1 Pedro 1:3 - Yaminahua

³ Nãskakẽ nõko Ifo Jesucristo ãfe Apa Nios nõ aicho fatiro: “Mĩ fãsi sharakõi,” ixõ nokomãi noikõiaino ãfe Fake Jesucristomãi nõkoõnoax naax anã otonikẽ. Nãskaxõ fake yome rama kãia keskara shara noko imai õiti fenasharayakõi. Nãskakẽ nõ afe isharakõipakenaka.

1 Pedro 1:3 ပူးပေါင်းရင်းမြစ်များ

Juan 1:13

Niospa fakefo yorafãfe fakefo keskarama. Yorafãfe fakefo yora keskara, yõramãi ato fake faano. Akka Nios fistichi ato fake fatiro. Yõrakai Niospa fakefo fake fatiroma. Nã Jesús chanĩmara faafo tii Epa Niospa ãto shinã ato fetsafaxotiro ãfe fakefo inõfo.

Romanos 12:12

Epa Niospa mato sharafaxoxiai keskara shinãkãfe. Nãfo shinãi inimakãfe. Akka omiskõifi fena fenayamakãfe. Epa Nios kĩfikĩ xateyamakãfe.

Romanos 15:13

Epa Nios chanĩmara faxõ nõko Ifo oxiaino nõ manai. Epa Niospa noko shinãmani iskafakĩ: “Chanĩma, nõko Ifo oxii noko ifixiki nõ afe ĩpaxanõ,” ixõ noko shinãmani. Nãskakẽ ẽ mato kĩfixomis Niospa mato inimamanõ. Askatari mãto shinã mẽra mato shinãmasharai mã afeskatama mã isharanõ mato axosharai. Mã Nios chanĩmara faano ãfe Yõshi Sharapa mato axosharai mã isharanõ.

Romanos 4:25

Nõko chakaõnoax Jesús nani nõko chaka noko soaxoxiki. Askata mã otofaano aõnoax afaa chakafamisma keskarafo nõ ixii.

Romanos 5:10

Askata nõ Nios noikaspaino ãfe Fãke noko nãxoni Nios fe nõ rafenõ. Nãskax nõ iskaratĩa Jesús afe yorafo nõ afe rafekõia. Askaxõ noko sharafakĩ finakõi. Jesús nakẽ Niospa anã otofani, nõri afe nipaxanõ.

Romanos 8:11

Mã Jesús naano Niospa otofani. Nãato ãfe Yõshi Shara mãto shinã mẽra nanea. Nãskarifiakĩ mãto yora naano ãfe Yõshi Sharaõxõ Niospa anã mato otofatiro mãto yora fenasharakõi inõ.

Romanos 8:24

Nãskara nõ shinãi nõ akiki nokoaito noko fetsafaxii a keskara shara nõ inõ. Nãskax nõ afe ipanaka. Chanĩmara faxõ inimayanã nõ manasharatiro fena fenakima nã nõ akiki nokoaitĩa. Akiki nokoxõ nõ anã manatiroma mãmãi nõ õikĩ.

1 Corintios 13:13

Iskaratĩa nõ Nios chanĩmara fai. Nõ Nios chanĩmara faxõ nõ manai nã oaitĩa afe ipaxakĩ. Nõ Nios chanĩmara fai nã shara. Askatari afe ipaxakĩ nõ manaino nãri shara. Askatari nõ fetsafo noikõia nãfi sharafinakõiaki.

1 Corintios 15:20

Akka chanĩmakõi, Cristo otoi taeni. Anã naxiima. Nãskakẽ Cristo otonino nã chanĩmara faafo nakanax otoxikani afe ipaxakakĩ.

2 Co. 1:3

Nõ Epa Nios yoisharanõ iskafakĩ: “Epa Niospa, mĩ noko sharafa fafafãini. Mĩ sharafinakõia. ¡Aicho!” ixõ nõ Epa Nios yoinõ. Nãfi nõko Ifo Jesucristo ãfe Apaki. Nãatori noko noisharakõi. Askatari nõ omiskõiaito noko inimamatiro. Akka nã nõ meemis keskara mei, fetsa omiskõiaito nõ inimamatiro, nã Epa Niospa nõ omiskõiaito noko inimamamis keskafakĩ.

Gálatas 6:16

Niospa Yõshi Sharapa Jesúsnoa noko yoia keskara mã akẽ Epa Niospa mato inimamakõiyanã mato noikõi. Nãskax Niospa fakekõifo mã iki.

Efesios 1:17

Niospa ãfe Fakekõikĩ Jesucristo. Nãskax sharafinakõia. Nãskakẽ ẽ mato kĩfixokĩ iskafamis: “Epa Niosi, mĩ Yõshi Sharapa na Efeso ano ikafo ato tãpimasharakõife mia xafakĩakõi tãpisharakõinõfo.

