Kisah Para Rasul 13:15 - Allah Wene Hurumbik Keron

¹⁵ Horie uruk apareg weregma, it wene urukon epmanowen at Musaen wene holal embebahon etno inim, eke it nabien wene holal embebahon epmano inim yig isaruk apagma, it o Allah wene uruk ambeg unde werehon epmanowen at Paulus omini epmano inim yig isaruk wilil, “Nomini-o, wene misig wereg halug, nit nindi ninahien hulen ulug yig nisimiek-o,” ulug yig isaruk apagma,

Kisah Para Rasul 13:15 ပူးပေါင်းရင်းမြစ်များ

Markus 5:22

Wonggalik wapareg weregma, ap misig inuk Yairus, o Allah wene uruk ambeg inaso werehon etno waharuk apareg, At Yesus ilanggen halug, indibahal yungguksoho ut kunukseg wilil,

Lukas 16:16

Eke at Yohanes ikma belap inaptukon etno awan waharuk eleg heheg, at Musaen wene duroho suruk amuk eke duroho suruk am fug ulug ebahon etno inim, eke it nabi ap wene holal embebahon epmano inim, du-at senebuk ulug hinahla birikip-o. Eke at etno waharuk atisireg, At Allah weregma welamon wene fano wene etno yig hisaruk atisimu, it aphe obohen inasineroho kuk ulug uruk-o.

Kisah Para Rasul 1:16

“Nomini-o, at Yudas etno nit ninim At Yesus omin ulug heako minduhupfebahon oke, eke At Roh Kudus etnowen Daud yig itukmu ebag etno hag, at Yudasen fobik At Yesus ebe du at-o, ulug irisi famen, it ap Yesus hele watuson epmano inowe neken atisi ari Roh Kudus etnowen Daud yig itukmu iluk apag etno hag seg atisi-o.

Kisah Para Rasul 13:27

Eke it Yerusalem aphe inim, it inowesi epmano inim, At Yesus ninili warukon ulug inapeleg wilil, it nabien wene holal embebahon nintul nantul o sembahyang fam yig nisarukon epmano inapeleg neken welatusa-o. Ariroho wilil, At Yesus dahon obam umburusa etno fam it nabien hurumbik ebahon demat surusa-o.

Kisah Para Rasul 15:21

Eke at Musaen wene duroho suruk amuk eke duroho suruk am fug ulug ebahon etno o amuk it Yahudi ap wene uruk ambehen o sembahyang fam yig nisaruk wilil, awene etno o ahik ya da yig nisaruk wereg-o,” ulug at Yakobus etnowen yig isebag.

Kisah Para Rasul 15:7

at Petrus etno minatuk apareg yig isaruk wilil, “Nomini-o, it Allah wene waruk elehon epmano yig isarukmu inesanggo holtug eberoko wawag ulug At Allahen amuk hit hinanggelegmen minduhup nahabag etno hiniluk-o.

Kisah Para Rasul 18:17

Wilip isaruk atisimu, it Yahudi ap inasineyen at Sostenes o Allah wene uruk ambeg aso werehon etno hog senerik laruk atusareg, at Galio ibam olmen yikangge watukmu, at Galio etno ahla bugsoho welatisi.

Kisah Para Rasul 18:8

Eke at Krispus o Allah wene uruk ambeg aso werehon etno Allah wene eberoko waruk atisimu, it omini uma werehon epmano inim-at eberoko warusa. Waruk atusama, it Korintus aphe anggolo nin inim Allah wene inesanggo holtuk wilil eberoko waruk atusama, ikma belap inaptisi.

Kisah Para Rasul 2:29

“Nomini-o, at ninetamu Dauden ebahon etno an bukaloko yig hisamin-o. Ari bilin at Daud waratuk apagma, o embebag ambeg etno kidia horog du wereg-o.

Kisah Para Rasul 2:37

Yig isaruk apagma, it epmano wi ulug inakol anggolo haruk apareg, at Petrus omini epmano inim yig isaruk wilil, “Halug nit keroho suk-o nomini?” ulug hinog yig isebag.

Kisah Para Rasul 2:4

Inilanggen hebareg weregma, eke fobik it Roh Kudus inindimu kebahon epmanowen yig isarukmu, it o ahik ya da inune iniluk wilil, inune yion dion obog-at uruk apag.

Kisah Para Rasul 20:2

Waharuk atisireg, o epmano ya keheg wene yig isil nuruk wilil, it aphe obog inesanggo watil nuruk atisi. Inesanggo watil nuruk atisireg, fobik o Akhaya waharisi.

Kisah Para Rasul 22:1

Bok atusama, at Paulusen it Yahudi inune fam yig isaruk wilil, “Niknisi, nowesi-o, hit obog hinil fam wene misig bukaloko yig hisaminen hinune bok amiek-o,” ulug yig isaruk atisimu,

Kisah Para Rasul 4:36

It ninen og isa lebag etno hag, at ap misig inuk Yusuf, ungguluag Lewi, ibam o Siprus epmen endag apahon etno waharuk apagma, it mondep isebahon epmanowen ninindi fano ninaptukon ulug inuk Barnabas soalfag.

Kisah Para Rasul 7:2

Hinog waruk apagma, at Stefanus etnowen yig isaruk wilil, “Niknisi, nomini-o, hit an nune holtuk amiek-o. At ninetamu Abraham etno o Haran wariog ulug o Mesopotamia weregma,

Roma 12:8

Eke nineyabuk aphe inindi oag werehep isawon etno og nisarisi halug, etno ilitoho-at suruk amuk-o. Eke yi angge di angge menag isaruk amon etno, ninindi seberoho-at wilil, menag isaruk amuk-o. Eke aphe inindi aso welamon etno yabuk ninarug fanoroho-at suruk amuk-o. Eke it aphe inabuen surukon epmano ninindi ninahientoho-at suruk amuk-o.

1 Korintus 14:3

Eke at ap Allah wene indimuen walug yig isarukon arien aphe-at yig isaruk wilil, inindi oag wereg amag ulug inesanggo wareheg, eke une fanoroho yig iseheg, suruk-o.

2 Korintus 3:14

Ariroho suruk apareg fam, kidia it Yahudi aphe inahla burukon epmano sok lareg neken wereg-o. Eke at Musa olohore sum sambuntepatebag etno hag, it Yahudi ap kidia hurumbik amukon holal baleg etno wane suruk wilil sum sambunteg wereg etno fam inilanggen hupnig neken wereg-o. Ariroho wereg oke, At Kristus awene etno-at waruk isalug, sum sambunteg neken werehon etno eleg atuk-o.

1 Tesalonika 2:3

Ariroho oag werehep nisaharisireg fam, wene ninenggal-at yig hiseheg, eke yamintal neken yig hiseheg suruk atukuk fug-o. Ariroho suruk eleg wilil, hinesanggo war hinaptuk atukuk-o.

Ibrani 13:22

Nomini-o, hit hinindi oag wereg amag ulug an wene yig hisihion du hinindi seberoho wilil, hinesanggo fanoroho holtuk amag ulug yig hisihi-o. Eke an holal ari ebe yaron neken bal hisihi fug-o.