Apocalipsis 9:21 - Yaminahua

²¹ Ato retekakĩ xatemisfoma, askatari koshoiki xatemisfoma, askatari ãto ãfima chotamisfo, kẽrofãferi ãto fenema chotamamisfo, yometsoriai xatemisfoma nãfo xateafoma. Tsõa ãto chaka xateama. Nõko Ifo Jesús Ifofaxikakima. Nãfo chakakõifikaxõ ãto chaka xateafoma nõko Ifo Jesucristo Ifofasharaxikakima.

Apocalipsis 9:21 ပူးပေါင်းရင်းမြစ်များ

Mateo 15:19

Akka yorafãfe afara chakafakakĩ ãto shinã mẽraxõ chaka shinãtirofo, ato retetirofo, askatari ãto ãfima chotatirofo, askatari kẽro fetsa kaxefatirofo, askatari yometsotirofo, askatari chanĩtirofo, askatari ato ĩchatirofo.

2 Co. 12:21

Nãskatari ẽ shinãchakakõi, shinãyanã õitsai Niospa atoõxõ ea rãfimaniraka ixõ ẽ shinãi mã isharayamaino. Mã askaino ẽ matoki nokoax ẽ rãfikõixii mã afara chakafaino. Akka ranãri mã isharapaonima. Mãto ãfima fe mã oxapaoni. Askatari kẽrofori ãto fenema fe oxapaonifo. Nãskatari afara chakafo fetsa fetsatapafo mã apaoni. Akka mã xateyamaino ẽ nokoax ẽ mato õi ẽ shinãmitsakõixii, rãfikõiyanã.

Gálatas 5:20

Nãskakaxõ afara yora fakaxõ na nõko niosra ixõ kĩfimisfo. Askatari koshoiti tãpiafo, askatari ato noikaspamisfo, askatari isharakãtama õitifishkimisfo. Nãskakaxõ atonã fisti afara apaimisfo, askatari noikaspa faatanãmisfo nores fisti nõ tãpikõia a nõ tãpia keskara tsõa tãpiama ikanax.

Apocalipsis 13:13

Afama mĩshti tsõa atiroma keskara ato ispa yorafãfe chanĩmara fanõfo. Nãskata yorafãfe ãto ferotaifi nai mẽranoa chii fotomana.

Apocalipsis 13:15

Nãnori ato yoiaino mã nimofonõfã mãpeakano xãkaitiroma. Askafiano Satanáõxõ xãkaima mekanõ, askatari a siete mapoya mekayamaifo ato retenõ.

Apocalipsis 13:7

Askatari Satanás ifofakaxõ ato afara shinãmãnaino yorafãfe a Jesús Ifofamisfo ato finõpaikĩ ato retepaikani ãto xanĩfo ipaikakĩ. Askatari maitio anoafo, xoko fetsafo, meka fetsafoya keyokõi ãto xanĩfo ikani a feronãfake xanĩfo chakakõi a Satanás yõshi a mẽra nanea.

Apocalipsis 14:8

Askata Niospa ãjiri fẽtsa mã mekai keyoano fetsari nokotoshixõ iskafakĩ yoia: “Babilonia ano pexe rasi iyopaoni. Iskaratĩa anã ano tsoa ikama. Nãnoxõ yorafãfe afara chaka shinãpaonifo. Fetsafori afara chaka ato famapaonifo ato keskara inõfo. Askaifãfe Epa Niospa ato omiskõimani anã ano inõfoma. Nãskakẽ Babilonia anã anoma,” ixõ Niospa ãjirinĩ nai mẽra ikato yoia.

Apocalipsis 17:2

Akka keyokõi xanĩfofo maifo tii anoafo ato fe chaka imisfo. Nãskakẽ atoõnoax afori chakakõifo ikafo. Nã kẽro feromakõi keskara ikafo chakafakani. Akka nã Niospa ato omiskõimaxiai keskara ẽ mia õimanõ,” ixõ ea yoia.

