1 Ti. 4:8 - Yaminahua

⁸ Akka afaa meeyamai rakatsax nõko yora xokenãtiro. Nõ anã afaa yonopaitiroma. Akka nõ mẽxotaima yonoi nõ mitsisipakõi itiro. Nãskara shara. Nãskafakĩri nõ mẽxotaima Niospa meka nõ õirifakĩ, Nios kĩfirifai nõ mitsisipakõi itiro nõmẽra sharafinakõia. Nãskax nõ shara itiro. Nãskatari nõ naax, nai mẽra kaax, ariaxri nõ mitsisipakõi itiro sharafinakõimãi niax Nios anoax, nõmãi Nios Ifofakatsaxakĩ.

1 Ti. 4:8 ပူးပေါင်းရင်းမြစ်များ

Mateo 12:32

Askatari fẽtsa Niospa Fake yorakõi chakafaino Epa Niospa ãfe chaka soaxotiro. Akka fẽtsa Epa Niospa Yõshi Shara mekafakĩ chakafaino, Epa Niospa ãfe chaka soaxonakama. Ãto chaka neepakenaka. Nã naitĩari ãfe chaka aõ neepakenaka,” ixõ Jesús ato yoini.

Mateo 19:29

Akka yora fẽtsa eõxõ ẽfe meka sharaõnoa ato yoikakĩ ãfe pexe õifaini, askatari ãfe onefetsafori õifaini, ãfe poifori õifaini, ãfe apari õifaini, ãfe afari õifaini, ãfe ãfiri õifaini, ãfe fakefori õifaini, ãfe tareri õifaini, akka nãato afama mĩshtifo fixii. Nãskatari mã naax Nios fe ipanaka.

Mateo 6:33

Nãskakẽ Nios mãto xanĩfoõnoa shinãkãfe. A Niospa mato amapaiyai keskara nãskara fisti shinãkõikãfe. Mã askafaito afara fetsa mã yopaito Epa Niospa mato inãxii.

Marcos 10:30

nãato niyoxõ afama mĩshtifo fitiro, Niospa inãino, pexefoya ita, onefetsafoya ita, poifoya ita, afafoya ita, fakefoya ita, tarefoya ita itiro. Nãfo Niospa inãsharafiano omiskõixii. Nãskafiax chipo Epa Nios fe ipanaka.

Lucas 5:38

Nãskarifakĩ tsõa mãmã fata koiro pisha xini mẽra nanetiroma nã mãmãnõ farax akaino toxamãiyanõ. Nãskakẽ nã mãmã fata fe koiro pisha chakanatirofo. Akka nã mãto xinifãfe mato yoimisfo keskara fe nã ẽ mato yoiai keskara osinãtiroma. Nã ẽ mato yoiai keskara Niospa meka sharakõi. Akka a mãto xinifãfe mato yoimisfo anori shinãx mã isharatiroma. Niospa mekaya meka chaka osinãtiroma. Nãskakẽ mã nikapaifikĩ mã shinãsharatiroma.

Romanos 8:28

Akka nõ tãpia Epa Niospa noko katoni a apaiyai keskara nõ anõ. Nõ Epa Nios noiaino afarafãfe noko afeskarafafiaino afoxõ Epa Niospa noko axosharai.

1 Corintios 3:22

Ẽ ikaino, Apolos ikaino, Pedro ikaino nõ Nios yonoxomis. Ãfe meka nõ mato yoimis mã nikasharanõ. Askatari naax mã afe ĩpaxanõ. Keyokõi Niosnã, askatari nã Niosnãri mãtonã. Iskaratĩa afara sharafo ikai aõxõ Niospa mato shara faxõi. Nã chipo ixiaifori aõxori Niospa mato shara faxoxii. Keyokõi a Niospa onifanifo mãtonãri. Nãskakẽ mãri ãto ifo ixii.

1 Corintios 8:8

Anori shinãfiaifonokai a nõ afara piatokai Nios yafi noko rafemasharatiroma. Nios makinoa noko potatiroma. Afara onifakaxõ, “Na nõko niosra,” ikaxõ nami inãfo nã nami nõ piamanokai noko shara imatiroma. Askatari noko chakafatiroma. Nãskatari mã nõ pianori noko chakafatiroma. Nãskatari noko shara imatiroma.

1 Ti. 4:7

A tãpiamafãfe yoimis anori nikayamafe. Mẽxotaima Niospa meka shinãfafãife. Askata õiti kerexfafãi Nios shinãfafãife mĩ õiti pachi fakĩma.

