Apocalipsis 1:4 - Yaminahua

^4-5 Nã Asia mai anoafo a Nios Ifofaafo tii siete pexefo anoafo ẽ mato kirika kenexõ fomai. A ẽ mato yoiai anori õisharakõikãfe. Afetĩama Epa Nios niyopaofinixakĩ iskaratĩa nia. Epa Nios nĩpanaka. Ãfe Yõshi Sharari afe itiani. Nãskakẽ Epa Nios feta ãfe Yõshi Sharapa, ãfe Fake Jesucristo mato noikĩ mãto õiti mẽra mato shinãmasharapainõ afanã mãto õiti fekaxtefanõma. Nãskakẽ nõko Ifo Jesucristo Niospa meka noko yoimis chanĩmakõi. Jesúsfi Niospa Fakekõifekẽ retenifo. Mã retexõ maifafiafono Apa Niospa anã otofani anã nanakama. Fato fetsa askayomisma. Nãskaxõ Apa Nios fe rafexõ a xanĩfofo maitio anoafo ato ĩkixii xanĩfokõi ixõ. Aatofi noko noikõiakĩ, ãfe imi foax noko nãxoni Satanás chaka nõko ifo inõma.

Apocalipsis 1:4 ပူးပေါင်းရင်းမြစ်များ

Juan 1:1

(Ẽkĩa Juan. Iskaratĩa Jesucristoõnoa ẽ mato yoi mã tãpinõ. Cristo ãfe ane ipaoni, Meka. Nãato Niosnoa noko tãpimani.) Afaa oniataima na Meka aneya iyopaoni. Apa Nios fe iyopaoni. Nãrifi Nioski.

Hch. 19:10

Anoxõ Pablo Niospa meka sharaõnoa ato yoikĩ xinia rafe ani. Nã Asia mai ano ikafãfe nikasharakõinifo Niospa meka sharaõnoa. Judeofo feta a judeofofãfema nõko Ifo Jesúsnoa meka shara nikapaonifo.

Hch. 2:9

Akka nõ Partia anoax oni. Fetsafori Media anoax fenifo. Fetsafori Elam anoax fenifo. Fetsafori Mesopotamia anoax fenifo. Fetsafori Judea anoax fenifo. Fetsafori Capadocia anoax fenifo. Fetsafori Ponto anoax fenifo. Fetsafori Asia anoax fenifo.

Romanos 1:7

Roma anoafãfe, ẽ mato kirika kenexõ fomai. Niospa mato noixõ mato ifini mato chaka soaxoxiki afe yorafo mã inõ. Mato noikĩ mãto shinã mẽraxõ mato shinãsharamanõ. Epa Nios feta nõko Ifo Jesucristo mato askafanõ.

1 Corintios 1:3

Mato noikĩ mãto shinã mẽraxõ mato shinãmasharanõ. Epa Nios feta nõko Ifo Jesucristo mato askafanõ.

2 Co. 1:2

Ẽ nõko Nios mato kĩfixomis iskafakĩ: “Epa Niospa, nõko Ifo Jesús feta ato noikõikĩ ãto õiti inimamasharaxõfe. Askatari ato shara fafe,” ixõ ẽ matoõnoa yoimis.

Hebreos 13:8

Akka Jesucristo nã ipaoni keskara ĩpanaka. Anãkai iskaratĩa fetsatiroma.

Stg. 1:17

Akka Epa Niospa nai mẽraxõ mẽxotaima noko kexesharafafãini. Nãskaxõ noko afama mĩshti onifaxoni. Xini onifata, fishifo onifata, oxe onifata, nãfo noko onifaxoni, afãfe noko chaxasharanõ. Akka oxe ikiaito nõ anã õitiroma. Fishiri nãskarari ikiaito nõ õitiroma. Chipo kãiyaito nõ anã õitiro noko chaxasharaito. Akka Epa Nioskai askarama. Akai fetsatiroma. Noko mẽxotaima sharakõi faxomis. Nokokai chakafatiroma.

