Ibrani 10:10 - Allah Wene Hurumbik Keron

¹⁰ Eke At Yesus Kristus etno At Allahen du suhu ulug ahla bebahon etno ilitoho suruk wilil, At ebe nit obog ninonggo inggik misihim-at Allah ake ombatebag etno fam, niren dag suruk aheon epmano sohorep isalug, ninindi ho ninaptuk-o.

Ibrani 10:10 ပူးပေါင်းရင်းမြစ်များ

Yohanes 17:19

Eke it inebe epmano Hat hudaki demat welamag ulug An nebe etno it inake nonggarehen fuloko ombataruk ahi-o.

Yohanes 19:34

Sohorep isebareg oke, at sehen seneg werehon misig etnowen asega fam Yesus ombandu dal haruk apagma, amep ik inim wilik wapag-o.

Yohanes 6:51

Eke orom iniluk inaptukon boholmen ambik waharision etno ari An at-o. Eke orom roti iniluk inaptukon etno naruk isalug, iniluk mondog welamuhup-o. Eke orom roti Anden og isahukon ari, it yi aphe di aphe kweanmon obog-at iniluk welamag ulug An nebe etno-at og isahuk-o,” ulug yig isebag.

1 Korintus 1:30

Eke At Allahen hit Kristus Yesus hinim dambuksoho hinombisaharisi-o. Eke At Kristus etno inuk fam ninindi yi angge di angge iniluk atukon epmano-at og nisarisi-o. Eke nit ninebe At Allah ninim dambule nisahakeg, eke nit At Allah udaki welamag ulug heako ninombisahakeg, eke ninebe ninili weheg suruk amag ulug At Allahen Amloho Yesus etno nit ninake belabik wapag-o.

1 Korintus 6:11

Eke hit nin ariroho dag suruk atikibon oke, eke At Allahen Ninowe Yesus Kristus inuk fam At Roh Kudus etno og hisaruk wilil, hinindimu dag suruk atikibon epmano ho hinabeheg, eke hinebe Aren angge ulug akeleg-at hinombisahakeg, eke alem dahon hinobam werehon epmano hinili oko elehepfeheg suruk atisi-o.

Efesus 5:2

Eke At Kristus nit ninobam indi hunduhuk welapag etno hag, hit hit hinindi hunduhuk welamuk-o. Eke At Kristus ari nit ninake warariog ulug onggarehen imig saruk wilil, At Allah ahien hawag ulug At ebe fanowon etno Allah ake atisi-o.

Efesus 5:26

it inebe ik etno fam ho inaptuk apareg, At Allah udaki inakeleg-at welamag ulug At awene etno yig isaruk wilil inakeleg-at fuloko imbisebag-o.

Ibrani 10:12

It apheyen dag surukon epmano eleg amag ulug At Kristus etnowen misihim-at Allah ake ombataruk wilil, aphe obog inonggo baltuk apareg, At Allah inggik bikit fil horie ik lahabag-o.

Ibrani 10:14

Ari halug, At Kristus etnowen misihim-at Allah ake embebareg fam, Aren it aphe dag surukon etno inindi ho inaptukmu, initog mondog fano welamag ulug imbisebag-o.

Ibrani 10:20

Ariroho hut nisebag etno fam, ninonggalem keron misig yahap nisaharuk wilil, bilin sum saleg welapahon etno healep nisahabag-o. Ariroho healep nisahabag ari, at ebe og nisebag etno fam ninebe niniluk ninaptuk-o.

Ibrani 10:29

Ari halug, at ap misihen At Allah Amloho etno ambit heheg, eke At Yesus amep fam aphe inindi dahon horep isalug At Allah inim dambulukon etno hai ulug seberoho embeheg, eke At Roh Kudus ninabua nisarukon etno abug baleheg surukon halug, onggo mondog-at wabukag ulug oag deloko umbukon etno hinindi ebetuk amuk-o.

Ibrani 10:5

Elehap inaptuk eleg etno fam, At Kristus o kweanma duma ambik wariog ulug ahla bebareg, At Allah yig ituk wilil, “Yi angge di angge Allah ake umburukon epmano inim, eke wam waroko Allah ake hondok yalukon epmano inim wao ari hambit haruk ahen oke, eke An nebe etno hag Allah ake ulug nombaharikin-o.

Ibrani 13:12

Ariroho sebag etno hag, At Yesus etno At amep fam it aphe dag surukon epmano ninindi ho ninabiog ulug At ebe lehet selema fil-at warapag-o.

