Roma 8:17 - Allah Wene Hurumbik Keron

¹⁷ Eke nit At Allah udaki wereg nisalug, At udaki ahien inobam umbukon etno nit inim-at og nisahu-o. Eke Aren angge At Kristus og iruhuon etno nit inim-at og nisahu-o. Eke At Kristus ninim dahon etno ninobam umburuk isalug, At ninim-at suontep nisaharuk aruhu-o.

Roma 8:17 ပူးပေါင်းရင်းမြစ်များ

Matius 16:24

Yig ituk apareg, eke fobik omini epmano yig isaruk wilil, “Hit An ninim sil nuruk amuhuken ulug hinahla buruk ahep halug, yi angge di angge hinindi hunduhuk welahebon epmano sohorep isalug, hinahe salib etno hinomalo fam holalug, An ninim-at sil nuruk amuhuk-o.

Matius 25:21

Yig ituk apagma, at ikni etnowen yig ituk wilil, ‘Hat nanggimbu hobabut fanoroho wilil yabuk suk harug fanowon etno ilitoho-at sirikin-o. Eke uang anggen dorat oke, fanoroho aso welatikin ari famen, fobik uang anggen anggolo aso welamag ulug minduhup hahakuk-o. Ariroho minduhup hahakuk ari, an hikni ninim ninahien hahuken ninim kuhuk-o,’ ulug yig epag-o.

Lukas 12:32

At Yesusen yig isaruk wilil, “Hit udag doron dia, hinakol ha fug-o. At Hinikni etnowen fobik ahientoho At wereg ambeg hinombisahaku-o.

Lukas 24:26

Eke At Kristus etno Inowe suon welamag ulug, yi angge di angge dahon obam embeheg elegma suon welaruhu-o ulug hinahla buruk ahep ano?” ulug yig isebag.

Yohanes 17:24

Eke Haren it inebe etno og nitikinteg fam, it inebe An wereg ambeg epma ninim welam nindi-o. It inebe epma wilil, Haren suontep naharuk ahenon etno inilanggen hahup-o. Eke Haren o kweanma duma awan wal haruk eleg wilil, An nobam hindi hunduhuk welahenag-o Nikni.

Kisah Para Rasul 14:22

Laruk apareg, it aphe o epma Allah wene warukon epmano inesanggo watuk wilil, “Hit At Allah weregma kuhuben yi wene di wene dahon epmano hinobam umburuk iseheg, At Yesusen wene ebahon epmano fanoroho eberoko waruk amuk-o,” ulug yanggul isaruk apareg,

Kisah Para Rasul 20:32

Eke kidia anden At Allah hinabua hisarukon etnowen hinaso welamag ulug At apma hinombisaharuk ahi-o. Ariroho hinombisaharukmu, eke Aren hinindi oag werehep hisaharuk wilil, At udaki ahien isaruk etno hag, hit ariroho-at ahien hisahu-o.

Kisah Para Rasul 26:18

Eke haren it aphe o hikmu neken werehon epmano inebe selegmaroho imbisaruk wilil, iniluk inabukag ulug minduhup hahakireg fam, it inebe at iblis apma werehon epmano sohorep isalug, At Allah apma imbisahun-o. Ariroho suruk aruhunmu, it aphe obohen An ninuk eberoko waruk wilil, iren dag suruk atuson epmano sohorep isalug, At Allahen fuloko imbisebareg fam, At udaki-at welamuhup-o,’ ulug At Yesusen yig nitisi-o,” ulug eke at Paulusen yig isarisi.

Roma 5:17

Eke at ap misihen dag sebahon etno, alem neken weregma, alem waratukon etno oag wereg apag ari demat ulug niniluk-o. Eke at ap misig Yesus Kristusen sebahon etno fam alem niniluk welamon etno wereg apag ari, suon oag werehon neken-at wereg apag-o. Eke ariroho wereg apag ari fam, it yi aphe di aphe At Allahen inabua isalug, alem dahon inobam weregma elehepfukon etno onggo eleg-at og isaruk heheg, At Yesus Kristus inim wilil suon-at welamuhup-o.

Roma 8:3

Eke ninebe kweanmon etnowen fano suk ninoag elegma, at wene duroho suruk amuk eke duroho suruk am fug ulug ebahon etnowen fano ninabuk hai atision oke, At Allahen fano ninaptisi-o. Eke At Allahen Amloho etno it ap kweanmon inebe dag surukon epmano ilitoho belabik waharuk wilil, At Kristus obam alem dag surukon epmano onggo umbukag ulug belabik wapareg fam, alem dag surukon epmano oag deloko elehepfebag-o.

1 Korintus 2:9

Eke wene misig du Alkitab fam weregma yig nisaruk wilil, “It aben inilanggen haruk apag fuhon etno inim eke inesanggo holtuk apag fuhon etno inim eke inindi ebetuk apag fuhon etno inim, At Allahen nit aphe At obam hinindi hunduhuk welaheon etno og nisiog ulug dugsoho ninombisahabag-o.”