Apocalipsis 1:1

Efe yora mĩshtichi, iskaratĩa ẽ mato kirika kenexõ fomai mã tãpinõ. Ẽkĩa Juan ẽ mato kirika kenexõ fomai. Nai mẽraxõ Epa Niospa Jesucristo yoini afe keskara a inõpokoaifo nãmãnoafo a yonoxomisfo tãpimaximãkai. Askafaito nikakĩ Jesús ãfe ãjiri ekeki nĩchia. Anoxori ea ãjirinĩ yoinõ afe keskara ikimãkai nãmãnoafo. Ea õimanaito mẽ õia a inõpokoaifo xafakĩakõi. Askaito õikĩ ẽ kirika kenea a inõpokoaifo anori a Niospa Jesús yoia anorikõi mã tãpisharakõinõ.

Apocalipsis 1:11

“Nã mĩ õiaifo fetsafo kenexõfe. A kirika kenexõ Jesús Ifofamisfo tii ato fomafe. A siete Nios yoiti pexe anoafo Asia anoa ato fomafe, afãfe õinõfo. A Nios Ifofamisfo a pexe tii Efeso anoafo fomata, Esmĩrnã anoafo fomata, Pérgamo anoafo fomata, Tiatira anoafo fomata, Sardis anoafo fomata, Filadelfia anoafo fomata, Laodicea anoafori nã mĩ õiaifo ato kirika kenexõ ato fomafe,” ea faa.

Apocalipsis 1:17

Nãskara õi ẽ pakea, oa nai keskara. Ẽ askaito õikĩ ea ramã ãfe mifi kayakai aõxori. Ẽ askaito ea yoia iskafakĩ: “Rateyamafe. Ẽ Jesúski. Afara onifataima ẽ iyopaoniki. Ẽfi anã nanakamaki.

Apocalipsis 1:20

Ẽ mia yoinõ afeskai siete fishimẽ ẽfe mẽke kayakai aõri; askatari afeskai siete rãpari oro keskara otamãki. Na siete fishi mĩ õiai nãato noko shinãmamis siete Niospa meka yoimisfo Nios yoiti pexe mẽranoa ichanãmisfo. Askatari nã siete rãpari keskara mĩ õiai nãatori noko shinãmamis siete Nios yoiti pexe mẽranoax ichanãmisfo Nios Ifofakanax,” ixõ ea faa.

Apocalipsis 1:8

Epa Niospa yoia: “Afara onifataima ẽ iyopaoni. Ẽfi nĩpanakakĩ. Afetĩara na nõko mai keyoai eres fisti ẽ ato yoitiro. Nãskaxõ ẽ afama mĩshti famis. Akka ẽ niyopaoni. Nãskatari ẽ nĩpanaka,” ixõ nõko Ifo Niospa yoia.

Apocalipsis 1:9

Ẽkĩa Juan, ẽ mãto ochikõi. Nãskax mãri Jesús Ifofaax mã efe yorakĩ. Askax mã aõnoax omiskõifikĩ, mã tenemis. Nãskariai ẽri aõnoax omiskõifikĩ ẽ tenei. Ẽ Niospa meka ato yoita Jesúsnoari ẽ ato yoimis. Ea nikakaspakakĩ, ãto xanĩfãfe sorarofo ea achimaxõ, fakafã nakirafe ea ato nĩchimana ãfe nãsimã, ãfe ane Patmos ano.

Apocalipsis 16:5

Askatari Niospa ãfe ãjiri fetsa mekaito ẽ nika. Nã faka kexemisto iskafakĩ yoia: “Epa Niosi, mĩ tsoa onifataima mĩ iyopaoni. Nãskakẽ nã mĩ iyopaoni keskarari iskaratĩari mĩ nĩpanaka. Mĩ shara fisti amis. Aicho, iskaratĩa nã mia nikakaspamisfo mĩ ato omiskõimani chanĩmakõi. Ãto chaka xatekaxõ mĩ Fake Jesús Ifokõi fanõfo, mĩ meka ato yoimisfori nã Jesús Ifofaafãfema ato reteafo. Nãskakẽ nã mia Ifofaafoma mĩ kopikiri ato namai chanĩma. Mefe yorafo omiskõimamisfo. Nãskakẽ ato kopikiri nã mia Ifofaafoma mĩ ato omiskõimani omiskõinõfo. Chanĩmakõi ato omiskõimani,” ixõ Niospa ãjirinĩ yoia.

