1 Juan 5:6 - Zoque Copainalá New Testament

⁶ Yʌ'wʌte' te' Jesucristo te' minupʌ najsacopajcʌsi, y tiju ñʌ'yʌyu. Y yajca'yaju'c cruzcʌsi 'yumbʌ'jayaju ñʌ'pin. Ja'n na' tiju ñʌ'yʌyu, sino que 'yumbʌ'jayaju ñʌ'pin. Y te' Espíritu Santo's quiotestigosajpa, y te' Espíritu wiyuŋdzambapʌte'.

1 Juan 5:6 ပူးပေါင်းရင်းမြစ်များ

San Mateo 26:28

Porque yʌ' vino ʌsyʌ' nʌ'pin maŋba 'yumbʌ'jayajupʌ. Y maŋba pyaquitzi'u te' jomepʌ trato, y maŋba yajcotocoyjayu wʌwʌ pʌ'nista'm quiowa.

San Mateo 3:16

Y nʌ'yʌyu'ctij te' Jesús, qui'mbujtu te' nʌ'ojmo, y aŋwaju te' tzap y quienu te' Diojsis 'Yespiritu nʌ wyanajcu'c jujcha' wiyuŋšejpʌ paloma, y nu'cu ñe'cʌcʌsi.

San Marcos 14:24

Ñʌjayaju Jesujsis: Yʌ' vino ʌsyʌ' nʌ'pin maŋba 'yumbʌ'jayajupʌ. Y maŋba pyaquitzi'u te' jomepʌ trato, y maŋba yajcotocoyu wʌwʌ pʌn.

San Lucas 22:20

Ujcaŋbajcu'ca, pyʌjque'tu te' vaso, y nʌmu: Yʌ' vasote' te' jomepʌ trato ʌs nʌ'pinbit. Yʌ'wʌ maŋba 'yumbʌ'u mijcotoyata'm.

San Juan 14:17

Te'wʌte' te' Espíritu Santo, wiyuŋdzambapʌ. Iwʌ'sʌj ja'n wʌ'aŋjame ʌj ja'n maŋu pyʌjcʌchoŋu te' Espíritu porque ja'n quiene ni ja'n ispʌqui. Pero mis ispʌctambamis porque miji'ŋda'm ijtu, y itwa'a mista'm ndzoco'yojmo.

San Juan 14:6

Ñʌjayu Jesujsis: Ʌjte' te' ocnʌctu'ŋʌ'opyapʌ, ʌjpit myujšajpa wiyuŋbʌ tiyʌ, y ʌste' sajpa ja'n yayepʌ quenguy. Ya'iwʌ ja'n musi myaŋu ʌs Ndata Diosaŋʌ juca ja'n ʌjpit.

San Juan 15:26

Pero maŋba'ʌsmij ŋgʌ'wejaytyamu te' Cotzo'ŋopyapʌ. Te'wʌ maŋba chu'cumu ijtumʌy ʌs Ndata Dios. Te'wʌte' te' wiyuŋdzambapʌ Espíritu maŋba quiʌ'wejupʌ ʌs Ndata's. Te'wʌ'sʌj maŋba cotestigosaju ʌj.

San Juan 16:13

Pero minba'ca te' wiyuŋdzambapʌ Espíritu, ñe'cʌ'smij maŋba yajnʌctʌ'ytyamu mumu te' wiyuŋbʌ tiyʌ. Ja'n maŋu chamu te' ñe' quio'quips, sino que maŋba chamu jujche'ŋ tiyʌta'm yajmuspa Diojsis, y maŋbamij cha'maŋwajaytyamu maŋbamaj tyuquiajupʌ tiyʌ.

San Juan 3:5

Aŋdzoŋu Jesús: Wiyuŋše'ʌsmij nwiyuŋdzamjapya, iwʌ ja'n pyʌ'nay nʌ'pit y Espiritupit ja'n musi tyʌjcʌyu wa'y 'yaŋgui'mu Diojsis.

San Juan 4:10

'Yaŋdzoŋu Jesujsis: Ja'nmis ispʌcjay te' Diojsis yajya'moquiuy. Ja'nmis ispʌqui iwʌ'smijte' nʌ wya'cjayu nʌ'. Juca inʌc misʌj ispʌcpa mis inʌc nwa'cpa ʌjcʌsi, y ʌsmij inʌc ndzi'pa nʌ' šajpapʌ's quenguy.

