Apocalipsis 12:11 - Yaminahua

¹¹ Nãskakẽ Jesús Ifofaxõ mẽxotaima nõ yoimis niri nai mẽra oyoxoma nõ yoiyopaoni nãmãxõ iskafakĩ: ‘Nõko Ifo Jesús, Niospa Fakekõi, oa oveja fake keskaraxõ noko nãxoni nõko chaka noko soaxoxiki,’ ixõ nõ yoimis mẽxotaima. Askatari nõ Niospa meka ato yoimis. Nãskai nõ meseima, ‘Noko retefiaifono, nõ inimasharai,’ ixõ anori mẽxotaima nõ yoimis. Askaxõ nõ Satanás finõinĩfofana.

Apocalipsis 12:11 ပူးပေါင်းရင်းမြစ်များ

Lucas 14:26

“Fẽtsa ea Ifofapaikĩ ea noikĩ finakõitiro. Ãfe apanõ ãfe afanõ ãfe ãfinõ ãfe fakefonõ ãfe extonõ ãfe chikonõ ato noifikĩ earoko noikĩ finakõiama, askatari ãa anoi noimei ea noisharakõitama nãskakẽ a keskara eõxõ tãpimis itiroma.

Juan 16:33

Nã ẽ mato yoi mãto õiti shara inõ. Akka nã ea chanĩmara faafoma fe mã nono nãmã nẽtei. Nãskakẽ mato omiskõimafiaifono shinãchakayamakãfe. Ẽ Satanás yafi nã ea chanĩmara faafomafo ẽ ato finõkõia. Nãskakẽ ẽ mato kexesharatiro,” Jesús ato fani.

Hch. 20:24

Akka ea askafafiaifono ẽ shinãchakaima. Nã Epa Niospa ea amapaiyai keskara fisti ẽ shinãi. Epa Niospa keyokõi yorafo noikõi na meka shara ato yoitãfe ea fani. Nã ea yoini keskara ẽ apai.

Hch. 21:13

Askafaifono Pablo noko kemani iskafakĩ: “¿Afeskakĩ mã oiaiyanã mã ea shinãmitsamanimẽ? Mẽ itipinĩshara ea nexayamakakĩ ea retekani Jerusalén anoxõ, nõko Ifo Jesúsxõ ea askafakani,” Pablo noko faito,

Romanos 16:20

Epa Niospa mato imasharatiro mã isharanõ. Nãato Satanás mato nãmã potai anã mato afeskafanõma. Nõko Ifo Jesucristo mato sharafaxopainõ.

1 Corintios 15:57

Akka Jesucristo noko nãxoni noko chaka soaxoxiki. Nãskakẽ nõ Jesucristo Ifofaax nõ nafiax nõ anã otoax nõ anã nanakama. Nõ afe nĩpanaka. Nãskakẽ nõ Epa Nios aicho fai.

1 Juan 4:4

Akka mãroko askaramakĩ efe yorafãfe, Niosfi mãto Ifokõikĩ, mãfi Niospa yorakõifokĩ. Ãfe Yõshi Shara mã mãto õiti mẽra nanea. Akka a anorima shinãifo askarafoma, Satanás yõshi ãto õiti mẽra nanea. Akka Niospa Yõshi Shara mato mẽra naneano mã Satanás finõkõia.

1 Juan 5:5

Afara chakafo noko amapaiyaifo keskara Niospa noko amatiroma nõ anõma. Nãskaxõ Jesucristo Niospa Fake nõ chanĩmara faxõ aõxõ na chakafo nõ finõtiro anã afaa chakafaxikima. Nã chanĩmara faafãfe finõtirofo.

Apocalipsis 1:9

Ẽkĩa Juan, ẽ mãto ochikõi. Nãskax mãri Jesús Ifofaax mã efe yorakĩ. Askax mã aõnoax omiskõifikĩ, mã tenemis. Nãskariai ẽri aõnoax omiskõifikĩ ẽ tenei. Ẽ Niospa meka ato yoita Jesúsnoari ẽ ato yoimis. Ea nikakaspakakĩ, ãto xanĩfãfe sorarofo ea achimaxõ, fakafã nakirafe ea ato nĩchimana ãfe nãsimã, ãfe ane Patmos ano.

Apocalipsis 11:7

A feronãfake rafeta mã ato yoikĩ senẽfaafono, a chakakõi mai kinĩfã mẽranoax Satanás shinãmanaino, tsekeinãkafã a feronãfake rafe retexii.

Apocalipsis 12:17

Nãskaito õi Satanás a kẽroki õitifishkikõina. Nãskax nã kẽromã ãfe fakefoki kaa ato retepai, nãfãfemãi Niospa meka nikakõisharaifono isharakõiyanã Jesús Ifofasharakõiyanã.

