Apocalipsis 1:9 - Yaminahua

⁹ Ẽkĩa Juan, ẽ mãto ochikõi. Nãskax mãri Jesús Ifofaax mã efe yorakĩ. Askax mã aõnoax omiskõifikĩ, mã tenemis. Nãskariai ẽri aõnoax omiskõifikĩ ẽ tenei. Ẽ Niospa meka ato yoita Jesúsnoari ẽ ato yoimis. Ea nikakaspakakĩ, ãto xanĩfãfe sorarofo ea achimaxõ, fakafã nakirafe ea ato nĩchimana ãfe nãsimã, ãfe ane Patmos ano.

Apocalipsis 1:9 ပူးပေါင်းရင်းမြစ်များ

Mateo 20:23

Askafaifãfe Jesús ato yoini: “Chanĩma, mãri mã omiskõixii. Akka ẽkai tsoa yoitiroma, ‘Efe ketaxamei tsaofe efe rafexii’ ixõ. Akka ẽfe Epa Nios fistichi yoitiro. Nã Niospa ato katoafos nãfo afe ketaxamei tsaotirofo efe rafexikakĩ,” ixõ ato yoini.

Marcos 10:39

kemanifo iskafakakĩ: “Ẽje, nõri nõ tenetiro,” faifono, Jesús ato yoini iskafakĩ: “Chanĩma, nã ẽ teneai keskafakĩri, mã tenetiro omiskõifinakõifikĩ.

Juan 16:33

Nã ẽ mato yoi mãto õiti shara inõ. Akka nã ea chanĩmara faafoma fe mã nono nãmã nẽtei. Nãskakẽ mato omiskõimafiaifono shinãchakayamakãfe. Ẽ Satanás yafi nã ea chanĩmara faafomafo ẽ ato finõkõia. Nãskakẽ ẽ mato kexesharatiro,” Jesús ato fani.

Hch. 1:15

Askata pena fetsa yora rasi ciento veinte ichanãnifo. Askaifono Pedro niinãkafã ato yoini

Hch. 14:22

Nãriafo a Nios Ifofaafo ato yoifofãsafakakĩ ato inimamakõinifo, “Isharakõikãfe Nios nikakõisharayanã. Epa Nios xanĩfo fe ipaxakakĩ, nai mẽra oyoamano nono mai anoax mã omiskõi finakõitiro,” ixõ ato yoinifo.

Romanos 8:17

Nõ Niospa fakekẽ nã noko yoia keskara noko inãtiro. Nõfi nõ Niospa fakekẽ nã ãfe Fake Cristo ani keskara nokori inãtiro. Nõõnoax omiskõifinixakĩ iskaratĩa nai mẽranoax Apa Nios fe xanĩfokõi. Nãskarifiai nõri aõnoax omiskõiax nõ nai mẽra Epa Nios ano nokoano noko sharafinakõia imaxii nõ afe isharapakexanõ, a keskara shara nõ inõ. Akka afe yorafo Niospa ato sharafaxõi nãfomãi ãfe fakefokẽ.

2 Co. 1:7

Mã nõ tãpia nõ omiskõiai keskai mãri nofe omiskõiaito Epa Niospa nõko õiti inimama keskafakĩ matori inimamasharai.

Filipenses 1:7

Nãskakẽ nãnori shinãkĩ ẽfe õiti mẽraxõ ẽ matoõnoa shinãfafãini, ẽmãi mato noikõikĩ nã Epa Niospa ea sharafai keskafakĩ mãrimãi efeta meemiskẽ. Akka ea karaxa mẽra ikimanifo. Nãskakaxõ xanĩfofofãfe ferotaifi ea iyomisfo anoxõ ẽ ato yoisharanõ Niospa meka sharaõnoa afe ĩpaxanõfo. Iskafakĩ ẽ ato yoimis: “Jesús noko nãxoni nõko chaka noko soaxoxiki nõ afe ĩpaxanõ,” ixõ ẽ ato yoimis.

Filipenses 4:14

Nãskafekẽ mã ea shinãkĩ mã ea sharafa ẽ omiskõiaito.

2 Tesalonicenses 3:5

Epa Niospa mato noiai keskafakĩ nõko Ifãfe mato tãpimapainõ. Cristo omiskõifikĩ teneni keskafakĩ, aõxõ mãri mã tenesharakõifafãinõ.

2 Timoteo 1:8

Askafai rãfiyamafe Jesúsnoa yorafo yoitaifãfe rãfikima. Askatari eõri rãfiyamafe. Ẽ Jesucristo ato yoirifaito ea karaxa mẽra ikimatifoki. Mĩri Jesús ato tãpimasharafe; mĩ askaito, miari omiskõimanaifono rateyamafe. Jesúsnoax mĩ omiskõiaito, Niospa mia axoxii.

