Lucas 20:17 - Yaminahua

¹⁷ Akka askaifãfe õikĩ Jesús ato yoini: “Akka, ¿afeskakĩ Niospa meka iskafakĩ kenenifomẽ? Tokiri pexe fapaikakĩ nã pexe famisfãfe na tokiri chakara ixõ potafiafono, fetsafãfe fichikaxõ na tokiri sharakõi ikaxõ akiki pexe fatirofo, ixõ kirikaki kenenifo.

Lucas 20:17 ပူးပေါင်းရင်းမြစ်များ

Mateo 21:42

Nãskata Jesús ato yoini meka fetsafaxõ: “¿Na kirika kenea anoa mã anemismamẽ? Iskafakĩ kenenifo: Tokiri pexe fapaikakĩ nã pexe famisfãfe na tokiri chakara ixõ potafiafono, fetsafãfe fichikaxõ na tokiri sharakõi ikaxõ akiki pexe fatirofo. Nãskarifiakĩ xanĩfofofãfe, ‘Nakai afama,’ ikaxõ Niospa Fake õikaspamisfo. Askafafiaifono Niospa ãfe Fake katoni nõko Ifo inõ. Nãskakẽ nõ akiki inimakõi, ixõ kirika ano kenenifo,” Jesús ato fani.

Marcos 10:23

Nãskaito Jesús aa kemataima õiakexõ, aõxõ tãpimisfo yoini iskafakĩ: “A yora afama mĩshti ichapaya Nios xanĩfo ano katiroma, fekax pishta,” ixõ ato yoiaito,

Marcos 12:10

“Akka, ¿a kirika kenekĩ iskafanifo mã anemismamẽ?: Tokiri pexe fapaikakĩ nã pexe famisfãfe na tokiri chakara ixõ potafono, fetsafãfe fichixõ na tokiri sharakõi ikaxõ akiki pexe fatirofo. Nãskarifiakĩ xanĩfofofãfe, ‘Nakai afama,’ ikaxõ Niospa Fake õikaspamisfo. Askafafiaifono Niospa ãfe Fake katoni nõko Ifo inõ. Nãskakẽ nõ akiki inimakõi, ixõ kirika ano kenenifo,” Jesús ato fani.

Marcos 3:5

Ato feratexõ Jesús ato õini, yora fetsafoõnoax shinãyamaifãfe. Askatari Jesús shinãmitsani. Shinãmitsaxõ yoikĩ iskafani feronãfake: “Mẽshafe,” fani. Askata nikax mẽshatani. Mẽshatanaino sharatani.

Lucas 19:41

Mã chaima Jerusalén ano nokoax nã pexe rasi anoafo ato õi, atoõnoax Jesús oiani.

Lucas 22:37

Akka ẽ mato yoi nã eõnoa yoikĩ kirika kenenifo keskai mẽ askakõi. Ẽ askarayamafiano ea pãrakani yora chakafãfe, ‘Nato ato chakafamis,’ ea fakani. Nãskakẽ nã eõnoa yoikĩ kirika kenenifo keskara nẽ askakõi,” ixõ ato yoiaito,

Lucas 22:61

Pedro askaito Jesús texkeakekafã festani. Festanaino Pedro shinãtani nã ãfe Ifãfe yoia keskara. “A takara keoyoamano, ‘Ẽ Jesús õimismara,’ ixõ mĩ ato yoi tres fakĩ,” Jesús faa nã Pedro shinãtani.

Lucas 24:44

Nãskaxõ afianã ato yoini: “Mẽfi mato yoiyomiskĩ mato fe iyoxõ eõnoa yoikĩ Moisésnõ nã a Niospa meka yoimisfonõ, eõnoa fanãiti kenenifo keskai nẽ askakõi,” ixõ Jesús ato yoini.

Juan 15:25

A Niospa meka yoikĩ kirika kenenifo nẽ askakõi. Niospa meka yoikĩ eõnoa kirika kenenifo iskafakakĩ: ‘Ẽ afara chakafayamafiakẽ ea noikaspakani,’ ixõ eõnoa yoikĩ kirika kenenifo.

Hch. 4:11

“Aõnoa yoiyokĩ yõra kirika keneni iskafakĩ Niospa shinãmanaino: Tokiri pexe famisfãfe, ‘Na tokiri chakara,’ ixõ potanifo sharafiano. Nãskakaxõ chipo tãpinifo nã tokiri sharafinakõifiano. Nãskarifakĩ nã Jesucristo tokiri keskarafiano mã potamis sharafinakõifiano. Mã mã potafiano Epa Niospa ifini aõnoax mã afe yorafo inõ.

Efesios 2:20

Nãskax mã oa pexe sharakõi keskarafo. Oa tokiri nõ pexe shara faa, afeskax paketiroma keskara. Taefakĩ nõ mai põkita a mẽra tokiri nanexõ, nõ pexe fatiro pakeyamanõ. Tokiri kerex sharakõiki nõ atiro pexe fakĩ. Nãskarifiakĩ taefakĩ a Niospa mekaõnoa ato yoipaonifãfe ato yoipaonifo Niospa ato shinãmanaino. Akka chipo mã Jesús nãmã fotoxõ, aõxõ tãpimisfo ato ifini aõxori a fetsafo tãpimanõfo, oa pexe fisti mẽra nõ imis keskaraxõ, akairi ato tãpimanõfo Niospa meka sharaõnoa ato yoikakĩ, atoõxori yorafãfe chanĩmara fanõfo. Askaxori a rama fakeaifãferi Jesús Ifofakanax, oa nõ pexe mitsisipakõi faano, anã paketiroma keskarakõi inõfo Jesucristo Ifofakanax. Nãskakẽ nõri Ifokõi faax, nõri anã paketiroma nõ keyokõichi Ifofaax. Oa pexe sharakõi mẽra nõ ika keskara, nõ ixii, Niospa ãfe Yõshi Shara nõ mẽra naneano.

1 Pedro 2:6

Akka kirika ano kenekĩ iskafanifo, Niospa ato shinãmanaino: Õikapo, ẽ Cristo õia ares fisti sharakõi. Nãskakẽ ẽ katoni efe yorafo afe yora inõfo. Nã tokiri mitsisipa keskarakõiki. Nãskakẽ afe yorafo afe isharakõipakenakafo. Nãskakaxõ Cristo chanĩmara fakaxõ anã afaa chaka shinãpakenakafoma. Askatamaroko afe inimakõipakenakafo, ixõ Niospa yoini.