San Juan 4:14

pero iwʌ's tyo'ŋba te' nʌ' ʌs ndzi'papʌ ja'na yoctʌtzque'temaj. Te' ʌs ndzi'papʌ nʌ' maŋba wyomjojcʌtʌjcu ñe'co'mo jujcha' wombamʌy nʌ', y maŋba wyipqui'mjojcʌtʌjcu choco'yojmo wa'y pya'tu ja'n yayepʌ quenguy ñe'cʌ's.

San Juan 6:55

Porque te' ʌs sis wiyuŋšejpʌ cu'tcuyšejpʌte', y te' ʌs nʌ'pin wiyuŋšejpʌ to'ŋguyšejpʌte'.

Hechos 8:36

Y te'šejtij nʌ tyu'ŋajyaju'c nu'quiaju ijtumʌy nʌ', y nʌmu te' eunuco: Yʌy ijtu nʌ'. ¿Tiyʌ'samʌj yajwinducpa u'yʌj nʌ'yʌyu?

Romanos 3:25

Y yʌ' Jesús chi'oquia'u Diojsis wa'y quioyojayu tʌta'm ŋgowa ñe' ñʌ'pinbit ca'u'c cruzcʌsi, y te'wʌ mbʌjcʌchoŋbatʌ wʌ'aŋjamgupyit. Yʌ'šej chʌjcu Diojsis wa'y yajqueju ñe' jyusticia, porque myatzcomʌ'nu 'yucaŋgʌ'mʌc te' ya'acta'mbʌ cowa ñe' pyacienciapit.

Efesios 1:7

Ca'u'c te' 'Yune Jesucristo cruzcʌsi, jupyujtutʌ ñe' ñʌ'pinbit. Y ñe'cʌpit Diojsis yajcotocoyjapya tʌ ŋgowa, porque aŋba'tepʌte' te' ñe' yajya'moquiuy.

Colosenses 1:4

porque matoŋutʌs que mista'm nwʌ'aŋjamdambamis Cristo Jesús, y que jene sundambamis mumu masanbʌnda'm.

1 Timoteo 3:16

Tiene que wa'ytyʌ ndzamu que mʌja'ŋbʌte' te' nʌtʌ nwʌ'aŋjamdamupʌ, te' Diojsis jayajqueyapʌ cʌtʌquiajupʌ aŋsʌ'ŋojmo. Yʌ'šejte' tujcu: Minu yajqueju Diojsis te' Cristo pʌnšej, Y chamu que justopʌte' Espíritu Santopit. Y quieñaju ñe'cʌ angelejsista'm. Chamgopuŋyajwa'a pʌ'nista'm te' nacio'ŋojmota'm. Wyʌ'aŋjamyajwa'a najsacopajcʌsita'mbʌ's. Y yajmʌja'ŋajwa'a Diojsis tzajpojmo.

Tito 3:5

Ñe'cʌ'stʌ yajcotzoctamu, pero ja'n tʌta'm justota'mbʌ ndzʌquipit sino ñe' tyo'ya'ŋʌ'oquiupyit. Te'šejtʌ yajpʌ'najwʌtzʌctamu yajcowajtamu'ctʌ y tzi'tamu'ctʌ jomepʌ quenguy te' Espíritu Santopit.

Hebreos 10:29

Más na'chaŋ maŋba quio'aŋgʌyaju te' ja'n myato'ŋoyjayapyʌ's te' Diojsis 'Yune, y myaŋgocʌtʌcpa te' trato chʌjcupʌ Jesujsis ñe' ñʌ'pinbit. Yʌ'wʌ's yajmasa'najtʌ'u, pero jyojtʌjcʌyu te' Espíritu Santo tzi'papʌ'stʌ yajya'moquiuy.

Hebreos 12:24

Y teymʌ itque'tu Jesús, y ñe'cʌpit tujcu te' más oyepʌ trato. Y ñʌtʌjcʌyu ñe'cʌ's ñe' ñʌ'pin que más oye yajyojsu que ja'nde' Abe'lisñe'.

Hebreos 13:20

Diojsis yajwinsa'u tʌ Ngomi Jesucristo ca'yajupʌ'ojmoc. Yʌ'wʌte' te' mʌja'ŋbʌ ñchowambe-coque'noye, y ñe' ñʌ'pinbit tujcu te' ja'na yayepʌ trato. Yʌ' Dios, yajwinsa'upʌ's Jesús, yʌ'wʌ'ste' šajpa sʌ'mnaquiuy.