Efesios 1:3

Nõko Ifo Jesucristo ãfe Apa Niospa noko afara sharafo noko shara famai, nai mẽraxõ nõ õiamafiaito nõko õiti mẽra noko inimamasharai nõmãi ãfe fakefokẽ. Nãskakẽ nõ yoisharai nõ inimasharakõi Epa Nioski.

Efesios 1:7

Niospa noko noikĩ finakõikĩ ãfe Fake Jesús noko nãmã nĩchixoni nokoõnoax ãfe imi foax ifi cruz ikakinoax noko nãxonõ nõ sharakõi afe inõ, askatari nõko chaka nokoõnoa noko soxonõ.

Efesios 3:20

Akka Epa Niospa afama mĩshti fatiro a nõ yõkai tii noko axotama finõmata noko axotiro. Nãato ãfe sharaõxõ noko axotiro afama mĩshtifo. Noko axopaiyai keskafaito nõ tãpitiroma. Finõmainĩfofãta noko shara fatiro.

Colosenses 1:23

Nãskano na meka shara Jesucristoõnoa mã chanĩmara faxõ afara fetsa mã shinãyamaino Epa Niospa matoõnoa yoipakenakama iskafakĩ: “Mĩ afara chakafamis,” ixõ matoõnoa afaa yoipakenakama. Askatamaroko mã chanĩmara faax mã inimakõiaito mato ifixii mã afe ĩpaxanõ. Mã Jesucristo ãfe meka shara nikakĩ taefani keskafakĩ nãnorikõi keyokõi ẽ ato tãpimani. Ẽkĩa Pablo, ẽ Epa Niospa ãfe meka yoifafãini Jesucristoõnoa ato yoikĩ.

Colosenses 1:27

Epa Niospa Cristoõnoa mato yoiyomis keskafakĩ keyokõi mato tãpimaxii, mato fisti tãpimatama, nã yora fetsafori ato tãpimaxii. Iskafakĩ ato yoixii: “Ẽfe Fake Cristo mato fe rafekakãini, nãskakẽ mã chanĩmara fatiro a ẽ ika ano efe ipaxakĩ. Nã Cristo isharakõiai keskafakĩ ẽri mato askafatiro mãri isharakõinõ,” ixõ mato yoini.

1 Tesalonicenses 1:3

“Epa Niosi, na Tesalónica anoafãfe, mia noikakĩ mia yonoxosharamisfo, nãskakaxõ fena fenakãkima nõko Ifo Jesús manasharamisfo nokoki anã oi kiki,” ikaxõ. Nãnori pena tii ẽ mato kĩfixõfafãini.

1 Tesalonicenses 4:13

Efe yora mĩshtichi, ẽ mato yoiai keskara nikasharakãfe. Jesús Ifofaafo nakanax afeskakanimãkai ẽ mato yoinõ, akka a Ifofaafoma ato fe yorafo naafono, manomitsakani omiskõikani. Akka mã askaima mãmãi Nios Ifofaax, mãmãi anã õinõnãxixakĩ. Akka a Nios Ifofaafoma anã õinõnãkanima.

2 Tesalonicenses 2:16

Nõko Ifo Jesucristo feta nõko Epa Niospa noko noikĩ, nõko õiti mẽraxõ noko inimamakõinõ. Nãskakẽ nõ tãpitiro noko potanakama nõ afe ipaxanõ.

Tit. 2:13

Iskaratĩa nõ Jesucristo manai anã oaito nõ õisharapai. Nãfi nõko Ifokõikĩ. Nãfi Nioski. Nõ tãpia nokoki anã oxii. Nokoki nokoaito sharafinakõia nõ õixii. Nãato noko nãxoni nõ omiskõipakexanõma nõko chaka noko soaxoxiki, nõ afe nĩpaxanõ.

Hebreos 3:6

Akka Jesúskai Epa Niospa ãfe yonomatima. Ãfe Fakekõi. Nãskakẽ afe yorafãfe ãto Ifokõi. Akka tsoamãki afe yorafo ẽ mato yoinõ. Nõ Jesús Ifofaxõ a noko yoiyoni keskafakĩ nõ manasharai nã anã oaitĩa, nõ kachikiri fayamax nõ afe yorakõi nõ iki.

Stg. 1:18

Niospa ares shinãyoni iskakĩ: “Ẽfe meka chanĩmakõi nikaifono ẽ ato fetsafaxii ẽfe fakekõi inõfo,” ixõ Niospa shinãyoni. Nãskakẽ noko katokĩ taefani. Nãskatari a rama chanĩmara faifo ãfe fakekõifo ixikani.

1 Pedro 1:13

Nãskakẽ itipinĩsharakãfe shinãsharakõiyanã. Nã Niospa noko noikĩ noko afara shara inãxiaitĩa Jesucristo oaino. Nãskakẽ manasharakõikãfe.

1 Pedro 1:21

Jesucristoõxõ mã Epa Nios chanĩmara fai, Epa Niospa Jesucristo otoax akiki inimakõini. Nãskakẽ mã iskaratĩa chanĩmara fakõini, Nios manakõiyanã afe ipaxakĩ.

