Efesios 5:32 - Yaminahua

³² A Niospa meka yoimisto keneni anori taefakĩ tsõa tãpinima. Mã iskaratĩa noko Niospa tãpimasharai a nõko Ifo Cristo Ifofaafo tii afe yorafokanax, oa fisti keskara afe yorafo ixõ keneni.

Efesios 5:32 ပူးပေါင်းရင်းမြစ်များ

Juan 3:29

Afianã ẽ mato yoinõ ea nikapo. Mã mã tãpia feronãfake ãfe yama yoikĩ iskafatiro: ‘Aicho. Na kẽro mĩ ea yoixona iskaratĩa ẽfe ãfi iki,’ ixõ yoiaino ãfe yamari aõnoax inimatiro. Nãskarifiai ẽ Cristoyamafiax fetsafãfe nã Cristo Jesús chanĩmara faifono ẽri fãsi akiki inimakõi.

2 Co. 11:2

Feronãfãke kẽroyapaikĩ ãfe apa yõkatiro, nã kẽro fixiki ãfe ãfi inõ. Nãskakẽ apa ãfe fake xotofake kexesharatiro feronãfake fetsa fe oxayamanõ. Nãskax mã fianãkanax fene fes fianãtirofo feronãfake fetsafekairoko oxakatsaxakĩ. Nãskarifiakĩ ẽ mato Nios Ifofamakĩ ẽ mato kexesharani. Nãskaramãi Epa Niospa fichipaiyaino. Nãskakẽ mẽxotaima ẽ mato kexesharai mã fetsafo nã chanĩmisfo mã ato nikayamanõ. Nãskakẽ mã nai mẽra Nios ano kaax Cristo afe yorakõi mã ixii.

Efesios 5:31

A Niospa meka yoimisto keneni iskafakĩ: “Nãskakẽ feronãfãke kẽro fiax anã apa fe afa ikano anã ano itiroma. Paxkatiro, ãfi fe ixiki. Askax oa fisti keskara ixiki anã rafema,” ixõ yoikĩ keneni.

Efesios 5:33

Ẽ mato yoi fisti rasichi mãto ãfifo noisharakõikãfe. Mẽxotaima aa mã mã noimeai keskafakĩ mãto ãfifo noisharakãfe. Askatari kẽrofãferi ãto fenefo noisharakõikaxõ nikasharakõinõfo.

Efesios 6:19

Nãskaxõ eari kĩfixokãfe Niospa Yõshi Sharaõxõ ãfe meka shara mesetama ẽ ato yoinõ. Nã ãfe kaifomafoõnoaxri Jesús ato nãxoni ẽ yoinõ tsõa tãpiyonifoma.

Colosenses 2:2

Nãskaxõ ẽ mato kĩfixõfafãini mãto õiti mẽranoax mã inimakõiyanã, mã ranã mã nõinãkõinõ. Nãska faatanãxõ Epa Niosnoa xafakĩakõi mã tãpitiro, akka a iyopaonifãfe Cristoõnoa tsõa tãpiyopaonima. Nãskakẽ iskaratĩa xafakĩakõi mato tãpimapai aõnoa mã tãpisharakõinõ.

1 Ti. 3:16

Fetsafãfe yoikĩ iskafatirofoma: “Niospa meka chanĩra,” ixõ yoitirofoma. Jesús Niospa Fake feronãfakekõi kãini. Niospa Yõshi Sharapa, “Jesús Niospa Fakekõi,” ixõ yoini. Askatari Niospa ãjirifãfe Jesús õinifo Niospa Fakekõikẽ. Askatari yorafãferi õinifo Jesús Niospa Fakekõikẽ. Nãskaxõ yorafo tãpimakõinifo ato yoisharakõikakĩ, akairi tãpisharakõinõfo. Askaifãfe yora fetsafãfe mai fetsafo arixõ nikakakĩ ato chanĩmara fanifo akairi Jesús shinãkakĩ. Nãskakẽ Jesús anã nai mẽra kani Apa Nios ano.

1 Ti. 3:8

Nã a Nios Ifofamisfo ato kexemis nã keskara feronãfake katoxõ ifife. Nãskara yora sharakõifo itirofo, ãto meka mẽstekõi shara itirofo, askara yorafo pãemis itirofoma, nã kori fisti shinãfafãinaifoma. Nãskara feronãfake isharamisfo ifife Nios Ifofamisfo ato kexesharanõ.

Apocalipsis 21:2

Askano ẽ õia Niospa yorafo nãfãfe Jesús Ifo shara famisfo nai mẽranoafo Epa Nios ika ariax fotokani. Nãfo ikafo Jerusalén fena ano. Nã Jerusalén fena Nios ika ariax nãmã fotoa nãno ikafo. Fotoaifono ẽ õia fãsi sharakõi. Akka kẽromã ãfe sama sharakõi safetiro itipinĩsharaxikĩ fene fe fianãxiki. Nãskari fakĩ Epa Niospa nã Jerusalén fena itipinĩshara faa sharakõi inõ afe yorafo nãno afe nĩpaxanõfo.