1 Ti. 6:18 - Yaminahua

¹⁸ Nãskakẽ mãto korioxõ fetsafo aõ noisharakãfe. Fishkomĩtsayamakãfe. Afaamaisfo ato inãkãfe. Fishkoyamakãfe. Inãkõikãfe.

1 Ti. 6:18 ပူးပေါင်းရင်းမြစ်များ

Mateo 5:42

Akka fẽtsa mato afarafo yõkaito inãkãfe. ‘Ea inãyope,’ mato faito inãfe fĩshkoyamakãfe,” ixõ Jesús ato fani.

Lucas 12:21

Nãskariatiro a yora afama mĩshti ichapaya ikatsaxakĩ Nios shinãtama. Akka Niospa õiaino anã afaya itiroma,” ato fani Jesús.

Lucas 3:11

“A yora omiskõiaito afaamais oxõ mato rapati yõkatoshiaito mã inãtiro mã rapati rafeyaxõ. Askatari yora fonãiki oaito mã pimatiro,” ato Juan faito nikanifo.

Hch. 10:38

Akka mã mã tãpia Niospa ãfe kerex sharafoya ãfe Yõshi Shara Jesús mẽra naneni. Jesús afama mĩshtifo fapaoni, ato sharafayanã a omiskõiaifo, niafaka chakata ato omiskõimanaino. Nãskakẽ afama mĩshtifo fatiro Niosmãi afe ikano.

Hch. 11:29

Nãskakẽ a Nios Ifofaafãfe Antioquía anoxõ shinãnifo a Nios Ifofaa fetsafo Judea anoafo ato kori manamaxikakĩ, afe tii ato fomakanimãkai.

Hch. 9:36

Nãskaifono nã pexe rasi Jope ano kẽro Nios Ifofaa ika ini, ãfe ane Tabita. Griego mekapa Dorcas famisfo. Nã kẽromã isharakõixõ ato axosharakõipaoni ato afara inãsharakõikĩ.

Romanos 12:13

Nios Ifofaafãfe afara yopaifono ato inãkãfe. Fetsafo pimasharakãfe. Pexe yopaifãfe mãto pexe mẽra ato ikimakãfe. Ato kexesharakãfe.

Romanos 12:8

Mato fetsafo katokẽ aõxõ fetsafo õiti ato fepeaxõfafãikãfe. Mato fetsafo katokẽ afara yopaifo inimayanã ato inãsharakãfe. Mato fetsafo katokẽ ãto xanĩfo mã inõ. Nãskakẽ Niospa shinãmana keskara ato yonomasharakãfe. Xanĩfo mẽsteshara ikãfe. Nã mato katokẽ ãfe shinãõxõ omiskõiaifo ato noikĩ inimayanã ato axosharakãfe.

1 Corintios 16:2

Nomĩkotĩa ichanãi mã kori ichafaxõ chipo Jerusalén anoa mã ato fomatiro. Yonoxõ kori fĩta atiri mã ato inãtiro. Akka mã kori ichapama fixõ ichapamari mã ato inãtiro. Akka mã ichapa fixõ ichapari ato inãkãfe. Nomĩkotĩa ichanãi mã kori ichafatiro, ea manakima kori ichafayokãfe. Nã ẽ matoki nokoaitĩa mã anã kori meketiroma. Nã kori mã ichafaa nã Jerusalén anoafo afaamaisfo mã ato fomatiro mẽ Corinto ano matoki oano.

2 Co. 8:12

Akka mã ato inãpaikĩ mã ato inãtiro. Askatari mã afarayaxõ mã ato inãsharaito Epa Niospa tãpia. Askatari mã afara ichapayaxoõma mã ato inãitori nãri Epa Niospa tãpia. Nãskakẽ inimakõi.

2 Co. 8:9

Mã mã tãpia nõko Ifo Jesucristo nai mẽranoax nãmã fotoyoamax afama mĩshtifoya iyopaoni. Afaakai yopapaonima. Nãskafixõ noko noikõikĩ ãfe afama mĩshtifo keyokõi potãferani. Nãskax nokoõnoax afaamais iyopaoni nõ aõnoax isharapakexanõ.

Gálatas 6:10

Nãskakẽ afeskaraifãfe õikĩ keyokõi ato axosharafafãikãfe. Nãskatari a Nios Ifofaafo ato noisharayanã ato axosharafafãikãfe.

Efesios 4:28

Mã yometsoyopaoni anã askayamakãfe. Iskaratĩa yonokãfe a mã fichipaiyai fixikakĩ, a yora afaamaisfo ato inãxikakĩ afara sharafo.

1 Ti. 5:10

Nãskata nã kẽroõnoa yorafãfe yoisharamisfo; nãskata ãfe fakefo pexkosharakõini; askatari yora fetsa ãfe pexe ano kaito atoki inimamis; fetsafo pimamis; omiskõiaito ato sharafamis; ato feta amis; kẽro askara fistichi ãfe ane kenetiro Jesús Ifofamisfãfe a kexenõfo.

Tit. 2:14

Nã nokoõnoax nani. Nõko chaka keyokõi noko soaxõfaini. Nãskaxõ nõko õiti noko sharafaxõa. Nõ afe yoraxõ nõ afara sharafapaikĩ nõ anõ.

Tit. 3:8

Titopa, ẽ mia xafakĩakõi yoiaki. Nã ẽ mia yoiai keskara chanĩmaki. Nãskakẽ Nios Ifofaafo yoisharakõife, shinãsharata isharakõinõfo, yora fetsafo shara fanõfo. Askara shara ikax keyokõi nõ isharatiro.

Hebreos 13:16

Askatari ato shinãmakiyamakãfe mã afarayaxõ a afaamaisfo ato inãsharakãfe. Mã ato askafaito õikĩ Nios matoki inimasharakõi kiki.

Stg. 2:5

Efe yora mĩshtichi, ẽ mato noikõi. Akka ẽ mato yoiai keskara ea nikasharakãfe. Yorafãfe afaamaisfikaxõ, Jesús chanĩmara faifãfe ato noixõ Niospa ato katoni afe yorakõifo inõfo. Ato yoiyoni iskafakĩ: “Mã ea chanĩmara fakĩ, mã ea noikõi. Nãskakẽ mã efe ipanaka ẽ xanĩfo ika ano. Nãskatari nã ẽfenãfo mãtonãri ixii,” ixõ Niospa ato yoiyoni.

1 Pedro 3:11

Afara chakafo fishtayamakãfe, ato makinoax fotakãfe. Askatamaroko afara sharafos akãfe. Afeskax mã isharatiromãkĩ nãskax isharakõikãfe fetsafo fe.

1 Juan 3:17

Akka afama mĩshti ichapayafixõ, fetsafãfe afara yopaito nõ ato afaa inãmã, askara sharama. Epa Niospa noko noiai keskafakĩ, nõ ato noima.

3 Jn. 1:11

Yamã, õiti chakayafo keskara mĩri iyamafe. Akka a õiti sharayafo keskara mĩri ife. A ato sharafamisfo Niospa fakefokĩ. Akka a ato chakafamisfo Nios tãpimisfoma afe keskaramãki.