Apocalipsis 17:4

Nã kẽromã sama chainipa yafi nana õshi safea ika. Oro fakka fakka ikai keskara safea. Askatari makex keskara fakka fakka ikai sharashta yafi fetsa ãfe ane perla oxoshara, nãri safea ika. Nã kẽromã kecho oro tsoma a mẽra afara chakakõi naneato, a mẽra nanea keskara yorafo afara chakakõi fetsa fetsatapafo chakafama. Ãto mẽra nanexõ ato afara chaka shinãmana. Ato pãemata, chanĩmis ato imata, ãto ãfima chotamisfo ato imata, ãto fenema chotamamisfo ato imata, nãskara chakakõifos ato imamis.

Apocalipsis 17:5

Ãfe femãnãki kenea keskara tsõa tãpimisma. Iskara kenea: “Babilonia anoafo tsoa keskarafoma. Nã kẽro feromakõichi Nios nikakaspai keskarafo. Nãskakẽ fetsa fetsatapafo chakafakĩ finakõimisfo,” ixõ kenea.

Apocalipsis 18:3

Nã kẽro chakapa yorafo ato mãmã pae ayamatiro keskafakĩ, nãskarifiakĩ nã Babilonia anoafãfe yora fetsafo mai fetsa anoafo ato afara chakafamafo ato keskara inõfo. Ãto xanĩfofori ato askafamafo. Askatari afara sharafos fichipaimisfo. Nãskakẽ a afama mĩshtifo ato minimisfo, afara ichapayakõifo, ixõ yoiaito ẽ nika. Niospa inapa askara ato yoia a Niospa keyoxiai a Babilonia anoafo.

Apocalipsis 21:8

Akka fetsa ratei eõnoax omiskõikaspakĩ ea kachikiri faa, askatari fẽtsa ẽfe meka nikakaspamis, fẽtsari afara chakafo fetsa fetsatapafo xatekaspai, askatari fetsari retemitsamis, fetsari ãto ãfima chotamis, askatari kẽromãri ãto fenema chotamamis, fẽtsari koshoiti tãpiax nã niafaka chakafo fe rafemis, askatari fẽtsari ea noitamaroko afara fetsa noikĩ, ‘Na ẽfe nioski,’ famis. Nãskakẽ askarafo fe nã chanĩmisfo afokai efe nĩpanakafoma. Chiifã mẽra nã omiskõipakenakafo mẽra ipanakafo. Anoaxkai faki fonakafoma,” ixõ Epa Niospa ea yoia.

Apocalipsis 22:15

Nãskakẽ nã yora chakakõi paxta põfe keskarafo fe, a koshoiti tãpiafo, nã koshoiti chanĩmara faifori, feronãfãke ãfe ãfima chotamis, kẽrofãferi ãto fenema chotamamisfo, retemitsamisfori, Nioskõima noikĩ ifofamisfori, chanĩmisfori, nã chanĩ noimisfori, askara yorafokai Jerusalén Fena mẽra ikitirofoma.

Apocalipsis 9:20

Tsoa nayamafiaxõ ãto chaka xateafoma Epa Nios Ifofaxikakĩma. A niafaka chakafo ifofamisfo xateafoma. Nãskakẽ oro nimofo fakãta, a kerexkõi fakkai fakkaisai nimofo fakãta, keno ãfe ane bronce nimofo fakãta, ifi nimofo fakãta, tokiri nimofo fakãta; nãfo askafaxõ, “Nãfo nõko nios. Nõ aõ noi,” ixõ yoimisfo. Afãfe õiyamafiaifono, askatari mekayamafiaifono, askatari kafãsayamafiaifono, nãskakẽ afo kĩfimisfo. Epa Niospa nã ãto kaifo yafi yora fetsafo omiskõimafiaito õifikanax ãto chaka xateafoma Epa Nios Ifofapaikanima.