1 Corintios 13:4 - Yaminahua

⁴ Nõ yorafo noikõiaino noko fekaxtefaifono nõ atoki õitifishkitiroma, nõ tenetiro. Nãskaxori nõ ato noikõikĩ nõ ato axosharatiro. Askaxori nõ ato noikĩ nõ xĩtipaitiroma. Askatari kakapaimis nõ itiroma. Nõ yorafo noikõikĩ nõ iskatiroma: “Ẽ tãpikõiaki. Ẽ fetsafo keskarama,” ixõ nõ yoitiroma.

1 Corintios 13:4 ပူးပေါင်းရင်းမြစ်များ

Mateo 27:18

Akka mã Pilato tãpia ini judeo xanĩfãfe shinãchakaito nõ anã xanĩfo itiromara ixõ, a ano Jesús iyoaifono.

Hch. 7:9

“Jacobo ãfe fakefo nõko xinifo ipaonifo, nãfãfe ãto exto José õikaspapaonifo. Nãskakaxõ Egipto anoax foaifono yora fetsafo ato inãnifo aõxõ kori fixikakĩ nãfãfe Egipto ari iyotanõfo. Askafafiaifono Epa Niospa José potanima.

Romanos 1:29

Chaka fisti feyafakanax chaka shinãkani. Chaka faatanãi xatekanima. Feronãfakefãfe ãto ãfima fichipaikĩ chotamisfo. Kẽrofãferi ãto fenema fichipaikĩ chotamamisfo. Nãskaxõ afara shara ãa atonã fisti fipaikani. Fetsafo chakafakĩ xatekanima. Fetsafo xĩtipaimisfo. Yora retemitsamis ita, setemitsamis ita, feratenã faatanãmisfo. Õitifishkikĩ feyafamisfo. Ato pãrafofãsafamisfo. Ato noikaspamisfãfe fetsafonã fĩapaikakĩ. Ato noikaspamisfo. Chanĩmisfo fetsafo pãramisfo. Nios noikaspayanã tsoa noimisfoma. Ĩchamitsamisfo. Kakapaimisfo, ãa kakamepaimisfo. Afara fetsa chaka shinãi iskakani: “Afaa chaka fetsa ẽ afeska faimẽti,” ixõ shinãkani. Ãto apa yafi ãto afa nikakaspakani. Afara shara shinãkanima. A yoiai keskara amisfoma. Ãa chanĩmisfo. Tsoa noikanima. Õitifishkikax fetsaki raemisfoma.

Romanos 13:13

Isharakõikãfe penano nõ õisharatiro pakexikima. Nãskarifiakĩ Jesús Ifofaax nõ isharakõitiro afaa chakafatama. Akka fetsafãfe monokakĩ afara chakafaifo mẽra foyamakãfe. Chaka fetsa fetsatapafo ayamakãfe. Pãeyamakãfe. Askatari mãto ãfima chotayamakãfe. Kẽromãri mãto fenema chotamayamakãfe. Afara chaka fetsafo shinãyamakãfe. Feratenã faatanãyamakãfe. Fetsa xĩtipaimis iyamakãfe.

1 Corintios 3:3

Mãfi nã Niospa Yõshi Shara fe rafeama keskarafokĩ. Nãskaxõ fetsafo mã ato xĩtipai mã ato keskara ipaikĩ. Nãskax mã fochishpanã faatanãi mã ika. Nãskaxõ yõra shinãi keskara mã shinãi. Akka Niospa Yõshi Sharapa mato shinãmapaiyai keskara mã shinãima.

1 Corintios 4:18

Mẽ tãpia mã ranãrito shinãkĩ iskafai: “Pablo Timoteo nokoki nĩchi nokoki mesekĩ. Ãakai nokoki opaima. Akka nõ keyokõi tãpikõia. Nõ Pablo yopaima,” ixõ mã shinãi. Askai mã kakapaimis.

1 Corintios 4:6

Efe yora mĩshtichi, nãnori ẽ mato yoi mã isharanõ. Yõra kirika keneni keskara a Niospa yoiai nã fisti ẽ aki. Nã Apolosri Epa Niospa yoia keskara fisti aki. Nõ askafaito mã noko õixõ nõ akai keskara mãri akãfe. Nãskakẽ iskayamakãfe: “Nã noko yoimisto ãfe meka sharafinakõia, fetsafo keskarama. Akka nõ fetsafo nikapaima,” ixõ anori shinãyamakãfe.

1 Corintios 5:2

Ooa. Nã feronãfãke mato mẽraxõ afara chakafai aõnoa rãfipaikanima, “Nõ sharakõifora,” ixõ mã yoimis kakapaiyanã. Akka, ¿afeskakĩ nã feronãfakeõnoa mã shinãchakaimamẽ? Akka nãskaxõ ãfe chaka xateyamax anã mato fe ichanãito potakãfe anã mato fe ichanãyamanõ.

