1 Corintios 2:7 - Yaminahua

⁷ A nõ mato iskaratĩa Niosxõ yoia tsõa tãpiyopaonima. Niospa mai onifayoxoma shinãkĩ iskafani: “Ẽfe Fãke ato chipo nãxoxii nã chanĩmara faafo tii ato nimapakexixakĩ,” ixõ shinãni.

1 Corintios 2:7 ပူးပေါင်းရင်းမြစ်များ

Mateo 11:25

Ato askafata Jesús Apa kĩfini iskafakĩ: “Epa, ẽ mia aicho fai. Keyokõi nai mẽranoafoya nono mai anoafo mĩ ãto Ifo. Mĩ sharafinakõi. Akka atirifãfe kirika kene tãpifikaxõ mia Ifofakaxoma. Iskafakĩ shinãmisfo: ‘Tsoa fetsakai noko keskarama. Nõ tãpikõia,’ ixõ shinãmisfo. Akka nãfo mĩ meka mĩ ato tãpimanima. Akka nã kirika kene tãpikaxoma, mia Ifofaifono nãfo mĩ meka shara mĩ ato tãpimani,

Mateo 13:35

Akka nã Niospa meka yoimisto a inõpokoai yoikĩ kirika kenekĩ keskakõifakĩ Jesús nãskakõi fani. Iskafakĩ keneni Jesúsnoa yoikĩ: Ẽ ato meka fetsafaxõ yoixii. Niospa keyokõi onifanitĩa nãskatari a nikamisfoma ẽ ato tãpimaxii, ixõ Jesúsnoa yoikĩ keneni.

Romanos 11:25

Efe yora mĩshtichi, mãfi israelifoma. Meka fetsaõnoa mã nikamisma ẽ mato tãpimanõ mãto shinã mẽraxõ mã shinãnõ, nã ẽ mato yoiai keskara mã tãpiax kakapaimis mã inõma, mã iskanõma: “Nõ israelifo keskarama, nõ sharafinakõia,” mã inõma. Chanĩma, iskaratĩa ẽfe kaifo israelifãfe ãto õiti kerexkõixõ Niospa meka shara Jesúsnoa nikakaspakani. Akka israelifãfema Jesús chanĩmara faafono Niospa ato ifini afe yora ato imaxii. Nãskatari ẽfe kaifãferi anã Nios chanĩmara faifãfe Niospa anã ato ifixii afe yora inõfo.

Romanos 8:29

Nõ Jesús Ifofayoamano Epa Niospa tãpiyoni fatofomãkĩ a chanĩmara faifo. Akka chanĩmara fayoafomano shinãni iskafakĩ: “Nafo ẽfe Fake keskara ẽ ato imaxii,” ixõ shinãyoni. Niospa ãfe Fake iyoa Jesús. Nãskaxri nõri ãfe fake chipoko ixii.

Romanos 8:30

Tãpiyoni nõ ãfe fakefo ixinõ. Askano nõko shinã mẽraxõ noko yoini: “Ẽfe Fake chanĩmara fakãfe,” noko fani. Fatora anori yoixõ ato chaka soaxoni isharanõfo, afaa chakafamisma keskara ato õixii, ato chaka soaxonano ãfe Fake sharakõi keskara inõfo.

1 Corintios 2:1

Efe yora mĩshtichi, ẽ matoki nokofenaxõ yõra shinãõxõ ẽ mato Niospa meka yoiyameama. Niospa ãfe shinã fistiõxõ ẽ mato yoiyamea. Ẽa shinãxõ ẽ mato yoiyameama. Niospa ea shinãmanaino ẽ mato yoiyamea.

Efesios 1:4

Epa Niospa mai yafi nai onifayoxoma noko katoni nõ afe ĩpaxanõ ãfe Fake Cristo keskara afaa chakafamisma keskara sharakõi nõ inõ. Niospa noko noikĩ,

Efesios 3:10

Nãskakẽ Niospa ea nĩchini ãfe meka sharaõnoa ẽ ato yoinõ akairi Nios tãpinõfo. Tãpikanax oa ato fe yorakõifo keskara ixikakĩ Jesúsnoax. Mã askaito nai mẽraxõ a xanĩfo tiito askara õikĩ tãpisharatirofo. “Chanĩma, Niospa tãpikĩfinakõia,” fatirofo.

2 Timoteo 1:9

Akka Niospa ãfe Fake Cristo Jesús noko nĩchixoni nokoõnoax nãxoyonõ nõko chaka noko soaxoxiki. Askaxõ noko shinãni afe yora nõ inõ. Nõ yora chakafofiakẽ Niospa noko noimis. Taefakĩkõi Niospa mai onifaxoma, a inõpokoai tãpixõ, noko shinãni noko ifixixakĩ Jesúsxõ.

Hebreos 1:2

Akka iskaratĩa noko yoia ãfe Fakeoxõ. Nãskakẽ nõ tãpitiro Nios afe keskaramãki. Ãfe Fakeoxõ keyokõi nai mẽranoafoya mai anoafoyari onifani. Nãskafata ãfe Fake katoni nai mẽranoafoya mai anoafoyari nõko xanĩfo finakõia inõ.

Hebreos 11:3

Akka nõ chanĩmara faxõ nõ tãpitiro Niospa ãfe mekapa mai yafi nai onifani. A nõ õiyomisfoma afarafo Niospa onifani, akka iskaratĩa mã nõ õitiro. Nãskakẽ ãfe mekapas keyokõi onifani.

1 Pedro 5:1

Akka nã Niospa meka nikakani ichanãfono ato kexemisfo, ẽ mato yoisharapai ea nikasharanõfo. Nãskaxõ mãto shinã mẽra ẽfe meka nanesharakãfe. Ẽri nã Jesús chanĩmara faafo ẽ ato kexemiski. Nõko Ifo Cristo omiskõiaito ẽ õini. Anã oaino ẽri afe isharapakenaka. Tsõa a keskara õimisma sharakõi keyokõichi õixikani. Ẽri õixii a keskara sharafinakõia.

1 Pedro 5:10

Niospa mato noikõikĩ mato katoni, Cristo ika ari mã afe isharakõipakexanõ nã sharafinakõia ano. Nono mai ano mã iyoax mã aõnoax omiskõiyoi. Mã askaino Epa Niospa mãto õiti mato kerex faxõi. Nãskaxõ afara afeskara afiaino mã tenekõixõ mã Jesucristo Ifofasharakõixii.

2 Pe. 1:3

Niospa noko katoni a keskara shara ikax nõ afe ĩpaxanõ. Nãatofi afama mĩshti fatiroki. Nõ Nios tãpikõikẽ afara nõ yopaito ãfe kerex sharaõxõ noko inãxii. Nãskaxõ noko amapaiyai keskara nõ anõ.

Apocalipsis 13:8

Askafaxõ yoisharaxikani akiki inimakakĩ: “Mĩ fãsi finakõia, mĩ nõko nioskõi,” ixõ yoixikani akiki inimakakĩ. Askaifãfe tãpixõ nõko Ifo Niospa atoki kirika keneama a Ifofaafãfema õikĩ. Mai onifataima mã tãpixõ Niospa ãto anefo ãfe kirikaki keneni fatofãfe Jesús Ifofaimãkai. Akka nã Jesús ovejanã fake keskara noko nãxoni noko ĩkipakexakĩ.