Efesios 3:20 - Yaminahua

²⁰ Akka Epa Niospa afama mĩshti fatiro a nõ yõkai tii noko axotama finõmata noko axotiro. Nãato ãfe sharaõxõ noko axotiro afama mĩshtifo. Noko axopaiyai keskafaito nõ tãpitiroma. Finõmainĩfofãta noko shara fatiro.

Efesios 3:20 ပူးပေါင်းရင်းမြစ်များ

Mateo 3:9

Ẽ mato anã yoinõ nikakapo. Mã shinãtiro: ‘Nã Abraham nõko xini ipaoni, õiti sharayaxõ Nios shinãpaoni.’ Akka mã shinãkĩ: ‘Nõmãi Abraham fenaxõ nõ shara shinãi,’ ixõ mã shinãkĩ mã shinãsharaima. Askara shinãyamakãfe. Akka mãto õitinĩ mã chaka shinãfi mã chanĩ. Nikasharakõikãfe, ẽ mato yoinõ. Na tokiri Niospa onifaxõ nĩchikẽ mã õitiro Abraham ãfe fena inõ. Nãskakanax Abraham fakefo itirofo na tokiri õikĩ Nios shinãkanax. Akka mãkai anori shinãima mã mã chanĩ: ‘Abraham shinãpaoni keskara nõ shinãira,’ ikax. Askara shinãyamafi Satanás fisti ifofafiai.

Juan 10:10

Akka fetsafãfe efe yorafo ato pãrapaikani: ‘Ea ifofakãfe. Ẽ mato tãpimasharanõ,’ ixõ ato yoifikakĩ anorima ato pãrakani. Nãskakaxõ emakinoa ato ifipaikani. Yometso keskarakõifo. A ea chanĩmara faafo ato kexesharapaikanima. Ato chakafata ato retepaikani. Akka ẽ askarama. A ea Ifofamisfo ẽ ato kexesharai efe isharapakexanõfo, nono nãmãnoaxri isharapakexanõfo. Nãskax ẽ nono nãmã oni ato kexesharaxikĩ.

Romanos 16:25

Epa Niospa mato kexesharanõ. Ẽ Jesucristoõnoa mato yoimis keskara ãfe shinãmã mato shinãmatiro mã Ifofasharanõ. A iyopaonifãfekai tsõa Jesucristoõnoa tãpiyopaonifoma. Akka iskaratĩa keyokõichi mã tãpiafo. Epa Niospa nã nipanakato noko nĩchini Jesucristoõnoa nõ ato yoinõ. A ixiainoa Epa Niospa ato yoini nãnorikõi kirika kenenifo. Nã maitio ikafãfe Jesús chanĩmara fayanã nikasharatirofo.

Romanos 4:21

Niospa axõai keskara fakĩ Nios chanĩmara faxõ Abraham afaa fetsakai shinãnima.

1 Corintios 2:9

Akka yõra kirika kenekĩ iskafani: Afama mĩshti shara Niospa ato axoxii. Tsõa õiyomisma sharafo ato axoxii. A tsõa nikayomisma ato axõfãi a tsoa pishta ãto shinã mẽraxõ shinãyomisfoma nãfo ato axosharaxii. A ato noiaifo ato itipinĩshara faxoxii, nãskara yoikĩ Niospa meka yõra kirikaki keneni.

2 Co. 9:8

Akka nã mã fichipaiyai tii keyokõi Niospa mato inãtiro afara sharafo fetsa fetsatapafo mã afaa yopanõma. Askatari nã afara yopaifo mã ato inãno, Niospa keyokõi tãpia mato sharafa fafafãitiro mãri fetsafo shara fanõ.

Efesios 1:19

Epa Niosi, mĩ Yõshi Sharaõxõ mĩ afama mĩshti famis. Nãskaxõ mĩ Fake Cristo mĩ anã nimani mĩ Yõshi Sharaõxõ mefe pataxamei niax mefe xanĩfokõi inõ. Nãskax mĩ põya kayakai aõri mefe tsaoa. Afia mĩ Yõshi Shara nõ mẽra nanexõ a nofeta mia chanĩmara faafo tii afara fetsafo mĩ noko ispasharakĩ mĩ noko amasharakĩ.”

Efesios 3:7

Nãskakẽ a Jesús Ifofaafo ẽ ato chakafafiaito, ea noisharakĩ Epa Niospa ea nĩchini ẽ ãfe meka shara ato yoinõ ãfe Yõshi Sharaõxõ.

Colosenses 1:29

Nãskakẽ ẽ mato yonoxokĩ finakõifafãini, Cristo ãfe kerex shara ea inãno.

Hebreos 11:19

Nãskaxõ Abraham ãfe shinã mẽraxõ shinãkĩ iskafani: “Epa Niospa ea yoia iskafakĩ: ‘Mĩ fake Isaaca ea retexõfe,’ ea faito ẽ shinã Niospa afama mĩshti fatiro. Akka ẽfe fake nafiakẽ Epa Niospa samama ea otofaxotiro,” ixõ shinãni. Chanĩma, ãfe fake nakerani. Nãskakẽ Abraham shinãni ãfe fake nafiakẽ Niospa otofaxotiro.

Hebreos 7:25

Nãskakẽ Apa Niosxõ noko ifitiro nõ afe ipaiyaito nokoõxõ Apa Nios yoifafãini iskafakĩ: “Epa Niosi, ẽ ato nãxoniki, ato chaka soaxõfe. Nãskaxõ a mĩ ika ano ato imafe,” ixõ nokoõxõ Apa yoimis. Nãskakẽ a nokoõnoa Apa yoia keskafakĩ noko nãskakõi faxoxii nõ afe ĩpaxanõ. Nãskaxkai nõ fenopakenakama.

Stg. 4:12

Nios fistichi noko yoini afeskax nõ isharatiromãkĩ, ares fistimãi xanĩfokõixõ. Ares fistichi tãpikõia nõ afe keskara ikamãkĩ, shara iyamai chaka nõ ikamãkĩ. Ares noko ifitiro. Akka noko ifiyamakĩ omiskõipakenakafo mẽra noko potatiro. Nãskakẽ fetsafo pãrayamakãfe.

2 Pe. 1:11

Mã askaito õikĩ mato ifisharakõixii a ika ano mã afe ĩpaxanõ nõko Ifo fe. Nõko Ifo Jesucristo noko ifimis.

Judas 1:24

Nõko Ifo Nios fisti finakõia, nãato keyokõi tãpiakõia. Askatari nãato noko ifimis. Ãfe kerex sharaõxõ noko kexesharatiro nõ fenonõma. Nãato noko inimamasharakõi nõ nai mẽra kai, afaa chakafamisma keskarax. Nã sharafinakõia, efapakõi, afama mĩshti fatiro, tsõa atiroma keskafakĩ nõko Ifo Jesucristoõxõ atiro. Nãskarakõi mẽxotaima ĩpanaka. Nã tii. Ẽkĩa Judas