18 Inimmeu Jesus: ―A'abo em neu am toja ―ti ameu jiiak.
Bempo intok: ―Kaita te im jipue, mamni paanim intok wooi kuchum jiba ―ti au jiiak.
Junak intok aapo, juka' yoemrata, bajpo am joote saek intok chukula jume' mamni paanim intok jume' wooi kuchum am nu'uka, jikau bitchuka, Liojta a' baisaeka am rebekta taitek. Jume' a' majta'ummeu am bwisek. Inime'e intok junae yoemratat am na'ikimtek.
Junak intok, juka' yoemrata, nat wikiaka am jootesaeka amet nesawek. Intok jume' woo busanim paanim nu'uka, Liojtau bicha nok suka, am rebektataitek. Junak intok, a' majta'ummeu am manak. Jume' a' majta'um intok, yoemrata bichapo am manak.
Junak intok ju'u Jesus: ―Si'imem inime'e, eme'e am jote'esaune ―ti jiiak. Junama bem ane'epo tua basotukan. Jume' intok junama jotekame jumak mamni miil o'owimtukan.
