Kisah Para Rasul 19:8 - Allah Wene Hurumbik Keron

⁸ Uruk atusama, at Paulus etno it o Allah wene uruk ambeg kuruk atisireg, bikalem henahan wilil, it aphe epmano At Allah weregma welamon wene etno wawag ulug yig isarukmu, iren onggo yig ereheg, suruk atusa.

Kisah Para Rasul 19:8 ပူးပေါင်းရင်းမြစ်များ

Kisah Para Rasul 1:3

Inambeg laruk apareg, it epmano demat inahla bukag ulug ininggik empat puluh inim wilil, inilanggen hebag. Inilanggen haruk apagma, Aren wene Allah weregmen sukon etno yig isebag.

Kisah Para Rasul 13:14

Laruk apagma, eke it nin epmano o Perga epmanowen o Antiokhia Pisidia etno wapag. Waharuk apareg, o hari Sabat fam it o Allah wene uruk ambeg etno kuruk apareg, horie ebag.

Kisah Para Rasul 13:46

Enggali watuk apagma, it Paulus Barnabas etanowen inakol elegsoho yig isaruk wilil, “At Allah awene etno bilin hit-at yig hisuog ulug welahe-o. Ariroho yig hisuog ulug welahe oke, eke hiren ninambit-o ulug uruk wilil, hinili wawon etno sohorep isehepseg fam, niren hit yig hisao sohorep hisahalug, it Allah wene inapelehon epmano-at yig isa lahuk-o.

Kisah Para Rasul 14:1

It Paulus Barnabas etano o Ikonium wilil, it Yahudi Allah wene uruk ambeg epmano kuruk apareg, wene yig isaruk apagma, it Yahudi ap inim eke it Allah wene inapelehon inim anggolo-at eberoko waruk apag.

Kisah Para Rasul 17:17

Ambit atuk atisireg, it Yahudi ap o Allah wene uruk ambeg etno kuruk atisireg, it Yahudi ap inim, it Allah wene warukon nin inim, it onggo hundutuk ambeg nintul nantul waharuk atuson epmano inim wene yig isarukmu, iren onggo yig ereheg suruk atusa.

Kisah Para Rasul 18:19

Ariroho suruk atisireg, eke fobik o Efesus larusa. Laruk atusareg, at Paulus etno it Priskila Akwila sohorep isalug, it o Allah wene uruk ambeg etno kuruk atisireg, inim wene uruk atusa.

Kisah Para Rasul 18:26

Ariroho iluk wilil, akol elegsoho-at it Yahudi ap o Allah wene uruk ambeg epmano yig isarisi. Yig isaruk atisimu, it Priskila Akwila inesanggo holtuk atusareg, at ebe walug inibam kurusa. Kuruk atusareg, iren At Allahen sebahon epmano fikfag yanggul itusa.

Kisah Para Rasul 18:4

Og ituk atusareg weregma, at Paulus etno it Yahudi ap inim, it Yunani ap inim, wene wawag ulug nintul nantul it Yahudi ap o Allah wene uruk ambeg epmano kuruk atisi.

Kisah Para Rasul 19:10

Eke at ebe tahun biren inim wilil, yig isaruk heheg, it Asia aphe inim, eke it Yahudi aphe inim, eke it Allah wene holtuk elehon inim, obog-at Allah wene inesanggo holtuk atusa.

Kisah Para Rasul 19:9

Ariroho surukmu, it nin inindi arikon epmano wene weheg eleg wilil, At Yesusen sebahon epmano it aphe obog inil fam seberoho embeheg suruk atusama, at Paulus etno it sohorep isaruk atisireg, it omini epmano og inaplug at Tiranusen sekolah yanggul isaruk ambeg etnowen nintul nantul inim uruk atusa.

Kisah Para Rasul 20:31

Ariroho suruk isalug, an tahun henahan wilil nintul nantul ioba yatuk wilil, hit obog yanggul hisaruk atikikon epmano fanoroho hinindi ebetuk amuk-o.

Kisah Para Rasul 28:23

Yig ituk atusama, o ari sambit wene uhuk, ulug at Paulus inim uruk atusareg, it inebe obog at Paulus wereg ambeg wonggalik waharusa. Wonggalik waharuk atusama, at Paulusen Allah weregma sukon wene etno ilikia hubet yig isarisi. Yig isaruk mondog weregma, o hupmu atisi. Eke o ari fam yanggul isaruk wilil, at Musaen ebahon etno yig iseheg, eke it nabien wene holal embebahon epmano yig iseheg suruk wilil, At Yesus ari Kristus at-o ulug iren eberoko wawag ulug yig isarisi.

Yudas 1:3

Nomini-o, alem At Allahen hit hinili warukon etno holal baloko og hisaminen ulug bihireg fam, fobik it inenggal urukon epmano hit hinune yig isahuben ulug holal baloko og hisaminen ulug nahla bihi-o. Wene At Allahen udaki yig isebahon etno waruk wilil welamuhuben ulug yig hisaminen ulug nahla bihi-o.