2 Korintus 1:5

Eke At Kristus obam dahon anggolo embebag epmano hag, ninobam umburukon oke, eke At Kristus ahlahiroho welapag etno hag, nit ninahlahiroho welamag ulug yig nisaruk-o.

2 Korintus 1:7

Eke ari halug, hit hinoag weregsoho welamuhup ulug ninahla buruk ahe-o, eke nit dahon ninobam umburuk epmano hag, hit hinobam umburukon oke, eke nit ninahlahiroho welamag ulug yig nisaruk etno hag hit yig hisaruk ari niniluk-o.

Galatia 3:29

Eke hit hinebe At Kristusen angge welahep halug, at Abraham etamuki neken welahep-o. Eke hit at Abraham etamuki neken welahep halug, At Allahen og hisahuk ulug abug yig epahon etno hit-at og hisahu-o.

Galatia 4:7

Eke ari halug, hit anggimbu neken welamon etno sohorep isalug, At Allah udaki neken welahep-o. Eke At udaki neken welahep ari fam, At Allahen udaki og isawon etno obog-at og hisahu-o.

Efesus 3:6

Eke wene misig heraho welapahon bukaloko yig isarision etno duroho yig isarisi-o, bilin it Yahudi ap At Allah ahien inobam embebahon oke, kidia wene fano wene yig isil lawon etno fam it bilin Allah wene inapeleg welatuson epmano inim-at ahien inobam umburuk-o.

Filipi 1:29

Eke hit hinabua hisaruk wilil, At Kristus anggimbu welamon etno og hisarisireg fam, hiren At Yesus obam ebetuk ahep-o. Eke At awene ebetuk ahep etno fam dahon etno hinobam umburuk-o.

Filipi 3:10

Eke At Kristus ebe niluk welamon etno inim, eke At ebe iluk atlug minapareg fam oag werehon og nisawon etno inim, eke At obam dahon umburusa etno hag an nobam umbukon etno inim,

Kolose 1:24

Eke an hit hinake neken dahon etno nobam umburukon oke, nahientoho welahi-o. Nahientoho wilil, At Kristus etno udaki inake bilin war ariog ulug indi dag apag etno hag, an atog ilitoho neken kidia nindi dag atuk ahi-o.

Titus 3:7

Eke At Yesusen nit ninonggo baltisireg fam, At Allah ninim dambul atukukseg, niniluk welamon etno og nisa­hu-o ulug ninindi ebetuk wilil, niniluk welamon etno huluog ulug suruk ahe-o, ulug wene ari demat yig hirihi-o.

Ibrani 1:14

Ari halug, it malaikat etno sa ilitoho wereg buruk ahep-o? It inebe ari, aphe inahut neken wilil, At Allah inuk yig isarukon At anggimbu-at wereg-o. Eke it aphe inili holahubon etno inaso welamag ulug At Allahen-at lahap isaruk-o. Ariroho lahap isaruk halug, it ineyabuk ari-at wereg-o.

Ibrani 1:2

eke kidia At Amloho etnowen wene etno yig nisaruk atisi-o. Ariroho yig nisaruk atisi ari, At Allahen Amloho yi angge di angge unde welamag ulug minduhupfebahon etno, At Allahen at inuk fam o ahik ya da wal hebag-o.

Ibrani 6:17

Eke At Allahen ariroho og hisahuk ebahon etno it epmanowen demat og nisahu-o. Aren enggal-at ulug sohorep nisahaku fug-o, ulug inahla bukag ulug aren yig isaruk wilil, “An og hisahuk yig hisihi ari, An ninuk fam demat yig hisihi-o,” ulug yig isebag.

Yakobus 2:5

An nune etno fanoroho holiek-o. It aphe o kweanmen inaharek elehon epmano At Allah udaki welamag ulug Aren fuloko imbisaruk weregma, iren inindimu fikfag ebetuk wilil, At Inikni inindi hunduhuk wereg isalug, At Allah weregma imbisiog ulug abug yig isebahon etno fam ombatawag ulug fuloko imbisarisi-o.

1 Petrus 1:4

Nit ninebe ketoho ninombisahiog ulug weregma, fobik fanowon etno At udaki og nisahu ulug ninindi ebetuk ahe-o. Og nisahuon etno dag atlug, eleg am nowen ulug, o boholma dugsoho umburuk-o.

1 Petrus 4:13

At Kristus welapag etno ilitoho atikipseg, hinahientoho wilil, fobik At ninim ilitoho suon amuhuk-o, ulug hinindi ebetuk amiek-o.

Wahyu 21:7

Eke it inoag weregsoho anduhunmu welamuhubon etno An nudaki neken yi angge di angge obog-at og isahuk-o. Eke iren, “Ninikni Allah,” ulug yig nituk amuhup-o. Eke Anden, “Nudaki-o,” ulug og inaptuk aruhuk-o.

Wahyu 3:21

Eke it inoag weregsoho anduhunmu welamuhubon epmano An kidia Nikni ombandu bikit fil su­on-at welahi etno hag, it epmano og inaplug An nombandu fil welamag ulug suontoho imbi­sahuk-o.