Matius 6:2 - Allah Wene Hurumbik Keron2 Eke it aphe inaharek elehon epmano dorat og isaruk wilil, hininuk suontepfukag ulug binggon une uk fug-o. Eke it inindi demat ulug ebetuk elehon epmano nininuk suontepfukag ulug o Allah wene uruk ambeg epmano inim, kwalema apheyen onggo anggolo hundutuk ambeg epmano inim ariroho suruk-o. It ariroho surukon epmano onggo fanowon etno og isahu fug-o, ulug An demat yig hisaruk ahi-o. အခန်းကိုကြည့်ပါ။ |
At Yesusen yig isaruk wilil, “Hit orom nenggeg eleg wilil bok welamuog ulug suruk ahep ari, it nin inindi inenggal neken werehon epmanowen suruk hag hit suk fug-o. It epmano orom nenggeg eleg wilil, bok welamuog ulug suruk ari, apheyen inilanggen nisawag ulug inolohore dag atuk-o. Ari halug, onggo fanowon etno fobik og isahu fug-o, ulug An demat yig hisaruk ahi-o.
At Yesusen yig isaruk wilil, “Hit sembahyang uruk wilil, it aphe inindi demat ulug ebetuk elehon etno ilitoho welam fug-o. It epmano sembahyang o Allah wene uruk ambeg inim, eke kwalem handohalma inim sembahyang yaron uruk am inindi-o. It apheyen inilanggen nisawag ulug-at sembahyang uruk-o. Ari halug onggo fanowon etno og isahu fug-o, ulug An demat yig hisaruk ahi-o.
Eke hinaharek anggolo wereg halug, uang anggen anggolo fam onggo baloko it inaharek elehon epmano og isaruk amiek-o. Eke hinahuang eset fanowon umburuk ahep etno hag, boholma hinaharek ombataruk amiek-o. Epmen hinaharek epmano olohore dag aheg eleg weregma, it ap heraharukon epmanowen diloko herag seheg eleg, bak sumbuen baleheg eleg surukmu, fano mondog wereg-o.
“It ap Allah wene baleg unde epmanowen hinindi kahaluk nowen hinonggarehen hinindi aso welamuk-o. Eke it epmano inasum yaron yiko wantepfulug kwalemke yuhun-at sil nuruk wilil, o onggo hundutuk ambeg epmano it apheyen nininuk suontepfuruk wilil heahi war ninabukag ulug sil nuruk am inindi-o. Ariroho sil nuruk wilil, o Allah wene uruk ambeg ap suon inahe belareg epmano fam horie eheg, eke wam waroko esoho suon esetuk ambeg epmano kulug anggela-at horie eheg suruk-o.
Eke, hat hilanggen e asenggep suon weregma hilanggen halug eleg-at homin etno yig ituk wilil, ‘Nomin wai, hilanggenma e asenggep ari wilipminen bok amin-o,’ ulug keroho yig um-o? Henggal-at uruk ahenon du, bilin e asenggep suon hat hilanggenma etno wilipfulug, fobik e asenggep homin ilanggenma werehon etno wilipfik ulug wal hahun-o,” ulug At Yesusen yig isebag.
Ilanggen haruk apareg, akoltoho weregma, at malaikat etnowen yig ituk wilil, “Kornelius wai,” ulug yig ituk apagma, aren, “Hat nongge yig niriog ulug wahen-o?” ulug yig ituk apagma, at malaikat etnowen, “Haren sembahyang eheg, aphe inabuen yi angge di angge og iseheg surukmu, At Allahen habua hearisi-o.
Eke nineyabuk aphe inindi oag werehep isawon etno og nisarisi halug, etno ilitoho-at suruk amuk-o. Eke yi angge di angge menag isaruk amon etno, ninindi seberoho-at wilil, menag isaruk amuk-o. Eke aphe inindi aso welamon etno yabuk ninarug fanoroho-at suruk amuk-o. Eke it aphe inabuen surukon epmano ninindi ninahientoho-at suruk amuk-o.
Ari Allah wene yig isawon etno og hisarisi etno fam, Allah wene yig isaruk amuhup-o. Eke yalmag isawon etno og hisarisi etno fam, yalmag isaruk amuhup-o. At Allahen nineyabuk ninakeleg sik og nisebag etno fam, ariroho-at suruk amuhuk-o. Ariroho suruk amuhukmu, At Yesus Kristus inuk fam Allah-at nintul nantul suontepfuruk amuhuk-o. At Yesus Kristus suon oag weregsoho itog mondog werehon etno-at inuk suontepfuhuk-o. Demat yig hisihi-o.