1 Ti. 4:16 - Yaminahua

¹⁶ Nãskakẽ kexemesharafe. Niospa meka mẽstesharakõi ato yoife, isharakõita. Mĩ askafai Epa Nios fe mĩ isharakõipakenakaki. A mia nikaifori askapakenakafoki.

1 Ti. 4:16 ပူးပေါင်းရင်းမြစ်များ

Marcos 13:9

“Akka mãroko kexemesharakãfe. Mato achikaxõ xanĩfofo mato inãkani kiki, nãskakaxõ mato koshakani kiki ichanãti pexe mẽraxõ. Xanĩfofofãfe ferotaifi mato iyoxikani. Eõxõ mato askafaifono, mã ato yoisharakõixikai.

Lucas 21:34

“Nãskakẽ kexemesharakãfe mãto õitinĩ afaa chaka shinãkakĩma. A mã pãepaiyai fisti shinãyamakãfe. Afaa fetsafori shinãyamakãfe. Anori shinãkĩ a ikaifo keskakĩ mã ea chanĩmara fatiromaki. Akka afo itipinĩsharafomano ẽ nokorisataxii. Mãraki poomãnã tanasharaxma tarapa faafo mẽra ikiyamatiro. Mãri nãskatiro ea shinãxma. Nãskata afarafo afeskara iki fetseaino nã mai tio anoax omiskõi fetsexikani.

Hch. 26:22

Akka ea retepaiyaifono Epa Niospa ea kexesharani, iskaratĩari ẽ isharakõia Niosnoa ato yoiyanã. A xanĩfokõifoya a afamafori ẽ ato yoimis. Afaa fetsa ẽ yoimisma. A ato Niospa shinãmanaino Moisés feta yoipaonifo anori fisti ẽ yoimis.

Hch. 6:4

Akka nõ pena tii Epa Nios kĩfifafãinikai, ãfe meka sharari yoiyanã,” ixõ ato yoinifo.

Romanos 11:14

Ẽ mato yoiaino mã Cristo chanĩmara fayanã mã inimakõiaito mato õikakĩ ẽfe kaifãferi Jesucristo chanĩmara fapaikani, mato keskara ipaikakĩ. Nãskarakõi ipainõfora.

Romanos 16:17

Efe yora mĩshtichi, ẽ mato yoinõ nikakapo. Mato fe ichanãmis fetsafãfe mato afara chakafamapaikani anã mã Jesúsnoa shinãnõma. Akka nõ mato mẽstekõi tãpimanai keskara nãfãfe mato anori yoikanima. Akka fakirira mato yoipaikani anã mã Jesús shinãnõma. Nãskax ato fe rafeyamakãfe, mato pãratirofokĩ.

Romanos 2:7

Yora fetsafãfe shara shinãmisfo a Niospa ato amapaiyai keskara apaikĩ. Niospa ato inimamatiro. Askatari Nios fe ipaikani. Askara yorafo Nios fe ipanakafo.

1 Corintios 1:21

Tsõa pishtakai ãto shinãmã Nios tãpitirofoma. Nios fistichi keyokõi tãpisharakõia. Nãskakẽ nõ ato yoimis iskafakĩ: “Niospa tãpikõixõ ãfe Fake Jesucristo nĩchini noko nãxonõ nõko chaka noko soaxoxikĩ,” ixõ nõ ato yoimis. A Nios chanĩmara faafãfema yoikĩ iskafamisfo: “Jesús chanĩmara faifãfe aõnoa anorima yoimisfo,” ato famisfo. Akka nã Jesús chanĩmara faifo Niospa ato chaka soaxoni afe nipaxanõfo. Nã nõ mato yoimis.

1 Corintios 9:22

Jesús chanĩmara faafãfe ranãrito Niospa meka tãpisharayokanima. Ẽ nã keskarafo fe ikax ẽri ẽ ato keskara ipai eari Jesús tãpimasharanõ. Nã ea tãpimana keskara ẽri ato tãpimasharanõ. Nãskatari fatora fetsafo fe ẽ ikax ẽ ato keskarari ẽ ipai. Eõxõ Jesús chanĩmara fakanax afe isharapakexanõfo.

1 Corintios 9:27

Ẽa ẽ apaiyai keskara ẽ akima. Ẽfe Ifãfe ea amapaiyai keskara ẽ aki. Ẽ tenepaifikĩ ẽ tenetiroma Jesús Ifofasharaxikĩ. Ẽ xokenãfiakĩ ẽ tenetiroma Jesúsnoa yoikĩ. Jesús fistichi ea yonomatiro. Nãskakẽ ẽ fetsafori yoifafãini Jesús Ifofaxõ yonosharaxonõfo. Nãskakẽ Niospa ea yoia keskara ẽ ayamax ẽ fenotiro, afianã ẽ Nios yonoxotiroma. Niospa anã ea yonomatiroma. Ẽ fenopaima. Nãskakẽ nã ẽa ẽ apaiyai keskara ẽ akima. Ẽfe Ifãfe ea amapaiyai keskara, nã fisti ẽ aki.

Efesios 4:14

Nãskax anã oa fakefo keskara nõ itiroma mã nõmẽra Niospa meka yosiano. Oa nefe onori kai, anã onori kai imis keskai, fakefo askatirofo afaa shinãsharaima. Askaxõ a Niospa meka tãpisharafãfema ato yoiaifãfe nikafofãsa fatirofo. Askaxõ tãpisharaxikakĩma Niospa mekakõi. Askatari a yora ãa chanĩki fanĩrira ato yoimis nõ nikatiroma.

Colosenses 4:17

Nãskakẽ Arquipori ea yoikĩ iskafaxokãfe: “Epa Niospa mia yoia keskafakĩ axosharakõife,” ixõ ea yoisharaxokãfe.

