Gálatas 1:4 - Yaminahua

⁴ Nõ afara chakafamisno nokoõnoax Jesús nani nõko chaka noko soaxoxiki, askatari nã yorafo chakafo mẽranoa noko ifixiki Epa Niospa fichipaiyai keskafakĩ.

Gálatas 1:4 ပူးပေါင်းရင်းမြစ်များ

Mateo 13:22

Akka atiri fimi exe moxafo mẽranoax foaikax yosinima. Nãskari fakĩ fẽtsa Niospa meka nikasharamax, nãskaxõ afara fetsa shinãkĩ, ãfe shinã mẽraxõ shinãchakakõitiro. Nãskaxõ kori ichapakõi noikĩ, ‘Ẽ kori ichapayax ẽ inimatiro,’ ixõ shinãkĩ Niospa meka anã shinãima. Nãskakẽ Niospa meka nikafikĩ afara fetsafo shinãino, afaa Niospa axotiroma.

Mateo 20:28

Akka ẽri anori shinãima, ẽfe Epa Nios ariax ẽ nãmã fotoni feronãfakekõi ixiki, ẽ Niospa Fakefekẽ ea afara axonõfo ẽ onima. Askatamaroko fetsafo ẽ ato afara sharafaxoxiki ẽ oni. Ẽ atoõnoax naxiki ẽ oni Satanás chaka ãto ifo inõma,” ixõ Jesús ato yoini.

Mateo 26:28

Nãskaxõ ato yoini: “Nafi ẽfe imi keskaraki. Akka nã ẽ mato yoiyoni keskai mẽ nai. Nãskakaxõ ẽfe imi õikaxõ tãpitirofo Epa Niospa yoiyoni keskafakĩ yora ichapafo ẽ ato chaka soaxonõ.

Mateo 26:42

Ato askafata anã kani Apa Nios kĩfikai iskafakĩ: “Epa, ea mĩa omiskõimayamakĩ ea mĩa omiskõimatiroma. Akka nã mĩ ea amapaiyai keskafafe,” fani.

Mateo 6:9

Akka mã kĩfikĩ iskafatiro: Epa Niosi, mĩ fisti sharafinakõia. Mĩ nai mẽra ika. Nõ mia noikõi.

Marcos 10:45

Akka ẽri anori shinãima, ẽfe Epa Nios ariax ẽ nãmã fotoni feronãfakekõi ixiki, ẽ Niospa Fakefekẽ ea afara axonõfo ẽ onima. Askatamaroko fetsafo ẽ ato afara sharafaxoxiki ẽ oni. Ẽ atoõnoax naxiki ẽ oni. Satanás chaka ãto ifo inõma ẽ oni,” ixõ Jesús ato yoini.

Lucas 22:19

Nãskaxõ anã pãa tsomainĩfofã, Apa Nios kĩfikĩ aicho fata, ato pãa kaxkexopakeyanã ato yoikĩ iskafani: “Nafi efe nami keskaraki. Matoõnoax ẽ nai. Nãskakẽ nã mã piaitĩa ea shinãfafãikãfe,” ixõ ato yoini.

Lucas 22:42

Apa kĩfikĩ iskafani: “Epa, ea ifipaikĩ ea ifife ẽ omiskõinõma. Akka nã ẽ apaiyai keskafakĩma, nã mĩ ea amapaiyai keskafafe,” Apa faino,

Juan 10:11

“A ea chanĩmara faifo ovejafo keskarafo. Ẽfi nã oveja kexesharamis keskaraki. Nãskakẽ ẽ efe yorafo ẽ ato nãxoxii. Oveja ifãfe feronãfake fetsa kori inãtiro ãfe oveja kexexonõ. Nãskaxõ mã kori inãno nã feronãfãke oveja kexesharatamaroko, kori fisti shinãtiro. Nãskakẽ poomã oaito fichiax ovejafo kexetama ichotiro. Nãskaxõ shinãi iskakĩ: ‘Na poomã mesekõi. Na ovejafo ẽfenãkõima, aa poomãnã pinõ ẽfenãkõimakĩ. Nãskakẽ ẽ ichoikai ea poomãnã afeska fanõma,’ ixõ shinãtiro. Akka ovejafãfe ifokõi askarama. Ãfe oveja kexesharai. Poomã oaito fichixõ ato kexesharatiro, poomãnã ato afeska fanõma. Nãskaxõ shinãtiro iskakĩ: ‘Ẽfe ovejafoõnoax ẽ natiro afokai afeskatiroma,’ ixõ shinãtiro.

