Efesios 2:15 - Yaminahua

¹⁵ Nãskakẽ Jesús nokoõnoax nani. A Moisés Niosxõ keneni keskara anã noko tsõa yoitiroma. Jesucristo keyokõi noko nãxoni nõ afe yorafo inõ. Nãskakẽ mãri judeofoyamafekẽ, mato yafi noko ifini. Nãskax a yora fisti keskarafo nõ inõ. Mã nõ fetsa keskarax õitisharayakõifo nõ inõ noinãsharakõi.

Efesios 2:15 ပူးပေါင်းရင်းမြစ်များ

2 Co. 5:17

Nãskakẽ Cristo nã Ifofaafo ato shinã fetsafaxõa anã shinãyopaoni keskara inõfoma, fena keskara shara inõfo. A Niospa fichipaiyai keskara fena keskara nõ ixii. Keyokõi fena keskara ixii.

Gálatas 3:10

Akka fẽtsa shinãkĩ iskafai: “Moisés yoini keskara ẽ nikai ẽ isharakõi,” ixõ shinãi afi ãfe chaka aõ nepakenaka. Akka kirika kenekĩ yoikĩ iskafanifo: “Moisés yoikĩ kirika kenekĩ iskafakĩ yoinino: ‘A Moisés yoini keskara nikayamakani ãto chaka ãto nepakenaka,’ ” ixõ yoinifo.

Gálatas 3:28

Epa Niospa Cristoõxõ keyokõi nã maifo tii anoafo keyokõi nãskarafos noko õi. Judeofoya a judeofoma, a ato yonomatifoya a yonomatifoma, feronãfakefoya kẽrofo, nãskarafos noko õi. Jesucristo nõko Ifo ikano aõnoax yora fisti keskara nõ itiro. Akka keyokõichi nõ Ifofaax nõ afe yorafo.

Gálatas 6:15

Nõ Jesucristo Ifofaxõ nõ foshki repa xatea askarakai sharama atokai nõko chaka noko soaxotiroma. Akka nõ Ifofaito Niospa nõko chaka noko soaxotiro fena keskara shara nõ inõ.

Efesios 2:10

Nãskakẽ Epa Niospa taeyoi shinãyoni Jesucristoõxõ yorafetsafo nõ axosharakõinõ. Nãskakẽ aa fistichi noko onifani afara fetsafo nõ sharafanõ aõxõ. Akka nores fisti nõ afaa sharafatiroma. Cristo Jesús Ifofaxõ nõ afama mĩshti sharafatiro. Nãskakẽ taeyokĩ Epa Niospa ares õikĩ yoini.

Efesios 2:14

Nãskakẽ Jesucristoõnoax nõ noinãtiro, ẽfe kaifo israelifo fe yora fetsafo. Nãskakẽ nãskarafos noko shinãmasharatiro nõ aõnoax noinã faatanãx afianã nõ noikaspa faatanãnõma. Nãskakẽ afanã noko anã afeska fatiroma. Iskaratĩa nõ Cristoõnoax yora fisti keskarafo.

Efesios 2:16

Nãskakẽ Jesús ifi cruz ikakinoax noko nãxoni. Na ẽfe kaifo judeofo yafi a judeofomari Jesúsxõ Niospa noko a yora fisti keskara noko fani. Noko noisharakõikĩ nõ nikayospafo iyopaofinikẽ, Jesús nokoõnoax nani. Nãskakẽ Niospa noko yora fetsafoya rafema sharakõia afe yorafo nõ inõ.

Efesios 4:16

Jesús nõko mapo keskaraxõ noko shinãmakĩ noko yonomanaino, oa afe yora keskara nõ itiro. Akka nõko yora meemafiax nõ mifimais ita, nõ kishimais ita, nõ pachomais ita, nõ feromais ita, ixõ nõ afaa yonotiroma, afaakairoko shinãkĩ. Akka nõ mifi rafeyata, nõ tae rafeyata, nõ fero rafeyata, askai fetsexõ nõ meemasharakõixõ nõ yonosharakõitiro shinãfãi, nõko yoramãi meemasharakõikẽ. Nãskafakĩri keyokõichi nõ Jesús Ifokõi faax nofe yorafo fe nõ isharakõitiro noinãsharakõikai, Jesúsnoax mã noko ãfe Yõshi Shara inãno oa ãfe yora keskara sharax.