Ibrani 2:11

Eke Aren nit dag suruk aheon etno ninindimu ho ninaptuk ari famen, At etno inim eke nit dag suruk nisalug ho ninaptision etno inim, obog-at nit Ninikni At ebe misig-at wereg-o. Nit Ninikni misig-at wereg ari famen, At Yesus etnowen it du An nomini at-o, ulug yig nisawon fano enggali elegsoho-at yig nisaruk-o.

Ibrani 2:14

Eke At etnowen it du An nudaki at-o, ulug ebag ari, nit aphe kweanmon duma farim-at ebag halug, At Yesus etno nit ilitoho-at endag atuk apareg, it kweanmon ilitoho-at welapag. Ariroho wilil, At ebe warapag etno fam, at iblis bilin it aphe waratukon unde wereg welapahon etno oag elegsoho umburuk apareg,

Ibrani 5:7

Eke At Yesus etno ebe o kweanma iluk wilil, At Allah obam sembahyang kino eheg eke une suon eheg, ioba yareheg suruk wilil, At ili wawon etno obam kino yig epag-o. Yig epag ari, At indi seberoho wilil, obam ebetuk apagma, At une urukon etno Allah esanggo holfag-o.

Ibrani 7:27

Eke it ap kweanmon Allah unde suon welapag epmano hag, At Yesus ariroho wereg eleg-o. Eke it ap Allah unde suon werehon etnowen iren dag surukon etno eleg amag ulug bilin Allah ake embeheg, eke it yi aphe di aphe epmanowen dag surukon etno eleg amag ulug fobik Allah ake embeheg nintul nantul suruk etno hag, At Yesus ariroho suruk eleg-o. Eke At ebe etno Allah ake neken wararuhuken ulug onggarehen imig saruk apareg, Allah ake misig etno-at embebag-o.

Ibrani 9:12

Eke At Kristus ebe o Aren yabuk suruk ambeg epmano kuruk apareg, o bilin inuk Mondog Usabaharik welapag etno hag wereg ambeg epmano inggik misihim-at mondog mondog kebag-o. Kuruk wilil, Aren Allah ake imbiog ulug wam kambing inim, sapi udag inim inamep walug wapag fug-o. At amep etno-at walug waharuk apareg, nit ninebe ninili oko niniluk mondog welamon etno-at og nisebag-o.

Ibrani 9:14

Eke At Kristus etno At ahut itog mondog werehon etno fam At ebe Allah ake warariog ulug imig sebag-o. Ari halug, niren usaroho suruk atukukon epmano sohorep isalug, At Allah iluk werehon etno anggimbu wilil At eyabuk-at suruk amag ulug, At Yesus amep fam ninindi horoho ninobabut keron neken ninombisaharuk-o.

Ibrani 9:26

o kweanma duma alem bilin wal hebag etno famen dahon etno obam umburukmu, nintul nantul-at waratlep-o. Ariroho selebon oke, kidia o ebe elehap sukon etno fanggog uruk heheg, At ebe etno misihim-at waharuk apareg, it apheyen dag surukon epmano elehap siog ulug At ebe misihim-at Allah ake ombatebag-o.

Ibrani 9:28

Ariroho suruk etno ilitoho, At Kristus nit yi aphe di aphe obohen dag suruk aheon epmano elehap sukag ulug misihim-At Allah ake waroko embebag-o. Ariroho waroko embebag etno fam, fobik misihim waruhu ari, niren dag suruk aheon elehap siog ulug waruhu fug-o. Nit At wamon aso welaheon epmano ninili wiog ulug-at waruhu-o.

1 Petrus 2:24

Eke At Kristus niren dag suruk atukukon epmano omalo fam walug e fam lenggaloko embebag etno niren dahon sohorep isalug fanowon-at suruk amag ulug embebag-o. Eke it epmanowen At ebe ele suon wapag etno fam, hinebe fano atikip-o.

1 Petrus 3:18

Eke At Kristus obabut mondog fanowon-at oke, hit dahon hinake-at warapag-o. Hiren dag suruk atikibon epmano hinapelegsoho At Allah apma imbisawag ulug warapag-o. At ebe wapahon oke, fobik iluksoho minduhupfebag.

1 Yohanes 5:6

Eke at kweanma wapahon ari, At Yesus Kristus wapag, ik inim, amep inim walug wapag, ari ikma belapfebahon etno inim, amep deloko embebahon etno inim walug wapag. Ik-at walug wapag fug, we biren eta ik inim, amep inim walug wapag. Walug wapag ari, At Roh Kudus etnowen demat walug wapag ulug yig nisaruk-o. Eke yig nisaruk ari At Roh Kudus etnowen demat ulug yig nisaruk-o.