Juan 12:31

“Iskaratĩa nã ea Ifofaifoma Niospa ato omiskõimani. Ãto ifori nã yõshi chaka Satanás nãri ẽfe Epa Niospa potaxii anã xanĩfo inõma.

Juan 5:30

Anã Jesús ato yoini iskafakĩ: “Akka ẽakõi ẽ yorafo omiskõimanima. Epa Niospa ea yoiaino ẽ aki. Epa Niospa keyokõi tãpia. Akka ea mẽstekõi yoia keskara ẽ yorafo yoitiro fatofo omiskõipakenakafomãki. Ẽ ato kaxpa omiskõimanima. Eres fistikai ẽ apaiyai keskara ẽ shinãima. Ẽfe Epa Niospa ea nĩchini a apaiyai keskara ea famaxiki.

Juan 6:38

Epa Niospa ea nĩchikĩ ea yoini iskafakĩ: ‘Nã mefe ipaikani mefe ipanakafo tsoa pishta fenonakama. Nãfo mã nafiamisfono mĩ anã fotoxõ mĩ ato õtofaxii nofe nipaxanõfo. Nãskara ẽ fichipai,’ ixõ ea nĩchini. Nãskakẽ nã ẽa ẽ apaiyai keskara faxiki ẽ mai ano onima. Akka nã ea nĩchiato ea amapaiyai keskara faxikĩ ẽ mai ano fotoni.

Romanos 1:7

Roma anoafãfe, ẽ mato kirika kenexõ fomai. Niospa mato noixõ mato ifini mato chaka soaxoxiki afe yorafo mã inõ. Mato noikĩ mãto shinã mẽraxõ mato shinãsharamanõ. Epa Nios feta nõko Ifo Jesucristo mato askafanõ.

Romanos 12:2

Nios Ifofaafãfema shinãi keskara shinãyamakãfe. Mã shinãpaoni keskara anã shinãyamakãfe. Iskaratĩa Niospa mãto shinã mẽra fetsafapaiyai keskara shinãkãfe. Afaa fetsakai mã shinãtiroma. Mã askakĩ mã tãpitiro Niospa mato imapaiyai keskara sharafinakõi. Mato imapaiyai keskara mã ikaino matoki inimatiro.

Romanos 4:25

Nõko chakaõnoax Jesús nani nõko chaka noko soaxoxiki. Askata mã otofaano aõnoax afaa chakafamisma keskarafo nõ ixii.

Romanos 8:27

Ãfe Yõshi Sharapa shinãi keskara Epa Niospa tãpikõia. Keyokõi nõko shinã mẽrari nõ shinãi keskara tãpikõia. Epa Niospa noko amapaiyai keskara nãnori ãfe Yõshi Sharapa a chanĩmara faafo tii ato kĩfixomis.

Romanos 8:3

Moisés yoini keskara nõ tãpifiano aato noko imasharatiroma nõko chaka noko soaxotiroma. Akka Epa Niospa shinãyoni ãfe Fake nai mẽraxõ mai ano nĩchixiki ari noko keskara yora inõ. Noko keskarafiaxokai nõ amis keskara afaa chakafamisma. Akka noko nãxoni anã afara chaka nõko ifo inõma.

Romanos 8:32

Epa Niospa noko noikĩ ãfe Fake Jesús timamanima noko naxonõ. Nãskanixakĩ noko axosharatiro nã apaiyai keskara nõ anõ.

1 Corintios 15:3

Yorafãfe ea meka sharafinakõia yoiyonifo. Nãskakẽ ẽri mato yoini iskafakĩ: Cristo noko nãxoni nõko chaka noko soaxoxiki. Akka Cristo tres nia maiyoni. Askata anã otoni. Mã otoax Pedroki nokoi taeni. Nãskatari chipo a aõxõ tãpimisfokiri nokoni. Askatari nã chanĩmara faafoki yorafã rasifokiri nokoni. Akka fisti rasi nãpaifono, akka ranãri nanifoma. Nãskatari chipo Santiagoki nõko Ifo nokoni. Askatari a aõnoa ãfe meka yoimisfoki nokoni.

2 Co. 4:4

Nãfofi nã niafaka chaka ãto ifoxõ ato yoimis. Nãskaxõ nã õiti fẽstoa keskara ato faano na meka shara Jesúsnoa tãpitirofoma. Nã yora fẽxõ luz ota sharafiano õitiroma keskarafo. Nãskarakaxori Jesús finakõia tãpitirofoma. Nãskatari tsõa tãpitiroma Jesús Apa keskara sharafinakõifiano.