Colosenses 2:14

Shinãkapo. Keyokõi nõ chakafamis keskara nõko chakafo Epa Niospa noko soaxoni, anã afoõnoa shinãyamaxii. Nãskano Niospa yoini keskara nõ nikatama afara fetsa nõ chakafapaoni. Nãfo keyokõi nõ chakafamisfo keskara kenepakea. Askafixõ ifi cruz ikakinoa Jesús mastanifoxõ não nõko chaka noko soaxoni.

Colosenses 2:20

Mã oa Cristo fe naa keskara mã ini. Nãskakẽ iskaratĩa a mã chakafapaoni keskara mã anã akima. Askatamaroko mã isharakõimis. Mã askaito nã chanĩmara faafãfema mato afaa yoitirofoma. Nãskafekẽ, ¿afeskakĩ mã ato nikaimẽ, mã ato nikaxõ nã mato yoiaifo keskara ma apai? Nãskakẽ ato nikayamakãfe.

Colosenses 3:10

A mã apaoni keskara anã atama iskaratĩa, mã mã Jesucristo fe rafekõia a keskara shara ixiki. Akka Epa Niospa mãto õiti mẽra fena sharakõi mato õi. Nãskakẽ a keskara sharakõi mato imafafãini, aõnoa mã tãpisharakõinõ.

Colosenses 3:11

Nõ Cristo Ifofakẽ Niospa keyokõi nãskarafos noko õi. Judeofo yafi a judeofoma, a kene tãpiafoya a kene tãpiafomari, yorafoya nafafo ãto yonomatifoya a ãto yonomatifomari Niospa nãskarafos noko õi. Keyokõi nõ afe yoraxõ nõ Jesucristo fisti yopakõi.

Colosenses 3:15

Nãskakẽ Cristo nikasharakõikãfe mãto õiti sharanokai mã fochishpanã faatanãtiroma. Askatamaroko aõnoax isharakõiax nã yora fisti keskara shara mã itiro. Nãskakẽ Epa Niospa mato katoni aõnoax mã isharakõita fetsafo mã afeska fanõma. Nãskakẽ mã Epa Nios yoitiro iskafakĩ: “Aicho Epa Niosi, ẽfe õiti mĩa sharafaxõa,” ixõ mã yoitiro.

Hebreos 7:16

Akka Moisés yoini keskarakõi Leví ãfe fenafo fisti ato Nios kĩfixomisfo itirofoki. Jesúskai Leví fenaxoma a Moisés yoini keskaraõnoax noko Nios kĩfixomis itiroma. Askatamaroko Niospa Jesús katoni noko kĩfixomis inõ. Ãfe sharaõxõ Epa Niospa Jesús otofani. Anã nanakama. Nãskax noko Nios kĩfixomis ipanaka Niospa sharaõxõ.

Hebreos 8:13

Nãskakẽ Niospa anã ato yoini iskafakĩ: “Meka fena shara ẽ mato yoinõ,” ixõ ato yoini. Akka a Moisés ato yoini keskarakai anã tsõa shinãtiroma. Nã Moisés ato yoini keskara meka xinikõi. A mekakai anã tsõa shinãpakenakama. Nãskakẽ nã meka shinãmakipakenakafo.

Hebreos 9:23

Nã anoxõ Nios kĩfiti karapa pexe mẽranoa keskarakõifo Nios ika ari. Nãfoki ato Nios kĩfixomisfãfe yoinã imi saanifo Niospa afo õisharanõ. Akka a karapa pexe mẽranoa imifo sharafiano afãfe nõko chaka noko soaxotiroma. Askatamaroko nã Cristo nokoõnoax nai fistini nõko chaka noko soaxoxiki. Noko chaka soaxonano Nios ika ari nõ katiro, a keskara shara afe ipaxakĩ. Askatari anokai a anoxõ Nios kĩfiti karapa pexe keskarama. A Nios ika ano sharafinakõia.