Hebreos 10:36

Akka Niospa meka keneni iskai: Cristo mã chaima matoki oi, samarakaima, ixõ kenenifo. Nãskakẽ mã Jesús Ifofasharai keskafakĩ omiskõifikĩ tenekãfe. Epa Niospa mato inãpaiyai keskara aõxõ nã mato yoiyoni keskara mã fixii.

1 Pedro 5:1

Akka nã Niospa meka nikakani ichanãfono ato kexemisfo, ẽ mato yoisharapai ea nikasharanõfo. Nãskaxõ mãto shinã mẽra ẽfe meka nanesharakãfe. Ẽri nã Jesús chanĩmara faafo ẽ ato kexemiski. Nõko Ifo Cristo omiskõiaito ẽ õini. Anã oaino ẽri afe isharapakenaka. Tsõa a keskara õimisma sharakõi keyokõichi õixikani. Ẽri õixii a keskara sharafinakõia.

Apocalipsis 1:1

Efe yora mĩshtichi, iskaratĩa ẽ mato kirika kenexõ fomai mã tãpinõ. Ẽkĩa Juan ẽ mato kirika kenexõ fomai. Nai mẽraxõ Epa Niospa Jesucristo yoini afe keskara a inõpokoaifo nãmãnoafo a yonoxomisfo tãpimaximãkai. Askafaito nikakĩ Jesús ãfe ãjiri ekeki nĩchia. Anoxori ea ãjirinĩ yoinõ afe keskara ikimãkai nãmãnoafo. Ea õimanaito mẽ õia a inõpokoaifo xafakĩakõi. Askaito õikĩ ẽ kirika kenea a inõpokoaifo anori a Niospa Jesús yoia anorikõi mã tãpisharakõinõ.

Apocalipsis 1:4

Nã Asia mai anoafo a Nios Ifofaafo tii siete pexefo anoafo ẽ mato kirika kenexõ fomai. A ẽ mato yoiai anori õisharakõikãfe. Afetĩama Epa Nios niyopaofinixakĩ iskaratĩa nia. Epa Nios nĩpanaka. Ãfe Yõshi Sharari afe itiani. Nãskakẽ Epa Nios feta ãfe Yõshi Sharapa, ãfe Fake Jesucristo mato noikĩ mãto õiti mẽra mato shinãmasharapainõ afanã mãto õiti fekaxtefanõma. Nãskakẽ nõko Ifo Jesucristo Niospa meka noko yoimis chanĩmakõi. Jesúsfi Niospa Fakekõifekẽ retenifo. Mã retexõ maifafiafono Apa Niospa anã otofani anã nanakama. Fato fetsa askayomisma. Nãskaxõ Apa Nios fe rafexõ a xanĩfofo maitio anoafo ato ĩkixii xanĩfokõi ixõ. Aatofi noko noikõiakĩ, ãfe imi foax noko nãxoni Satanás chaka nõko ifo inõma.

Apocalipsis 1:6

Nõ aõnoax nõ Epa Nios afe yorakõi ixõ noko yonomapaiyai keskafakĩ nõ anõ. Nõ askai afe yorakõifo ixõ nõri yora fetsafo nõ kĩfixotiro Epa Niospa noko nikai. Nãskarafoskõi nõko Ifo Jesucristo noko imai. Nãskakẽ keyokõi yorafãfe aõxõ iskafakakĩ yoipakenakafo: “Aicho, tsoa fetsakai na Jesús keskarama. Nã fisti sharafinakõia. Ares fisti nõko Ifo nĩpanaka. Ares fisti keyokõi yorafo ato ĩkipakenaka,” ixõ yoipakenakafo. Askapakexapainõ.

Apocalipsis 11:7

A feronãfake rafeta mã ato yoikĩ senẽfaafono, a chakakõi mai kinĩfã mẽranoax Satanás shinãmanaino, tsekeinãkafã a feronãfake rafe retexii.

Apocalipsis 12:11

Nãskakẽ Jesús Ifofaxõ mẽxotaima nõ yoimis niri nai mẽra oyoxoma nõ yoiyopaoni nãmãxõ iskafakĩ: ‘Nõko Ifo Jesús, Niospa Fakekõi, oa oveja fake keskaraxõ noko nãxoni nõko chaka noko soaxoxiki,’ ixõ nõ yoimis mẽxotaima. Askatari nõ Niospa meka ato yoimis. Nãskai nõ meseima, ‘Noko retefiaifono, nõ inimasharai,’ ixõ anori mẽxotaima nõ yoimis. Askaxõ nõ Satanás finõinĩfofana.

Apocalipsis 12:17

Nãskaito õi Satanás a kẽroki õitifishkikõina. Nãskax nã kẽromã ãfe fakefoki kaa ato retepai, nãfãfemãi Niospa meka nikakõisharaifono isharakõiyanã Jesús Ifofasharakõiyanã.