Apocalipsis 19:10

Ea yoiaino ẽ a nãmã feopakekafana, “Mĩ fãsi sharakõi,” ixõ yoixiki. Ẽ askafaino ea yoia iskafakĩ: “Ea askafayamafe. Ẽri Nios yonoxomiski mĩ axomis keskafakĩ, a Nios Ifofaa fetsafãferi askafamisfokĩ. Jesús mato yoiai keskara mã kachikiri famisma. Nãskakẽ Nios fisti nãmã nõ feopakekafã yoitiro: ‘Mĩ fãsi sharakõi. Mĩ ẽfe Ifokõi,’ ixõ anori fisti nõ yoitiro. Nã Niospa meka yoimisfãfe yoimisfo keskarifakĩ ẽri Jesúsnoa yoimis Epa Niospa ea shinãmanaino,” ixõ ãjirinĩ ea yoia.

Apocalipsis 2:13

Mẽ tãpia a pexe rasi Pérgamo ano mã ika. A Pérgamo anoafãfe Satanás nikakõikani. Askaito õi mã mesemisma, ea Ifosharafai. “Jesús nõko Ifokõi,” ixõ mã ato yoimis. A ea Ifofamis fetsa ãfe ane Antipas eõnoa ato yoimis õikĩ mã reteafo noikaspakakĩ. Mã reteaifãfe õifiax mã atoki meseima, mã ea chai faama. Mãto õiti mẽra mã shinãsharakõi. “Noko retefiaifonokai nõko Ifo Jesús nõ chai faima,” ixõ mã yoimis. Anori mã shinãi sharakõi.

Apocalipsis 2:17

Mã pachoyaki ea nikakãfe. Niospa Yõshi Sharapa eõnoa mato yoiaito, nikasharakãfe. Satanás mato chakafamapai. Fẽtsa Satanás nikayamaxõ ea kachikiri faamano, nã ẽ kexesharaxii nã ẽfe Epa israelifo kexesharani keskafakĩ. Shinãkapo. Epa Niospa israelifãfe ãto xinifo a piaifo ato inãni fonãikaifãfe afaa piamaifãfe Epa Niospa nai mẽraxõ ato põtani oa misi keskarafo ãfe ane mãnã nã pinõfo ato põtapaoni pena tii ato noikĩ. Nãskafakĩri nã ea chanĩmara faafo ea Ifo sharakõi faifo ẽ ato inãxii ẽfe Yõshi Shara isharapakexanõfo. Ea õiyamafiaifono pena tii ẽ ãto õiti xafasharakõi faxotiro. Askatari mã ea Ifo sharafaifono isharakõiyanã mã ea chanĩmara faino, akka ẽ mato ane fetsafaxõi tsõa tãpimisma, nã fiai fistichi tãpitiro. Tokiri oxosharakõikĩ nã tokiriki mã mãto ane kenea mãto ane fena ẽ mato inãxii. Nãskakẽ ea tãpisharakõixikani. Mã õitisharayakõi ixii,’ ” ixõ Jesús anori ea yoia a chanĩmara faafo Pérgamo anoafo ẽ ato kenexonõ.

Apocalipsis 2:26

Fẽtsa Satanás finõkõixõ, ea fisti Ifokõifaax mã naax nã efe nĩpanaka. Ẽ ato xanĩfo imaxii. Epa Niospa ea xanĩfokõi ima keyokõi ẽ ato ĩkinõ. Nãskarifakĩ ẽ ato xanĩfo imatiro efeta na maitio anoafo ato ĩkinõfo, mitsisipakõixõ. Akka a fetsafãfe ẽfe meka shara nikakaspaifãfe nõ ato omiskõimaxii. Oa nõ kesho kerexkai nõ yamĩ moshaino moshitiro keskara afeskaxõ nõ anã shara fatiroma. Nãskarifakĩ nã nikayospamisfo nõ ato omiskõimanaitĩa tsoa pishta ato timamatiroma nanõfoma. Mã penaino, fishifã fisti fafeaito, keyokõichi yorafãfe õitirofo. Aa keskara ẽ anã oxii ea õisharanõfo. Ẽ anã nokoxõ, ẽ ato yoixii nã ea Ifofamisfo efe isharapakexanõfo.

Apocalipsis 2:7

Mã pachoyakĩ ea nikakõikãfe. Niospa Yõshi Sharapa mato yoiaito nikasharakõikãfe. Satanás mato fanĩrira shinãmapaimiskĩ. A Satanás finõinĩfofã ea kachikiri fatama ea Ifofasharakõiaito, aafi Epa Nios ano ẽ ikimaxii efe isharapakexanõ,’ ” ixõ Jesús ea yoia anori Efeso anoafo a chanĩmara faafo ato ẽ kenexonõ.