Hebreos 9:14

Pero Cristo's chi'oquia'u cowatacapʌ wyin Dioscʌsi, te' ja'n yayepʌ Espiritu's pyʌmipit. Te'cotoya Cristo's ñʌ'pin maste' pʌmi'ʌyupʌ wa'y yajcowajayu tʌta'm ndzocoy u'yandʌ ndzʌjcu te' ja'n yojšapyʌ tiyʌ, sino que wa'ytyʌ nyosjayu te' quenjojcʌtʌcpapʌ Dios.

Hebreos 9:7

Pero te' Más Masanbʌ Luga'rojmo tumnacatij tʌjcʌpya tumdumʌ ame ñaytyumʌ te' mʌja'ŋbʌ sacerdote. Ñʌtʌjcʌpya inʌc copʌn-nʌ'pin wa'y quioyoju ñe' quiowa y eyata'mbʌ pʌ'nista'mñe'.

1 Pedro 1:2

Tʌ Ndata Diojsis quipsu ya'ajca wa'mij ŋguiopiŋdamu mijta'm. Te'cotoya mumu mijta'm ŋguiopiwi-pʌnda'mdijmijte'que'. Y te' Espíritu Santo'smij nyajmasa'najtamu wa'mis mato'ŋoyjaytyamu Jesucristo y ñe' ñʌ'pinbit wa'mij ŋguiowajtamu mis ŋgowapit. Sunba'ʌs wa'mij Diojsis aŋba'te'c nyajyamdamu y wa'mij ñchi'tamu sʌ'mnaquiuy.

1 Pedro 3:21

Te'šejpʌ cotzojcuy yospa yʌtij jujcha' comparación tʌcotoyata'm. Nʌ'yʌ'pya'ctʌ nyajquejpatʌ que cotzocwa'ndʌ u'yandʌ ca'uwʌšej ittamu Diojsis wyi'naŋdʌjqui sino que tumʌtzʌctamwa'ndʌ Jesucristoji'ŋ ñe' wyinsa'cu'yojmo. Porque tʌ nʌ'yʌ'oquiuy ja'nde' wa'ytyʌ ŋgotze'tamu ŋgüerpo sino que wa'ytyʌte' nʌ'ittamu oyepʌ tzocoy Diojsis wyi'naŋdʌjqui.

1 Juan 1:7

Juca Diojsis šʌ'ŋgʌ' tʌ nʌtu'ŋajapya, sʌ'ŋjapyašejtʌ ñe'cʌ's, wiyuŋšejtʌ tumʌquipspa Diosji'ŋ, y Diojsis 'Yune's, Jesucristo's ñʌ'pi'nis yajcowajapya mumu tʌ ŋgowa.

1 Juan 4:10

Quendamʌ jutztʌ sundamba Diojsis. Ñempetʌ inʌc tʌ ja'n sundame ñe'cʌ, ñe'cʌ's wiyuŋšej sundambatʌ. Quiʌ'weju te' 'Yune wa'y chi'oquia'u wyin wa'y quioyojayu tʌta'm ŋgowa ca'u'c cruzcʌsi.

El Apocalipsis 1:5

Te'šejtʌ tzi'que'tpa Jesucristo's, te' jicapyʌ testigujsis, te' winbʌ winsa'upʌ ca'yajupʌ'ojmoc pʌngotoyata'm. Te'wʌte' te' cowi'na najsacopajcʌsita'mbʌ re'yisñe'. Mʌja'ŋgotzamda'mitʌy yʌ' Cristo, te' sundambapʌ'stʌ, te' yajcotocoyjayupʌ's tʌ ŋgowa 'yumbʌ'u'c ñʌ'pin tʌcotoyata'm.

El Apocalipsis 5:9

Y nʌ inʌc wyañaju jomepʌ wane nʌmbapʌ: Miste' pyʌcpa wa'mis mbʌjcu te' libro y wa'mis ndzijtzjʌcʌ'jayu te' libro's šello porque mijte' te' cʌmnʌ'pinbʌ Ñchowambe yajca'yajupʌ. Y njupyujtumis Dioscotoya mis nʌ'pinbit wʌwʌ pʌn, mumu raza'ojmota'mbʌ, wi'ni eya otoweta'mbʌ, jujche'ŋ najsacopac-iti y mumu nacio'ŋojmota'mbʌ.

El Apocalipsis 7:14

Aŋdzoŋu'ʌs y nʌjayu'ʌs: Señor, bieŋdijmis muspa. Y te' anciano's nʌjayu'ʌj: Yʌ'ta'mbʌ pujtyajupʌyʌ' te' yacsnutzʌquiatʌjumʌy. Yʌ'ta'mbʌte' te' yajcotocoyatʌjupʌ y quiotze'yatʌjupʌ quiowapit Ñchowambe's ñʌ'pi'nojmo.