Apocalipsis 2:12

Anã Jesús ea yoia iskafakĩ: “A ea Ifofamisfo Pérgamo anoafo a ato Niospa meka yoimis a ẽ yoipaiyai anori ẽ yoinõ ea kirika kenexõfe tãpinõfo. Iskafakĩ kenefe: ‘Ẽkĩa mãto Ifo Jesús ẽ mato yoi mã tãpinõ. Ẽfe meka oa keno chainipa takairafe ikikõiai keskaraxõ, ẽfe mekapas a ea noikaspaifo tii ẽ ato chakafatiro kopikĩ.

Apocalipsis 2:18

Anã Jesús ea yoikĩ iskafaa: “Ea Ifofaafo Tiatira anoafo Niospa meka ato yoimis a ẽ yoipaiyai anori ẽ yoinõ ea kirika kenexõfe iskafakĩ: ‘Ẽkĩa ẽ mãto Ifo Jesús ẽ mato yoisharapai mã tãpinõ. Ẽfe fero oa chii xoisai keskara. Nãskakẽ ẽ mato tãpikõia. Ẽfe taeri nã keno fakka fakka ikai keskara. Nãskakẽ ẽ mato yoikĩ iskafai:

Apocalipsis 2:8

Anã Jesús ea yoia iskafakĩ: “A ea Ifofamisfo Esmĩrnã anoafo a ato Niospa meka yoimis ẽ yoinõ ea kirika kenexõfe iskafakĩ: ‘Ẽkĩa mãto Ifo Jesús ẽ mato yoi mã tãpinõ. Ea nikasharakãfe. Nã afama mĩshti onifataima ẽ iyopaoni. Iskaratĩa ẽ nĩpanaka. Mẽ nayofinixakĩ ẽ anã nanakama. Ẽ mato nonori yoi iskafakĩ:

Apocalipsis 22:16

“Ẽkĩa Jesús, ẽfe ãjiri matoki nĩchia ẽ mia yoia keskara nã ea Ifofaafo tii ichanãfo anoxõ ato tãpimanõ. Ẽkĩa David ãfe fena. Ẽfi nã fishi efapa penaino õimisfo keskarakĩ. Nã fishi õikĩ nõ tãpitiro mã penaino. Nãskarifiai mẽ chaima oaino tãpikanax itipinĩsharatirofo Jerusalén Fena mẽra efe ipaxakakĩ,” ixõ Jesús ea yoia.

Apocalipsis 22:8

Ẽkĩa Juan ẽ nika, askatari ẽ õia ea Niospa ãjirinĩ õimanaino. Nãskakẽ ẽ a nãmã feopakekafana ẽfe Ifo keskara shinãi. Nãskaxõ, “Mĩ fãsi sharakõi,” ẽ fakerana.

Apocalipsis 3:1

Askata anã Jesús ea yoia iskafakĩ: “A ea Ifofamisfo Sardis anoafo a ato Niospa meka yoimis a ẽ yoipaiyai anori ẽ yoinõ ea kirika kenexõfe iskafakĩ: ‘Ẽkĩa mãto Ifo Jesús ẽ mato yoi mã tãpinõ. Niospa Yõshi Shara efe ika. Ẽfi Nios yoimisfãfe ãto xanĩfokõiki. Ẽ mato yoi iskafakĩ: Mã ika keskara mẽ tãpimis. Yorafãfe matoõnoa iskafakĩ yoimisfo: “Nafo shara ikafo. Na Sardis anoafãfe mã Jesús Ifofakõinafo,” ixõ matoõnoa yoimisfo. Mã isharamis keskara õikani. Mãri shinãmis iskafakĩ: “Nõ shara ikara” ifiax mã shara ikama. Mã ea Ifofasharakõiama.

