Efesios 4:14 - Yaminahua

¹⁴ Nãskax anã oa fakefo keskara nõ itiroma mã nõmẽra Niospa meka yosiano. Oa nefe onori kai, anã onori kai imis keskai, fakefo askatirofo afaa shinãsharaima. Askaxõ a Niospa meka tãpisharafãfema ato yoiaifãfe nikafofãsa fatirofo. Askaxõ tãpisharaxikakĩma Niospa mekakõi. Askatari a yora ãa chanĩki fanĩrira ato yoimis nõ nikatiroma.

Efesios 4:14 ပူးပေါင်းရင်းမြစ်များ

Mateo 11:7

Nã a Juan ato nĩchia rafe mã foaifono Jesús yorafo yoikĩ taefani Juanoa. “¿Afeskakĩ tsõa istoma anoa Juan õifokani fonifomẽ? Juankai nã nẽfe tafa pei taka taka akai keskarama. Nãskarifiakĩ mã mã tãpia Juankai õiti ranãyama.

Mateo 24:11

Nãskatari yora ichapafo ãa chanĩxikani iskakani: ‘Ea Niospa shinãmani kiki ẽ Niospa meka mato yoinõ,’ iki ãa chanĩxikani. Nãskaxõ yora ichapafo ato pãraxikani.

Mateo 24:24

Akka nã chanĩmisfo fekani, ẽ Cristora ixikani, nãfo nõ Niosxõ nõ mato yoira ikani. Nãskakaxõ tsõa atiroma keskara fakani Satanás yõshixõ mato parapaikakĩ. Nã Niospa ato katoafori nãfo ato parapaikani.

Hch. 23:21

Akka mia askafaifono ato nikayamafe. Cuarenta feronãfakefo fai nẽxpakĩa kexekaxõ ẽfe koka manafoki achikaxõ retexikakĩ. Nõ Pablo retexii nõ foni tenekĩ taefanõ afaa piyamata afaari nõ ayaimakai. Nõ askayamaito Epa Niospa noko retetiroki. Akka mã Pablo retexõ chipo nõ pikai ikax yoinãfo, mã itipinĩkõikaxõ mia manafo mĩ ato afafaimãkai,” ixõ nã naetãpa yoini.

1 Corintios 12:2

Shinãkapo. Mã Jesús Ifofaamano afara fetsa onifakaxõ, “Na nõko niosra,” ikaxõ mato chanĩmara famapaonifo. Mã chanĩmara fafiaino a onifafotokai afaa shinãtirofoma. Askaxorikai afaa pishta mato yoitiroma. Nãskakẽ mã anorima shinãyopaoni.

1 Corintios 14:20

Efe yora mĩshtichi, ẽ mato tãpimapaiyai keskara tãpisharakãfe. Fake yomẽ tãpisharayoxoma, shinãsharatiroma. Nãskarifakĩ fake yomẽ shinãi keskara shinãyamakãfe. Mẽstekõi shinãkãfe. Akka yora xinifãfe chaka shinãtirofo. Akka fake yomefãfekai chaka shinãtiroma. Nãskakẽ fake yome keskara ikãfe. Afara chaka tãpipaiyamakãfe.

1 Corintios 3:19

Nã Jesús chanĩmara famafãfe shinãkani iskafakakĩ: “Nõfi mẽstekõi shinãsharakĩ,” ifiaifãfe Niospa ato õia mẽstekõi shinãsharakanima. Tatima keskarafo ato õi. Nãnori yõra Niospa meka yoikĩ kirika keneni iskafakĩ: “Nã Jesús chanĩmara famafãfe ãa shinãkani iskakakĩ: ‘Nõfi tãpikĩ finakõiaki,’ ixõ shinãkakĩ Nios pãratirofoma. Ãakõi anori pãramekani. Nãskakanax fenoafo,” ixõ Niospa meka yõra kirikaki keneni.

2 Co. 2:17

Akka fetsafãfe Niospa meka ato yoikakĩ kori fipaikani ãa ato pãrakaxõ. Nõ mato Niospa meka yoikai noko kopifakãfe ikaxõ ãa ato pãrakaxõ ato kori fĩaifo keskafakĩ nõkai mato askafamisma. Mã nõ tãpia nõ ãfe meka yoiaito Epa Niospa noko õisharakõi, nãatomãi noko nĩchinixakĩ. Ãfe meka yoikai nõ kaxetiroma, Niospamãi noko õiaino nõmãi Cristo ãfe inaxõ.

