Efesios 4:29 - New Testament Psalms and Proverbs in Mixtec Magdalena Peñasco

²⁹ Ñatuu ni‑in tnu'u ndeva'a ko kee yu'u ni a, ja kuña'a ni nuu tna'a ni ma, su'va tnu'u ká'an ni ma ko kuu tnu'u kuatniñu, sukan‑va'a jin chindee tna'a ni ja jin koo va'a‑ka ni nuu Su'si ma. Te ja sukan jin sa'a ni ma, te vivii jin kuatnu'u ini ña'a ñayii ka niniso'o ña'a ma.

Efesios 4:29 ပူးပေါင်းရင်းမြစ်များ

Salmos 45:2

Vaa maa ni chi vivii kaa ni, iyo ni ne'un ndaka sa'ya tata ñayii ma, te tnu'u ká'an káchi ni a ndimaa tnu'u vii tnu'u va'a kúu, te chukan kúu ja Su'si ma chi taa ya ja vii ja va'a ja kuta'vi ni ni‑kani ni‑jika.

Salmos 5:9

Vaa tnu'u ka ka'an i ma, másu inundija i, vaa onde ini anua i ma nanimaa ja u'vi ka ñu'u, vaa sukan kaa nuu yinee ndiyi ma nuna ndanune ma te kuni o ja nanimaa ja kini ja tne'e ja ni tivi ñu'u ma, sukan ka kuu tnu'u ka ka'an ñayii ka sa'a ja u'vi ma.

Salmos 52:2

Te ndijin chi nanimaa tnu'u ndeva'a ká'an ni, te nanimaa tnu'u xnda'vi tna'a ká'an ni. Te kuenda tnu'u ja in yuchi xen‑xeen ka kuu tnu'u ká'an ni a.

Salmos 71:24

Te nii nduu ma ndaka'an ndakachi sa tnu'u ndaa tnu'u ndija ni a, vaa ni sa'a ni ja ni ka ndatna'a maa ñayii ñatuu ka kunimani nuu sa ma ja kan‑nuu, vaa ni ka jini i ja masu na kuechi sa ma.

Proverbios 12:13

Ñayii sa'a ja u'vi ma chi maa ja xnda'vi i ñayii ma nukun‑tuu maa i te ndando'o ndaneni i, kovaa ñayii ká'an ndimaa ja va'a ja ndaa ma chi vivii yanduu yandoso i nuu ndaka tnundo'o kenda ma.

Proverbios 15:23

Vivii kúu ora kénda ñayii ká'an naxe sa'a o ora ñatuu ní'i ini o naxe ko kuu ma, kovaa vii xeen‑ka kúu ja maa ora jiniñu'u o ma te kénda kunu tnu'u jiniñu'u o ma.

Proverbios 15:7

Ñayii ndichi ma chi ndimaa tnu'u ndichi ka ka'an i te ka sa'a i ja kua'a‑ka ñayii ka jaku'ni ini, kovaa ñayii so'o xeen ka ndaa ma chi ndimaa ja u'vi ka ñu'u ini i ja jin sa'a i ma.

Proverbios 16:21

Ñayii ndichi ma chi ñayii jáku'ni ini kúu i, vaa tnu'u vii tnu'u va'a ká'an i ma, te sa'a i ja ka ndundichi‑ka ñayii ka niniso'o ja ká'an i ma.

Mateo 5:16

Sukan kúu ñu'u ndú'va ma, sukan jin ko kuu ni nuu ñayii ma, sukan‑va'a ja jin kuni i ja va'a ka sa'a ni ma, te jin ndasa'a i kuenda ja kuechi ja ka iyo ni ji'in Su'si ma kúu ja ka sa'a ni sukan, te jin ndachiñu'u i Yuva o Su'si ma iya iyo andivi ma.

Lucas 4:22

Ndaka ñayii ma ka ka'an ja va'a ja kuu Jesús ma, te ni ka sa'vi‑nka ini i ndaka ja vii sa'a ya ma, te ka jikan‑tnu'u tna'a i: ―‍¿Masu tee ya'a kúu sa'ya José ma? ―‍ka kuu i ka ka'an i.

