Jonibai We Ma Boroyari Sina 5:6 - Yareba

⁶ Nana mui Reka Mamoe erena emema urebaitaro uitebasute ibebasu, i ari i Dera Yawoeta Amaranu iboro inaibiro i me ibene ibene ibeta emeru fonu iboroini i dera uwaraini ema nesia Dawa ode kara utaro ere. I Mamoe Danu yawera nesiana seweni. Nono Danu diti nesiana seweni. I diti seweni ina Godinu Imumu seweni. Godima imumu seweni ema siaia uiro orofa atata aika maikaro anita.

Jonibai We Ma Boroyari Sina 5:6 ပူးပေါင်းရင်းမြစ်များ

Rukanu 1:69

Godima Danu we bou ueta uwaranu bebeturoma bodere wei enanari utasu. Godima mui amara Deiwidinu sisia uwarabairoma ma uyari. I Amarana bunawere ma wiroeta Amara.

Joninu 1:29

Etei mui kowaro Jonima eriro Yesu farebina Jonima wei, eawe, Godinu Reka Mamoe waita amara ido farinu. Dana i orofa atata uwara nesianu neno neno ueta mubite abe sabisu wei.

Afosoro 8:32

I amaranu yawitebi sinana edono, Emema mamoe ma uifitae mune anaitana mamoe arua wiawa utasu o mamoenatunu iji turaitana arua wiawa utasu enanari emema Dawa ma uifitae mune anitana arua wiawa ui.

Jonibai We Ma Boroyari Sina 1:4

Na Joni, nanu sina ya Eisia orofaro dubu su seweni (7) ibinita uwaraba owawa ue odatane. Nanu ununa Godi Dana boderewere ibebe awonaini daido ibinu, nono duburo fafisu, Dawaini Dana i urero dera yaubetabai ibinu Amara, Dawana Godinu botai uietaroma uyari Amara, Dawana i orofa atata yawoeta dera uwaranu yawoeta dera kofiri. Nanu ununa Godini Imumu sewenini Yesuini emana yaba kobererau durua ufitate emanu wesarau ueta yaba mafitae watane. Yesu Keriso Dana ya uwara nesiaba neno arama uteda yaba uiro Danu onono itariba Dana ya nesia yanu siosawere uetabairoma mune aika odi. Dana ya uwara nesia dera yawoeta uwaraini Danu Damama Godinu fuyo ode sina weta uwara we mune odiba Dawabai buna derawereini araeta derawereini me ibene ibene ibifie watane, nanu sina ido.

Jonibai We Ma Boroyari Sina 12:11

Yanu naiyemutu, I Reka Mamoe Dana emaba uite Danu onono itariro emanu naueta Dawabai oitate Danu sina webitaba i wawei weta amara serigari uta. I uwara ema i uietaba iyarawa utebita. Emanu naueta derawereba eme emanu unu ema ma uifitae utaba iba uitebita.

Jonibai We Ma Boroyari Sina 13:8

Ewa nasiniro ibifitaita uwara nesia i buna egi ari emerubai guriguri ufitaitarogo nono i Reka Mamoema moana uwara, Godinu ane ane nesia ubu utawa kowaro, emanu ifu ifu i ba ui Reka Mamoenu me ibene ibene ibeta uwaranu bukaro owawa ue odiba emana i buna egi ari emerubai guriguri da ufitaita.

Jonibai We Ma Boroyari Sina 14:1

Nana nanu tubetuberoma erebe erena i Reka Mamoema Saioni maidaniro inaibiro ere. Dana inaibiro uwara wani aderedi foti fo tausani dawaini inaibita. I uwara nesia emanu befororo Danu ifuini Danu Damamanu ifuini owawa ue odiba iro inaibitaro ere.

Jonibai We Ma Boroyari Sina 17:14

Ema nesia i Reka Mamoeini urafitaita. Nono i Reka Mamoeini Danu we mune odiro buribi anegou utebita uwaraini emana i dera yawoeta uwara ma serigari ufitaita. I Reka Mamoena Dana i dera uwaranu Dera Amara. Dana i dera yawoeta uwaranu Dera yawoeta Amaraba iba i uwara ma serigari ufisu wei.

Jonibai We Ma Boroyari Sina 21:22

Nana erena iro dera dubu su ibawa ui. Yanu Dera Waria bunawere Godi Dawaini i Reka Mamoeini emanu torowana i dera dubu su ari.

Jonibai We Ma Boroyari Sina 21:23

Godinu araetama i tauniro ario utebiro i Reka Mamoe Dawaini i tauninu arioba kowaini sakarama iro ario utawa ui.

Jonibai We Ma Boroyari Sina 22:1

I aneruma ma wiroeta ogo roatarau kurisa waita gebiro ari taritari uteda Godini i Reka Mamoenu dera yauretaroma fari wiroeta ogo mawetu uiro ere.

Jonibai We Ma Boroyari Sina 22:3

Iro ba me aramawere ibaiabaina me. Irona Godini i Reka Mamoenu dera yaureta ibifiro Danu gaukara ueta uwarama Dawabai guriguri uteibitaita.

Jonibai We Ma Boroyari Sina 4:8

I fo me ibene ibene ibeta ememetu ema nesia demui demui emanu fakinana nesia sikisi (6) bobo. Diti faiyawere emabai ibita. Ubareroini wawaroini nesia wate fare ibita. Emana dumuroini kowaroini wate eno webaita, i Dera Waria buna derawere Godi Dawana kobererau, Dawana kobererau. Dana bodere ibebe awonaini daido ibinuba duburo fafisu. I sina imoiteda wiawa daido eno weiene weiene utebaita.

Jonibai We Ma Boroyari Sina 5:11

Nana nono erebe nauena aneru faiya faiyawerema weroroka webitaro naue. Emana i dera yaure yawoetanu orofaini i me ibene ibene ibeta emeru foini i dera uwara tueniti foini ode kara utate soni derawere eno weita, i utaro ui Reka Mamoe Dawana kobererauro bunawereba Dana yawoetaini gugua gubarini iwata uetaini buna derawereini mubisu. Emema Dawabai Danu ifu we ma derawere ufitate we ma kobererau ufitaro Godima Danu araeta mafisu, eno weita.

Jonibai We Ma Boroyari Sina 5:13

Nana nono nauena Godima ubu uiro ibinita ememetu nesia, nasiniro ibinitaini urero ibinitaini nasini wowonaro ibinitaini enea ogo ubarero ibinitaini ema nesia soni weitaro naue. Emana soni eno weita, i dera yaure yawoetanu orofaro yaubinu Godi, Dawaini i Reka Mamoeini ema sadeibai we ma kobererau uteibitate emanu ifu we ma derawere uteibitaro araeta derawereini buna derawereini emabai me ibene ibene ibifisu, eno weita.

Jonibai We Ma Boroyari Sina 5:14

Eno weitaro i me ibene ibene ibeta emeru foma weita, ina ido weitana i dera uwara tueniti foma arubi uteda guriguri utaro ere.