2 Co. 4:2

Nãskakẽ nõ afaa one chakafamisma rãfixikima, a afara one chakafamisfo keskafakĩ. Askatari nõ tsoa pãramisma. Askatari nõa nõ Niospa meka fetsafaxõ yoimisma. Akka Niospa tãpia meka chanĩma fisti nõ yoimiskẽ. Nãskakẽ mã nokoki inimasharapainõ, nã nõ afarafo shara faito õi.

Gálatas 3:1

Efe yora mĩshtichi Galacia anoafãfe, mãfi oa yõra shinãsharaima keskarafoki. Akka, ¿tsõa mato paraimẽ oa mato parakani afianã mã shinãsharanõma? Akka nõ xafakĩakõi mato yoimis Jesucristo ifi cruz ikaki mastafono matoõnoax nani. Nõ mato yoisharafimisno meka fetsa nikakĩ mã anorima shinãmis.

Efesios 6:11

Ẽ afara fetsaõnoa mato yoinõ mã tãpinõ. Sorarofo ãto xanĩfãfe ato yoitiro itipinĩsharanõfo fetsafãfe ato afeska fanõfoma. Nãskaxõ a aõ xorakomeaifo kerexkõi ato inãtiro, maiti kerexkõiri ato inãtiro, sĩtora kerexkõiri ato inãtiro fetsafãfe ato retenõfoma. Nãskarifiakĩ Epa Niospa ãfe Yõshi Shara mato inãpaiyaito fikãfe, Satanás chakata mato afara chakafamapaiyai keskara axikakĩma.

1 Ti. 3:6

Akka a rama Jesús Ifofaa a Niospa meka ato yoimis askara katoyamafe. Aato shinãki iskafatiro: “Ẽ fãsi sharakõi, ẽ Niospa meka ato tãpimani. Tsoa fetsa ea keskarama,” ixõ shinãi Jesús shinãyamafi ãa shinãi askatiro. Satanás anori mekani: “Ẽ Nios finõikai,” ini. Askaito Niospa nai mẽraxõ potani nãmã. Nãskari fakĩ a rama Jesús Ifofai, Satanás ani keskari fatiro. Nãskakẽ a ato Niospa meka yoimis askara katoyamafe a rama Jesús Ifofai.

2 Timoteo 1:15

Mã mĩ tãpia keyokõichi chanĩmara faafo Asia mai anoafãfe ea õifainafo. Askatari ato feta Figelo feta Hermógenesri ea õifainafo ato fe fokãkĩ.

2 Timoteo 3:13

A yora chakafãfe ãa ato pãrakani. Askatari chipo ato pãrakĩ finakõixikani. Nãskakẽ afara chakafakĩ ato pãraifãfe õikĩ Satanásri ato pãraxii.

2 Timoteo 4:3

A yora chakafamai nokoaino yorafãfe Niospa mekakõi nikakaspatirofo. A nikatamaroko meka fetsafo shinãtirofo, nã apaiyai keskafakakĩ. Anori fisti shinãkani. Nãskakanax ano fisti ichanãkaxõ anorima a fetsafãferi yoiaito nikakakĩ.

Hebreos 13:9

Akka fetsafãfe mato anorima yoipaikani, a tsõa nikamisma keskara. Nãskakẽ ato nikayamakãfe mato iskafakĩ yoipai ani kiki: “Nõko xinifãfe noko yoinifo keskara nõ nami fetsa piaino nõko shinã mẽra noko shinãmasharatiro,” ixõ mato yoipai ani kiki. Akka a nõ piaitokai nõko shinã mẽra noko shinãmasharatiroma. Askatamaroko Niospa noko noixõ noko imasharatiro a keskara shara nõ inõ.

Stg. 1:6

Nãskata mã Nios yõkakĩ iskafakĩ shinãyamakãfe: “Ẽ Epa Nios yõkaito ea tãpimanimaraka,” ixõ anori shinãyamakãfe. Akka nã mã yõkapaiyai keskara shinãkãfe. Nãskaxõ, “Aicho, ẽ Nios yõkaito mã ea tãpimasharaki. Nãskakẽ ea amapaiyai keskara ea tãpimaxii,” ixõ shinãkãfe. Askatari anã afaa shinãyamakãfe. Fekaxteyamakãfe. Nãskarari nẽfefakĩ ifi fokẽ fokẽ akaito nõ tãpitiroma fakiri kaimãkai. Nãskarifiakĩ Niospa mato tãpimafiaino mã anã afara fetsa shinãkĩ mã shinãsharatiroma. Nãskakẽ mã fekaxtexõ mã shinãsharatiroma. Nãskakẽ Niospa mato afaa tãpimatiroma mã fekaxteaito.