1 Pedro 1:23

Nãskakẽ nã mã rama fake kãia keskara shara mã. Akka mãto epa feta mãto ẽfa mato fake fifiakanax chipo natirofo. Akka Niospa ãfe meka sharaõxõ fena keskara shara noko ima, nã keyonakama.

1 Pedro 2:2

Askatamaroko nã fake rama kãiato yosixiki chocho apaiyai keskafakĩ, mãri Niospa meka shara fichipaikãfe, oa fake yomẽ chocho aki yositiro keska shara ixikakĩ. Mã mã tãpiaki nõko Ifãfe mato shara faxõaito. Nãskakẽ nã Epa Niospa mato amapaiyai keskara fisti akãfe.

1 Pedro 3:15

Askatamaroko nõko õiti mẽraxõ nõko Ifo kĩfikĩ iskafakãfe: “Cristo, mĩfi ẽfe Ifokõiki. Mĩkai afaa chakafamisma, mĩ sharakõi,” ixõ yoikãfe. Askatari fetsafãfe mato iskafaifãfe: “¿Afeskaxõ mĩ tãpiamẽ mĩ Nios fe ipanaka?” ixõ mato yoiaifãfe ato yoixikakĩ ĩkisi itipinĩsharakãfe ato tãpimasharaxikakĩ.

1 Pedro 3:21

Faka faipafãino kanõanãfã mẽra ikiax Noé ãfe ãfi fe ãsanima. Ãfe fakefori ãto ãfifo fe afe ikikanax ãsanifoma. Ocho inifo. Nãskarifiakĩ fẽtsa noko maotisafakĩ faka mẽra noko ikimaxõ, noko fininĩfofanaino nõ yorafo ispai nõ Jesús Ifofakĩ nõko chaka noko soaxonõ nõ afe ipaxanõ. Akka nã noko maotisafafoõxokai nõko choshta nõ soatiroma. Askatamaroko nõ Nios yõkai nõko chaka noko soaxonõ noko ĩkipakexanõ Jesúsmãi mã naax anã otonikẽ. Nãskaxõ nõ anã shinãchakatama Jesucristoõxõ nõ shinãsharakõi Nios fe ĩpaxakĩ.

1 Pedro 3:5

Nãskakanax kẽrofo ranãri Nios Ifofasharakanax isharakõipaonifo. Nãskakaxõ ãto fenefo nikakõisharapaonifo.

1 Juan 2:29

Mã mã tãpiakĩ Nios isharakõimiskĩ afaa chakafatama. Nã isharakõimisfo nãfo Epa Niospa imasharapakenaka ãfe fakefo inõ. Nafofi Epa Niospa fakekõifokĩ.

1 Juan 3:3

Niospa fakekẽ nonori nõ yoi: “Ẽ Jesucristo fe ipanaka. Ẽ Jesús fe ikaino ãfe õiti keskarakõi ẽ ixii,” ixõ shinãkĩ nõ anã chaka shinãpaima. Jesucristo shinãi keskarari nõ shinãtiro, anã chaka shinãyamakĩ.

1 Juan 3:9

Akka Niospa ãfe Yõshi Shara nõmẽra naneano nõ Niospa fake itiro. Nõ Niospa fakexõ nõ anã afaa chakafapaima. Nã Niospa Yõshi Shara nõko õiti mẽra ikẽ nõ anã afaa chakafatiroma, nõko õiti noko fetsafaano. Nõko õiti noko fetsafaxõ, mã Niospa noko fakefa.

1 Juan 4:7

Efe yora mĩshtichi, nõ noinãkõinõ, Niospa noko ato noimanõ. Nios fistichi noko shinãmatiro nõ ato noinõ, a fistichimãi noko noikĩ finakõixõ. Nãskakẽ nõ ato noikõikĩ nõ Nios tãpia nõ afe yora, nõko õiti mã noko fetsafaano.

1 Juan 5:1

Jesucristo Niospa Fakekõi. Nokoki nĩchini noko nimapakexanõ, nõko Ifo inõ. Akka nõ a chanĩmara fai nõ Niospa fakefo itiro. Nãskaxõ ãfe Apa Nios nõ noixõ, ãfe Fakeri nõ noikõitiro.

1 Juan 5:18

Mã nõ Nios Ifofaano, noko fakefai. Nõ ãfe fake ixõ nõ tãpia nõ anã chaka shinãpaima, mãmãi noko Niospa õiti fetsafaano. Mã nõ askano Satanás afara anã noko chakafamapaiyaito, Niospa Fakekõichi Jesús noko ifixõ noko kexesharatiro. Noko askafakẽ Satanás noko afeska fatiroma.

1 Juan 5:4

Nãskakẽ nõ Epa Niospa fakexõ afara chakafãfe noko amapaiyai keskarakai nõ atiroma. Niospa Fake Jesucristo chanĩmara faxõ afarafãfe noko afara chakafamapaiyai keskara nõ finõtiro.