Apocalipsis 10:5 - Yaminahua

^5-7 Askata nã Niospa ãfe ãjirinĩ takai fetsa fakafã aõri paita takai fetsari mai ano paixõ anã yoia. Epa Nios nã nipanakato nai onifaa. Askatari nai mẽra ikafo onifaa. Askatari mai onifaa. Mai ano ikafori onifaa. Askatari fakafã onifaa. Fakafã mẽra ikafori onifaa. Nã Nioskõichi ãfe ãjiri yoia iskafakĩ: “Epa Niospa ea õiaino chanĩmakõi ẽ mato yoi. Epa Niospa anã manaima. Ãfe ãjiri fẽtsa ãfe maneti manekĩ chãi chãisafaino Epa Niospa axiai keskara ãfe meka yoimisfãfe yoiaifo keskara yorafãfe tãpinifoma. Iskaratĩa a Nios yoimisfãfe yoinifo keskara mã askakõia,” ixõ Niospa ãjirinĩ ea yoia.

Apocalipsis 10:5 ပူးပေါင်းရင်းမြစ်များ

Hch. 14:15

iskafakakĩ: “¿Afeskafakĩ mã noko na rafe niosra mã noko faimẽ? Nõkai niosma. Nõri mato keskara, nõ mato meka shara yoiyoi oa na afarafo nõko niosra mã famis a chakafo mã potanõ a chakafokai afama. Nãskaxõ nã Nioskõi nĩpanaka Ifokõi fakãfe, nai yafi mai fakafãri onifaniki. Nai mẽranoafo onifata, nono mai anoafo onifata fakafãri mẽranoafo onifani.

Hch. 17:23

Nã mã nios kĩfimis ano kafasakĩ mẽ õia. Nãnoa ẽ fichia na nõko niosra ixõ mã afara onifanixakĩ mã akiki kenekĩ iskafakẽ: ‘Nõ na nios õimisma,’ ixõ mã aõnoa yoikĩ keneni. Nã nios õikatsaxakĩma mã kĩfimis, nãõnoa ẽ mato yoi.

Romanos 1:20

Nõ Nios õiyamafixõ nõ tãpitiro Niospa keyokõi onifani, nãmãi Nioskõi ixõ. Nã Niospa onifani õikĩ nõ tãpitiro tsoa fẽtsa keyokõi atiroma. Nios fistichi atiro, afama mĩshti. Nãskakẽ Nios nikakaspaifãfe Nios chanĩmara fapaikanima, a onifani õifikakĩ. Nãskakẽ Niospa ato omiskõimani nãfãfe Nios tãpipaikanima. Akka tãpipaikĩ tãpikeranafo.

Hebreos 6:13

Niospa nõko xini Abraham yoiyoni iskafaki: “Ẽkĩa mĩ Nios. Ea tsõa finõtiroma. Ramashara ẽ chanĩmisma. Ẽ mia yoinõ mĩ tãpisharakõinõ. Ẽ mia axosharakõikai mĩ fenafo ichapakõi inõfo. Akka mĩkai ato tanãtiroma mĩ fenafomãi ichapakõikẽ,” ixõ Niospa Abraham yoiyoni.

Apocalipsis 1:18

Iskaratĩari ẽ nia. Mẽ nafianixakĩ, iskaratĩa ẽ nia. Ẽ anã nanakama. Ẽ anã afeska pishta nakama. Eres fisti ẽ ato namata, chiifã mẽra ẽ ato potatiro a ea nikakaspamisfo.

Apocalipsis 10:2

Kirika fepekemea tsomax nia ika. Ãfe tae kayakai aõri fakafã femãkĩa paia. Akka ãfe tae oshkiori mai ano paia ika.

Apocalipsis 14:7

Mekakĩ fãsikõi ato yoia iskafakĩ: “Nios shinãkãfe. Nikakõikãfe. A noikõikãfe. ‘Mĩ sharakõi, mĩ afama mĩshti mĩ atirora,’ fakãfe. Iskaratĩa Niospa nã keyokõi chakafamisfo ato omiskõimani. Nãato nai onifani, mairi onifani, fakafãri onifani, faka sharari onifani. Nãskakẽ a noikãfe: ‘Mĩ nõko Ifo Nios sharakõi,’ fakãfe,” ato faa.

Apocalipsis 16:17

Askata Niospa ãjiri fẽtsa anã nai mẽraxõ ãfe kecho mẽranoa nachia. Mã nachiano Epa Nios meka fãsikõi iskai: “Mẽ keyokõi aka,” ixõ yoiaito ẽ nika.

Apocalipsis 4:11

Mĩ afaa chakafatamaroko mĩ sharakõifamis. Akka mĩõnoa fisti nõ yoitiro iskafakĩ: Mĩ nõko Ifokõi. Mĩ nõko Nios. Tsoa fetsakai mia keskarama shara. Mĩ isharapakenaka. Mĩkai afaa chakafamisma. Nãskakẽ nõ mia fãsi noi. Mĩ shinãmãs mĩ afama mĩshti fatiro. Mĩ keyokõi onifani. Mĩ apaiyai keskara mĩ keyokõi onifani ato nimapakexakĩ,” ixõ nã Jesús Ifofamisfãfe veinticuatro xanĩfofofãfe yoimisfo.

Apocalipsis 4:9

Nãskakẽ aõnoax fanãikafo iskakani: “Epa Niosi, mĩ fisti nõko Ifo. Fato fetsakai na mĩ ikai keskarama. Mĩfi nĩsharapakenakaki. Mĩ sharakõi. Mĩ afaa pishta chakafamisma. Mĩ askaito nõ mia Ifofasharakõi. Aicho Epa Niosi. Fato fetsakai mia keskarama,” ixõ Nios fanãkafo. Mã askafono nã Jesús Ifofamisfo veinticuatro xanĩfofo nõko Ifo Nios ãfe tsaotiki tsaoano a nãmã feopakefofãnafo. Feopakefofãkata, ãto maiti tsekakata feofafo Nios nãmã mãmãi askafakatsaxakakĩ. Nãskaxõ yoiafo iskafakakĩ: “Nõko Ifo Nios mĩ noko maiti inã keskari fakĩ nõri miari mini. Mĩ noko inãfikẽ nõ mia fãsi noikĩ na maitifo nõ mia mini. Meres fisti mĩ noko ĩkitiro. Mĩ noko ifimis. Akka mĩ nõko Ifokõi itiro.