Apocalipsis 3:14

Askata anã Jesús ea yoia iskafakĩ: “A ea Ifofaafo Laodicea anoafo a ato Niospa meka yoimis a ẽ yoipaiyai anori ẽ yoinõ ea kirika kenexõfe iskafakĩ: ‘Ẽkĩa mãto Ifo Jesús ẽ mato yoi mã tãpinõ. Epa Niospa ea amapaiyai keskara ẽ fakatsaxakĩ ãfe meka yoinõ. Epa Niospa yoipaiyai keskara ẽ keyokõi yoimis. Ẽ chanĩkima yoimis. Epa Niospa onifani tii keyokõi ẽfi ãto xanĩfokõikĩ. Ẽ mato iskafakĩ yoi:

Apocalipsis 3:7

Askata anã Jesús ea yoia iskafakĩ: “A ea Ifofaafo Filadelfia anoafo a ato Niospa meka yoimis a ẽ yoinõ ea kirika kenexõfe iskafakĩ: ‘Ẽkĩa mãto Ifo Jesús ẽ mato yoi mã tãpinõ. Ẽ afaa pishta chakafamisma. Ẽ sharafinakõia. Ẽfe meka chanĩmakõi. Nã fichipaiyai afama mĩshti sharafo ãfe pexe ano fapaoni, xanĩfo David. Akka ãfe pexe fepoti chamisyano tsoa ikitiroma ipaoni, chamismaisax. Akka ato ikimanaino ikitirofo. Akka ato ikimayamaino tsoa ikitiroma. Nãskarari mã Nios ano ikipai mã ikitiroma ẽ mato ikimayamaino ẽmãi chamis keskaraxõ. Akka ẽ mato ikimanaino mã ikitiro Nios ano. Akka fetsafãfe ikikãfe mato faifono mã Nios ano ikitiroma. Eres fistichi ẽ mato ikimatiro.

Apocalipsis 4:5

A ãfe tsaoti anoax kana peeitaitani oa kana piishikai keskara a mẽranoa ẽ nika. A fesoa anori siete rãpari xofisaito ẽ õia. A ẽ õiaino Epa Niospa ea shinãmana iskafakĩ: “A Epa Nios tsaoano rãpari otaito ẽ õia keskara, nãskarifakĩ Epa Niospa ãfe Yõshi Shara nokoki nĩchiarokomẽ nofe rafenõ,” ixõ ẽ shinã.

Apocalipsis 4:8

Askakani ãto pei ichapa seis ika, fisti rasi pei ichapayafo. Askai ãto fero rasi ato neei fetsea ika. Penachãi fanãita, fakishchãiri fanãiki xatepakenakafoma. Fanãiyanã iskafakani: Sharafinakõia, sharafinakõia, sharafinakõia, nõko Nios sharafinakõi. Nõko Niospa afama mĩshti famis nã apaiyaifo. Epa Nios niyopaofinixakĩ, nãskakẽ iskaratĩa nia. Askatari Epa Nios afeska pishta nakama, ikax fanãikaifo.

Apocalipsis 5:6

Nãskakẽ nãnoa ovejanã fake ẽ õia ãfe mãxo sieteya, ãfe ferori nãskara ika. Reteafo keskarafiax Niospa tsaoti ano nia ika. Nãnoa nã Niospa onifani cuatrofo feta a veinticuatro Nios Ifofaafo xanĩfofofãfe foaketefayakenafo ika. Tsoa fetsakai a keskarama. Nãato afama mĩshti fatiro. Nã fero sietefãfe noko shinãmani Niospa ãfe Yõshi Shara nĩchiano keyokõi nã maitio ano inõ.

Apocalipsis 8:2

Nishparakaifono ẽ õia Niospa ãfe ãjirifo siete a ketaxamei niafãfe, nãfãfe Niospa ato yoimis keskara anõfo. Niospa ato tii maneti inã nã ato yoiaitĩa ãto maneti chãi chãisafanõfo.