Gálatas 2:20

Nõko Ifo Cristo ifi cruz ikaki mastaifono nani keskai ẽri ẽ afe naa keskarakõi ini. Nãskakẽ iskaratĩa a ẽ ipaoni keskara anã ẽ ikima. A ẽ Jesús Ifofayamax ẽ ipaoni keskara anã ẽ shinãima. Niospa Fake Cristo ea noikõi nã ipaiyai keskakĩ ea nãxoni. Nãskakẽ ẽ chanĩmara faino iskaratĩa Cristo efe ika a keskara shara ea imaxiki.

Gálatas 6:14

Akka ẽkai anori shinãpaima, nã meka shara fistiõnoa ẽ yoipaifafãini. Nã meka shara fistiõnoa ẽ yoipaikĩ ẽ iskafai: “Aicho, Jesucristo ifi cruz ikakinoax ea nãxoni, aõxõ a ẽ chaka shinãpaoni keskara anã ẽ shinãtiroma. Jesús nã ea nãxofaitĩa nã ẽ afarafo chakafapaonifo mã Jesús fe naa keskarakõi. Nãskakẽ anãkai ea afeska fatiroma,” ixõ ẽ shinãtiro.

Efesios 1:11

Nõfi Cristo fakekõifokĩ. Nõ afe yorakõifo ikaito, Epa Niospa noko katoni noko onifayoxoma ãa shinãkĩ taefani. Epa Niospa nonori iskafakĩ shinãni: “Na ẽfe Fake Jesús ẽ inãi keskari fakĩ nã ẽfe Fake Jesús Ifofaifori ẽ ato inãira,” ixõ Epa Niospa shinãni. A Niospa shinãkĩ yoini keskara, nãskarifakĩ iskaratĩa mã askafaa.

Efesios 2:2

Nãskakẽ mã afara chakafamis, a yora chakafãfe akai keskafakĩ. Askata a nai mẽra ikafãfe a niafaka chakafãfe ãto xanĩfãfe Satanás mato amapaiyai keskafakĩ mã amis, Satanás ifofakĩ.

Efesios 5:16

Nãskakẽ a Nios Ifofaafomafo iskaratĩa chakafinakõiafo. Nãskakẽ mãri isharakõikãfe ato keskara ikakĩma. A Niospa apaiyai keskara akãfe mẽxotaima.

Efesios 5:2

Cristo noko shinãkĩ finakõi nokoõnoax nani. Nõko chaka noko soaxoni. Nãskakẽ noko nãxoni, aakõi nanima. Nãskaito xafakĩa Epa Niospa õini nõko chakaõnoax nani, anã nõko chaka nokoõ neenõma. Nãskakẽ mã ranãri nõinãi finasharakõikãfe.

Efesios 6:12

Akka nõkai yorakõifo fe mẽenãima. Askatamaroko nã niafaka yõshi chakafo fe nõ iki, kerexkai noko afara chakafamapaiyaifono. Nãfãfe nõ õiamafiaino noko afara chakafamapaikani. Nã niafaka yõshi chakafo ichapakõifo.

Filipenses 4:20

Akka nõko Epa Niosfi nõko Epakõikĩ nã fãsi sharakõi, tsoa keskarama. Ares fisti sharakõi. Tsõakai a finõtiroma. Nã nõko Ifokõira nõ fapanaka. Askara ipainõra.

1 Tesalonicenses 1:3

“Epa Niosi, na Tesalónica anoafãfe, mia noikakĩ mia yonoxosharamisfo, nãskakaxõ fena fenakãkima nõko Ifo Jesús manasharamisfo nokoki anã oi kiki,” ikaxõ. Nãnori pena tii ẽ mato kĩfixõfafãini.

1 Tesalonicenses 3:11

Nãskakẽ Epa Nios feta nõko Ifo Jesucristo mato ari noko nĩchipainõ nõ mato õikanõ.

1 Tesalonicenses 3:13

Mã askaino Epa Niospa mãto õiti mẽraxõ mato shinãmasharai, Jesús Ifo sharafayanã mã afaa chakafayamanõ. Mã askaino nõko Ifo Jesús afe yorafoya oaitĩa mãri a keskara shara ixii, Epa Niospa õiaino.

2 Tesalonicenses 2:16

Nõko Ifo Jesucristo feta nõko Epa Niospa noko noikĩ, nõko õiti mẽraxõ noko inimamakõinõ. Nãskakẽ nõ tãpitiro noko potanakama nõ afe ipaxanõ.

