Apocalipsis 22:14 - Yaminahua

¹⁴ Anã Jesús yoia iskafakĩ: “Nõ Jerusalén Fena mẽra ikixõ, nã ifi ãfe fimi pipaiyaitĩa nõ pitiro. Nãskarifiai nõ Epa Nios fe ikaino ares fisti noko nimapakexatiro. Nã Jesús chanĩmara faafo ato chaka soaxona nãfo fisti Epa Niospa ato ikimatiro afe ĩpaxanõfo.

Apocalipsis 22:14 ပူးပေါင်းရင်းမြစ်များ

Juan 10:7

Nãskano Jesús afianã ato yoini: “Ẽ chanĩmakõi mato yoinõ. Nã ovejafo kene mẽra ikikani nã kini fisti mẽra ikitirofo. Ẽfi na oveja kini keskaraki. Nã Epa Nios ano ikipaikani eõnoax fisti ikitirofo.

Juan 10:9

Akka ẽfi na kini kãiti keskaraki. Nã ẽfe Epa Nios ika ano ikipaikani eõnoax ikitirofo afe ipaxakakĩ. Nãskatari eõnoax isharatirofo anã fekaxtetirofoma.

Juan 14:15

Anã Jesús ato yoini iskafakĩ: “Ea noikõikĩ nã ẽ mato yoiai keskai ikãfe.

Juan 14:6

Jesús kemani: “Ẽfi nã fai keskaraki. Ẽfi chanĩmismaki. Eõnoax yorafo nĩpaxatirofoki. Tsoakai ẽfe Epa ika ano nokotiroma. Eõnoax fisti ẽfe Epa ari nokotirofo.

Juan 4:12

Nãskata anã kẽromã yoini: “Nõko xini Jacobo kini faxõ faka fixõ ayapaoni. Ãfe fakefãferi ayapaonifo. Ãto inafori ayamapaonifo. Nõri nã faka ayai. ¿Mĩ nõko xini Jacobo finõamẽ?” kẽromã fani.

1 Corintios 7:19

Akka nõ foshki repa xatemisma askatari nõ foshki repa xatemis nãskara shara. Akka nõ askanokai, “Mã chakafaa,” noko Niospa faima. Askatari nõ askamanori, “Mã chakafaa,” noko Niospa faima. Nã judeofo imis keskarakai nõ itiroma noko Niospa ifinõ. Askatamaroko Niospa noko yoini keskara nã fisti nõ atiro.

1 Corintios 8:9

Nãskakẽ mato feta Nios Ifofaafo afaa chakafamayamakãfe. Mã shinãi iskafakĩ: “Nõ keyokõi pitiro. Afara onifakaxõ, ‘Na nõko niosra,’ ikaxõ nami inãfo. Nã nami nõ pitiro nã onifafokairoko Nioskõikẽ. Akka mã nõ na nami pixokai nõ ãto nios chanĩmara faima. Akka mã nõ tãpia Nioskõima. Akka pixõ Nioskõi nõ chakafaima. Jesúsri nõ kachikirifaima,” ixõ mã shinãi. Mã anori shinãfiaino Jesús Ifofaa fetsafãfe anori tãpiafoma. Tãpiamaifono nã nioskõimato kĩfiti pexefã anoxõ mã piai fisti mã pipai mãkai ãto nios ifofapaima, nãskakĩ mato õikakĩ akairi apaikani. Akka mã mã tãpia yorafãfe ãto niosnã nõ nami pia shara, chakama. Akka fetsafãferi Nios Ifofafiakaxõ yoimisfo iskafakakĩ: “Ãto niosnã nõ nami pia sharama, nõ chakafatiro,” ixõ yoimisfo. Nãskaxõ mã nami piaito fetsafãfe mato õikakĩ akairi afãfe nami pitirofo. Nãskaxõ mã nami pikaxõ chipo shinãtirofo iskafakakĩ: “Ooa, mẽ nami pixõ ẽfe Ifo Jesús ẽ chakafaa ẽmãi ãto niosnã nami pixõ. Nã nami pikĩ ẽ ãto nios sharafai. Ẽ ãto nios ifofai õitsai. Ooa, ẽ chakafaa,” ixõ shinãtiro. Askaxõ ãfe shinã mẽraxõ shinãchakakõitiro mã nami piaito õikakĩ akairi pikaxõ. Nãskakẽ mã chakafamatiro. Askafakĩ Cristori mã chakafai. Mã mã tãpia afara onifakaxõ, “Na nõko niosra,” ikaxõ nami inãifo nã pixokai mã chakafaima nã onifafokairoko Nioskõikẽ. Akka fetsafãfekai tãpiafoma. Afãfe shinãkani: “Nã nami pixõ nõ chakafatiroki,” ixõ shinãmisfo. Akka mã piaito õikakĩ akairi pikaxõ shinãchakatirofo. Mã akai keskafakĩri shinãkani. Akka mã nã nami piyamainokai akairi pikeranafoma. Shinãchakakeranafoma. Nãskakẽ mato fe yorafo noikõixõ mã nã nami pitiroma ato chakafamaxikima. Akka atoõnoaxri Cristo naniki.

