nyajnʌctʌ'ytyamu tiyʌta'm mij nyajquendambapʌ wa'mis te'šej ispʌctamu oye'c tʌ Ngomi Jesucristo's Dios, tʌta'm mʌja'ŋbʌ Ndataj.

Efesios 4:30

Y uy yajtuyuquiʌñe'ctame te' Espíritu Santo Diojsisñe', porque Diojsis quiʌ'weju ñe' 'Yespiritu Santo wa'y ijtu mista'm ndzoco'yojmo wa'mis mustamu que te' minbapʌ aŋsʌ'ŋoyj Diojsismij maŋba nyajcotzojcoctuctamu.

1 Tesalonicenses 4:8

Te'šej jeque, iwʌ's myenoschʌcpa yʌ' aŋma'yoquiuy, ja'nde' pyʌndʌwʌ nʌ myenoschʌjcu sino que te' Dios, te' tzi'tambapʌ'stʌ ñe' 'Yespiritu Santo.

2 Timoteo 1:14

Te' tʌta'm ndzoco'yojmo itpapʌ Espíritu Santopit, coquena te' Diojsismij ñitza'mʌyjayupʌ tiyʌ.

Tito 3:5

Ñe'cʌ'stʌ yajcotzoctamu, pero ja'n tʌta'm justota'mbʌ ndzʌquipit sino ñe' tyo'ya'ŋʌ'oquiupyit. Te'šejtʌ yajpʌ'najwʌtzʌctamu yajcowajtamu'ctʌ y tzi'tamu'ctʌ jomepʌ quenguy te' Espíritu Santopit.

Hebreos 10:15

Te' Espíritu Santo'stʌ yajmuspa que wiyuŋbʌ tiyʌte' wina chamu'c:

Hebreos 2:4

Y Diojsis yajquendaŋgue'tutʌ que wiyuŋdzamyaju chʌquiaju'c señalta'm, maya'aŋda'mbʌ tiyʌ y wi'ni eyata'mbʌ isaŋwʌ'ajcuy Diojsis pyʌmipit. Y quejque'tu chi'yatʌju'c te' Espíritu Santo ñe'cʌ's šunušej.

Hebreos 3:7

Y como pʌ'nista'mde' Quiomi yʌ' Cristo pyʌcpa wa'ytyʌ ŋgoquendamu cuenta te' Espíritu Santo's chamušej: Juca išo'pyʌ jamamis matoŋjaytyamba Diojsis chame,

Hebreos 9:8

Yʌ'wʌcʌsitʌ yajnʌctʌ'ytyamba te' Espíritu Santo's que ja'n inʌc musi ñempe'iwʌ tyʌjcʌyu te' Más Masanbʌ Luga'rojmo nʌmaj yojsu'c te' winbʌ Masanbʌ Lugar.

1 Pedro 1:12

Pero jʌsa'ca yʌ' tza'maŋwa'oyeta'm yajmujšatʌju que ja'nde' ñe'ta'm jyamo'oyj inʌc maŋba tyujcu te'šejta'mbʌ tiyʌ sino que tʌta'mde' jamo'oyjtya'm. Y yʌtij Diojsis nʌ quiʌ'wejyaju pʌnda'm wa'mij ñchamjaytyamu te'šejpʌ oyeta'mbʌ tiyʌ. Y minumij ñchamgopuŋjatʌjtamu te' evangelio Espíritu Santopit quiʌ'wejupʌ Diojsis tzajpojmoc. Y hasta te' tzajpojmopʌ angelejsista'm sunba myujšaju y ñʌctʌ'yaju te'šejta'mbʌ tiyʌ.

2 Pedro 1:21

Porque te' Diojsis masanda'mbʌ cha'maŋwa'oye'sta'm jachamya yajtiyʌ ñe'ta'm quipsoquiupyit sino que te' Espíritu Santo'ste' chi'yajupʌ quipsoquiupyit, porque te' Espíritu Santo's yajmujšaju tiyʌta'm oye wa'y chamyaju.

1 Juan 2:20

Pero mijta'm njyo'ʌytyamwa'mij Espíritu Santopit te' Cristo's, y mustamba'mis mumutiyʌ.

1 Juan 2:27

Pero mijta'm njyo'ʌytyamwa'mij Cristo's te' Espíritu Santopit, te' nʌ'ittamupa'mis mista'm ndzoco'yojmo. Te'cotoya ja'ndiyʌ pyena eyawʌ'smij wa'y 'yaŋmaytyamu, porque ñe'cʌ'smij 'yaŋmaytyamu mumutiyʌcʌsi. Y aŋma'yopya wiyuŋbʌ tiyʌpit y ja'n šutzi. Te'šej jeque co'ŋjojcʌtʌctamʌ Cristo te' Espíritu Santo'smij 'yaŋmaytyamušej.

1 Juan 5:7

Porque tuca'y ijtu tzajpojmo quiotestigosajyajpapʌ's te' Jesús: Tʌ Ndata Diojsis, te' Tzame's y te' Espíritu Santo's. Y yʌ' tuca'ytya'mbʌ tumo'oyjtya'm quipšajpa.

Judas 1:20

Pero mista'm, tʌwʌy, yajpaquipʌctamʌ mista'm Cristocʌsipʌ nwʌ'aŋja'moquiuy, y Espíritu Santo'smij yajcotzoŋdamʌ oto'ŋʌytyamba'cmis Dios.

El Apocalipsis 2:11

Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm. Iwʌ's ñʌwʌ'ajpa ja'n maŋu quia'u metza naco'mo.