1 Corintios 8:1

Mã ea yõkaito ẽ mato yoisharatiro. Yora fetsafãfe afara onifakaxõ, “Na nõko niosra,” ikaxõ nami inãmisfo. Askata anã nã nami fikaxõ ato inãmisfo yorafãfe pinõfo. Akka yorafãfe ãto niosnã nõ nami pia, shara. Nõ piamari, shara. Nãskaxõ nõ afaa chakafaima. Akka mã yoikĩ iskafamis: “Mã nõ tãpia nõ ãto niosnã nami pia, shara. Akka nõ piamari, shara,” mãmãi shinãkĩ Nioskõimara ixõ. Akka mã fatora fetsafãfe shinãkĩ iskafamis: “Ẽfi tãpikõiaki. Nã ẽ shinãi keskara ẽ mẽstekõi shinãi. Ẽ fetsafo keskarama. Ẽ apaiyai keskara ẽ atiro,” ixõ mã yoimis. Askara yoi kakapaimis mã itiro. Askara shinãkĩkai nõ fetsafo inimamatiroma. Askakimaroko nõ yorafo noixõ nõ ãto õiti fepeaxosharakõitiro Jesús Ifofasharanõfo. Nãskakẽ nõ ato inimamatiro.

2 Co. 12:20

Akka ẽ tãpiama, õitsai, ẽ ari nokoxõ õia a ẽ yoiai keskai mã isharayamakẽ ẽ mato fichikai. Askatari ẽ matoki nokoaino õitsai, mã ekeki inimaima rakikĩa nã mã shinãi keskai. Akka ẽ matoki nokoxõ õipai mã mã chaka xatexõ mã Jesús Ifofasharaino. Akka ẽ matoki nokoxõ õia mã chaka xateyamano ẽ shinãmitsatiro. Mã fochishpanã faatanãta, fẽtsa fiaiti mãrifi mã fipaita, fetsa mekafata, õitifishkita, mares fisti mã fipaita, mã chanĩta, fetsafo mekafata, nõ tsoa keskarama ita, isharayamata, mã askaito ẽ mato õipaima.

2 Co. 6:6

Noko askafafiaifono afaa chakafatama nõko õiti mẽraxõ nõ afaa chaka shinãima. Nõ Cristo fe rafeaito nã noko yoimis keskara mã nõ tãpia. Noko chakafafiaifono nõ atoki õitifishkitama. Fena fenakima nõ tenekõimis. Nãskax fetsafo fe rafepaikĩ nõ ato sharafa fafafãimis Niospa Yõshi Sharaõxõ nõ ato askafamis ato pãrakĩma nõ ato noikõimis. Nõ askakĩ keyokõi nõ mato õimatiro nõmãi Niospa yonomatixõ. Satanás noko afara chakafamapaifiaito Niospa Yõshi Sharapa nã Nios keskara shara noko imaino ãfe Yõshi Sharaõxõ nõ afara chaka potatiro.

Gálatas 5:26

Nãskakẽ Niospa Yõshi Shara fe nõ rafeax kakapaimis nõ itiroma, fetsafãfe nokoõnoa yoisharanõfora ixõ ẽ mato finõkõiara iyamakãfe. Mã askakĩ fetsafo mã shinãchakamatiroki. Mã askara chakafo shinãkĩ mã shinãsharatiroma, askara chakakõiki.

Efesios 4:2

Nãskax, “Ẽ finakõia,” iyamakãfe, anori shinãtama. Yora fetsafo noisharakãfe ato shinãkĩ. A fẽtsa tãpisharamato mato afeskarafaito, shinãchakatama ato noisharakãfe, õitifishkitama, isharakõita.

Efesios 4:32

Askatamaroko ato fe raenã faatanãsharakõikãfe, a mato Niospa aka keskafakĩri Jesúsxõ ato raefakãfe.

Filipenses 1:15

Chanĩma, fetsafãfe Cristoõnoa meka shara yoifikakĩ ea finõpaikani, ea shinãchakamapaikakĩ. Akka fetsafãfe ea noikakĩ eõnoa shinãmisfo iskafakakĩ: “Pablo karaxa mẽra ikimafiafono Epa Niospa meka yoiaito tsõa xatematiroma Jesúsnoa ato yoiaito nikakõinõfo,” ixõ Jesúsnoa yoisharatirofo. Akka fetsafãfe Cristoõnoa yoikakĩ: “Noko nikakõinõfora,” ixõ ato yoipaikani ea finõpaikakĩ ẽ karaxa mẽra ikano. Akka fetsafãfe ato noikakĩ ato yoisharamisfo, mãmãi tãpikaxõ nonoxõ ẽ Cristoõnoa meka shara yoimiskẽ afe nĩpaxanõfo.

Colosenses 1:11

Akka Epa Niospa afama mĩshtifo shara fatiroki, ãfe kerex shara mitsisipakõi mato inãtiro afara afeskarafiaino aõxõ mã tenekõinõ. Nãskafikĩ mã tenetiro fena fenakĩma inimasharakõikai.