Apocalipsis 13:10

“Nã Satanás ifofaafãfe mato karaxa mẽra ikimakaki mato ikimaxikani. Askatari mato kenopa retekakĩ mato retexikani.” Nãskakẽ efe yora mĩshtichi, shinãchakayamakãfe. Nã nõ Jesús chanĩmara faafo tii nõ omiskõifikĩ, nõ tenekõixii nõko Ifo Jesús shinãmakitama.

Apocalipsis 14:12

Nãskakẽ efe yora mĩshtichi, mãto õiti inimamasharakãfe. Omiskõifikĩ tenekãfe. Niospa noko yoini keskara akãfe. Nõko Ifo Jesús kachikiri fayamakãfe.

Apocalipsis 19:10

Ea yoiaino ẽ a nãmã feopakekafana, “Mĩ fãsi sharakõi,” ixõ yoixiki. Ẽ askafaino ea yoia iskafakĩ: “Ea askafayamafe. Ẽri Nios yonoxomiski mĩ axomis keskafakĩ, a Nios Ifofaa fetsafãferi askafamisfokĩ. Jesús mato yoiai keskara mã kachikiri famisma. Nãskakẽ Nios fisti nãmã nõ feopakekafã yoitiro: ‘Mĩ fãsi sharakõi. Mĩ ẽfe Ifokõi,’ ixõ anori fisti nõ yoitiro. Nã Niospa meka yoimisfãfe yoimisfo keskarifakĩ ẽri Jesúsnoa yoimis Epa Niospa ea shinãmanaino,” ixõ ãjirinĩ ea yoia.

Apocalipsis 20:4

Askata xanĩfãfe tsaotifo Epa Nios ika anoa ẽ õia. Jesús afe yorafo yoia nã tsaoti kamaki tsaoafono, “Mã yoitiro fatofomãkĩ omiskõipakenakafo mẽra foaifoma, akka fatoforimãkĩ a omiskõipakenakafo mẽra foaifo.” Askano nãnoari ẽ õia nã Jesús chanĩmara faafo yamĩ ato textenifo. Ato texteyoafomano yoiyopaonifo: “Jesús nõko Ifo,” fayopaonifo. Niospa meka ifofamisfono, nãskakẽ ato textenifo. Akka nãfãfekai nã yoinã põfe keskara yafi ãfe nimofo yoimisfoma iskafakakĩ: “Mĩ nõko ifo nios. Nõ mia noi,” ixõkai anori yoimisfoma. Askatari aõ ato tãpinõfo ãto mẽke yafi ãto femãnã kenemisfoma. Nãskakẽ nã yoinã põfe keskara atoki õitifishkikĩ ato textemani. Mã nai fetsefiafono Jesús ato otoani. Mã otokaxõ Jesús feta maifo tii anoafo mil xinia yorafo tii ato ĩkinãfo.

Apocalipsis 3:10

A ẽ mato yoimis anori mã isharakõia omiskõifikĩ mã tenekõimis ẽfe meka nikakatsaxakĩ. Mã eõnoax omiskõifikĩ mã tenekõimis. Nãskakẽ mã ea shinãmakimismano ẽ mato kexesharaxii a omiskõiai nokoaino nã maitio. Keyokõi omiskõixikani ea Ifofayamakanax.

Apocalipsis 6:9

Nãskata Jesús ãfe kirika taxtamea anã fẽpea. Fẽpeaino nã Niospa meka ato yoifofãsafaifono fetsafãfe ato retefinifono mã otoafo ẽ õia. Epa Nios kĩfiti mĩsa ano nã Jesúsnoax nanifo ãto fero mẽshofo ichanãkanax fãsikõi mekaito ẽ nika iskai mekaifono: “Nõko Ifo Nios, mĩ keyokõi tãpikõia. Mĩ afama mĩshti fatiro. Mĩ shara famis. Mĩkai afaa chakafayomisma. Mĩ chanĩmakõi. Nã mia chanĩmara faafãfema mai anoafãfe noko retemisfo. Nãskakẽ, ¿afetĩa mĩ ato kopimẽ omiskõimakĩ?” ixõ yoiaifãfe ẽ nika.

Apocalipsis 7:14

“Maa. Ẽkai tãpiama. Mĩ tãpia. Mĩ ea yoitiro,” ẽ faito ea yoia iskafakĩ: “Yorafo omiskõiaifono na yorafori fãsi omiskõinifo. Akka omiskõiaifono Niospa ãfe Fãke Jesús ato nãxoni ãto chaka ato soaxoxiki. Ato chaka soaxõ mã ato imasharakõia. Nãskakẽ ato rapati oxo shara safemana.