Mateo 6:31 - New Testament Psalms and Proverbs in Mixtec Magdalena Peñasco

³¹ Te chukan kúu ja má jin ko ndi ini ni te jin ko kuxii ini ni te jin ka'an ni: “¿Nawa jin kaa o? xi ¿nawa jin ko'o o? xi ¿nawa jin kondii jin konama o a?”

Mateo 6:31 ပူးပေါင်းရင်းမြစ်များ

Salmos 111:5

Te ñayii ka yu'u Su'si ma ja iya ndákan kuenda nuu o kúu ya, te ñatuu‑ka na ja u'vi ka sa'a i ma, chi ñukuun wa'a ya ndaka ja jin kaa jin ko'o i ma, vaa ni masu ndunaa ya ja ni skuiso ya nuu o ma.

Salmos 37:3

Va'a‑ka ja na kukanu ini ni Iya Tátnuni ma, te ko sa'a ni ja va'a ma, sukan‑va'a koo ni nuu ñu'ú taa Su'si ma. Te tnu'u ndaa tnu'u ndija ya ma, skaka ña'a i ichi va'a ma.

Salmos 55:22

Sonee ni ndaka tnundo'o tnuneni ni a nuu nda'a Iya Tátnuni ma, te maa ya chindee ña'a ja koo va'a ni nuu ya. Vaa ñayii sa'a ja va'a ja ndaa nuu ya ma chi ni masu kua'a kuiti ya tnu'u ja ko ndo'o ko neni i.

Mateo 15:33

Te tee ka ndikin ya ma, ni ka ndakone'e de: ―‍¿Naxe kuu jin ni'i o ja jin kaa ñayii a? Chi vaa in nuu masu nawa iyo kuiti kúu nuu ka iyo o a ―‍ka kuu de ka jiña'a de.

Mateo 4:4

Kovaa Jesús ma, ni ndakone'e ya: ―‍Tnu'u Su'si ma ká'an: “Masu maa in‑ni ja kaa ja ko'o o ma sa'a ja koteku o chi su'va ja kandija o ndaka tnu'u ká'an káchi Su'si ma” ―‍kúu ya jiña'a ya.

Mateo 6:25

’Chukan kúu ja ká'an sa: Máko jin ko ndi ini ni nawa jin kaa jin ko'o ni ja jin koteku ni, ni a nawa jin kondii jin konama ni. Ka jini maa ni ja Su'si ma ni sa'a ja ka teku ni a, te kuu sa'a ya ja jin ni'i ni ja jin kaa ni ma. Te ka jini maa ni ja Su'si ma, ni sa'a ya yikikuñu ni a, te kuu sa'a ya ja jin ni'i ni ja jin kondii jin konama ni.

Mateo 6:27

Te visi na jin ko ndi ini xeen ni, kovaa masu kuu jin sa'a maa ni ja jin kua'nu‑ka ni jaku.

Lucas 10:41

Te ni ndakone'e ya: ―‍Marta, Marta, ndí ini xeen ni ndaka tniñu sa'a ni a, te ndó'o néni ni.

Lucas 12:11

Ndijin ja ka ndikin ña'a ni maa sa a, nuna jin koo i jin xsia'a ña'a i ini veñu'u lilikin ma, xi nuu tee ka ja'nde tniñu ma, xi nuu tee ka netniñu ma, máko jin ko ndi ini ni nawa jin sa'a jin kuu ni, xi nawa jin ka'an jin kachi ni.

Lucas 12:22

Ni jinu, te jiña'a Jesús ma nuu tee ka ndikin ya ma: ―‍Sa'a‑ni ká'an sa: Máko jin ko ndi ini ni nawa jin kaa ni ja jin koteku ni, ni a nawa jin kondii jin konama ni.

Lucas 12:29

Te chukan kúu ja má jin ko ndi ini ni te jin ko kuxii ini ni ja ma jin ni'i ni nawa jin kaa ni nawa jin ko'o ni.

Filipenses 4:6

Masu nawa jin ko ndi ini ni, su'va jin kakan‑ta'vi xen‑xeen ni nuu Su'si ma nawa ka jiniñu'u ni ndaka jichi ka ndakuan‑ta'vi ni nuu ya ma.

1 Pedro 5:7

Ndaka ja ndí ini o ma, te sonee o nuu nda'a maa ya ma, vaa maa ya jito ña'a, te na'a ya nawa jiniñu'u o ma.