Colosenses 2:18

Õisharakãfe fetsafãfe mato pãrapaikani kiki iskafakakĩ: “Nõ afaa tãpiama. Ãjirifo nõ kĩfitiro,” ixõ mato pãrapaikani. Afãfe afaa õiyamafikatsaxakakĩ afama mĩshtifo yoipaimisfo. Ãto shinãmã shinãkata kakapaikõimisfo, Niospa shinãi keskarakai shinãmisfoma.

Colosenses 3:12

Niospa mato noikĩ mato katoni afe yorafo mã inõ. Aa keskara shara mato imaxiki. Nãskakẽ fetsafo noikĩ ato sharafa fafafãikãfe. Nãskakẽ fetsafo shinãki nã mã apaiyai keskara fisti shinãtama, fetsafãfe apaiyaifo keskarari shinãkãfe, oi tsii faxõ ato yoifafãikãfe.

1 Tesalonicenses 5:14

Askatari efe yora mĩshtichi, nõ mato yoisharamis iskafakĩ: A xanimisfori ato yoisharakãfe yonosharanõfo, askatari a shinãmitsaifo ato inimamakãfe. Nãskaxõ a Nios Ifofasharafoma ato yoisharakãfe chanĩmara fakõinõfo. Nãskaxõ ato noiyanã fenãmãshta mã ato yoisharatiro.

2 Timoteo 2:25

Fẽtsa Niospa mekakõi nikakaspakĩ meka anorima fisti shinãito, fenãmãshta ato tãpimasharafe. Mĩ ato askafaino ãto chaka xatetirofo Niospa mefeta akaino. Askaxõ Jesús chanĩmara fakõinõfo.

2 Timoteo 3:10

Timoteo, mã mĩ ea õisharakõimiskĩ ẽ ato afo tãpimanaito. Mã mĩ ea õimiskĩ afeskax ẽ isharaimãkai, Nios fisti inimamapaifãi, Jesús noikĩ chanĩmara fafãi, afarafo chakafo nokoaito ẽ tenefãi, ẽ yorafo noifãi,

2 Timoteo 4:2

Niospa meka fena fenakima ato yoife fenãmãshta shara. A nikapaiyaifo askatari a nikakaspaifori ato yoisharafe, mĩ ato yoisharaino ãto chaka xatenõfo Jesús Ifofasharax isharanõfo. Shinãsharata, Niospa meka mẽstekõi yoife.

Tit. 3:3

Nãskakẽ nõri afaa shinãyopaonima. Nõko õiti mẽra nõ afaa pishta shinãtiroma nõ ipaoni. Nõ nikayospakõi nõ ipaoni. Nõ chaka shinãpaoni. A nã nõ ipaiyai keskara nõ ipaoni. “E shara shinãi, nã ẽ ipaiyai keskara ẽ iki,” ikax nõa nõ pãramepaoni. Nõ yora fetsa ãfe afara fichipaipaoni. Nõ ato mekafakĩ chakafapaoni. Chakakõi nõ ipaoni, afaa pishta nõ mekeaima. Nãskax nõ noikaspa faatanãpaonixakikai nõ xatemisma.

Stg. 4:5

Niospa ãfe Yõshi Shara nõ mẽra naneano nõ afe rafepakenaka. Akka shinãkapo. Nõ afara fetsa noikõikĩ nõ Nios noisharaimano ãfe Yõshi Shara shinãmitsatiro. Akka Niospa meka kirikaki kenenifo iskafakakĩ: “Epa Niospa ãfe Yõshi Shara nõ mẽra naneni. Aõxõ noko noikĩ finakõi. Akka nõ Epa Nios noisharayamakĩ nõ afara fetsa noikõiaino ãfe Yõshi Shara shinãmitsatiro,” ixõ kirikaki kenenifo. Nãskakẽ kaxpa noko kenexonifoma.

1 Pedro 2:1

Nãskakẽ nã mã afara chakafamisfo xatekãfe. A mã ato pãramisfo, askatari a mã ato feparamisfo: “Noko sharara fanõfora,” ixõ nãfori xatekãfe. Nãskatari a fẽtsa fiai tii fipai fekaxtemis iyamakãfe. Askatari fetsafo ato chakafapai chanĩmis iyamakãfe.

1 Pedro 3:8

Nãskakẽ isharakõixõ keyokõichi nãnori fisti shinãsharakãfe. Oa mato fe yora mã noiai keskafakĩ ato fe nõinã faatanãsharakõikãfe. Ato shinãkĩ ato axosharafafãikãfe. Askatari, “Nã yora afaa tãpiamafo ẽ finakõia,” ikaifo keskai askayamakãfe.

1 Pedro 4:8

Nãskax noinã faatanãkõikãfe nõ noinãkõia sharaki. Fetsa noikõixõ nõ rae fatiro, a noko chakafai keskara anã shinãnõma.

2 Pe. 1:7

Askatari keyokõi yorafo sharafata oitsifaxõ ato noifafãikãfe.

1 Juan 4:11

Akka efe yora mĩshtichi, Epa Niospa noko noikõi. Nãskakẽ nõa ranã nõri nõ noinãsharakõikãfe.