Stg. 3:4

Askatari shinãkapo. Kanõa efapanãfãfiano ãfe fiti pishtafakeshta. Kanõa efapanãfãfiano ãfe fĩti ãfe ifãfe chiataxõ nã iyopaiyai ari iyotiro. Faka faipafãfekẽ, nã iyopaiyai ari iyotiro ifãfe chiataxõ.

2 Pe. 2:18

Nãfo chanĩkani kakapaimisfo. Nãskaxõ yoimisfo iskakani: “Nõ tãpia keskafakĩ tsõa tãpiama. Nã tsõa atiroma keskafakĩ nõ tãpikõia,” ixõ ãa yoikani chanĩfinamisfo. Nãskakaxõ a rama Nios Ifofapaikakĩ ãto chaka xatepaiyaifo ato yoitirofo iskafakakĩ: “Mĩ fẽtsa ãfe ãfi fe ika sharakĩ, nãskax mĩ afe inimakõitiroki, nõ anõ kafe,” ixõ fẽtsa iyotiro afara chakafamaxiki.

1 Juan 2:19

Nã Cristo noikaspaifo nofe iyoafo, mã noikaspakani nomakinoax tsekeafo. Afokai noko keskarafoma. Cristo anã shinãkanima, mã kachikiri faafo. Nãskax nomakinoax tsekeafono nõ tãpitiro afãfekai Cristo Ifofaafoma. Akka a Cristo ãto Ifokõikẽ nomakinoax tsekekeranafoma.

1 Juan 2:26

Akka na yorafãfe Cristo noikaspaifo afãfe mato pãrapaikani. Mato anorima yoipaikani. Nãskakẽ ẽ mato yoisharakĩ kirika kenexoni mã tãpikõinõ tsõa mato pãrayamanõ anorima yoikĩ.

1 Juan 4:1

Efe yora mĩshtichi, fetsafãfe mato anorima yoiaifãfe ato nikayamakãfe. Iskafakĩ mato yoipaikani: “Nõ mato Niospa meka yoi Niospa noko shinãmanaino,” ifiakaxõ anorima mato yoimisfo. Askaifono Niospa meka õikĩ mã tãpitiro a yoiaifo keskara chanĩmamãkĩ. Niospa Yõshi Sharaõxõ mato yoikanimakĩ. Akka afokai Niospa ato afaa yoiama.

Judas 1:12

Akka mã noinãkĩ ayayanã mã pimis nõko Ifo shinãyanã. Akka nã yora chakafori rãfitama mato fe ichanãkaxõ nõko Ifo shinãmisfoma. Fetsafo noitama ãakõi noimemisfo. “Nõ mato yoi mato kexesharaxiki,” ifiakaxõ tsõa afaa yoisharamisma. Nãfo nã nai kõi oimais keskarafo. Nõ nai kõi fakish õikĩ mã oi feira nõ fatiro inimayanã. Akka oi iyamaino nẽfe nai kõi potano nõ shinãchakatiro. Nã ato kexemisfo keskarafofikanax afãfe nõko Ifoõnoa tsõa tãpiama. Nãskatari nã yorafo nã ifi fimimistĩa fimiyamai keskarafo. Nã ifi mã nai rafea keskarafo, mã nakẽ ãfe tapo tsekatirofo. Nãskarifiakĩ nã ato pãramisfãfe tsõa ato Jesús Ifofamatiroma afe nĩpaxanõfo.

Apocalipsis 19:20

Akka ato retetamaroko Jesús ato achia chiifã mẽra ato potaxiki. Nã ato pãramisto, “Ẽ Niospa meka mato yoimis,” ifiax ãa chanĩmis. Nãato na yoinã põfe keskaraõxõ tsõa atiroma keskara famis Satanás yõshixõ. Nãskaxõ keyokõi yorafoki kenea nã marakkaõxõ yoinã põfe keskara tãpixikani. Nãfãfe yoimisfo iskafakakĩ: “Mĩ ẽfe nios. Ẽ mia noi,” ixõ anori yoinã põfe keskara yoimisfo. Akka nã ato pãramisto yõra atiroma keskafakĩ afama mĩshti faito nãfãfe õiafo. Nãskakẽ ato pãrakõia. Nã yoinã põfe keskara fe nã ato pãramis naafomano iriyafi Jesús ato chiifã mẽra pota.