1 Corintios 3:10 - Yaminahua

¹⁰ Ẽ mato yoinõ afeska faxõ pexe fatirofomãki. Taefakĩ ãfe kishi kerexkõi fikaxõ nĩchitirofo. Mã kishi nĩchikaxõ aõxõ yonotirofo. Nãskarifiai mãfi pexe keskaraki. Akka nõ mato Niospa meka tãpimani nã pexe faifo keskara. Cristofi pexe kishi keskaraki. Nã ãfe kishiõnoax pexe nitiro. Nãskarifiakĩ Cristo mato nimai. Ea Niospa tãpimashara keskarari taefakĩ ẽ mato yoiaito mã Cristo Ifofani. Askatari fetsafãferi nãnorikõi mato yoikani mã Cristo Ifofasharanõ. Nãskata nã fetsafo ẽ ato yoimis iskafakĩ: “Shinãsharata ato mẽstekõi yoisharakãfe,” ixõ ẽ ato yoimis.

1 Corintios 3:10 ပူးပေါင်းရင်းမြစ်များ

Mateo 24:45

Anã Jesús ato yoini iskafakĩ: “Ẽ mato yoinõ afe keskaramãkĩ a yonoxomis shara mã tãpinõ. Xanĩfãfe mai fetsa ari kakĩ, a yonoxomis ãfe pexe ano nĩchifaini nãnoxõ a yonoxomis fetsafo a piaifo pena tii ato inãfafainõ.

Mateo 7:24

Anã Jesús ato yoini iskafakĩ: “Akka nã ea nikaito nã ẽ yoiai keskara aki, nã yõra pexe fakĩ tãpixõ mai chai põkixõ mai teikĩ pexe kishi nĩchitiro keskafakĩ.

Lucas 11:35

Akka õisharakãfe mã Epa Nios shinãi xafakĩa ifiaxõ ãfe meka kachikiri faxõ mã anã shinãsharatiromaki, fakish keskara mã itiro.

Lucas 21:8

Askafaifono Jesús ato kemani: “Kexemesharakani mã ato nikaino mato afara chakafamatirofoki. ‘Ẽfi Cristokĩ. Mẽ oa mãto xanĩfo ixiki,’ ixõ mato pãrapaikani kiki. Nãskakaxõ afãfe yoikani kiki a ẽ yoimis keskara. Akka yoiaifãfe ato nikayamakãfe.

Hch. 18:27

Nãskakẽ Apolos Acaya mai ano kapaiyaito nikakĩ a Nios Ifofaafãfe iskafanifo: “Nõ a Jesús Ifofamisfo kirika kenexõ fomanõ mia ifisharakõinõfo,” ixõ yoinifo. Apolos mã Acaya mai ano kaxõ, ato yoisharakõini. Ato askafaito nikakani Niosnoax inimasharakõinifo.

Romanos 1:5

Jesucristoxõ noko noi. Noko noikĩ ãfe shinã noko inãni. Nãskaxõ noko nĩchini Jesúsnoa yoimis nõ inõ. A judeofomari a xoko fetsafori afãferi Jesús chanĩmara fanõfo nõ yoiaino. Jesús chanĩmara fakaxõ nikasharakõinõfo.

Romanos 12:3

Epa Niospa ea noikĩ ea yoia ẽ mato tãpimanõ. Nãskakẽ ẽ keyokõi mato yoisharapai. Kakapaimis iyamakãfe. Niospa mato imapaiyai keskara fisti shinãkãfe. Afaa fetsa shinãyamakãfe. Niospa mato shinãmana keskara fisti matoõnoa shinãkãfe. Mẽstekõi matoõnoa shinãkãfe. Mã Nios chanĩmara fakĩ shinãkãfe iskakĩ: “Ea Niospa imapaiyai keskara ẽ ipai,” ixõ shinãkãfe.

Romanos 15:15

Niospa ea noikĩ ea katoni Jesucristo ãfe yonomati ẽ inõ, ãfe meka shara ẽ mato tãpimanõ. Nãskakẽ ẽ ranotama anã aõnoa ẽ mato shinãmasharai kirika kenekĩ. Akka Niospa ea nĩchini judeofoma ẽ ato Jesús Ifofamanõ. Mã Jesús Ifo sharafaxõ, mãto chaka mã soax a keskara shara mã inõ. Nãskax Epa Nios matoki inimakõi.

Romanos 15:20

Ẽkai a yora fetsafãfe Cristoõnoa yoimisfo ari ẽ kapaimisma. A Cristoõnoa nikamisfoma ano ẽ kapaimis ato tãpimaxiki.

1 Corintios 3:11

Ẽ mato taefakĩ Cristoõnoa yoini mã Ifofanõ. Akka tsõakai mato yoikĩ iskafatiroma: “Ẽ mato meka fetsa tãpimanõ mã chanĩmara faax Nios fe ĩpaxanõ,” ixõ tsõa mato anori yoitiroma. Jesucristo fistichi noko nimasharatiro nõ Nios fe ĩpaxanõ.

1 Corintios 9:2

Fetsafãfe shinãkakĩ iskafamisfo: “Niospakai Pablo nĩchiama Jesúsnoa noko tãpimanõ,” ixõ anori yoimisfo. Fetsafo mekaino anori shinãyamakãfe. Ẽ mato yoiaito mã nõko Ifo Jesús chanĩmara fai. Nãskakẽ mã tãpitiro chanĩma Niospa ea nĩchini ẽ mato Jesúsnoa yoinõ.