1 Corintios 9:5

Ẽ akai keskafakĩ Pedrori Jesúsnoa yoifofãsafamis. A Jesús nĩchiafãfe fetsafãferi Jesúsnoa ato yoifofãsafamisfo. Jesús ãfe extofãferi ato yoifofãsafamisfo. Nãfo kẽro Jesús Ifofaafo fe fianãkaxõ Jesúsnoa ato yoifofãsafaifono ãto ãfifori ato fe fofãsamisfo. ¿Nãfãfe ãto ãfifãfe Jesús Ifofaafo fe fianãfo keskari ẽri nã kẽro Jesús chanĩmara faa fe ẽ fianãtiromamẽ eferi kafãsanõ?

Gálatas 5:6

Nõ foshki repa xateano, askayamãkĩ nõ xateamano, afãfekai nõko chaka noko soaxotiroma. Akka nõ Jesucristo Ifofakõinaino fetsafo noko ato noimasharakõitiro nõ ato noisharakõinõ. Nã fisti nõ fichipai, chanĩmara fasharakõixii.

1 Juan 3:3

Niospa fakekẽ nonori nõ yoi: “Ẽ Jesucristo fe ipanaka. Ẽ Jesús fe ikaino ãfe õiti keskarakõi ẽ ixii,” ixõ shinãkĩ nõ anã chaka shinãpaima. Jesucristo shinãi keskarari nõ shinãtiro, anã chaka shinãyamakĩ.

1 Juan 5:3

Nõ Nios noikõixõ ãfe meka nõ nikakõikĩ a noko yoiai keskara nõ nikai nõ fekaxteima.

Apocalipsis 2:7

Mã pachoyakĩ ea nikakõikãfe. Niospa Yõshi Sharapa mato yoiaito nikasharakõikãfe. Satanás mato fanĩrira shinãmapaimiskĩ. A Satanás finõinĩfofã ea kachikiri fatama ea Ifofasharakõiaito, aafi Epa Nios ano ẽ ikimaxii efe isharapakexanõ,’ ” ixõ Jesús ea yoia anori Efeso anoafo a chanĩmara faafo ato ẽ kenexonõ.

Apocalipsis 21:12

Nã tokiri kenea efapa Jerusalén foake tii fayakena. Nã kene keyakõi doce fepotiya. Nã doce fepoti ano Niospa ãjiri niafo kexesharaxikakĩ. Israel iyopaonito ãfe fake doce ipaoni. Nã docefãfe ãto fakefo paxkanifo. Nãskakẽ fepoti tii ãto anefo doce kenea.

Apocalipsis 21:27

Akka afara chaka nã Jerusalén Fena mẽra ikitiroma. Nã chaka shinãmisfo fe a afara chakafamisfo, a ato pãramisfori afo ikitirofoma. Akka Jesús ãfe kirika mẽra ãto ane keneano afe ipaxatirofo. Nãfo fisti Jerusalén Fena mẽra ikitirofo Jesús fe ipasharaxikakĩ.

Apocalipsis 22:7

Akka yoikĩ iskafaa nõko Ifo Jesús yoia iskafakĩ: “Ẽ nai mẽranoax mai ano matoki nokorisai. Nã mĩ õia a inõpokoai a mĩ nikafori, nãfo mĩ kenetiro. Akka nãfo chanĩmara fakakĩ kachikiri fayamakanax inimakõixikani,” ixõ Jesús ea yoia.

Apocalipsis 7:14

“Maa. Ẽkai tãpiama. Mĩ tãpia. Mĩ ea yoitiro,” ẽ faito ea yoia iskafakĩ: “Yorafo omiskõiaifono na yorafori fãsi omiskõinifo. Akka omiskõiaifono Niospa ãfe Fãke Jesús ato nãxoni ãto chaka ato soaxoxiki. Ato chaka soaxõ mã ato imasharakõia. Nãskakẽ ato rapati oxo shara safemana.