1 Ti. 6:3

Nõko Ifo Jesucristo ãfe meka fãsisharakõi. Jesús meka nikax oa Nios keskara nõ shara itiro. Akka a yora fẽtsa noko anorima yoitiro, ãa shinãxõ. “Ẽfi fãsi tãpifinakõiakĩ, ea keskarakai tsoama,” ixõ ãa yoi askara yõra afaa tãpiamafiax. Ãa chanĩ askamis. Askara yora ato fe feratenãtiro. Askakĩ meka shara yoitiroma. Ãa kakapaimis askara yõrari ãa shinãtiro: “Ea tsõa finõyamanõra,” ixõ ãa shinãtiro. Askara feronãfãkekai Niospa meka ato yoisharatiroma. Askaito õi kakĩ feratetirofo, meepaitirofo, nikakaspatirofo, ĩchatirofo, noikaspatirofo, “Noko chakafaira,” ixõ shinãtirofo.

1 Ti. 6:5

Akka a feratenãmisfãfe anorima fisti shinãmisfo. Mã Nios shinãyopaofinixakakĩ anã shinãsharatirofoma. Anã ato yoisharatirofoma mẽstekõi. Afãfe shinãfo: “Nõ Nios Ifofakatsaxakĩ nõ kori ichapaya itiro,” ixõ shinãmisfo anori Niospa yoiamafiano. Akka fẽtsa shinãi iskatiro: “Ẽri a keskara shara ipai,” ixõ shinãtiro.

1 Ti. 6:6

Akka anori shinãtamaroko nõ afaamaisfixõ nõ Nios Ifofaax, nõ inimasharakõitiro.

2 Timoteo 3:5

Askata a Nios Ifofaafo ichanãifono ato fe ichanãkaxõ Niospa meka nikafikaxõ shinãsharakanima. “Nõri Nios Ifofai,” ixõ ãa mato pãrakani. Askax ãa chanĩmisfo Nios Ifofayamafiakanax. Askaifãfe õi ato fe rafeyamafe.

Tit. 3:8

Titopa, ẽ mia xafakĩakõi yoiaki. Nã ẽ mia yoiai keskara chanĩmaki. Nãskakẽ Nios Ifofaafo yoisharakõife, shinãsharata isharakõinõfo, yora fetsafo shara fanõfo. Askara shara ikax keyokõi nõ isharatiro.

Hebreos 13:9

Akka fetsafãfe mato anorima yoipaikani, a tsõa nikamisma keskara. Nãskakẽ ato nikayamakãfe mato iskafakĩ yoipai ani kiki: “Nõko xinifãfe noko yoinifo keskara nõ nami fetsa piaino nõko shinã mẽra noko shinãmasharatiro,” ixõ mato yoipai ani kiki. Akka a nõ piaitokai nõko shinã mẽra noko shinãmasharatiroma. Askatamaroko Niospa noko noixõ noko imasharatiro a keskara shara nõ inõ.

1 Juan 2:25

Nãskakẽ Jesús noko iskafakĩ yoiyoni: “Ea yafi ẽfe Epa mã Ifofaax, mã nofe nĩpanaka, anã mã nanakama,” ixõ noko yoini.

Apocalipsis 3:12

Fetsa omiskõikĩ ẽfe meka shinãmakitama tenekõifai ea Ifo sharakõi faxõ ato Satanás finõkõia. Nãskakẽ a ẽfe Epa Nios ika ano, ẽ ato imasharapakenaka. Anoax anã faki fonakafoma. Nãskakẽ ẽ afo tãpimaxii afomãi Epa Niospa yorafokẽ. Askaxõ ẽ ato yoixii iskafakĩ: “Nono Epa Nios ikano, nofe mã ipanaka,” ẽ ato faxii. A Niospa yorafo, judeofo, Jerusalén ano ipaonifo. Akka iskaratĩa Epa Nios ika ari Jerusalén fena. Jerusalén fena nai mẽra. Nai mẽra ifiax, chipo nãmã fotoxii. Akka fetsafo ea shinãmakikanaxma afo ano ipanakafo. Nãskakẽ fotoxõ ẽfe Epa ane ẽ atoki nẽtaxii. Askatari Jerusalén fenapa aneri ẽ atoki nẽtaxii. Askatari ẽfe ane fenari tsõa nikayomisma ẽ atoki nẽtaxii keyokõichi tãpinõfo ẽ ãto Ifokẽ.

Apocalipsis 3:21

Fẽtsa afara chakafakĩ xatexõ ea Ifosharafai nã ẽfe Epa Nios ika ano efe ipasharatiro. Nãato Satanás finõa. Ẽfi xanĩfokõikĩ ari efe xanĩfo itiro. Ẽ Satanás yafi niafaka chakafo finõkõia. Ẽfe Epa Nios ika ano afe xanĩfokõi ẽ ika. Nãskarifiai fẽtsa ãfe chaka kachikiri fakĩ, ea Ifosharafaxii ẽ ika anoax ari efe xanĩfo ipaxatiro.