2 Co. 10:15

Akka nã ẽ kamisma anoxõ fetsafãfe ato yoiafono nõ ato yoia ixõ nõ ato yoimisma. Akka nõ mato yoi nã nõ mato afara axosharamis fistiõnoa. Akka nã fetsafãfe mato axomisfoõnoa nõ yoimisma. Akka mã mã Jesús nikasharai. Nãskapainõ. Mẽxotaima mã nikasharakõifafãinõ. Akka mã ea ifisharakõiano mẽxotaima ẽ mato yoisharatiro nã Niospa fichipaiyai keskafakĩ.

Efesios 2:20

Nãskax mã oa pexe sharakõi keskarafo. Oa tokiri nõ pexe shara faa, afeskax paketiroma keskara. Taefakĩ nõ mai põkita a mẽra tokiri nanexõ, nõ pexe fatiro pakeyamanõ. Tokiri kerex sharakõiki nõ atiro pexe fakĩ. Nãskarifiakĩ taefakĩ a Niospa mekaõnoa ato yoipaonifãfe ato yoipaonifo Niospa ato shinãmanaino. Akka chipo mã Jesús nãmã fotoxõ, aõxõ tãpimisfo ato ifini aõxori a fetsafo tãpimanõfo, oa pexe fisti mẽra nõ imis keskaraxõ, akairi ato tãpimanõfo Niospa meka sharaõnoa ato yoikakĩ, atoõxori yorafãfe chanĩmara fanõfo. Askaxori a rama fakeaifãferi Jesús Ifofakanax, oa nõ pexe mitsisipakõi faano, anã paketiroma keskarakõi inõfo Jesucristo Ifofakanax. Nãskakẽ nõri Ifokõi faax, nõri anã paketiroma nõ keyokõichi Ifofaax. Oa pexe sharakõi mẽra nõ ika keskara, nõ ixii, Niospa ãfe Yõshi Shara nõ mẽra naneano.

Colosenses 1:29

Nãskakẽ ẽ mato yonoxokĩ finakõifafãini, Cristo ãfe kerex shara ea inãno.

Colosenses 4:17

Nãskakẽ Arquipori ea yoikĩ iskafaxokãfe: “Epa Niospa mia yoia keskafakĩ axosharakõife,” ixõ ea yoisharaxokãfe.

1 Ti. 4:16

Nãskakẽ kexemesharafe. Niospa meka mẽstesharakõi ato yoife, isharakõita. Mĩ askafai Epa Nios fe mĩ isharakõipakenakaki. A mia nikaifori askapakenakafoki.

2 Timoteo 2:15

Timoteo, Niospa meka pena tii õife. Askafaxõ Niospa meka tãpisharaxõ yorafo mẽstekõi ato tãpimafafãife. Mĩ askaito Niospa mĩõnoa yoitiro iskafakĩ: “Na ea yonoxosharamis, ẽ akiki inimasharakõi,” ixõ mĩõnoa yoixiki. Mia askafainokai mĩ aõ rãfitiroma.

Stg. 3:1

Efe yora mĩshtichi, ẽ mato afara fetsa yoinõ. Mã Niospa meka tãpifixõ nikasharaxoma mã ato tãpimapaiyamakãfe. Akka nõ Niospa meka nikasharaxoma nõ ato yoiaito noko nikakaxõ akairi afara chakafatirofo. Nãskakẽ Niospa ato omiskõimafiakĩ, ato omiskõimasharanima. Akka nokoroko omiskõimakĩ finai. Nãskakẽ Niospa meka nikasharaxoma nõ ato yoitiroma.

1 Pedro 4:11

Mã Niospa meka yoi, nã Nioskõi mekai keskaraõxõ ato yoikãfe. Mãto shinãmã shinãxõ ato yoikakĩma. Askatari mã Niospa Yõshi Sharaõxõ mã afarafo ato shara faxõfaito õikakĩ yorafãfe iskafakĩ yoitirofo: “Aicho, Epa Nios sharakõi. Ãfe Fake Jesucristoõxõ afama mĩshtifo fatiro,” ixõ yoitirofo. “Epa Niospa ares fisti afarafo shara famis, atokai afaa chakafapanakama. Ares fisti ãfe Yõshi Sharaõxõ afama mĩshti fapanaka,” ixõ yoinõfo.

2 Pe. 3:15

Nãskakẽ mãri fekaxtekãkima. Shinãsharata isharakõikãfe. Õikapo. Nõko Ifo samarakamis fena omisma yorafãfe ea Ifofanõfora ixõ shinãmis Epa Niospa. Nãskarifakĩ nofe yora Pablo mato kirika kenexoni Epa Niospa shinãmasharaino.

Apocalipsis 21:14

Nã kene keyakõi tokiri doce efapanãfã kamaki kenea. Jesúsnoa yoimisfãfe ãto anefo nã tokiri doceki kenea.

Apocalipsis 21:19

Tokiri sharakõifo fetsa fetsatapafo Epa Niospa onifaa, nã doce tokiri kamaki nã kene keya tsaoa. Taeyoi jaspeki iyoa. Ãfe pefeta zafiroki ika. Ãfe pefetari agataki ika, ãfe pefetari esmeraldaki ika,