Juan 1:37

Nduu tee ka ndikin Juan ma, ni ka jiniso'o de, te ni ka ndikin de Jesús ma.

Romanos 14:19

Te chukan kúu ja jín ko sa'a o tna'a ja sa'a ja jin koo mani o ma, te sukan, te jín chindee o tna'a o ma, te jín jaku'ni‑ka ini ndaka o, te jín koo va'a‑ka o nuu Su'si ma.

Romanos 15:2

Su'va ndi‑in ndi‑in o sa'a ja va'a ja kuu tna'a o ma tna'a ja chindee ña'a ja jin koo va'a i nuu Su'si ma.

1 Corintios 14:19

Kovaa nuu ka ndatna'a o ja ni ka nduu o sa'ya Su'si o a chi va'a‑ka ja uni kuun u'un‑ni tnu'u ja jin jaku'ni ini ñayii ma ka'an sa ja káxtnu'u sa nuu i ma, sana ja ka'an sa uxi mil tnu'u sa'an ja masu jin jaku'ni ini i ma.

Efesios 4:12

sukan‑va'a ñayii ya'a, jin skua'a i ñayii ni ka nduu sa'ya maa ya ma ja ñatuu na ja u'vi‑ka ka sa'a i ma, sukan‑va'a jin koo tu'va i ja jin kunukuechi i nuu Su'si ma, sukan‑va'a jin ko kuu i ñayii jin koo va'a nuu ya ma, te kuenda tnu'u ja nda'a Cristo ma xi ja'a ya ma ka kuu o,

Efesios 4:16

Te jín ndasa'a o kuenda sukan vivii ka chindee tna'a nda'a o a ja'a o a, ni‑ka'nu yikikuñu o a, sana kuu nawa sa'a o ma, te sukan jin ko kuu o, te vivii jin ketna'a ini o, te jin koo tutu ndaka o, te jin chindee tna'a ndaka o. Nde a kúu ja ni taa Su'si ma ja jin sa'a o ma, te jín sa'a o, te jín chindee tna'a o, te jin koo va'a jin koo vii ndaka o, vaa ka kutoo tna'a o a.

Colosenses 4:6

Ndaka ja jin ka'an ni ma, te jin ka'an ni tnu'u vii tnu'u va'a tnu'u kuatniñu, sukan‑va'a nawa jin ko kakan‑tnu'u ña'a ñayii ma, te jin ni'i ini ni naxe jin ndakone'e ni nuu ndi‑in ndi‑in i ma.

1 Tesalonicenses 5:11

Chukan kúu ja jin ndaka'an‑so'o nuu tna'a ni, te jin chindee tna'a ni, sukan‑va'a jin koo va'a ndi‑in ndi‑in ni nuu Su'si o a, sukan jâ ka yikuu ni ka sa'a ni a.

1 Pedro 2:12

Jin ko kuu va'a jin ko kuu vii ni, ja ka iyo ni ne'un ñayii ñatuu ka kandija Su'si o a. Te visi na jin xtekuechi ña'a i ja ka sa'a ni ja u'vi, kovaa nuna jin kuni i ja va'a ka sa'a ni ma, te jin ndachiñu'u i Su'si ma kivi kii ya ja jin ndani'i ta'vi o ma.

1 Pedro 3:1

Ndijin ja ka kuu ni ña'a ma, jin kandija ni ja ka ka'an yii ni ma, sukan‑va'a yii ni ma, ja ñatuu ka kandija de Su'si ma, te ja jin konde'ya de sukan ka sa'a ka kuu ni ma, te jin kandija de Su'si ma, visi ñatuu ka kaxtnu'u ni tnu'u ya ma nuu de.

2 Pedro 2:18

Vaa vivii ka ka'an i ora ka kaxtnu'u i ma, kovaa masu nde jiniñu'u ja ka ka'an i ma, vaa ka ka'an i ja kuu jin sa'a ñayii ma sukan ka kuni maa yikikuñu i ma, te ñayii yika ni ka nde koo nuu ja u'vi ma, te ka sa'a i ja ka ndakokuiñi tuku ñayii nda'vi yukan in‑ka tuku jichi nuu ja u'vi ma.