Apocalipsis 20:4

Askata xanĩfãfe tsaotifo Epa Nios ika anoa ẽ õia. Jesús afe yorafo yoia nã tsaoti kamaki tsaoafono, “Mã yoitiro fatofomãkĩ omiskõipakenakafo mẽra foaifoma, akka fatoforimãkĩ a omiskõipakenakafo mẽra foaifo.” Askano nãnoari ẽ õia nã Jesús chanĩmara faafo yamĩ ato textenifo. Ato texteyoafomano yoiyopaonifo: “Jesús nõko Ifo,” fayopaonifo. Niospa meka ifofamisfono, nãskakẽ ato textenifo. Akka nãfãfekai nã yoinã põfe keskara yafi ãfe nimofo yoimisfoma iskafakakĩ: “Mĩ nõko ifo nios. Nõ mia noi,” ixõkai anori yoimisfoma. Askatari aõ ato tãpinõfo ãto mẽke yafi ãto femãnã kenemisfoma. Nãskakẽ nã yoinã põfe keskara atoki õitifishkikĩ ato textemani. Mã nai fetsefiafono Jesús ato otoani. Mã otokaxõ Jesús feta maifo tii anoafo mil xinia yorafo tii ato ĩkinãfo.

Apocalipsis 3:12

Fetsa omiskõikĩ ẽfe meka shinãmakitama tenekõifai ea Ifo sharakõi faxõ ato Satanás finõkõia. Nãskakẽ a ẽfe Epa Nios ika ano, ẽ ato imasharapakenaka. Anoax anã faki fonakafoma. Nãskakẽ ẽ afo tãpimaxii afomãi Epa Niospa yorafokẽ. Askaxõ ẽ ato yoixii iskafakĩ: “Nono Epa Nios ikano, nofe mã ipanaka,” ẽ ato faxii. A Niospa yorafo, judeofo, Jerusalén ano ipaonifo. Akka iskaratĩa Epa Nios ika ari Jerusalén fena. Jerusalén fena nai mẽra. Nai mẽra ifiax, chipo nãmã fotoxii. Akka fetsafo ea shinãmakikanaxma afo ano ipanakafo. Nãskakẽ fotoxõ ẽfe Epa ane ẽ atoki nẽtaxii. Askatari Jerusalén fenapa aneri ẽ atoki nẽtaxii. Askatari ẽfe ane fenari tsõa nikayomisma ẽ atoki nẽtaxii keyokõichi tãpinõfo ẽ ãto Ifokẽ.

Apocalipsis 3:21

Fẽtsa afara chakafakĩ xatexõ ea Ifosharafai nã ẽfe Epa Nios ika ano efe ipasharatiro. Nãato Satanás finõa. Ẽfi xanĩfokõikĩ ari efe xanĩfo itiro. Ẽ Satanás yafi niafaka chakafo finõkõia. Ẽfe Epa Nios ika ano afe xanĩfokõi ẽ ika. Nãskarifiai fẽtsa ãfe chaka kachikiri fakĩ, ea Ifosharafaxii ẽ ika anoax ari efe xanĩfo ipaxatiro.

Apocalipsis 3:5

Tsoa ẽfe meka shinãmakitama ea Ifofakaxõ, eõxõ Satanás finõkanax afo efe isharakõipakenakafo. Afori ẽ ato rapati oxokõi sharakõi inãxii. Askaifãferi ẽfe Epa Niospa a ea Ifofaafo tii ãto ane tii kirikaki kenea. Nãskaxõ ãto ane kenea kirikaki a ea Ifofaifãfe tãpinõfo efe nĩpaxakãki. Askaifãfe ẽ ãto ane soanakama. Epa Nios feta ãfe ãjirifãfe õiaifono ẽ ato yoixii iskafakĩ: “Nafofi efe yorafokĩ,” ixõ ẽ ato yoixii.

Apocalipsis 6:9

Nãskata Jesús ãfe kirika taxtamea anã fẽpea. Fẽpeaino nã Niospa meka ato yoifofãsafaifono fetsafãfe ato retefinifono mã otoafo ẽ õia. Epa Nios kĩfiti mĩsa ano nã Jesúsnoax nanifo ãto fero mẽshofo ichanãkanax fãsikõi mekaito ẽ nika iskai mekaifono: “Nõko Ifo Nios, mĩ keyokõi tãpikõia. Mĩ afama mĩshti fatiro. Mĩ shara famis. Mĩkai afaa chakafayomisma. Mĩ chanĩmakõi. Nã mia chanĩmara faafãfema mai anoafãfe noko retemisfo. Nãskakẽ, ¿afetĩa mĩ ato kopimẽ omiskõimakĩ?” ixõ yoiaifãfe ẽ nika.