1 Tesalonicenses 2:16

Askatari a judeofoma Nios fe ĩpaxanõfo nõ ato yoisharapaiyaino, noko ato yoitima famisfo. Nãskakẽ afaa chakafakĩ finayamafikatsaxakakĩ mã afara chakafakĩ finakõimisfo. Akka iskaratĩa anã tenetiromameki Niospa ato omiskõimaki finakõi.

1 Ti. 1:3

Ẽ Macedonia ano kayamea taefakĩ, ẽ mia yoifaini kati. Ẽ mia anã yoiaito nikasharafe. A Efeso anoax fena kayamafe. Nãno ixõ mĩ efesofo ato yoisharafe. Atiixori Niospa meka anorima yoimisfokĩ. Niospa meka yoitamaroko ãto xinipao ipaoni fisti ato yoifafãikani. Askakani feratenãkani. Nãskakẽ ẽ mia yoi mĩ ato yoisharanõ iskafakĩ: “Niospa meka mẽstekõi yoisharakõikãfe. Mãto xinipaofãfe afeskax Epa Nios ari nõ nokotiromãki noko tãpimapaonifoma. Jesucristo noko nãxoni nõko chaka noko soaxoxiki. Epa Nios ano noko imaxiki nõ Jesús chanĩmara fakẽ. Nã fisti chanĩmara fakãfe, a fisti ato yoikãfe. A mãto xinipao ipaoni anori mã anã shinãnõma. Anorima chaka ato yoiyamakãfe. Niospa meka yoisharakãfe mẽstekõi,” ixõ ato yoife.

1 Ti. 4:15

Shinãfãikõi isharafe nã ẽ mia yoiai keskafakĩ. Mĩ askafaito mia tãpisharakõinõfo mĩ yorafo Niospa meka yoiaito mia tãpisharakani. Askaxõ, “Timoteo fãsi sharakõi,” ixõ mia yoikani.

1 Ti. 4:6

Timoteo, na ẽ mia yoiai anori mĩ chanĩmara famis. Nãskakẽ Jesús Ifofamisfo ato tãpimasharafe, mĩ Cristo Jesús yonoxomis shara ixiki. Askatari Niospa meka mẽxotaima õife a mĩ piai keskafakĩ, fãsi shinãsharakõixiki, shara nixiki.

2 Timoteo 2:10

Nãskakẽ ẽ atoõnoax omiskõifikĩ ẽ tenekõi a Jesús Ifofaafo tii ẽ ato tãpimani chanĩmara fanõfo, Nios fe ĩpaxakakĩ.

2 Timoteo 3:14

Nãskakẽ Timoteo, na meka Jesúsnoa mĩ tãpisharai. A mia tãpimanafo mã mĩ tãpikõia. Nãskakẽ mĩ tãpisharakõi. Anori meka chanĩmara fafe, shinãmakikima.

2 Timoteo 4:2

Niospa meka fena fenakima ato yoife fenãmãshta shara. A nikapaiyaifo askatari a nikakaspaifori ato yoisharafe, mĩ ato yoisharaino ãto chaka xatenõfo Jesús Ifofasharax isharanõfo. Shinãsharata, Niospa meka mẽstekõi yoife.

Tit. 1:9

Niospa meka nikasharaxõ kachikiri fayamafãi, nã Niospa yoiai anori chanĩmara faxõ fetsafori yoitiro. Xafakĩakõi yoitiro. Nãskaito nikai yorafo Nioski inimanõfo. Askatari anorima yoimisfori ato tãpimatiro, akairi tãpinõfo.

Tit. 2:15

Nãskakẽ ẽ mia yoiai keskafakĩ keyokõi yorafo ato tãpimafe, mia Niospa shinãmanaino. Afara chakafaifãfe ato yoisharafe, anã askanõfoma. Niospa yoiai keskafakĩ mĩri ato yoisharafe, inimanõfo. Mĩ ato askafaito mia nikasharanõfo Niospa mia yoiai keskarafakĩ akairi nikasharanõfo.

Tit. 2:7

Askatari mĩri isharafe. Keyokõi yorafo shara fafe. Afeskax isharatirofomãkĩ ato õimafe. Ato Niospa meka tãpimafe, mẽstekõi ato yoisharafe, xafakĩakõi. Niospa mekaki kakapaiyamafe.

Flm. 1:19

Nãnori ẽ mia yoi mia kirika kenexõ fomayanã. A Onĩsimõ mia nimia ẽ mia kopifanõ ea chanĩmara fafe. Efe yorashta, mĩ ea nimia shinãfe. Mĩ ea kori nimiyamafekẽ ẽ mia Jesús meka yoiyamano mĩ Jesús Ifofakeranama afe nĩpaxakĩ.

Hebreos 12:15

Epa Niospa noko noikõikĩ ãfe Fakeoxõ noko sharafa fafafãimis. Nãskakẽ a Niospa noko amapaiyai keskara akãfe fenoxikakima. Askatari mãto shinãmã afaa shinãyamakãfe. Akka mãto shinãmã mã afara shinãkĩ fetsafori mã ato afara chakafamatiro akairi askara anõfo.

Hebreos 13:9

Akka fetsafãfe mato anorima yoipaikani, a tsõa nikamisma keskara. Nãskakẽ ato nikayamakãfe mato iskafakĩ yoipai ani kiki: “Nõko xinifãfe noko yoinifo keskara nõ nami fetsa piaino nõko shinã mẽra noko shinãmasharatiro,” ixõ mato yoipai ani kiki. Akka a nõ piaitokai nõko shinã mẽra noko shinãmasharatiroma. Askatamaroko Niospa noko noixõ noko imasharatiro a keskara shara nõ inõ.