Tit. 2:14

Nã nokoõnoax nani. Nõko chaka keyokõi noko soaxõfaini. Nãskaxõ nõko õiti noko sharafaxõa. Nõ afe yoraxõ nõ afara sharafapaikĩ nõ anõ.

Hebreos 2:5

Akka Niospa ãfe ãjirifo yoikĩ iskafanima: “Na mai fena anoax mã xanĩfo ixii,” ixõ yoinima. (Nãskakẽ nõ Jesúsnoa nõ shinãmakitiroma nãmãi xanĩfofinakõikẽ.)

Hebreos 6:5

Nãskakẽ nõ Niospa meka tãpisharakõiaino a Niospa afara shara noko yoiai nõ atiro. Askatari Niospa afara sharafo noko famapai afara sharafo nõ atiro, ãfe Yõshi Sharaõxõ.

Hebreos 9:14

Akka Cristokai afaa chakafamisma. Nãfi sharafinakõia. Niospa Yõshi Shara a nĩpanakato Jesús shinãmani. Nãskakẽ Apa yoini iskafakĩ: “Epa, ẽ atoõnoax naikai. Nãskakẽ ẽfe imi foano eõxõ mĩ ãto chaka soaxotiro mefe yorafo inõfo,” ixõ Apa yoini. Akka a nõ Nios inimamapaikĩ nõ shinãpaoni keskara nõ anã shinãima. Akka iskaratĩa nõ Nios inimamapaikĩ nõ nikasharakõitiro. Nã Nios nĩpanaka sharafinakõia.

Stg. 4:4

Akka kẽro feneyafiax feronãfake fetsafo fe imis keskarakõi mãri nãskarakõi. “Jesús ẽfe Ifoki,” ifiaxõ mã Jesús Ifofakõinama. Nã mã shinãi keskara chakakõi. ¿Mã tãpiamamẽ mã fetsafo feta afara chakafakĩ, mã Nios noima? A Niospa fichipaiyaima, mã fichipaiax mã Nios fe rafetiroma mãmãi noikaspakĩ.

1 Pedro 2:24

Cristo cruznoax noko nãxoni, nõko chaka noko soaxoxiki. Nãskakẽ nõ anã fanĩrira shinãtiro oa yora naa keskara nõ itiro mã noko chaka soaxonano nõ afe isharapakexanõ. Mãraki yora naato afaa shinãtiro. Nãskax mẽstekõi nõ isharakõitiro. Nã noko omiskõixoniõnoax nõ isharakõipakexanõ.

1 Pedro 3:18

Akka Cristo nokoõnoax omiskõiax nani nõko chaka noko soaxoxiki. Anãkai nanakama nai fistini. Sharakõifiano retenifo. Akka nõ chakakõifokẽ noko nãxoni. Apa Nios ano noko imapakexakĩ. Akka mã nafiax ãfe fero mẽsho nanima, anã otoni Ãpa Yõshi Sharaõnoax.

1 Juan 2:2

Noko nãxoni nõko chaka noko soaxoxiki. Noko fistima, keyokõiõnoax noko nãxoni. Nõko Ifo Jesucristo noko nãxoni. Nõko chaka noko soaxõfaini nani.

1 Juan 3:16

Akka Jesús noko noikõikĩ, noko nãxoni. Ãakõi nokoõnoax nani. Nãskarifiakĩ nõ fetsafo noikõiax nõ atoõnoax natiro.

Apocalipsis 5:9

Akka nã fanãikaifo tsõa nikayomisma fanãikani, iskakani: Mĩ afaa chakafayamafiamiskẽ mia retenifo. Mĩ noko nãxoni, mĩ imi foni Satanás anã nõko ifo inõma Epa Nios ãfe fakefo nõ inõ. Nãskakẽ mĩ fistichi fitiro kirika kenea fẽpexiki noko tãpimaxiki. Mĩõnoax nã mia chanĩmara faafo tii maifo tii anoafo Niospa yora itirofo meka fetsa fetsatapafãfe mekakani. Nãskakẽ nãfãferi fetsafo mĩ meka shara ato tãpimanano, mĩ ato amapaiyai keskara anõfo. Askatari nã maifo tii anoafo xanĩfo mefe ixikani, ikax fanãikafo.

Apocalipsis 7:9

Askata Epa Nios fe ãfe Fake Jesús nã oveja fake keskara nã tsaoafo ano yorafã rasi niafo tsõa ato tanatiroma. Nã maitio anoafo fisti rasi anoafo, xoko fetsafo, meka fetsayafo ikafo, rapati oxokõi chainipa safeafo ẽ õia fisti rasichi epe pei tsomafãfe.